EN KONVERSASYON AVEK EN VWAZEN

Akoz Bondye i permet soufrans?

Sa konversasyon ki swiv i enn ki Temwen Zeova i kapab gannyen avek en vwazen. Meton en Temwen ki apel Michelle in vin kot lakour en madanm ki apel Sophia.

KI MANNYER BONDYE I SANTI LER I VWAR NOU PE SOUFER?

Michelle: Bonzour Sophia. Mon byen kontan pour zwenn ou kot ou ozordi.

Sophia: Mwan osi parey.

Michelle: Dernyen fwa mon ti pas kot ou, nou ti koz lo konman Bondye i santi ler i vwar nou pe soufer. * Ou ti dir ki sa i en kestyon ki ou’n toultan demann ou lekor, sirtou apre ki ou manman ti paralize dan en aksidan loto. Kontrer, ki mannyer ou manman i ete?

Sophia: I annan zour i byen me i annan zour i pa byen. Ozordi i oke.

Michelle: Mon byen kontan pour tann sa. I bezwen vreman difisil pour ou reste pozitif dan en sityasyon koumsa.

Sophia: Wi. Parfwa mon demann mon lekor ki kantite letan ankor i pou bezwen soufer.

Michelle: I normal pour ou santi koumsa. Ou rapel dernyen fwa mon ti demann ou en kestyon lo akoz Bondye i permet soufrans si i annan pouvwar pour met en lafen avek li?

Sophia: Wi mon rapel.

Michelle: Avan ler nou egzamin larepons dan Labib, annou revwar detrwa pwen ki nou ti koz lo la dernyen fwa.

Sophia: Oke.

Michelle: Premyerman, nou ti vwar ki menm en zonm fidel dan letan lontan ti demande akoz Bondye i permet soufrans. Pourtan, Bondye pa ti zanmen ankoler avek li akoz i ti pe demann sa kestyon. I pa ni ti dir li ki i zis bezwen annan plis lafwa.

Sophia: Sa mon pa ti konnen avan.

Michelle: Nou ti osi vwar ki Zeova pa kontan vwar nou soufer. Par egzanp, Labib i dir ki ler son pep ti pe soufer, “sa ti fer li soufer.” * Pa i rekonfortan pour konnen ki ler nou pe soufer Bondye i santi sa ki nou pe santi?

Sophia: Wi i rekonfortan.

Michelle: Finalman, nou ti osi dakor ki lefet ki nou Kreater i annan en kantite pwisans, definitivman i annan sa abilite pour entervenir e met en lafen avek soufrans nenport ki ler.

Sophia: Se sa ki mon pa konpran. Akoz Bondye i les tou sa bann move keksoz arive kan i kapab anpes zot arive?

LEKEL KI TI PE KOZ LAVERITE?

Michelle: Annou al lo premye liv Labib, Zenez pour konmans reponn ou kestyon. Eski ou konn en pe lo sa ki ti arive avek Adan ek Ev e sa fri ki Bondye ti defann zot pour manze?

Sophia: Wi, mon ti aprann sa zistwar dan katesis.  I ti annan en fri ki Bondye ti defann zot manze me kantmenm sa zot ti manz li.

Michelle: Sa i vre. Me aprezan, annou konsantre lo kwa ki ti fer Adan ek Ev arive fer pese. I relye direkteman lo rezon akoz nou soufer. Eski ou kapab lir Zenez sapit 3, verse 1 ziska 5 silvouple?

Sophia: Oke. “Prezan, serpan ti sa zannimo sovaz pli pridan ki Zeova Bondye ti’n kree dan lakanpanny. Alor i ti dir avek sa madanm: ‘Eski i vre ki Bondye in dir zot pa manz fri dan tou pye dibwa sa zarden?’ Me sa madanm ti dir avek sa serpan: ‘Nou kapab manz fri sa bann pye dibwa dan zarden. Me fri sa pye dibwa ki dan milye zarden, Bondye in dir: “Zot pa devret manze. Non, zot pa devret tous li pour ki zot pa mor.” Alor sa serpan ti dir avek sa madanm: ‘Sirman, zot pa pou mor. Akoz Bondye i konnen, ki sa zour menm ki zot pou manz sa fri, zot lizye pou sirman ouver e sirman zot pou vin parey Bondye, zot pou konn sa ki bon ek sa ki move.’”

Michelle: Mersi. Annou egzamin sa bann verse en kou. Premyerman, remarke ki en serpan ti koz avek Ev. En lot verse dan Labib i montre ki an realite, se Satan ki ti pe koz avek li atraver sa serpan. * Satan ti demann Ev konsernan lord ki Bondye ti’n donnen lo sa pye fri. Eski ou’n remarke ki Bondye ti dir ti pou ariv zot si Adan ek Ev ti manz sa fri?

Sophia: Zot ti pou mor.

Michelle: Tre byen. Me, sa ki Satan ti dir apre i montre ki i ti fer en gran lakizasyon kont Bondye. Remarke ki Satan ti dir: “Sirman, zot pa pou mor.” Andotmo Satan ti pe dir Bondye i en manter!

Sophia: Mon pa’n zanmen tann sa bout avan.

Michelle: E kan Satan ti dir ki Bondye i en manter, i ti lev en kestyon ki ti pou pran letan pour reponn. Eski ou konpran akoz?

Sophia: Hmm. Mon pa tro asire.

Michelle: Oke, mon a donn ou en legzanp pour konpran. Fer konmsi en zour mon vin kot ou e dir ou ki mon pli for ki ou. Ki ou ti pou fer pour montre ki sa pa vre?

Sophia: Petet nou ti pou bezwen fer en pti tes.

Michelle: Egzakteman. Petet nou ti pou rod en keksoz lour e apre gete lekel ant nou de ki ti pou kapab lev li. I ase fasil pour montre lekel ki pli for.

Sophia: Mon konpran ki ou pe sey dir.

Michelle: Me fer konmsi olye dir ou ki mon pli for ki ou, mon vin dir ou ki mon pli onnet ki ou. Sa i diferan, non?

Sophia: Mon krwar.

Michelle: Apre tou, lonnekte pa parey lafors ki ou kapab prouve par en senp tes, pa i vre?

Sophia: Wi.

Michelle: Sel fason pour prouve lekel ki pli onnet ant nou de, se pour les ase letan pase kot lezot dimoun ti pou obzerv nou e vwar lekel ki pli onnet.

Sophia: Sa i fer sans.

Michelle: Aprezan, annou get ankor en kou sa resi dan Zenez. Eski Satan ti dir ki i pli for ki Bondye?

Sophia: Non.

Michelle: Bondye ti pou’n deswit prouve ki se li ki pli for. Par kont, Satan ti oule dir ki i pli onnet ki Bondye. I konmsi i ti dir avek Ev, ‘Bondye pe koz manti avek ou, me mwan mon pe dir ou laverite.’

Sophia: I enteresan sa!

Michelle: Bondye ti konnen ki sa pli meyer fason pour prouve lekel ki vreman pli onnet se pour les letan pase. Avek letan i ti pou evidan lekel ki ti pe dir laverite e lekel ki ti pe koz manti.

EN KESTYON ENPORTAN

Sophia: Me dek ki Ev ti mor, eski sa pa ti prouve ki Bondye ti pe dir laverite?

 Michelle: Dan en sans wi. Me pa zis sa ki Satan ti pe kestyonnen. Get verse 5 ankor en kou. Eski ou remarke ki Satan ti dir Ev ankor?

Sophia: I ti dir ki si i manz sa fri, son lizye pou ouver.

Michelle: Wi, e ki i ti pou vin ‘parey Bondye, i ti pou konn sa ki bon ek sa ki move.’ Andotmo, Satan ti pe dir ki Bondye ti pe priv bann imen en bon keksoz.

Sophia: Mon konpran.

Michelle: Sa osi ti pou bezwen ganny prouve.

Sophia: Ki ou pe sey dir?

Michelle: Par son parol, Satan ti oule dir ki Ev, ensi ki tou bann imen ti pou pli byen san dominasyon Bondye. Dan sa ka osi, Zeova ti konnen ki pli meyer fason pour prouve ki sa i vre, se pour les Satan esey prouv son lakizasyon. Alor, Bondye in permet Satan pour diriz sa lemonn pour en pe letan. Se pour sa rezon ki nou vwar sa kantite soufrans otour nou, akoz Satan ki pe diriz sa lemonn, pa Bondye. * Me i osi annan en bon nouvel.

Sophia: Kwa sa?

Michelle: Labib i koz lo de keksoz tousan lo Bondye. Premyerman, Zeova i la avek nou ler nou soufer. Par egzanp, reflesir lo parol Lerwa David, dan Psonm 31:7. David ti soufer en kantite dan son lavi, me annou get sa ki i ti dir dan son lapriyer. Ou ti a kontan lir sa verse silvouple?

Sophia: Oke. I dir: “Mon pou zwaye en kantite akoz ou lanmour fidel, ou’n vwar mon soufrans; ou konnen ki mon dan ladetres.”

Michelle: Alor, menm si David ti pe soufer en kantite, i ti rekonfortan pour li konnen ki Zeova ti vwar tou sa ki i ti pe pas atraver. Lefet ki ou konnen ki Zeova i vwar tou keksoz, menm nou bann soufrans ki petet lezot pa pou tro konpran, pa sa i rekonfortan?

Sophia: Wi.

Michelle: Dezyenm keksoz, se ki Bondye pa pou permet nou soufer pour touzour. Labib i dir ki byento I pou met en lafen avek move dominasyon Satan. I pou retir tou bann move keksoz ki’n arive, enkli sa ki’n ariv ou ek ou manman. Mon kapab retournen semenn prosen pour montre ou akoz nou asire Bondye pou byento met en lafen avek soufrans? *

Sophia: Oke.

Eski ou annan bann kestyon lo serten topik lo Labib. Eski i annan keksoz ki ou ti a kontan konnen lo krwayans oubyen aktivite bann Temwen Zeova. Si i le ka pa ezite pour demann en Temwen Zeova. I pou kontan pour donn ou plis lenformasyon.

[Not anba lo paz]