To ou tar, ou zanfan pou bezwen fer fas avek serten dezapwentman oubyen lobstak. Ki mannyer ou kapab ed zot reganny zot stabilite?

•  Ki ou devret konnen?

•  Ki ou kapab fer?

 Dezapwentman i form parti lavi. Labib i dir ki “nou tou nou souvan fer fot.” (Zak 3:2) Bann zanfan osi i fer fot. Toudmenm, bann lobstak i annan son bon kote, i donn loportinite bann zanfan pour devlop rezilyans oubyen perseverans. Zanfan pa neseserman ne avek sa abilite, me zot kapab devlop li. En manman ki apel Laura i dir, “Nou de mon msye nou’n obzerve ki i pli bon ler bann zanfan i aprann fer fas avek en dezapwentman olye fer konmsi sa keksoz pa’n zanmen arive. Zot kapab aprann persevere ler keksoz i al mal.”

 Bokou zanfan pa kapab fer fas avek dezapwentman. Serten zanfan pa’n aprann fer fas avek dezapwentman akoz zot paran pa ed zot pour pran responsabilite pour sa ki zot fer. Par egzanp, si en zanfan i ganny en move rezilta pour son legzanmen lekol, sa paran pou taye pour blanm son ansenyan pour sa. Si en zanfan i ganny en problenm avek son zanmi, son paran pou taye pour blanm sa zanmi.

 Me ki mannyer en zanfan i kapab vreman pran responsabilite son bann fot si son paran i protez li kont tou son bann konsekans?

•   Ansenny ou zanfan ki son aksyon i annan konsekans.

   Labib i dir: “Sa ki en dimoun pe senmen, sanmenm ki i pou rekolte osi.”​—Galat 6:7.

   En aksyon i anmenn en rezilta. Domaz i vin avek son kou. En fot i annan son konsekans. Zanfan i devret konn sa prensip ki sa ki nou fer i annan son konsekans e zot devret santi zot responsab a en serten degre pour sa ki’n arive. Alors, evite blanm lezot oubyen rod leskiz pour ou zanfan. O kontrer, les zot eksperyans serten konsekans ki apropriye pour zot laz. Byensir en zanfan i bezwen byen konpran ki mannyer move aksyon i relye avek son move konsekans.

•   Ed ou zanfan trouv solisyon.

   Prensip Labib: “Sa enn ki zis i kapab tonm set fwa, me i pou touzour leve.”​—Proverb 24:16.

   Ler nou pa arive fer en keksoz, sa i kapab vreman dezapwentan, me i pa lafen dimoun. Ed ou zanfan konsantre lo rod solisyon olye rod rezon akoz sa ki’n arive i enzis. Par egzanp, si ou zanfan in fel en legzanmen lekol, ed li vwar ki mannyer i kapab pran kontrol son sityasyon par met plis zefor dan son letid e determinen pour fer pli byen laprosenn fwa. (Proverb 20:4) Si ou fiy in ganny en largiman avek en zanmi, ed li vwar ki mannyer i kapab pran linisyativ pour aranz keksoz, ki i annan tor oubyen rezon.​—Romen 12:18; 2 Timote 2:24.

•   Ansenny ou zanfan pour vin modes.

   Prensip Labib: “Mon dir zot tou ki la pour pa annan en tro gran lopinyon lo zot lekor.”​—Romen 12:3.

   I pa ni realistik ni dan lavantaz ou zanfan pour dir li ki i “meyer” dan en serten keksoz. Apre tou, menm bann zanfan ki fer tre byen kot lekol pa pou toultan ganny en rezilta parfe. Bann ki fer byen dan serten sport osi pa pou toultan sorti venker. Bann zanfan ki annan en pwennvi modes lo zot lekor i pli kapab fer fas avek bann dezapwentman ek lobstak.

   Labib i dir ki difikilte i fer nou vin pli for e ed nou devlop landirans. (Zak 1:2-4) Alor menm si dezapwentman ek lobstak i kapab vreman dekourazan, ou kapab ed ou zanfan vwar zot dan en bon fason.

   I demann letan ek zefor pour ansenny ou zanfan pour devlop rezilyans oubyen perseverans zis parey ou ti pou ansenny zot en nenport skil. Me zot pou benefisye ler zot pas atraver ladolesans. Liv Letting Go With Love and Confidence i dir, “I tre probab ki bann adolesan ki konnen konman fer fas avek difikilte pa pou al fer bann keksoz danzere oubyen bet kan zot fer fas avek difikilte. Zot annan plis sans pour epanouir dan bann nouvo sityasyon ki zot pa ti pe ekspekte.” Byensir, rezilyans pou benefisye zot kan zot vin adilt osi.

 Esey sa: Montre legzanp. Gard antet ki fason ki ou fer fas avek dezapwentman dan lavi pou ed ou zanfan kan zot fer fas avek dezapwentman zot osi.