Serten paran ki travay i deside pour met zot zanfan dan en deker ki en fasilite en pe parey en laklas. Eski ou devret met ou zanfan dan deker?

•  Kestyon ki ou devret demande?

•  Sa ki ou kapab fer

 Si mon met mon zanfan dan deker, eski sa pou afekte mon relasyon avek li? I posib. Dan bann premye lannen dan lavi en zanfan, son laservel i devlop vitman e sa i kapab afekte son relasyon avek lezot. O tan ki posib, esey reste avek ou zanfan pandan son bann premye lannen akoz sa i en moman enportan ki pou annan en lefe lo li tou dilon son lavi.​—Deterononm 6:6, 7.

•    Bann paran ki pe mazin met zot zanfan dan deker, i devret reflesir lo ki mannyer pour gard en relasyon pros avek zot zanfan.

 Si mon met mon zanfan dan deker, eski mon pou kontinyen annan menm lenfliyans lo li? Sa liv Hold On to Your Kids i dir: “Plis letan ki en zanfan i pase avek lezot zanfan, pli zot enfliyans kanmarad.”

•    Bann paran ki pe mazin met zot zanfan dan deker, i devret reflesir lo si zot pour kontinyen annan menm lenfliyans lo zot zanfan.

 Si mon met mon zanfan dan deker eski i pou pli fasil pour mon zanfan aprann ler i al lekol? Serten paran i dir wi. Lezot i dir ki deker napa bokou oubyen ditou lefe lo abilite pour en zanfan aprann. Nenport kwa ki dimoun i dir, Penelope Leach ki en psikolog pour bann zanfan i ekri: “Pa krwar ki i ‘ledikasyon’ ki pour fer en zanfan annan en pli bon lavi e pa krwar ki i touzour pli bon pour en zanfan konmans lekol pli boner posib. Si ou krwar sa, petet ou pa realize ki kantite ou zanfan in benefisye avek tou sa ki ou’n ansenny li depi son nesans.”

•   Bann paran ki pe mazin met zot zanfan dan deker, i devret reflesir lo si sa i neseser e si i pour ed sa zanfan ler i al lekol.

 Eski i posib pour ou oubyen ou konzwen reste avek ou zanfan dan plas al travay? Dan serten ka, tou le de paran i travay zis pour annan en lavi pli konfortab. Eski i neseser pour tou le de travay?

•   Bann paran ki pe mazin met zot zanfan dan deker i devret reflesir lo si i posib pour koup zot depans pour ki en paran i reste kot lakour.

 Sa desizyon pour met ou zanfan dan deker i devret ganny fer selman apre ki ou’n reflesir seryezman lo son bann lavantaz ek dezavantaz. Me ki ou pou fer, si apre ki ou’n reflesir ou santi ki ou bezwen met ou zanfan dan deker?

 Labib i dir: “En dimoun pridan i gete kote i met son lipye.” (Proverb 14:15) Si ou reflesir lo sa prensip, sa pour ed ou pour swazir en bon landrwa pour kit ou zanfan.

 Konn bann opsyon

•   Serten paran i swazir pour kit zot zanfan kot en dimoun ki vey zanfan kot lakour. Normalman i annan enn oubyen detrwa dimoun ki vey en pti group zanfan dan sa lakour.

•   Lezot paran i annan enn zot fanmir ki vey zot zanfan, oubyen en lot dimoun ki vin vey sa zanfan kot zot.

 Tou sa bann opsyon i annan son lavantaz ek son dezavantaz. Akoz ou pa koz avek lezot paran ki’n met zot zanfan deker? Labib i dir: “Lasazes i avek sa enn ki ekout konsey.”​—Proverb 13:10.

 Ki ou pou fer si ou swazir pour met ou zanfan dan deker?

 Rod lenformasyon lo sa deker

•   Eski sa deker i annan en laysenns oubyen i pe fonksyonn dapre lalwa? Ki kalite repitasyon i annan?

•   Eski sa landrwa i prop e an sekirite?

•   Ki bann aktivite ki i ofer? a

 Rod lenformasyon lo sa bann dimoun ki vey zanfan

•   Eski zot in ganny okenn formasyon? Sa i enkli formasyon dan ledikasyon pour bann pti zanfan, premye swen ek CPR.

•   Eski ou kapab rode si sa bann dimoun ki pou vey ou zanfan i annan okenn rikord kriminel?

•   Eski zot souvan sanz travayer? Si zot sanz travayer souvan, ou zanfan pou bezwen tanzantan pe adapte avek nouvo dimoun.

•   Konbyen zanfan sak dimoun i annan pour veye? Si sak dimoun i annan en kantite zanfan pour veye, sa pou vedir ou zanfan pour ganny mwens latansyon ki i bezwen. Byensir, lakantite latansyon ki ou zanfan i bezwen i depan lo son laz ek son abilite.

•   Eski sa bann dimoun ki pe vey zanfan i pare pour koz avek ou lo okenn problenm ki i annan?