“Ler mon ti ankor zanfan, tou le zour mon gran frer ti abiz mwan fizikman e verbalman. Apre ki mon ti’n marye, mon belmer ti kontinyen tret mwan dan en move fason. Li ek mon boper ti tret mwan konmsi mon ti en lesklav. Mon ti mazinen pour mwan touy mon lekor.”—Madhu, a Lenn.

 Lorganizasyon Mondyal pour Lasante i dir ki “bann madanm partou dan lemonn i fer fas avek vyolans.” Apepre enn dan trwa madanm i ganny abize fizikman oubyen seksyelman omwen en fwa dan zot lavi.

 Si sa in deza arive avek ou, ou kapab santi ki ou pa an sekirite e ki nenport landrwa kot ou ale ou kapab ganny abize verbalman, fizikman oubyen seksyelman. Vi ki sa bann move keksoz i ariv avek bann madanm, sa i kapab fer ou santi ki laplipar dimoun i krwar ki bann madanm pa enportan. Me eski bann madanm i enportan pour Bondye?

 Verse Labib: “[Bondye] ti kree zot, zonm ek fanm.”—Zenez 1:27.

 Ki sa i vedir: Bondye ti kree zonm ek fanm. Pour li, zot tou le de zot devret ganny respekte. An plis ki sa, i ekspekte ki en msye i “kontan son madanm parey i kontan son lekor” e i pa esey kontrol li avek bann parol ki blesan oubyen avek vyolans. (Efezyen 5:33; Kolosyen 3:19) I kler ki Bondye i anvi ki bann madanm i santi zot an sekirite.

 “Ler mon ti ankor zanfan, mon bann fanmir ti abiz mwan seksyelman. Ler mon ti annan 17 an, mon anplwayer ti dir mwan ki i ti pou pous mwan si mon pa ti annan relasyon seksyel avek li. Konman en adilt, mon msye, mon bann paran ek mon bann vwazen napa respe pour mwan. Me pli tar, mon ti aprann konsernan Zeova, b nou Kreater. I annan respe pour bann madanm. Sa ti fer mwan asire ki i kontan mwan e ki mon presye pour li.”—Maria, Larzantin.

 Verse Labib: “I annan en zanmi ki pli fidel ki en frer.”—Proverb 18:24.

 Ki sa i vedir: En vre zanmi pou siport ou. Si ou kapab, koz avek en dimoun ki ou annan konfyans ladan lo ki mannyer ou pe santi.

 “Pour 20 an mon pa ti dir personn ki mon ti’n ganny abize seksyelman. Sa ti fer mwan malere, enkyet e mon ti ganny depresyon. Me ler mon ti finalman koz lo sa ki ti’n arive avek mwan avek en dimoun ki ti pare pour ekout mwan, mon ti santi mwan vreman soulaze.”—Elif, Latirki.

 Verse Labib: “Larg tou zot traka lo [Bondye] akoz i enterese avek zot.”—1 Pyer 5:7.

 Ki sa i vedir: Bondye i vreman ekout ou ler ou priye. (Psonm 55:22; 65:2) Vi ki i enterese avek ou, i kapab ed ou konpran ki ou presye pour li.

 “Ler mon ti aprann lo Zeova, mon ti kapab konmans rekipere emosyonnelman. Aprezan, mon kapab koz avek Bondye dan lapriyer e dir li tou sa ki mon pe santi. I parey en zanmi ki konpran byen ki mannyer mon santi.”—Ana, Beliz.

 Verse Labib: “Zeova . . . pou fer bann orfelen ek bann ki ganny abize ganny lazistis, pour ki dimoun i nepli fer zot per.”—Psonm 10:17, 18.

 Ki sa i vedir: Byento, Bondye pou tir tou lenzistis e sa i enkli kriyote ek vyolans ki pe arive avek bann madanm.

 “Ler mon’n aprann ki byento Zeova pou fer bann madanm ek bann zenn fiy aret soufer, sa in rekonfort mwan en kantite. Sa in fer mwan santi mwan anpe.”​—Roberta, Meksik.

 Pour ou kapab aprann plis lo ki mannyer Labib i donn nou lespwar, akoz ou kapab annan konfyans dan son bann promes e ki mannyer bann Temwen Zeova i servi Labib pour ed bann dimoun, demann pour vin vizit ou.

 Download en kopi sa lartik ki ou kapab enprimen.