LO KOUVERTIR | ESKI I VREMAN VO LAPENN PRIYE?

Lapriyer​—Sa ki i kapab fer pour ou

Avan ki ou konmans fer okenn zefor, san dout ou kapab demande, ‘Ki mannyer mon pou benefisye?’ Eski i egois pour demann sa kestyon konsernan lapriyer? Pa neseserman. I fer sans ki nou oule konnen si i vo lapenn fer lapriyer. Menm en bon zonm ki ti apel Zob ti demande en zour: “Si mon apel li eski i pou reponn mwan?”​—Zob 9:16.

Dan sa bann lartik avan, nou’n vwar laprev ki lapriyer i plis ki zis en servis relizye oubyen en kalite terapi. Sa vre Bondye i vreman ekout lapriyer. Si nou priy dan sa bon fason e pour bann keksoz ki apropriye, i pou ekoute. Anfet, i ankouraz nou pour apros avek li. (Zak 4:8) Alor, ki nou kapab ekspekte si nou fer lapriyer vin en parti nou lavi? Annou get serten byenfe.

Lape lespri.

Ler ou ganny problenm ek difikilte dan lavi, eski sa i fatig ou e fer ou enkyet? Labib i ankouraz nou pour: “Priye tou letan!” dan bann moman koumsa e “demann Bondye tou sa ki [ou] bezwen.” (1 Tesalonisyen 5:17; Filipyen 4:6) Labib i asir nou ki si nou priy Bondye, “lape Bondye ki depas tou konpreansyon imen i ava gard [nou] leker ek [nou] lespri.” (Filipyen 4:7) Nou kapab ganny en serten trankilite si nou devid nou leker konsernan tou sa ki pe fatig nou avek nou Papa ki dan lesyel. Sanmenm ki Bondye i ankouraz nou pour fer. Psonm 55:22 i dir: “Larg ou fardo lo Zeova e i pou soutenir ou.”

I annan en kantite dimoun atraver lemonn ki’n eksperyans sa lape. Hee Ran sorti Sid Kore i dir:  “Kantmenm mon annan bann gro problenm, enn fwa ki mon’n priye, mon santi mon soulaze e mon santi ki mon annan lafors pour andire.” Cecilia sorti Filipin, i dir: “Lefet ki mon en manman, mon enkyet en kantite pour mon bann fiy e osi pour mon prop manman ki aprezan nepli kapab rekonnet mwan. Me lapriyer i ed mwan pour annan mwens lenkyetid sak zour. Mon konnen ki Zeova pou ed mwan pran swen avek zot.”

I donn rekonfor ek lafors dan leprev.

Eski ou santi ou anba en ta presyon, petet ou lavi i an danze oubyen ou dan en sityasyon difisil? Ou pou ganny soulaze si ou priy avek “sa Bondye ki touzour donn konsolasyon.” Labib i dir: “I konsol nou dan nou bann soufrans.” (2 Korentyen 1:3, 4) Par egzanp, en fwa ler Zezi ti dan en gran  lenkyetid, “i ti azenou e i ti priye.” Ki ti arive? “En lanz sorti dan lesyel, ti aparet devan li e i ti ankouraz li.” (Lik 22:41, 43) En lot zonm fidel, Neemya ti sibir bann menas avek bann move dimoun ki ti pe esey anpes li fer travay Bondye. I ti priye: “Aprezan mon priye, donn mwan lafors.” Sa bann levennman ki ti swiv i montre ki vreman Bondye ti ed li pour sirmont son lafreyer e pour reisi dan son travay. (Neemya 6:9-16) Reginald sorti Gana i rakont son leksperyans konsernan lapriyer: “Ler mon priye, sirtou dan bann moman kot mon anba presyon akoz difikilte, mon annan sa santiman ki mon’n dir mon problenm avek en dimoun ki annan sa posibilite pour ed mwan e ki asir mwan ki napa okenn rezon pour enkyet.” Wi, Bondye i kapab rekonfort nou ler nou priy li.

Lasazes sorti kot Bondye.

Serten desizyon ki nou fer i kapab afekte nou tou nou lavi e bann ki nou kontan. Ki mannyer nou kapab fer bann bon swa? Labib i dir: “Si i annan parmi zot ki mank lasazes [sirtou ler pe pas dan bann leprev], ki i demann Bondye e Bondye a donn li parski i donn tou dimoun zenerezman san fer okenn repros.” (Zak 1:5) Si nou priye pour ganny lasazes, Bondye i kapab servi son lespri sen pour gid nou pour fer bann bon desizyon. An realite, nou kapab sirtou demann led lespri sen parski Zezi i asir nou ki nou “Papa ki dan lesyel pou donn son Lespri Sen tou bann ki demann li.”​—Lik 11:13.

Menm Zezi ti santi ki i ti bezwen demann son Papa led ler i ti annan bann desizyon enportan pour fer. Labib i dir ki “i ti priy Bondye tou lannwit” ler i ti pe swazir 12 zonm ki ti pou vin son bann zapot.​—Lik 6:12.

Zis parey Zezi, en kantite dimoun ozordi i santi zot soulaze ler zot in vwar ki mannyer Bondye in reponn zot lapriyer pour fer bann bon desizyon. Regina ki sorti Filipin i dir ki i’n fer fas avek en kantite problenm, par egzanp apre lanmor son msye, i ti bezwen okip son lekor ek son fanmir, i ti perdi son travay e pas atraver bokou difikilte pour elve son bann zanfan. Kwa ki ti ed li fer bann bon desizyon? I dir: “Mon depan lo Zeova atraver lapriyer.” Kwabena sorti Gana, i eksplike akoz i ti demann led Bondye, “Mon ti perdi mon travay dan konstriksyon ki ti byen peye.” An rapor avek bann opsyon ki i ti annan, i dir: “Mon ti toultan priy Zeova pour ed mwan fer sa bon desizyon.” I azoute, “Mon vreman santi ki Zeova in ed mwan swazir en bon travay ki permet mwan pran swen avek mon bann bezwen fizik e spirityel.” Ou osi ou kapab eksperyans gidans Bondye si ou priy konsernan bann keksoz ki kapab afekte ou relasyon avek li.

Nou’n mansyonn zis detrwa keksoz ki lapriyer i kapab fer pour ou. (Pour plis legzanp, vwar sa bwat “ Byenfe lapriyer.”) Me pour ou ganny sa bann byenfe, premyerman ou bezwen aprann konn Bondye ek son lavolonte. Si sanmenm sa ki ou anvi, nou ankouraz ou pour demann bann Temwen Zeova pour ed ou etidye Labib. * Sa i kapab premye pa pour ou vin pli pros avek “sa Enn ki ekout lapriyer.”​—Psonm 65:2.

[Not anba lo paz]

[Ekstre lo paz 7]

“Larg ou fardo lo Zeova e i pou soutenir ou.”​—Psonm 55:22

[Bwat lo paz 7]

 Byenfe lapriyer

Lape lespri “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.”​—Filipyen 4:6, 7.

Konsolasyon sorti kot Bondye ‘Nou rann glwar Bondye, Papa nou Senyer Zezi-Kri, Papa ki ranpli avek labonte, Bondye ki touzour donn konsolasyon. I konsol nou dan nou bann soufrans.’​—2 Korentyen 1:3, 4.

Gidans pour fer bann bon desizyon “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.”​—Zak 1:5.

Led pour evite ganny tante “Priye pour zot pa ganny tante.”​—Lik 22:40.

Pese ganny pardonnen “Si mon pep ki port mon non i demontre limilite, priye, rod mwan e kit zot move aksyon, alor depi lesyel mon pou tann zot e pardonn zot pese.”​—2 Kronik 7:14.

En fason pour ed lezot “Lapriyer senser en zonm zis i annan en gran pisans.”​—Zak 5:16.

Ganny ankouraze ler lapriyer i ganny reponn “Zeova i dir avek li [Salomon]: ‘Mon’n tann ou lapriyer ek demann ki ou’n fer devan mwan.’”​—1 Lerwa 9:3.

[Portre lo paz 6, 7]

Lapriyer i kapab donn ou lafors ler ou pas dan bann leprev

[Portre lo paz 8]

“Mon ti toultan priy Zeova pour ed mwan fer sa bon desizyon.”​—Kwabena, Gana