LO KOUVERTIR

Eski lafen lemonn i pros?

Eski Bondye pou les bann imen kontinyen domin kanmarad e kree bann menas pour lavenir limanite? Non. Parey nou’n vwar, i pou entervenir e met en lafen avek tou sa bann maler ek labi ki’n arive pandan plizyer syek. Kreater bann imen ek later i anvi ou konnen ki son letan pe aprose pour li azir. Ki mannyer i revel sa konnesans enportan?

Reflesir lo sa legzanp: Kan ou pe vwayaze dan loto, petet avan ki ou konmanse ou pou get bann map ek bann direksyon ki’n ganny ekrir lo Enternet. Apre anmezir ki ou trouv bann siny ek demarkasyon ki koresponn avek sa bann direksyon ou pou ganny plis konfyans ki ou pe apros ou destinasyon. Dan menm fason, Bondye in donn nou son Parol, ki dekrir bann levennman remarkab. Anmezir ki nou vwar sa bann levennman enportan pe deroule, nou konvenki ki nou pe viv dan sa peryod letan zis avan lafen lemonn.

Labib i eksplike ki i pou ariv en letan spesyal e enportan dan listwar lemonn kot bann levennman pou anmenn ziska lafen lemonn. Sa letan pou enkli bann levennman ki ti arive dan lemonn ensi ki bann sirkonstans ki pa parey okenn keksoz ki’n deza arive dan listwar limanite. Annou egzamin serten sa bann laspe ki ganny mansyonnen dan Parol Bondye.

1. BANN BOULVERSMAN MONDYAL En profesi ki ganny rikorde dan Matye sapit 24 i fer en lalis bann levennman lo later ki form parti sa siny ki annan diferan laspe. Sa siny pou idantifye “konklizyon sa sistenm” e pou anmenn ver letan ki “lafen pou arive.” (Verse 3, NW; 14) Sa bann laspe i enkli bann gran lager, lafamin, tranblemandter dan plizyer landrwa, plis keksoz mal pou ganny fer, pou annan en mank lanmour e bann sef relizye pou anbet dimoun an servan bann riz. (Verse 6-26) I vre ki a en serten degre, sa bann kalite levennman ti pe deza arive depi plizyer syek. Me anmezir ki lafen i aprose, tou bann diferan laspe sa siny pou arive dan menm letan difisil. Sa ti pou ariv menm letan ki sa trwa lavertisman swivan.

2. LATITID BANN DIMOUN Labib i dir ki pandan sa “bann dernyen zour,” setadir sa peryod letan zis avan lafen lemonn, i pou annan en gran deteryorasyon dan latitid bann dimoun. Nou lir, “Zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye.” (2 Timote 3:1-4) I vre, i pa nouvo ki dimoun i mank respe pour kanmarad me zis dan “bann dernyen zour” ki sa bann latitid pou ariv en degre ki sa letan i kapab ganny dekrir konman bann “letan difisil.” Eski ou’n remark sa move latitid ki dimoun i annan konmela?

3. ZONM PE DETRI LATER Labib i dir ki Bondye pou “detri bann ki detri later.” (Revelasyon 11:18) Dan ki fason dimoun pou detri later? Labib i dekrir lepok Noe dan sa menm fason, “Later ti’n vin koronpi dan lizye sa vre Bondye e later ti ranpli avek vyolans. Alor Bondye ti vwar later e, gete, later ti’n koronpi.” Alor Bondye ti dir konsernan sa bann move dimoun, “Mon pe al detrir zot.” (Zenez 6:11-13) Eski ou’n remark sa kantite levidans ki montre ki later pe ranpli avek vyolans? Deplis sa ki pe arive avek bann imen ozordi pa’n zanmen arive dan listwar, zot kapab gat later par detri tou dimoun lo la. Zot kapab servi zarm mannyer zot anvi. Later i osi pe ganny detrir dan en lot fason. Sa ki nou bezwen pour viv tel parey ler  ki nou respire, ekosistenm zannimo ek plant e bann losean, pe gradyelman ganny detrir akoz imen pe domin later dan en fason deplorab.

Demann ou lekor, ‘Eski bann imen ti annan sa pouvwar pour detri limanite san-t-an pase?’ Me aprezan bann imen pe servi zot pouvwar pour fer stok bann zarm sofistike e pour detri lanvironnman. Teknolozi pe devlop telman vit, ki i paret ki i pe depas kapasite imen pour konpran e kontrol bann konsekans. Me i pa pour imen pour kontrol oubyen deside sa ki pou arive avek later. Avan ki tou dimoun i disparet lo later, Bondye pou entervenir pour detri bann ki pe detri later. Sa i son promes!

4. PREDIKASYON​—EN TRAVAY MONDYAL En lot laspe sa siny lafen lemonn ti predir ki en travay remarkab ti pou konmanse, “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Sa travay predikasyon ti pou vreman diferan avek bann larelizyon ki pandan plizyer syek, ti esey konvenk dimoun pour annan menm krwayans relizye ki zot. Pandan bann dernyen zour, lanfaz pou ganny mete lo en mesaz spesifik “sa Bonn Nouvel Rwayonm.” Eski ou konn okenn larelizyon ki met lanfaz sirtou lo sa mesaz? Menm si i paret ki serten pe pres sa mesaz, eski zot en pti kominote, oubyen eski zot pe anons sa bon nouvel “partou dan lemonn pour tou dimoun konnen”?

Sit Enternet www.dan124.com i konsantre lo “sa Bonn Nouvel Rwayonm.” Lo sa sit i annan bann piblikasyon ki eksplik sa mesaz dan apepre 700 langaz. Eski ou konn okenn lezot zefor ki pe ganny fer pour met lanfaz lo sa bon nouvel Rwayonm dan lemonn antye? Byen avan ki Enternet ti disponib, Temwen Zeova ti ganny byen rekonnet pour zot zefor pour propaz sa bon nouvel lo Rwayonm Bondye. Apartir 1939, lo sak kouvertir nimero Latour Veyer ti ekri “Anons Rwayonm Zeova.” En liv ki koz lo larelizyon i annan sa pour dir konsernan travay predikasyon Temwen Zeova, “son lentansite ek kapasite i preski pa kapab ganny konpare.” Sa travay predikasyon i met lanfaz lo sa bon nouvel ki byento “lafen pou arive” atraver Rwayonm Bondye.

EN LETAN ENPORTAN DAN LISTWAR LEMONN

Eski ou’n remarke ki sa kat lavertisman ki Labib i koz lo la e ki’n ganny dekrir dan sa lartik in evidan tou dilon ou lavi? Pour plis ki san-t-an, sa magazin in prezant lenformasyon avek son bann lekter konsernan bann levennman ki pe arive dan lemonn, pour ki sa i ed zot vwar pour zot  menm ki lafen lemonn i pros. Byensir, serten ki doute pa dakor avek sa, zot dir ki bann fe ek bann statistik i kapab ganny manipile e i zis bann lopinyon serten dimoun. Zot osi dir ki bann mwayen pour kominike partou dan lemonn ki pe kontinyen devlope, i zis donn lenpresyon ki kondisyon sa lemonn pe vin pli pir. Kantmenm sa, deplizanpli i annan levidans ki nou pe ariv a lafen en letan tre spesyal dan listwar limanite.

Serten eksper i santi ki byento bann gran sanzman pou arive lo later. Par egzanp, an 2014, bord lasyans ek sekirite pour sa magazin Bulletin of the Atomic Scientists ti averti Konsey Sekirite Nasyon-z-ini ki menm legzistans limanite pe ganny seryezman menase. Sa bann syantis ti konfirmen, “Kan nou egzamin o profon sa bann menas, nou tonm lo en konklizyon ki sa posibilite pour limanite disparet akoz en katastrof teknolozik, i ankor touzour en gran risk.” Bokou dimoun i deplizanpli konvenki ki nou’n ariv en letan enportan dan listwar lemonn. Bann ki pibliy sa magazin ek bokou son bann lekter, napa okenn dout ki sa letan tre spesyal ki nou pe viv ladan i vreman bann dernyen zour e lafen i pros. Me olye per lavenir, ou kapab rezouir konsernan sa ki pou arive. Ki mannyer sa i posib? Parski ou kapab sirviv lafen lemonn!

[Bwat lo paz 7]

ESKI TEMWEN ZEOVA I BANN PROFET KI ANONS LAFEN LEMONN?

Non. Zot pe anons en mesaz pozitif konsernan lavenir pour plis ki san-t-an. Par egzanp, dan en lasanble an 1958, en diskour ki ti annan pour tit, “Rwayonm Bondye pe dirize​—Eski lafen lemonn i pros?” ti eksplike ki “Rwayonm Bondye pe vini pour detri lemonn Satan me pa later. Rwayonm Bondye pa pe vin pour bril later me pour ki lavolonte Bondye i ganny akonplir lo later parey dan lesyel. Pour sa rezon, i vo lapenn ki Bondye I prezerv later konman enn son kreasyon e I pou prezerv li pour touzour.”

[Portre lo paz 7]

Rwayonm Bondye pe ganny anonse partou dan lemonn antye dan plizyer santenn langaz