IMIT ZOT LAFWA | MARI

I ti sirviv malgre sagrinasyon ti pers li konman en lepe

MARI ti tonm lo son zenou, napa en mo ki ti pou kapab dekrir sa douler ki i ti pe santi. Dernyen leokri ki son garson ti fer apre sa ta martir ki i ti’n pase ti ankor pe rezonnen dan son zorey. I ti gran midi, me lesyel ti’n vin nwanr. Aprezan later ti pe sekwe en kantite. (Matye 27:45, 51) Pour Mari, petet Zeova ti pe fer lemonn antye konnen ki li, plis ki okenn lezot dimoun, ti dan en profon douler akoz lanmor Zezi Kri.

Anmezir ki laklerte soley apremidi ti penetre sa fernwanr ki ti’n kouver Golgota, oubyen landrwa Koksis latet, Mari ti lanmenm pe pler lanmor son garson. (Zan 19:17, 25) Dan son lespri, petet bann memwar lepase ti pe vini enn deryer lot. Enn ki petet i ti pe mazinen, ti apepre 33 an pase kan li ek Zozef ti vin prezant zot pti baba presye kot tanp Zerizalenm. La en zonm aze ki ti apel Simeon ti ganny enspire pour anons en profesi. I ti predir bann gran keksoz pour Zezi, me i ti osi azoute ki en zour Mari ti pou santi konmsi en lepe ti’n pers li. (Lik 2:25-35) La aprezan, i ti dan sa moman trazik ki Mari ti arive konpran vreman ki sa parol ti vedir.

I’n ganny dir ki lanmor ou zanfan i lanmor pli pir, pli fermal, ki en imen i kapab pas atraver. Lanmor i nou pli gran lennmi e i fer nou tou soufer dan en fason ou en lot. (Romen 5:12; 1 Korentyen 15:26) Me eski i posib pour fer fas avek sa soufrans? Anmezir ki nou egzamin lavi Mari depi o konmansman minister Zezi ziska son lanmor e en pti pe letan apre, nou pou aprann bokou lo son lafwa ki ti ed li fer fas avek sa sagrinasyon ki ti pers li konman en lepe.

“FER TOU SA KI I DIR ZOT”

Annou retourn trwa-z-an edmi an aryer. Mari ti santi ki en sanzman ti pe al arive. Dimoun partou dan sa pti lavil Nazaret ti pe koz konsernan Zan Batis ek son mesaz repantans ki ti pe anmenn bokou leksitasyon. Mari ti vwar ki son pli gran garson ti pe pran sa nouvel konman en siny, ler ti’n arive pour Zezi konmans son minister. (Matye 3:1, 13) Pour Mari ek son fanmir, labsans Zezi ti pou en gran sanzman pour zot. Akoz sa?

I paret ki Zozef, msye Mari, ti’n fini mor sa letan. Alor, perdi en dimoun pros dan lanmor pa ti en keksoz nouvo pour Mari. * Aprezan Zezi pa ti zis ganny apele “garson sa sarpantye” me osi “sa sarpantye.” I kler alor ki Zezi ti’n pran biznes son papa e se li ki ti pe pran swen avek lafanmir, ki ti enkli sis zanfan apre li. (Matye 13:55, 56; Mark 6:3) Menm si Zezi ti pe form Zak, son frer apre li, pour kontiny sa metye, son depar konman premye garson dan lafanmir pa ti pou fasil pour zot. Eski Mari ki ti pe deza anmenn en pake lour ti per sa sanzman ki ti pe al arive? Nou pa kapab dir ni wi, ni non. Me en kestyon pli enportan ki nou kapab demande se: Ki mannyer i ti pou reazir ler  Zezi sorti Nazaret ti vin Zezi Kri, sa Mesi ki lontan dimoun ti pe espere? En resi dan Labib i dir nou en keksoz dan sa domenn.​—Zan 2:1-12.

Zezi ti al kot Zan pour ganny batize e apre sa i ti vin sa Enn ki Bondye ti’n swazir oubyen Mesi. (Lik 3:21, 22) Apre, i ti konmans swazir son bann disip. Menm si son travay ti en travay irzan, i ti trouv letan pour pas avek son bann fanmir ek zanmi. En zour, i ti al en maryaz avek son manman, son bann disip ek son bann frer. Sa ti dan lavil Kana ki aparaman ti lo en pti montanny apepre 13 kilomet avek Nazaret. Pandan ki maryaz ti pe deroule, en problenm ti arive ki Mari ti okouran. Petet i ti’n remarke ki serten fanmir sa koup marye ti pe get kanmarad pa konnen ki pour fer e pe koz dan zorey kanmarad. Diven ti’n fini! Dapre zot koutim, en keksoz koumsa ti pou’n fini gat sa lafet akoz i ti pou konmsi zot pa’n byen ranpli zot devwar anver zot bann envite. Mari ti santi sa ki zot ti pe santi e i ti apros Zezi.

I ti dir son garson, “Diven in fini.” Ki i ti pe ekspekte Zezi fer? Nou pa asire, me Mari ti konnen ki son garson ti en zonm ki ti pou kapab fer bann gran keksoz. Petet i ti pe swete i konmans fer sa bann keksoz la konmela. Anfet, i ti konmsi i ti pe dir, “Silvouple mon garson, fer en keksoz!” Larepons Zezi ti’n bezwen sirprann li. I ti dir: “Fanm, ki oule avek mwan?” Menm si parol Zezi in ganny enterprete konman en siny mank respe, i pa ditou leka. Par kont, son parol i endike ki i pa ti tro kontan sa ki son manman ti’n dir li. I ti pe rapel son manman ki pa li ki devret dir li ki mannyer i pou akonpli son minister, zis son Papa, Zeova, ki ti kapab fer sa.

Mari ti aksepte ki son garson i koriz li akoz i ti en madanm sansib ki ti annan bokou limilite. I ti al kot bann ki ti pe servi dan sa maryaz e dir zot: “Fer tou sa ki i dir zot.” Mari ti’n realize ki olye dir son garson ki pour fer, li ek lezot ti devret fer sa ki i ti dir zot. Lo son kote, Zezi ti montre ki i ti annan menm konpasyon ki son manman pour nouvo ek nouvel marye. I ti fer son premye mirak par fer delo vin en bon diven. Avek ki rezilta? “Son bann disip ti krwar dan li.” Mari osi ti met lafwa dan Zezi. I pa ti konsider li zis konman son garson me konman son Senyer ek Sover.

Bann paran ozordi i kapab aprann bokou avek lafwa Mari. I vre ki personn pa’n zanmen elve en zanfan parey Zezi. Me, kan nenport zanfan i vin en adilt, sa tranzisyon li menm i anmenn bokou defi. En paran i kapab tant pour tret son garson oubyen fiy konman en manrmay, kantmenm i nepli letan pour fer sa. (1 Korentyen 13:11) Ki mannyer en paran i kapab ed son zanfan ki’n aprezan vin adilt? En fason pour fer sa, se par eksprim son konfyans ki son garson oubyen fiy pou kontinyen aplik bann lansennyman Labib e ganny benediksyon Zeova an retour. Ler en paran i eksprim son lafwa ek konfyans dan son zanfan avek limilite, sa i kapab fer sa zanfan bokou dibyen menm si i gran. San dout, Zezi ti apresye bokou sipor ki Mari ti donn li dan sa bann lannen ki ti swiv apre.

“SON BANN FRER PA TI KRWAR LI”

Bann Levanzil pa dir bokou lo Mari pandan sa trwa-z-an edmi ki Zezi ti akonpli son minister. Me, pa oubliye ki petet sa letan i ti’n fini vin en vev, en manman tousel ki petet ti annan bann pti piti pour okipe kot lakour. Alor nou konpran akoz petet i pa ti kapab swiv Zezi partou kot i ti al prese dan son pei natal. (1 Timote 5:8)  Kantmenm sa, i ti kontinyen medit lo bann keksoz spirityel ki i ti’n aprann lo Mesi e asiste bann renyon ki ti ganny fer dan sinagog parey son labitid.​—Lik 2:19, 51; 4:16.

Eski petet i ti la dan lodyans ler Zezi ti pe koze dan sinagog Nazaret? I ti bezwen vreman kontan ler son garson ti anonse ki en profesi konsernan Mesi ki ti’n ganny ekrir plizyer syek avan ti pe ganny akonplir lo li! Par kont, ler i ti vwar son bann konpanyon Nazareen rezet son garson, sa ti bezwen fatig li bokou. Zot ti menm esey touy li!​—Lik 4:17-30.

En lot keksoz ki ti fatig Mari ti lafason ki son bann lezot garson ti reazir anver Zezi. Nou vwar dan Zan 7:5 ki sa kat frer Zezi ti napa menm lafwa ki zot manman. Sa verse i dir: “Son bann frer pa ti krwar li.” Me Labib pa dir nanryen konsernan son bann ser, ki omwen ti annan de zot. * An tou ka, Mari ti soufer dan son prop fason dan en lakour kot i ti annan diferan krwayans relizye. I ti bezwen lite pour trouv en balans ant reste fidel avek laverite dan Parol Bondye e an menm tan esey konvenk son bann zanfan san bezwen fors zot oubyen argimante toultan.

En fwa serten son bann fanmir, petet enkli son bann frer osi, ti deside pour “atrap” Zezi. Anfet, zot ti pe dir: “I’n perdi latet.” (Mark 3:21, 31) Byensir Mari pa ti krwar sa, me i ti al avek son bann garson petet avek lespwar ki zot ti pou aprann serten keksoz ki ti pou ed zot devlop lafwa. Eski sanmenm ki ti arive? Kantmenm Zezi ti kontinyen fer bann keksoz enkrwayab e ansenny bann laverite merveye, son bann frer pa ti krwar menm. Eski Mari ti pe toultan demande dan en lanmertim konman pour kapab sanz zot leker?

Eski ou viv dan en fanmir ki annan diferan krwayans relizye? Ou kapab aprann en kantite avek lafwa Mari. I pa ti perdi lespwar ki en zour son bann zanfan non krwayan i kapab sanze. O kontrer, i ti fer zot vwar konman son lafwa ti fer li zwaye e donn li lape lespri. Tandis ki son garson fidel, i ti toultan donn li son sipor. Eski i ti mank Zezi? Eski parfwa i ti swete ki i ti ankor dan lakour avek li ek leres lafanmir? Si i ti santi koumsa, an tou ka i ti kapab kontrol son santiman. Mari ti konsider li en privilez pour siport e ankouraz Zezi. Eski ou osi ou kapab ed ou zanfan pour met Bondye premye dan son lavi?

“EN LEPE POU PERS OU LAM”

Eski Mari ti ganny rekonpanse pour son lafwa dan Zezi? Zeova i toultan rekonpans bann ki annan lafwa e Mari pa ti en leksepsyon. (Ebre 11:6) Zis mazinen ki mannyer i ti santi ler i ti tann son garson koze oubyen tann lezot pe rakonte ki i’n dir dan son sermon.

Dan bann legzanp ki son garson ti servi, eski Mari ti remarke ki zot ti resanble en pe lanfans Zezi Nazaret? Kan Zezi ti koz lo en madanm ki ti balye son lakaz pour rod en pyes larzan ki ti’n perdi, ler i ti koz lo travay lo moulen e alim en lalanp pour met anler, eski Mari ti mazin son pti garson ki ti toultan la dan son kote ler i ti pe fer son louvraz? (Lik 11:33; 15:8, 9; 17:35) Kan Zezi ti koz lo son zoug ki fasil e fardo ki leze, eski sa ti fer Mari mazin sa zoli apremidi kot i ti pe regard Zozef pe montre zot pti garson ki mannyer pour byen fer en zoug ki konfortab pour en zannimo? (Matye 11:30) Vreman Mari ti trouv bokou plezir  ler ti reflesir lo sa privilez ki Zeova ti’n donn li dan son lavi. Sa se pour elve e form son garson ki ti pou vin Mesi pli tar. I ti’n bezwen resanti en lazwa spesyal ler i ti ekout Zezi, pli gran ansenyan ki’n egziste, tir bann bon leson an servan bann lobze ek senn dan lavi tou le zour, pa i vre!

Pourtan, Mari ti annan limilite. Son garson pa ti zanmen met li anler, ni menm ador li. En zour ler Zezi ti pe prese, en madanm dan lafoul ti kriye ki manman Zezi ti bezwen vreman ere pour donn li nesans. Zezi ti reponn: “Ere plito dimoun ki ekoute e obei parol Bondye.” (Lik 11:27, 28) En lot zour serten dimoun dan lafoul ti dir Zezi ki son manman ek son bann frer ti la, i ti reponn par dir se bann ki krwar ki vreman son manman ek son frer. Olye ofanse, Mari ti konpran ki pwen Zezi ti oule fer resorti, setadir, en relasyon spirityel i bokou pli enportan ki relasyon familyal.​—Mark 3:32-35.

Toudmenm, napa en mo ki ti pou kapab dekrir sa douler ki Mari ti santi ler i ti vwar son garson pe soufer e mor lo en poto. Zapot Zan ki ti temwanny son legzekisyon, ti pli tar enkli sa detay dan son resi: Pandan tou sa soufrans, Mari ti ‘lanmenm pre avek poto Zezi.’ Napa nanryen ki ti pou kapab tir sa manman devoue akote son garson ziska lafen. Zezi ti vwar li e i ti koze menm si sak respirasyon ki i ti pran ti fermal e sak parol ki i ti dir ti en martir. I ti konfye son manman dan lanmen zapot Zan pour pran swen avek li. Vi ki bann frer Zezi pa ti ankor vin krwayan, Zezi ti konfye Mari dan lanmen son disip fidel olye zot. Dan sa fason, Zezi in montre konman i enportan pour en zonm Kretyen pran swen avek son fanmir sirtou dan domenn spirityel.​—Zan 19:25-27.

Kan Zezi ti finalman mor, Mari ti arive konn sa douler ki ti’n ganny predir byen lontan, sa gran sagrinasyon ki ti pou pers li parey en lepe. Petet i difisil pour mazinen ki kantite sagren i ti sagren. Be mazin sa lazwa ki i ti santi trwa zour pli tar! Mari ti tande ki Zezi ti’n resisite, pli gran mirak ki tou lezot! Son lazwa ti ogmant plis ankor ler Zezi ti pli tar aparet avek son demi frer Zak, petet ler i ti tousel. (1 Korentyen 15:7) Sa ti annan en gran lefe lo Zak ek lezot frer Zezi. Nou aprann ki pli tar zot ti krwar ki Zezi ti li menm Kris. Zot pa ti tarde pour asiste bann renyon Kretyen ansanm avek zot manman e pas “letan dan lapriyer.” (Akt 1:14) Pli tar de parmi zot, Zak ek Zid ti ekri en liv dan Labib.

Dernyen fwa ki Labib i mansyonn Mari, i ler i ti avek son bann garson pe priye dan renyon. Pa sa i en bon fason pour termin resi lo lavi Mari! Ki pli zoli legzanp in kapab kite pour nou! Akoz son lafwa, i ti fer fas avek son gran sagrinasyon ki ti pers li parey en lepe. Finalman i ti ganny en zoli rekonpans. Si nou imit son lafwa, nou osi nou pou reisi fer fas avek nenport douler ki nou kapab gannyen dan sa move lemonn e nou rekonpans pou bokou pli gran ki nou kapab ekspekte.

[Not anba lo paz]

[Portre lo paz 13]

Sagrinasyon ti pers leker Mari

[Portre lo paz 14]

Bokou legzanp ki Zezi ti servi i ti aprann avek Zozef ek Mari

[Portre lo paz 15]

Mari ti vreman kontan pour vwar lezot son garson vin bann Kretyen fidel