Lavi apre divors

“Mon ti santi konmsi mon ti’n sorti anler e tonm anba. Ou pe byen viv ou lavi e en sel kou ou napa nanryen.”​—MARK, * divorse depi enn an.

“Mon msye ti tronp mwan avek en madanm ki ti menm laz avek nou fiy. Ler nou ti divorse, mon ti soulaze akoz mon ti nepli bezwen sibir son move tanperaman, me mon ti osi santi konmsi mon’n ganny abese e mon pa vo nanryen.”​—EMMELINE, divorse depi 17 an.

Serten dimoun i divorse akoz zot krwar ki zot lavi pou amelyore, lezot pa anvi divorse me zot pa kapab fors zot konzwen pour reste avek zot. Me preski tou dimoun ki divorse i realize ki lavi i bokou pli difisil apre ki zot ti ekspekte. Anfet, si ou’n fek divorse, petet ou pou vwar ki divors i enn parmi bann keksoz pli difisil ki ou’n deza fer fas avek. Alor, i pou byen si ou egzamin serten konsey pratik dan Labib ki kapab ed ou pour fer fas avek bann defi ki ou kapab rankontre apre divors.

DEFI 1: BANN SANTIMAN NEGATIF.

Problenm larzan, zanfan ek lasolitid i kapab met en kantite presyon lo en dimoun, e sa bann santiman pa al deswit. Judith Wallerstein, en psikolog ki’n mor, ti dir ki menm apre plizyer lannen apre divors, serten i kontinyen santi zot trai e abandonnen, zot santi ki “lavi i enzis, zot dezapwente e santi zot tousel.”

KI OU KAPAB FER

▪ I normal pour sagren. Petet ou mank sa dimoun ki ou ankor kontan. Menm si ou lavi maryaz pa ti  sitan gou, i normal pour ou sagren akoz ou lavi maryaz pa’n sitan ere parey ou ti krwar i ti pou ete. (Proverb 5:18) Pa santi ou onte pour met dekote “en letan pour plere.”​—Eklezyast 3:1, 4.

▪ Evite izol ou lekor. I vre ki par ler ou bezwen en pe letan ou tousel, me i pa bon pour kontinyelman izol ou lekor. (Proverb 18:1) Koz lo bann keksoz ki batir ou bann zanmi, olye toultan koz an mal lo ou msye ouswa madanm avan, akoz menm si sa ki ou pe dir lo li i vre, sa i kapab fer lezot evit ou. Si ou bezwen fer bann gro desizyon deswit apre ou divors, rod led avek en dimoun ki ou annan konfyans ladan.

▪ Pran swen avek ou lasante. Presyon en divors i souvan annan en lefe lo lasante en dimoun, parey tansyon o oubyen migrenn. Manz byen, fer legzersis e dormi byen.​—Efezyen 5:29.

▪ Retir okenn keksoz ki kapab fer ou ankoler avek ou msye ouswa madanm avan oubyen keksoz ki ou pa bezwen. Me selman, anmas byen ou bann dokiman enportan. Si bann keksoz parey portre maryaz i fer ou tro sagren, met zot dan en bwat e anmas zot pour bann zanfan.

▪ Lalit avek bann panse negatif. Olga ki ti divorse apre ki son msye ti tronp li, i dir: “Mon ti toultan pe demann mon lekor, ‘Ki sa fanm i annan ki mwan mon napa?’” Me parey Olga ti realize pli tar, toultan mazin bann menm panse negatif i fer en dimoun “deprimen.”​—Proverb 18:14.

En kantite dimoun i kontan met zot bann panse an ekrir akoz sa i ed zot pour klarifye e kontrol zot panse. Si ou fer sa, esey mazin en panse pozitif pour ranplas sa enn negatif ki ou pe lalit avek. (Efezyen 4:23) Annou vwar de legzanp:

Avan: I mon lafot si mon konzwen in tronp mwan.

Apre: Mon defo pa ti en rezon pour li tronp mwan.

Avan: Mon’n gaspiy mon bann pli bon lannen avek sa move konzwen.

Apre: Mon pou pli ere si mon konsantre lo lavenir plito ki lepase.

▪ Pa konsantre lo bann parol ki blesan. Avek bon lentansyon, ou bann zanmi ek fanmir i kapab dir bann keksoz ki bles ou oubyen menm dir keksoz ki pa ti le ka. Par egzanp zot kapab dir: ‘I pa ti bon pour ou tou fason’ oubyen ‘Bondye i ay divors.’ * Labib i annan byen rezon ler i donn sa konsey: “Pa bezwen pran aker tou parol ki dimoun i dir.” (Eklezyast 7:21) Martina ki’n divorse pour de-z-an i dir: “Olye konsantre lo bann parol ki blesan, mon esey vwar keksoz parey Bondye. Son bann panse i pli siperyer ki pour nou.”​—Izai 55:8, 9.

▪ Priy Bondye. I ankouraz son bann adorater pour “desarz tou zot sousi lo li,” sirtou ler zot pe soufer en kantite.​—1 Pyer 5:7.

ESEY SA: Ekrir bann verse Labib ki ou santi i ed ou e met zot dan bann landrwa kot ou pou vwar zot souvan. Apard bann verse Labib ki’n ganny site, en kantite dimoun ki’n divorse i apresye sa bann verse swivan: Psonm 27:10; 34:18; Izai 41:10; ek Romen 8:38, 39.

DEFI 2: OU RELASYON AVEK OU KONZWEN AVAN.

Juliana ki ti’n marye pour 11 an i dir: “Mon ti sipliy mon msye pour reste. Me, apre ki i ti’n ale, mon ti ankoler avek li ek sa madanm ki i ti’n al reste avek.” Bokou ki divorse i reste ankoler avek zot msye oubyen madanm avan pour plizyer lannen.  Kantmenm sa, zot oblize gard kontak avek sa dimoun sirtou si zot annan zanfan.

KI OU KAPAB FER

▪ Toultan reste poli anver ou msye oubyen madanm avan. Konsantre lo bann keksoz enportan e fer li bref. En kantite dimoun in vwar ki kan zot azir koumsa, sa i fer ki i annan lape.​—Romen 12:18.

▪ Evite dir bann parol ki blesan. Kan ou santi ou pe ganny atake, i byen pour aplik sa konsey Labib ki saz: “En dimoun ki annan konnesans i kontrol sa ki i dir.” (Proverb 17:27) Si konversasyon pe al dan en move direksyon, ou kapab dir: “Mon bezwen reflesir lo sa ki ou’n dir e apre mon a koz avek ou.”

▪ Separ zot bann keksoz, otan ki ou kapab, enkli bann dokiman legal, finansyel e medikal.

ESEY SA: Laprosenn fwa ki ou koz avek ou msye oubyen madanm avan, veye ki zot pa pran tou keksoz an mal oubyen personnel. Si i neseser, pran en brek oubyen si zot dakor, servi imel pour diskit sa size.​—Proverb 17:14.

DEFI 3: ED OU ZANFAN ADAPTE.

Maria i rapel ki mannyer lavi ti ete zis apre ki i ti’n divorse: “Mon pli pti fiy ti plere tou lazournen e i ti rekonmans pis lo lili ankor. Tandis ki mon pli gran fiy li, i ti pe esey kasyet son santiman, me kantmenm sa, mon ti kapab vwar en sanzman dan li osi.” Malerezman, ou kapab santi ou fatige emosyonnelman oubyen ki ou napa letan pour ed ou zanfan ler zot pli bezwen ou.

KI OU KAPAB FER

▪ Ankouraz ou zanfan pour koz avek ou konsernan zot santiman, menm si sa i kapab paret konmsi i pe koz “an bonnavini.”​—Zob 6:2, 3.

▪ Sakenn zwe son rol. Ou kapab santi ou tousel e ou ti a voudre ganny sipor emosyonnelman, ou zanfan i kapab paret dan sa pozisyon pour donn ou sa sipor. Me, i enzis pour demann en zanfan pour ede avek bann problenm adilt, akoz i pa bon pour li e sa pou afekte son lasante. (1 Korentyen 13:11) Pa bezwen rakont ou zanfan ou bann problenm oubyen fer li vin en mesaze ant ou ek ou msye oubyen madanm avan.

▪ Esey gard bann bon labitid dan lavi ou zanfan. I kapab byen pour kontinyen reste dan menm landrwa e gard menm progranm, me i pli enportan ankor pour kontinyen annan en bon progranm spirityel, enkli lektir Labib ek ladorasyon fanmir.​—Deterononm 6:6-9.

ESEY SA: Pandan sa semenn, asir ou zanfan ki ou kontan zot e ki pa zot ki responsab pour lefet ki ou’n divorse avek ou konzwen. Reponn zot bann kestyon san blanm sa lot paran.

Ou kapab kontinyen ou lavi apre ki ou’n divorse. Melissa ki ti’n marye pour 16 an i dir, “Ler mon ti divorse, mon ti mazinen, ‘Pa koumsa ki mon ti anvi mon lavi i devenir.’” Me konmela i santi li pli ere malgre son sirkonstans. I dir, “Enn fwa ki mon ti aret esey sanz lepase, mon ti santi mwan bokou mye.”

[Not anba lo paz]

DEMANN OU LEKOR . . .

▪ Eski mon’n donn mon lekor letan pour geri apre mon divors?

▪ Ki mannyer mon kapab rezet okenn move santiman ki mon annan anver mon msye oubyen madanm avan?

[Portre lo paz 8]

[Portre lo paz 9]

Les Parol Bondye soutenir ou pandan bann moman difisil

[Portre lo paz 10]