Byento soufrans pou fini!

Mazinen ki ou pe viv dan en lemonn kot napa soufrans, en lemonn kot napa krim, lager, maladi ek dezas natirel. Mazinen ki ou leve tou le bomaten san okenn diskriminasyon, labi pouvwar ek problenm ekonomik. Eski ou krwar ki sa pa pou zanmen arive? I vre, napa en imen ouswa lorganizasyon imen ki kapab fer tou sa la posib. Me, Bondye in promet ki i pou elimin tou lakoz soufrans, enkli sa bann ki nou’n diskite dan lartik avan. Get sa bann promes dan Parol Bondye.

▪ DOMINASYON EN BON GOUVERNMAN

“Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour en letan endefini.”​—Danyel 2:44.

Rwayonm Bondye i en gouvernman dan lesyel. Zezi Kri, ki Dirizan dan sa Rwayonm, pou ranplas tou bann dirizan imen e fer sir ki lavolonte Bondye i ganny fer lo later, parey dan lesyel. (Matye 6:9, 10) Sa gouvernman pa pou ganny ranplase avek okenn gouvernman imen akoz i “Rwayonm eternel nou Senyer e Sover Zezi-Kri.” Nou kapab asire ki i pou annan lape anba sa dominasyon.​—2 Pyer 1:11.

▪ FO LARELIZYON POU NEPLI

“Satan limenm i degiz konman lanz lalimyer. Alor i pa etonan nonpli ki son bann serviter osi i degiz konman serviter lazistis. Zot lafen pou koresponn avek zot travay.”​—2 Korentyen 11:14, 15.

Fo larelizyon pou ganny devwale konman en travay Dyab e i pou ganny eliminen lo later. I pou nepli annan diskriminasyon relizye ek versman disan akoz larelizyon. Tou bann ki kontan sa “Bondye vivan e vre” pou ador dan “en sel lafwa” e “an-espri e an verite.” Pa i pou vreman annan lape ek linite!​—1 Tesalonisyen 1:9; Efezyen 4:5; Zan 4:23.

▪ IMEN POU NEPLI ENPARFE

“E mon ti tann en lavwa for sorti kot tronn kriye: ‘La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.’”​—Revelasyon 21:3, 4.

 Zeova pou fer sa posib atraver son Garson Zezi ki ti mor pour limanite. (Zan 3:16) Bann imen pou vin parfe anba dominasyon Zezi. I pou nepli annan okenn soufrans akoz Bondye pou avek zot, e i pou “eswiy tou larm dan zot lizye.” Lenperfeksyon imen ek soufrans pou en keksoz lepase byento akoz “bann dimoun drwat pou posed later e zot pou reste lo la pour touzour.”​—Psonm 37:29.

▪ BANN DEMON POU DISPARET

“[Zezi Kri] ti sezi sa dragon, sa serpan lantikite, setadir, dyab ou satan, e ansenn li pour 1000 an. Lanz ti zet li dan labim, i ti fermen e sel li pour ki i a nepli kapab tronp bann nasyon.”​—Revelasyon 20:2, 3.

Tou move lenfliyans pou disparet kan Satan ek son bann demon pou ganny ansennen e zet dan “labim,” setadir, dan en leta kot zot pou inaktif. Zot pou nepli annan okenn lenfliyans lo bann zafer imen. Eski pa i pou en soulazman pour ganny libere avek lenfliyans Satan ek bann demon?

▪ “BANN DERNYEN ZOUR” POU TERMINEN

“Bann dernyen zour” pou termin avek sa ki Zezi ti apel “gran ladetres.” I ti dir: “Sa pou en lepok gran soufrans, oubyen [“gran ladetres,” NW] pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.”​—Matye 24:21.

Sa gran ladetres pou enn terib dan sa sans ki i pou napa okenn maler parey ki pou ariv ankor. I pou ariv lo son pik ler “gran zour Bondye Toupisan pou arive,” sa zour ki ganny apele “Armagedon” dan Labib.​—Revelasyon 16:14, 16.

Dimoun partou kote ki kontan sa ki byen pe esper avek enpasyans lafen sa move lemonn. Get sa detrwa benediksyon ki zot pou gannyen anba dominasyon Rwayonm Bondye.

BONDYE POU FER PLIS KI SA!

“En gran lafoul” pou sirviv e viv dan nouvo lemonn: Parol Bondye i dir ki “en gran lafoul” dimoun “[pou’n] pas par en [“gran ladetres,” NW]” e pou sirviv e viv dan nouvo lemonn Bondye kot pou annan lazistis. (Revelasyon 7:9, 10, 14; 2 Pyer 3:13) Se gras a Zezi Kri “Lanyo Bondye ki efas pese lemonn” ki zot pou ganny delivre.​—Zan 1:29.

Byenfe atraver lansennyman sorti kot Bondye: Dan nouvo lemonn, “later pou vreman ranpli avek konnesans Zeova.” (Izai 11:9) Sa ledikasyon sorti kot Bondye pou enplik bann lenstriksyon lo konman pour viv anpe avek tou dimoun e respekte lanvironnman. Bondye i promet: “Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe fer ou mars dan sa semen ki ou devret marse.”​—Izai 48:17.

Bann dimoun mor pou resisite: Ler i ti lo later, Zezi ti resisit son zanmi Lazar ki ti’n mor. (Zan 11:1, 5, 38-44) Dan sa fason, i ti montre sa ki i ti pou fer lo en pli gran lanpler pli tar kan i ti pou dirize konman Lerwa dan Rwayonm Bondye.​—Zan 5:28, 29.

I pou annan lape ek ladrwatir pour touzour: Kan Kris pou dirize, i pou nepli annan lenzistis. Ki mannyer nou konn sa? Parski Zezi i kapab lir dan leker e i pou servi sa abilite pour li ziz bann bon e bann move dimoun. Sa bann ki pa sanz zot move fason pa pou viv dan nouvo lemonn.​—Psonm 37:9, 10; Izai 11:3, 4; 65:20; Matye 9:4.

Nou’n vwar zis detrwa parmi sa plizyer profesi ki dekrir bann moman merveye dan lavenir. Kan Rwayonm Bondye pou diriz lo later, i pou annan “labondans lape” pour touzour. (Psonm 37:11, 29) Lakoz tou douler ek soufrans ki pe ravaz later pou’n ganny eliminen. Bondye li menm in asir nou: “‘Lala mon refer tou keksoz a-nef.’ . . . ‘Ekri, sa bann parol i serten e i vre.’”​—Revelasyon 21:5.

[Portre lo paz 6]