EN KONVERSASYON AVEK EN VWAZEN

Akoz nou bezwen egzamin Labib?

Sa konversasyon ki swiv i enn ki Temwen Zeova i kapab gannyen avek en vwazen. Meton en Temwen ki apel Brian in vin kot lakour en msye ki apel Eric.

LABIB​—LISTWAR EGZAKT

Eric: Avan ou konmanse mon bezwen fer ou konnen ki mon pa en dimoun relizye. Mon pa krwar nou pou annan bokou pour koz lo la.

Brian: Mon kontan ki ou’n onnet avek mwan. O kontrer, mon apel Brian e ou ki mannyer ou apele?

Eric: Eric.

Brian: Mon byen kontan pour zwenn ou Eric.

Eric: Mwan osi tou.

Brian: Permet mwan pour demann ou, eski ou’n grandi dan en fanmir relizye?

Eric: Wi. Me selman kan mon’n kit lakour pour al kolez mon pa’n vreman pratik larelizyon.

Brian: Mon konpran. Ki ou ti etidye dan kolez?

Eric: Letid sosyal ek listwar. Mon’n touzour kontan listwar, par egzanp ki mannyer lasosyete imen in devlope pandan tou sa bann lannen.

Brian: Listwar i kapab vreman enteresan. Parey ou konnen Labib i en liv listwar. Eski ou’n deza servi Labib dan ou bann resers?

Eric: Pa vreman. Mon konnen ki i en bon liv, me mon pa’n zanmen mazinen ki Labib i en liv listwar.

Brian: Ou paret en dimoun ki pare pour pran an konsiderasyon pwennvi lezot. Si ou annan detrwa minit, mon ti pou kontan montre ou detrwa legzanp listwar egzakt ki trouve dan Labib.

Eric: Oke. Me selman mon napa en Labib.

Brian: I oke. Mon a montre ou dan mon Labib. Premye legzanp i trouve dan 1 Kronik sapit 29 verse 26 ek 27. Sa bann verse i dir: “Alor David garson Zese ti diriz lo tou Izrael, e son renny ti dire pour 40 an. An Ebronn i ti dirize pour 7 an, e an Zerizalenm i ti dirize pour 33 an.”

Eric: Ki mannyer sa i en legzanp listwar egzakt?

Brian: Bon, dapre serten kritik Lerwa David pa’n zanmen egziste.

Eric: Vreman? Akoz zot in kestyonn son legzistans?

Brian: Napa bokou levidans apard ki dan Labib ki i ti egziste. Par kont, an 1993, en group arkeolog ti dekouver en vye ros ki lo la ti ekri en mo ki ler i ganny tradwir i vedir “Lakaz David.”

Eric: I enteresan sa.

Brian: En lot dimoun dan Labib ki son legzistans ti ganny kestyonnen i Pons Pilat, en gouverner ki ti dirize dan letan Zezi. I ganny mansyonnen la dan Lik sapit 3 verse 1 parmi plizyer zofisye gouvernman sa lepok.

Eric: Wi, mon vwar. I dir ki: ‘Kan Pons Pilat ti gouverner Zide, Erod ti renny dan Galile.’

Brian: Tre byen. Pour plizyer lannen, serten spesyalis Labib in annan dout lo si Pons Pilat ti vreman egziste. Apepre 50 an pase, en ros ti ganny  trouve dan Mwayen Oriyan ki son non ti’n ganny grave lo la.

Eric: Mmm. Mon pa’n zanmen tann sa bann detay oparavan.

Brian: Mon byen kontan pour partaz sa avek ou.

Eric: Pour dir ou fransman, mon’n toultan respekte Labib konman en bon liv, me mon pa ti’n zanmen mazinen ki i ti itil pour nou letan. I kapab annan bann listwar egzakt, me mon pa krwar ki i annan okenn valer pratik denozour.

LABIB​—EN LIV ANSYEN ME MODERN

Brian: En kantite dimoun i annan sa menm pwennvi. Me mwan mon krwar diferaman. Mon a dir ou akoz: Nou bann bezwen de baz pa’n sanze depi o konmansman letan. Par egzanp, nou’n toultan bezwen manze, lenz ek landrwa reste. Nou’n toultan santi sa nesesite pour kominik avek kanmarad e pour annan en fanmir ere. Eski pa i vre ki nou bezwen tou sa bann keksoz?

Eric: Byensir.

Brian: Labib i kapab ed nou dan tou sa bann domenn. Se sa ki nou kapab apel en liv ansyen me modern.

Eric: Ki oule dir par sa?

Brian: Mon a met li dan en lot fason: Dan Labib i annan bann prensip enportan ki osi aplikab ozordi parey i ti leka ler zot ti ganny ekrir plizyer syek pase.

Eric: Oke. Dan ki domenn?

Brian: Bann prensip Labib i kapab gid nou, par egzanp pour annan en bon pwennvi lo larzan, annan en lavi fanmir ere e ki mannyer pour vin en bon zanmi. I parey en liv lenstriksyon ki si nou servi li byen nou pou reisi. Pa ou pou dakor ki pour vin en bon msye e sef lafanmir ozordi i kapab en defi?

Eric: Anfen, wi, mon pou dakor avek ou. In fer apepre enn an ki nou’n marye e i pa toultan fasil pour mwan ek mon madanm annan menm pwennvi avek kanmarad.

Brian: Egzakteman. Me dan Labib i annan bann prensip senp ki itil. Efezyen sapit 5 i en legzanp. Annou lir verse 22, 23 ek 28. Ou ti a kontan lir sa bann verse?

Eric: Oke. I dir: “Bann madanm, zot devre obei zot mari, parey zot obei Senyer, Parski en mari i sef son madanm parey Kris i sef [“kongregasyon,” NW], Kris in sov [“kongregasyon,” NW], ki son lekor.” Verse 28 i dir: “Bann zonm devre alor, kontan zot madanm parey zot kontan zot prop lekor. Sa ki kontan son madanm, i kontan son prop lekor.”

Brian: Mersi bokou. Eski ou pa krwar ki si tou le de konzwen i esey aplik sa konsey senp, lavi fanmir pou amelyore?

Eric: Mon krwar wi. Me sa i pli fasil pour dir ki fer.

Brian: I vre ki personn pa parfe. Anfet, dan sa menm sapit Labib i annan en verse ki ankouraz nou pour vin rezonnab. * Dan nenport ki relasyon, i enportan pour annan lekilib e pour pare pour aksepte. Nou de mon madanm nou’n vwar ki Labib i kapab ed nou pour annan sa kalite lekilib.

Eric: Sa i fer sans.

Brian: Temwen Zeova i annan en sit Enternet ki annan bann bon lenformasyon lo maryaz ek lavi fanmir. Si ou annan detrwa minit, mon ti pou kontan montre ou en legzanp sa ki lo la.

Eric: Oke. Mon kapab donn ou ankor detrwa minit.

Brian: Oke. Ladres sa sit Enternet i www.dan124.com. La sa paz lakey.

Eric: Mon kontan sa bann portre.

Brian: Sa bann portre i nou travay predikasyon ki nou fer dan lemonn antye. Ar, la i la. Sa seksyon ki annan pour tit “Help for Couples and Parents.”  Anba sa tit, i annan detrwa lartik bref ki kontyen bann lenformasyon lo ki mannyer pour reazir dan plizyer sityasyon. Eski i annan enn ki enteres ou?

Eric: Wi. Sa enn “Solving Problems in Your Marriage.” Mon pou kontan servi!

Brian: Sa lartik i montre kat letap pour reisi rezourd bann problenm. Get sa paragraf. Eski ou ti a kontan lir li, Eric?

Eric: Byensir. I dir: “If communication is the lifeblood of a marriage, then love and respect are the heart and lungs of the relationship.” Mmm . . . mon kontan ki mannyer zot eksplik sa.

Brian: Mersi pour lir. I annan en verse Labib ki’n ganny site. Ou kapab lir li si ou pez lo la.

Eric: Wi, mon vwar. Efezyen 5:33. I dir: “Fodre ki sak mari i kontan son madanm parey son prop lekor e ki sak madanm i respekte son mari.”

Brian: Eski ou’n remarke ki sa verse i met lanfaz lo donn sa ki sakenn i ekspekte gannyen?

Eric: Mon pa tro ganny en konpran ki ou pe esey dir.

Brian: Alor, pa i vre ki en msye pou anvi santi ki son madanm i annan respe pour li e osi sa madanm pou anvi santi ki son msye i vreman kontan li?

Eric: Wi, wi. Mon dakor avek sa.

Brian: Si sa msye i tanzantan rod bann fason pour montre son madanm ki i kontan li, pa i pou pli fasil pour son madanm demontre respe pour li?

Eric: I paret ki sa ti pou mars byen.

Brian: Alor, sa sel verse Labib, kantmenm in ganny ekrir plis ki 2,000 an pase, i montre bezwen sa koup dan zot maryaz e i donn zot bann bon konsey ki si zot met li an pratik i pou vreman ed zot. Zis parey sa legzanp ki nou ti lir avan, “leker ek poumon” dan sa maryaz pou reste an bonn sante.

Eric: Fransman, mon bezwen admet mon pa ti ekspekte pour vwar tousala dan Labib.

Brian: Mon byen kontan pour tann sa, Eric. Mon ti pou kontan retourn kot ou pour ganny ou lopinyon lo sa soutit “Four Steps to Solving Problems” ki dan sa menm lartik lo nou sit Enternet. *

Eric: Oke. Mon a get li ansanm ek mon madanm.

Eski i annan en serten size dan Labib ki ou’n deza mazin lo la? Eski ou kirye pour konn okenn krwayans oubyen pratik relizye bann Temwen Zeova? Si i leka, pa ezite pour koz avek en Temwen Zeova. I pou kontan pour diskit sa bann keksoz avek ou.

[Not anba lo paz]

[Ekstre lo paz 9]

Dan Labib i annan bann prensip de baz ki osi aplikab ozordi ki zot ti ete ler zot ti ganny ekrir plizyer syek avan

[Portre lo paz 7]

[Sorti kot]

HUC, Sa vye ros sorti Tel Dan

[Portre lo paz 8]

[Sorti kot]

Portre © Mize Izrael, Zerizalenm; avek permisyon Israel Antiquities Authority