IMIT ZOT LAFWA | RAAB

I ti “ganny rann zis . . . par son bann laksyon”

RAAB i get par lafnet anmezir soley i leve lo laplenn otour Zeriko. En gran larme in rasanble otour sa lavil. Larme Izrael sa. Anmezir ki zot fer ankor en lot letour sa lavil, lapousyer i monte e tapaz bann korn i rezonnen.

Raab i reste Zeriko, i konn tre byen semen, lakaz, bann bazar ranpli avek dimoun ek bann laboutik. I menm konn byen bann dimoun. I kapab santi zot lafreyer anmezir bann zour i pase e bann Izraelit i kontinyen fer en keksoz vreman drol, setadir fer letour lavil sak zour. Me, menm si i annan tapaz korn ki rezonnen dan semen ek laplas piblik Zeriko, Raab pa per, ni dezespere parey lezot.

Raab pe gete anmezir sa larme i konmans fer letour granmaten lo setyenm zour. I vwar bann pret pe soufle korn parmi bann Izraelit e pe anmenn lars lalyans ki reprezant prezans Zeova zot Bondye. Petet nou kapab mazin Raab pe tyonbo sa lakord rouz ki anpandan avek son lafnet ki dan pli gran miray Zeriko. Sa lakord i fer Raab mazinen ki li ek son fanmir pou sirviv destriksyon sa lavil. Eski Raab i en tret? Non, pa koumsa ki Zeova i vwar li. I vwar li konman en madanm ki annan en lafwa remarkab. Annou retourn o konmansman zistwar Raab e vwar ki nou kapab aprann avek li.

RAAB SA PROSTITYE

Raab ti en prostitye. Sa laverite lo son lavi ti telman sok serten spesyalis Labib dan lepase ki zot ti dir ki i ti plito zis en propriyeter en pti lotel. Me, Labib i kler e i pa esey kasyet laverite. (Zozye 2:1; Ebre 11:31; Zak 2:25) Pour bann Kananeen, sa ki Raab ti fer ti tre probab akseptab. Par kont, menm si dan kiltir Raab prostitisyon ti akseptab, i kapab ki i ti konnen ki i mal akoz Zeova in donn tou dimoun en konsyans ki endik zot sa ki byen ek mal. (Romen 2:14, 15) I kapab ki Raab ti onte akoz son fason viv. Petet, parey bokou ki pe anmenn sa kalite lavi, i ti santi ki i ti napa swa si i ti anvi pran swen avek son fanmir.

San dout, Raab ti anvi en lavi pli meyer. Lavil kot i ti reste ti ranpli avek vyolans ek malonnekte, osi byen ki relasyon seksyel antre fanmir e avek zannimo. (Levitik 18:3, 6, 21-24) Sa kantite lemal dan sa pei ti annan bokou pour fer avek larelizyon. Kot bann tanp, i ti annan bann seremoni ki ti relye avek prostitisyon e ladorasyon bann bondye dyabolik parey Baal ek Molek ki ti enplik bril bann zanfan vivan konman sakrifis.

Zeova ti pe vwar tou sa ki ti pe arive Kanaan. Anfet, bann Kananeen ti pe telman pratik sa ki mal ki Zeova ti dir: “Sa pei i enpir, e mon pou pini li pour son pese e sa pei pou vomi son bann zabitan.” (Levitik 18:25) Ki mannyer zot ti pou ganny “pini . . . pour [zot] pese”? An zeneral, Bondye ti’n fer sa promes avek bann Izraelit:  “Zeova ou Bondye pou sirman retir sa bann nasyon devan ou ptigin par ptigin.” (Deterononm 7:22) En bann syek pli boner, Zeova ti promet ki i ti pou donn fanmir Abraam sa pei e “Bondye pa zanmen manti.”​—Tit 1:2; Zenez 12:7.

Par kont, Zeova ti osi dir ki serten nasyon dan sa pei ti pou ganny eliminen konpletman. (Deterononm 7:1, 2) Konman “sa Ziz lo later antye,” i ti’n egzamin byen zot leker e i ti konn byen ki kantite anrasinen lemal ti’n anrasinen dan zot e ki kantite imoral zot ti ete. (Zenez 18:25; 1 Kronik 28:9) Ki mannyer i ti ete pour Raab viv dan en lavil sitan deplorab? Nou zis kapab mazinen ki mannyer i ti santi kan i ti tann koz lo bann Izraelit. I ti aprann ki Bondye Izrael ti’n gid son pep, en pep ki ti lesklav, pour ranport laviktwar lo larme Lezip, en larme vreman pwisan sa letan. Aprezan, Izrael ti pe vin atak Zeriko! Pourtan, lepep ti kontinyen fer sa ki mal. Nou kapab konpran akoz Labib i dir ki bann Kananeen dan letan Raab ti “bann non-krwayan” oubyen dezobeisan dan zot latitid.​—Ebre 11:31.

Raab ti diferan. Avek letan, i ti’n petet reflesir lo bann rapor ki i ti tande lo bann Izraelit ek zot Bondye, Zeova. Zeova ti vreman diferan avek bann Bondye Kananeen! Zeova ti en Bondye ki ti lager pour son pep olye viktimiz zot, i ti donn son pep bann standar moral ki ti o olye degrad zot. Bann madanm ti presye pour Zeova, i pa ti konsider zot konman bann lobze seksyel ki kapab ganny aste, vann e abese dan en seremoni ladorasyon ki degoutan. Ler Raab ti tande ki bann Izraelit ti’n kanpe lot kote larivyer Zourden, parey pour atake, petet i ti sagren akoz sa ki ti pe al ariv son pep. Eski Zeova ti vwar Raab e apresye sa ki ti bon dan li?

Ozordi, i annan en kantite dimoun ki parey Raab. Zot santi konmsi zot dan en latrap, konmsi zot napa swa me zot pe zis viv en lavi ki fer zot perdi zot dinyite ek lazwa. Zot santi konmsi personn pa enterese avek zot e zot pa vo nanryen. Legzanp Raab i rekonfortan, akoz i rapel nou ki nou tou nou annan valer pour Bondye. Menm si nou kapab santi nou pa vo nanryen, “i pa lwen avek sakenn parmi nou.” (Akt 17:27) I pros avek nou, i pare e anvi donn tou sa ki met lafwa dan li en lespwar. Eski Raab ti fer sa?

I TI RESEVWAR BANN ESPYON

En zour, en pe letan avan bann Izraelit ti konmans fer letour Zeriko, de etranze ti aparet devan laport Raab. Sa de zonm ti krwar ki personn pa ti pou remark zot, me dan sa lavil en kantite dimoun ti vey byen pour fer sir ki napa okenn espyon Izraelit ki ti vin kot zot. I ti enposib pour Raab pa remark sa de etranze. I pa konmsi i ti drol pour bann zonm etranze vin kot li, me sa de ti pe zis rod en landrwa reste e non pa en prostitye.

Anfet, sa de zonm ti bann espyon Izraelit. Zot sef Zozye ti’n anvoy zot al vwar bann pwen for ek pwen feb lavil Zeriko. Sa ti pou premye lavil  e petet sa enn pli for Kanaan ki bann Izraelit ti pou anvair. Zozye ti anvi konnen avek lekel li ek son bann zonm ti pou bezwen lager avek. San dout, sa bann espyon ti deside al kot Raab ekspre. Petet la, kot lakour en prostitye i ti pou fasil pour pa remark bann etranze. Petet osi zot ti mazinen ki zot ti kapab tann bann pti nouvel enteresan ki lezot ti kapab dir san reflesir.

Labib i dir ki Raab ti byen “resevwar bann mesaze.” (Zak 2:25) I ti akeyir zot se li e menm si i ti annan doutans konsernan kot zot ti’n sorti e rezon akoz zot ti’n vin la, i ti les zot reste. Petet i ti anvi konn plis lo Zeova, zot Bondye.

Me en sel kou, bann mesaze sorti kot lerwa Zeriko ti arive! Nouvel ti’n fannen konmkwa bann espyon ti’n vin kot lakaz Raab. Ki Raab ti pou fer? Si i protez sa de etranze, eski pa i ti pou met son lekor ek tou son fanmir an danze? Eski pa bann zabitan Zeriko ti pou touy zot tou si i ti kasyet sa bann lennmi? De lot kote, Raab ti aprezan konn lidantite sa de zonm. Si i ti deza konnen ki Zeova ti en Bondye ki ti bokou pli bon ki son bann bondye, eski petet sa ti en loportinite pour li pran kote Zeova?

Raab ti napa bokou letan pour reflesir, kantmenm sa, i ti mazin e azir vitman. I ti fer bann espyon kasyet dan bann lapay len (flax) ki ti’n ganny tale lo twa pour sek. Apre i ti dir bann mesaze lerwa: “Wi, sa bann zonm ti vin kot mwan, e mon ti konnen kote zot ti sorti. Ler baro ti pe al fermen aswar sa bann zonm ti ale. Mon zis pa konnen kote sa bann zonm in ale. Tay deryer zot deswit, sirman ou pou zwenn zot.” (Zozye 2:4, 5) Mazin Raab pe get dan figir bann mesaze lerwa. Eski i ti mazinen si zot ti kapab vwar ki son leker ti pe anvole?

Son trik ti marse! Bann mesaze lerwa ti degaze e al ver Larivyer Zourden. (Zozye 2:7) Sa ti bezwen en gran soulazman pour Raab. Par servi en senp taktik, Raab ti reisi fer sa bann move zonm ki ti napa drwa konn laverite al dan en move direksyon e sov lavi bann serviter Zeova ki ti inosan.

Raab ti degaze e retourn anler lo twa e dir sa de espyon sa ki ti’n arive. I ti osi dir en keksoz enportan: Son pep ti’n dekouraze e zot ti vreman per bann Izraelit. I bezwen ki sa bon nouvel ti’n fer bann espyon kontan. Sa bann move dimoun Kanaan ti pe konmans per pwisans Zeova, Bondye bann Izraelit! Raab ti apre dir en lot keksoz ki pli enportan pour nou ankor. I ti dir: “Zeova zot Bondye i sa Bondye ki anler dan  lesyel e anba lo later.” (Zozye 2:11) Bann nouvel ki i ti’n tande lo Zeova ti ase pour li omwen konn sa: I ti vo lapenn met son konfyans dan Bondye bann Izraelit. I ti met son lafwa dan Zeova.

I ti kler pour Raab ki Zeova ti pou fer son pep ganny laviktwar. Alor i ti demann zot pour demontre mizerikord e sipliy zot pour sov li ek son fanmir. Bann espyon ti dakor, zot ti demann Raab pour gard sa sekre e pour met en lakord rouz anpandan avek son lafnet dan miray pour ki bann solda ti pou protez li ek son fanmir.​—Zozye 2:12-14, 18.

Nou kapab aprann en laverite enportan lo lafwa avek Raab. Parey Labib i dir: “Lafwa i vin par mesaz ki nou tande.” (Romen 10:17) I ti tann bann rapor konsernan pwisans ek lazistis Zeova, alor i ti met lafwa ek konfyans dan li. Ozordi, nou annan plis lenformasyon lo Zeova. Eski nou pou aprann konn li e met lafwa dan li dapre sa ki dan son Parol Labib?

EN LAVIL FOR I TONBE

Par swiv konsey Raab, sa de espyon ti desann lo en lakord ki ti anpandan par lafnet e sov dan montanny. I ti annan en kantite kavern dan bann montanny apik dan nor Zeriko kot sa bann espyon ti kapab kasyet ziska ler zot ti kapab retourn kot bann Izraelit ti pe kanpe avek sa bon nouvel ki zot ti’n gannyen avek Raab.

Pli tar, bann zabitan Zeriko ti sirman tranble avek lafreyer ler zot ti tande ki Zeova ti’n fer en mirak e fer Larivyer Zourden sek pour ki bann Izraelit ti kapab traverse. (Zozye 3:14-17) Me pour Raab, sa nouvel ti donn li plis laprev konmkwa i ti’n byen fer pour met son lafwa dan Zeova.

Apre sa, pandan sis zour, bann Izraelit ti konmans fer letour Zeriko, sak zour zot ti fer en letour. La aprezan, i ti setyenm zour e i ti diferan. Parey i’n ganny mansyonnen o konmansman sa lartik, zot ti konmans fer letour ver soley leve e ler larme ti fini fer letour sa lavil en fwa, zot ti kontinyen fer letour lavil Zeriko ankor e ankor. (Zozye 6:15) Ki bann Izraelit ti pe fer?

Finalman, lo sa setyenm zour, apre ki sa larme ti’n fer setyenm letour, zot ti arete. Zot ti aret soufle korn e i ti annan en gran silans. Personn pa ti konnen ki pe al arive. En sel kou, ler Zozye ti sinyal zot, larme Izrael ti kriye byen for pour premye fwa. Eski bann gard ki ti anler lo miray ti krwar ki sa kalite latak ti vreman drol lefet ki bann Izraelit ti zis kriye? Si wi, zot pa ti mazin sa pour lontan. Sa gran miray ti konmans tranble anba zot lipye. I ti sekwe, i ti fele, degrengole e apre i ti tonbe aplat ater! Me, anmezir ki lapousyer ti konmans fannen, en bout sa miray ti reste debout. Lakaz Raab ti ankor entak, i ti parey en moniman tousel ki ti laprev lafwa en madanm. Esey mazinen ki mannyer i ti santi li ler i ti vwar ki mannyer Zeova ti’n protez li! * Son fanmir ti sen e sof!​—Zozye 6:10, 16, 20, 21.

Pep Zeova osi ti demontre respe pour Raab akoz son lafwa. Ler zot ti vwar ki i ti annan zis en lakaz ki ti ankor pe debout dan tou sa debri, zot ti konnen ki Zeova ti avek sa madanm. Li ek son fanmir ti ganny eparnyen avek sa destriksyon ki ti ariv lo sa move lavil. Apre sa lager, Raab ti reste o bor kot bann Izraelit ti pe kanpe. Avek letan Raab ti form parti pep Zwif. I ti marye avek en zonm ki ti apel Salmonn. Zot garson Boaz ti grandi pour vin en zonm avek en lafwa remarkab. I ti marye avek Rit, sa madanm Moabit. * (Rit 4:13, 22) Lerwa David e pli tar Mesi li menm, setadir Zezi Kri ti en desandans sa fanmir remarkab.​—Zozye 6:22-25; Matye 1:5, 6, 16.

Zistwar Raab i montre nou ki nou tou nou annan valer pour Zeova. I vwar nou tou, i egzamin nou leker e i kontan ler i vwar ki nou annan en lafwa ki parey pour Raab. Son lafwa ti pous li pour azir. Parey Labib i dir, i ti ganny “rann zis devan Bondye par son bann laksyon.” (Zak 2:25) Pa i pou vreman saz si nou imit son lafwa!

[Not anba lo paz]

[Portre lo paz 12]

[Portre lo paz 13]

Raab ti annan lafwa dan Bondye bann Izraelit

[Portre lo paz 14]

Raab ti kasyet de serviter Zeova anba lapay len e met son lavi an danze