Pornografi—Danzere oubyen non
LO KOUVERTIR
Pornografi—Danzere oubyen non
Sa lemonn ozordi pe ganny anvair avek pornografi. * Nou vwar li dan bann piblisite, lanmod, film, lanmizik ek bann magazin, ensi ki lo televizyon, zwe video, smartphones, bann lekipman elektronik, lo bann sit Internet, e la konmela ou kapab anvoy portre avek kanmarad lo Internet. I paret ki pornografi pe vin tre popiler dan nou sosyete. Ozordi, plis dimoun dan plis landrwa pe get pornografi plis ki oparavan dan listwar imen.—Vwar bwat “Bann fe lo pornografi.”
Lafason ki dimoun i vwar pornografi pe osi sanze. Profeser Gail Dines i ekrir: “Bann portre pornografik ki ti ganny konsidere tre sokan dan lepase pe ganny vwar konman normal ozordi.”
Ki mannyer ou vwar sa bann sanzman konsernan pornografi? Eski pornografi i en pastan ki napa nanryen mal avek, en pwazon danzere, oubyen i enn ant sa de? Zezi ti dir: “En bon pye fri i raport bon fri e en move pye fri i raport move fri.” (Matye 7:17) Ki kalite fri pornografi i raporte? Pour konn larepons, annou konsider detrwa kestyon senp lo pornografi.
Ki mannyer pornografi i afekte bann dimoun?
SA KI BANN EKSPER I DIR: Pornografi i tre adiktif, e serten serser ek terapis i dir ki i parey crack cocain.
Brian, * ki ti adikt avek pornografi lo Internet i dir: “Napa nanryen ki ti pou kapab anpes mwan. I ti konmsi mon ti dan en rev. Mon ti tranble e santi douler dan mon latet. Mon ti fer en kantite zefor pour arete, me mon ti reste adikt pour plizyer lannen.”
Bann dimoun ki kontan pornografi i souvandfwa kasyet zot move labitid. Zot koz manti e fer keksoz ansousekre. Alor, i pa drol ki laplipar sa bann dimoun i izol zot lekor, santi zot onte, annan lenkyetid, tonm dan depresyon, e ankoler. Dan serten ka, i annan ki menm anvi komet swisid. Serge ki ti download pornografi lo son mobayl preski tou le zour i dir: “Mon ti santi ki mon pa vo nanryen, koupab, tousel e ki mon ti’n tonm dan en pyez. Mon ti tro anbarase e per pour rod led.”
Menm si ou’n vin an kontak avek pornografi par aksidan oubyen pour en pti moman, sa osi i annan move konsekans. Ler i ti pe donn temwannyaz devan komite Sena Leta-z-ini, Dokter Judith Reisman, en serser renonmen lo pornografi ti dir: “Bann zimaz pornografik i annan en lefe dirab lo nou laservel ki nou pa kapab kontrole, dan en ptigin letan zot kapab ganny grave dan nou memwar e zot difisil pour efase.” Susan, en fiy 19 an ki ti ganny ekspoze avek pornografi lo Internet i rakonte: “Sa bann zimaz in ganny grave dan mon lespri. Zot zis aparet san ekspekte. Mon santi konmsi mon pa pou zanmen kapab efas zot.”
SA KI ENPORTAN KONNEN: Pornografi i fer ou vin son lesklav e i kapab afekte son viktim en kantite.—2 Pyer 2:19.
Ki mannyer pornografi i afekte bann fanmir?
SA KI BANN EKSPER I DIR: “Bann koup ek fanmir i kase akoz pornografi.”—The Porn Trap, par Wendy ek Larry Maltz.
Pornografi i andomaz maryaz ek fanmir par
▪ Diminyen konfyans, lentimite, ek lanmour dan maryaz.—Proverb 2:12-17.
▪ Fer dimoun vin egois, reste a lekar avek lezot, e pa satisfe avek zot konzwen.—Efezyen 5:28, 29.
▪ Fer dimoun mazin bann aksyon seksyel ki pa normal pour eksit zot dezir seksyel.—2 Pyer 2:14.
▪ Fer bann dimoun ki get pornografi enpoz bann pratik seksyel ki pa normal lo zot konzwen.—Efezyen 5:3, 4.
▪ Fer en dimoun vin enfidel e komet adilter.—Matye 5:28.
Labib i fer resorti ki bann dimoun marye pa devret “trai” zot konzwen. (Malaki 2:16) Enfidelite i en form traizon ki kapab konpletman detri en maryaz, i anmenn divors ek separasyon. Ler sa i arive, se bann zanfan ki soufer.
Pornografi i kapab direkteman afekte en zanfan. Brian ki nou’n mansyonnen pli boner i eksplike: “Kan mon ti annan apepre di-z-an, mon ti bat avek bann magazin pornografik mon papa pandan ki mon ti pe zwe kouk kasyet. Mon ti konmans get sa bann portre an sekre, san vreman konpran akoz mon ti pe ganny atire par zot. Sa ti konmans fer mwan annan en move labitid ki ti dire ziska mon ti vin en adilt.” Bann letid i montre ki pornografi i kapab pous bann adolesan pour konmans fer sèks byen boner e pour annan plizyer partner, fer sèks dan bann fason vyolan, e fer zot vin bann dimoun ki pa stab emosyonnelman e psikolozikman.
SA KI ENPORTAN KONNEN: Pornografi i kas bann bon relasyon e i fer nou ganny leker fermal ek douler.—Proverb 6:27.
Ki Labib i dir lo pornografi?
PAROL BONDYE I DIR: “Alor, met an-mor bann dezir materyel ki dan zot: limoralite seksyel, lenpirte, pasyon, move dezir, move dezir pour akapar keksoz dimoun, ki en form ladorasyon zidol.”—Kolosyen 3:5.
I kler ki Zeova * i ay pornografi. Sa pa vedir ki i konpletman kont sèks. I ti kre nou avek sa dezir pour annan relasyon seksyel e i ti anvi ki bann koup marye i fer plezir kanmarad, vin pros avek kanmarad emosyonnelman, e servi sa don pour fer zanfan.—Zak 1:17.
Alor, akoz nou asire ki Zeova i ay pornografi? Annou vwar detrwa rezon.
▪ I konnen ki pornografi i gat lavi bokou dimoun.—Efezyen 4:17-19.
▪ I kontan nou e i anvi protez nou kont danze.—Izai 48:17, 18.
▪ Zeova i anvi protez bann fanmir ek maryaz.—Matye 19:4-6.
▪ I anvi ki nou reste moralman pir e ki nou respe drwa lezot.—1 Tesalonisyen 4:3-6.
▪ I anvi ki nou servi nou lorgann reprodiktif dan en fason onorab.—Ebre 13:4.
▪ Zeova i konnen ki pornografi i fer dimoun devlop en pwennvi ki move, egois e ki reflekte fason panse bann move lanz lo sèks.—Zenez 6:2; Zid 6, 7.
SA KI ENPORTAN KONNEN: Pornografi i gat lanmitye ki en dimoun i annan avek Bondye.—Romen 1:24.
Me, Zeova, i annan konpasyon pour bann ki anvi sorti dan grif pornografi. Labib i dir: “Zeova i annan mizerikord ek konpasyon, pa ankoler vitman, e annan en kantite labonte leker. Parski li i konn byen avek ki nou’n ganny formen, i mazinen ki nou lapousyer.” (Psonm 103:8, 14) I envit tou bann ki annan limilite pour apros avek li pour “ganny pardonnen e trouv lagras pour ed [zot] dan moman neseser.”—Ebre 4:16; vwar bwat “Ki mannyer pour sorti dan pyez pornografi.”
I annan en kantite dimoun ki’n aksepte led Bondye. Eski son led i efikas? Gete ki Labib i dir konsernan bann ki’n debaras zot avek bann move labitid: “Zot in ganny lave, zot in ganny pirifye, zot in ganny zistifye o non Senyer Zezi-Kri e dan Lespri nou Bondye.” (1 Korentyen 6:11) Parey zapot Pol, sa bann tel dimoun i kapab dir: “Mon kapab fer fas avek tou par Kris ki donn mwan lafors.”—Filipyen 4:13.
Susan ki ti reisi aret get pornografi i dir: “Zis Zeova tousel ki kapab ed ou sorti anba lenfliyans pornografi. Si ou demann li son led ek gidans, ou pou kapab reganny son laprouvasyon. I pa pou zanmen dezapwent ou.”
[Not anba lo paz]
^ par. 3 Sa term “pornografi” i refer avek bann lenformasyon lo sèks byen detaye ki eksit dezir seksyel sa dimoun ki pe gete, lir, oubyen ekout sa bann lenformasyon. I enkli bann portre, liv ek magazin, lanmizik ek lezot keksoz ki’n ganny rikorde.
^ par. 8 Bann non dan sa lartik in ganny sanze.
^ par. 25 Zeova i non Bondye dan Labib.
[Portre lo paz 2, 3]
[Portre lo paz 4, 5]
[Bwat lo paz 5]
BANN FE LO PORNOGRAFI
SAK SEGONN: Apepre 30,000 dimoun i get pornografi lo Internet.
SAK MINIT: Bann dimoun ki servi Internet i anvoy plis ki 1.7 MILYON imel pornografik.
SAK ERDTAN: Apepre DE film pornografi i ganny lanse Leta-z-ini.
SAK ZOUR: An mwayenn i annan plis ki DE MILYON film pornografi ki ganny lwe zis Leta-z-ini.
SAK MWAN: Apepre 9 lo 10 zenn onm e 3 lo 10 zenn fiy Leta-z-ini i get pornografi.
SAK LANNEN: Lendistri pornografi i fer apepre 100 BILYON (Dolar Ameriken).
[Bwat lo paz 7]
Ki mannyer pour sorti dan pyez pornografi
Eski ou konn en dimoun ki pe lite pour sorti dan pyez pornografi? Annou vwar bann pa ki bokou in pran pour sorti ladan.
1. Priy Bondye.
“Sa pa pli enportan pour sorti dan pyez pornografi se pour demann Zeova led dan lapriyer.”—Franz.
Zeova i kapab donn sa dimoun lespri sen ek lafors pour ki i annan sa “lavolonte e rann [li] kapab akonpli tou dapre son bon plan.” (Filipyen 2:13) Si sa dimoun i les lespri sen gid li, i pou kapab ganny laviktwar lo son “bann [move] pasyon ek bann dezir.”—Galat 5:16, 24.
2. Rod led avek lezot.
“En dimoun ki adikt avek pornografi i telman sekre e onte ki i pa santi li alez pour demann led. I mazinen i kapab sorti dan sa sityasyon par li menm. Me sa pa vre ditou. I kapab sorti dan sa sityasyon selman avek led lezot. Alor mon ti anval mon lorgey, e mon ti koz avek mon madanm. Mon ti osi rod led avek en zanmi ki mon annan konfyans dan li. I ti sa keksoz pli difisil ki mon’n deza fer, me mon ti ganny sa led ki mon ti bezwen.”—Yoshi.
Ou bezwen kouraz ek determinasyon pour fer konfyans lezot. Me sa pa i enportan pour ou kapab ganny laviktwar, aret sa move tandans e rekonmans annan en relasyon avek bann ki ou kontan. Susan, ki nou ti mansyonnen pli boner, i dir: “Apre, mon ti santi mwan vreman soulaze. I ti bann moman difisil, me mon ti santi mon ti’n ganny laprouvasyon Bondye e mon ti anpe.”—Zak 5:16.
3. Idantifye e evit bann keksoz ki kapab donn ou lanvi get pornografi.
Ki sityasyon, panse, oubyen lemosyon ki kapab fer ou annan sa move dezir? Eski se get bann diferan sit lo Internet san en bi presi? Get bann progranm televizyon ki pas lo tar? Lir bann magazin? Al lo lans? Lafen, lakoler, ouswa akoz ou tousel oubyen fatige? Sven i dir: “Idantifye ou bann pwen feb e evit zot.” Zezi ti dir: “Si ou lizye drwat i fer ou fer pese, aras li e zet li.”—Matye 5:29.
Franz i dir: “Ler mon ganny tante pour get en madanm avek en move dezir, deswit mon priy Zeova e fors mon lizye pour get en lot bor.” Zob, en zonm fidel dan Labib ti dir: “Mon’n fer en promes pour mwan pa zanmen get en fiy avek move dezir.”—Zob 31:1, Today’s English Version.
4. Ranforsi ou spirityalite.
Franz i azoute: “Ranpli ou lespri avek bann panse ankourazan e ou lavi avek bann aktivite spirityel.”
Labib i dir: “Atas zot avek tou sa ki vre, tou sa ki onorab, sa ki zis, sa ki pir, sa ki bon, sa ki agreab, sa ki ekselan, tou sa ki merit felisitasyon; [kontinyen] mazin tou sa bann keksoz. . . . E Bondye, ki donn nou son lape i ava avek zot.”—Filipyen 4:8, 9.
[Portre]
1
[Portre]
2
[Portre]
3
[Portre]
4
