LO KOUVERTIR | ESKI NOU BEZWEN BONDYE?

Akoz sa kestyon?

“Eski ou oke san Bondye? Pour plizyer milyon, sa i leka.” Se sa ki en group dimoun ki pa krwar dan Bondye ti peye pour met lo en pano, tou resaman. I evidan ki zot santi ki zot pa bezwen Bondye.

De lot kote, bokou dimoun ki dir zot krwar dan Bondye i fer bann desizyon dan zar konmsi Bondye pa egziste. Salvatore Fisichella, en larsevek Katolik ti dir sa lo manm son prop legliz: “Kan dimoun i get nou ozordi, manke personn pa pou krwar ki nou Kretyen, akoz nou fason viv i parey avek pour bann dimoun ki pa krwar dan Bondye.”

Serten dimoun pa enterese avek Bondye akoz zot tro okipe. Zot panse ki i tro lwen oubyen i pa posib pour li zwe en rol enportan dan zot lavi. I kapab ki zot pa zanmen mazin Bondye oubyen si zot mazin li, i zis akoz zot dan problenm oubyen zot bezwen en keksoz, konmsi i zot serviter ki taye pour vini sak fwa i ganny kriye.

Lezot pa met an pratik sa ki zot larelizyon i ansennyen, petet akoz zot pa krwar ki i neseser oubyen anmenn okenn byenfe. Pour donn zis en legzanp, 76 poursan Katolik Lalmanny i krwar ki i akseptab pour en msye ek en madanm viv ansanm avan marye, en kondwit ki tou lekontrer avek lansennyman Labib e osi zot legliz. (1 Korentyen 6:18; Ebre 13:4) Byensir, i pa zis bann Katolik ki pa pe viv annakor avek lansennyman zot larelizyon. Bann sef relizye dan diferan larelizyon i konplent ki zot bann manm i konport zot parey “bann dimoun ki pa krwar dan Bondye.”

Alor, sa bann legzanp i fer nou demann sa kestyon: Eski nou vreman bezwen Bondye? Sa topik pa enn nouvo. I ti ganny souleve pour premye fwa o konmansman Labib. Pour ganny larepons sa kestyon, annou vwar serten problenm ki ti arive dan liv Zenez.

[Portre lo paz 3]