LABIB I SANZ LAVI

Ozordi mon santi ki mon kapab ed lezot

Rakonte par Julio Corio

NE: 1981

PEI NATAL: GWATEMALA

LEPASE: MOVE LANFANS

MON LAVI DAN LEPASE: Mon ti ne dan en lavil izole ki apel Acul, ki trouve dan bann montanny lo kote was Gwatemala. Mon fanmir i form par pep Ixil, en group etnik sorti dan desandans Maya. Mon koz Espanyol e osi bann dyalek lokal. Mon ti ne dan en letan kot ti annan lager sivil Gwatemala ki ti dire pour 36 an. Bokou dimoun ti mor pandan sa letan.

Ler mon ti annan kat-r-an, mon frer ki ti annan set an ti pe zwe avek en grenad ki ti eksploze par aksidan. Akoz sa aksidan, mon ti nepli vwar kler e malerezman, mon frer ti perdi son lavi. Apre sa, mon ti pas mon lanfans dan en lenstitisyon pour bann manrmay ki pa vwar kler dan Lavil Gwatemala e laba mon ti aprann Bray. Mon pa ti tro konpran akoz, me bann dimoun ki ti travay laba ti anpes mwan koz avek lezot manrmay e bann manrmay dan mon laklas osi ti evit mwan. Toultan mon ti tousel e mon ti zis esper sa de mwan sak lannen kot mon ti kapab al dan lakour kot mon manman ki ti touzour zantiy e rekonfort mwan. Malerezman, ler mon ti ganny di-z-an, i ti mor. Mon ti santi ki mon ti’n perdi sa sel dimoun dan lemonn ki kontan mwan, sa ti tap mwan en kantite.

A laz 11 an, mon ti retourn kot mon ti’n ne e viv avek mon frer kote papa ek son fanmir. Zot ti donn mwan sa ki mon ti bezwen fizikman, me emosyonnelman personn pa ti kapab ed mwan. Par ler mon ti demann Bondye: “Akoz mon manman in mor? Akoz mon pa vwar kler?” Dimoun ti dir mwan ki sa bann move keksoz ti lavolonte Bondye. Alor mon ti mazinen ki Bondye napa santiman e i enzis. Sel rezon akoz mon pa ti swisid mon lekor se akoz mon ti napa en fason pour fer li.

Vi ki mon pa ti vwar kler, sa ti fer ki mon ti san defans fizikman e emosyonnelman. Mon ti ganny abize seksyelman plizyer fwa ler mon ti en zenn garson. Mon pa ti zanmen raport sa bann krim, mon ti panse ki personn pa ti pou fatig zot. Rar dimoun ti koz avek mwan e mwan mon pa ti koz avek personn. Mon ti reste dan mon pti kwen, mon ti tris e mon pa ti kapab annan konfyans dan personn.

KI MANNYER LABIB IN SANZ MON LAVI: Pandan mon ladolesans, de Temwen Zeova (en koup marye) ti vin vwar mwan pandan  letan goute. En mis kot mon lekol ti’n pran lapenn pour mwan e demann zot pour vizit mwan. Zot ti dir mwan ki Labib i promet ki bann mor pou resisite e ki en zour bann aveg pou vwar ankor. (Izai 35:5; Zan 5:28, 29) Mon ti kontan sa ki mon ti pe aprann me i ti difisil pour mwan koz avek zot parski mon pa ti abitye koze. Me kantmenm mon ti en dimoun personnel, zot ti byen zantiy e avek pasyans zot ti vizit mwan pour ansenny mwan lo Labib. Sa koup ti mars plis ki 10 kilomet e travers en montanny pour ariv kot mon lavil.

Mon frer kote papa ti dir mwan ki zot ti byen sanze, annord e ki zot pa ti ris. Me zot ti touzour demontre vre lentere dan mwan e donn mwan bann pti kado. Mon ti santi ki zis bann vre Kretyen ki ti pou demontre sa kalite leta lespri sakrifis.

Mon ti servi bann piblikasyon Bray pour etidye Labib. Menm si mon ti konpran sa ki mon ti pe aprann, i ti annan bann keksoz ki mon ti vwar difisil pour aksepte. Par egzanp, i ti difisil pour mwan krwar ki Bondye ti vreman kontan mwan personnelman e ki lezot dimoun ti kapab santi parey anver mwan. Mon ti konpran akoz Zeova ti permet lemal pour lemoman, me i ti difisil pour mwan vwar li konman en Papa ranpli avek lanmour. *

Ptitapti, sa ki mon ti aprann dan Labib ti ed mwan sanz mon fason panse. Par egzanp, mon ti aprann ki Bondye i vreman santi douler bann ki soufer. Konsernan son bann adorater ki ti pe ganny maltrete, Bondye ti dir: “Mon’n vreman vwar soufrans ki mon pep i ladan . . . Mon konn tre byen sa douler ki lo zot.” (Egzod 3:7) Pour tou sa bann zoli kalite ki Zeova i annan, sa ti pous mwan pour dedye mon lavi avek li. An 1998, mon ti batize konman en Temwen Zeova.

Apre enn an batenm, mon ti asiste en kour pour bann aveg pre avek lavil Escuintla. En ansyen dan kongregasyon laba ti aprann ki mon ti annan bann difikilte pour asiste renyon akoz mon ti reste lwen. Pour ariv kot sa kongregasyon ki pli pre avek mwan mon ti bezwen travers sa menm montanny ki sa koup ti’n bezwen traverse pour vin etidye avek mwan e i ti difisil pour fer sa. Pour ed mwan, sa ansyen ti pran kontak avek en fanmir Temwen Escuintla ki ti pare pour les mwan viv avek zot e pour ed mwan asiste bann renyon. Ziska ozordi zot pran swen avek mwan konmsi mon ti zot fanmir.

Mon ti pou kapab rakont bokou plis legzanp lanmour ki bann frer ek ser dan kongregasyon in demontre anver mwan. Konman en Temwen Zeova tousala i konvenk mwan ki mon parmi bann vre Kretyen.​—Zan 13:34, 35.

KI BYENFE MON’N GANNYEN: Mon nepli santi ki mon napa okenn valer e san lespwar. Ozordi mon annan en bi dan lavi. Konman en serviter a plen tan, mon konsantre pour ed lezot aprann bann laverite dan Labib ki parey en trezor, olye konsantre lo mon dezabilite. Mon osi annan sa privilez pour servi konman en ansyen e fer bann diskour piblik dan plizyer kongregasyon. Mon’n menm ganny sa privilez pour fer bann diskour baze lo Labib pandan bann lasanble rezyonal kot plizyer milye dimoun i asiste.

An 2010, mon ti asiste Lekol Formasyon Ministeryel (ki aprezan i apel Lekol pour bann predikater Rwayonm) ki ti ganny fer El Salvador. Sa lekol in pli byen prepar mwan pour desarz mon bann responsabilite dan kongregasyon. Sa formasyon ti fer mwan santi ki Zeova i vreman kontan e apresye mwan e ki i kapab servi nenport ki pour fer son travay.

Zezi ti dir: “I annan plis lazwa pour donnen ki pour resevwar.” (Akt 20:35) Mon kapab dir ki ozordi mon vreman ere e ki menm si avan mon ti krwar ki i pa ti pou zanmen posib, aprezan mon santi ki mon kapab ed lezot.

[Not anba lo paz]

[Portre lo paz 12]

Mwan ek sa frer ki mon ti reste avek son fanmir

[Portre lo paz 13]

Pe fer en diskour avek mon Labib Bray