Ou garson i dir ou ki i pe ganny bouli kot lekol. Ki ou kapab fer? Eski ou pou demann lekol pour pini sa zanfan ki pe bouli li? Eski ou pou montre ou zanfan ki mannyer i pour defann son lekor? Avan ou fer en desizyon, reflesir lo serten fe konsernan bouli. a

•  Ki mon devret konnen lo bouli?

•  Ki mannyer mon kapab ede?

 Ki savedir bouli? Bouli i en aksyon ki kontinyel e i ganny fer par ekspre pour fer ditor en dimoun fizikman oubyen emosyonnelman. Par kont, pa tou lensilt oubyen aksyon agresiv ki vedir ki ou pe ganny bouli.

 Akoz i enportan pour konnen?: Serten dimoun i servi sa term “bouli” pour refer avek tou konportman ki blesan, menm si i pa sitan grav. Serten paran i entervenir sak fwa ki en dimoun i fer zot zanfan en keksoz, menm si i pa sitan grav. Par kont, sa i anpes sa zanfan aprann rezourd bann problenm, en keksoz ki i pou bezwen fer la e ler i vin en adilt.

 Prensip Labib: “Pa pran lakoler tro vit.”​—Eklezyast 7:9.

 A lafen dizour: Menm si ou bezwen entervenir dan serten sityasyon, i annan lezot sityasyon ki pou kapab donn ou zanfan en loportinite pour aprann rezourd problenm ki i rankontre avek dimoun.​—Kolosyen 3:13.

 Ki ou kapab fer si ou zanfan i dir ou ki i pe kontinyelman ganny bouli?

•   Avek pasyans ekout ou zanfan. Esey konpran (1) ki pe arive e (2) akoz i pe ganny bouli. Pa esey tir konklizyon avan ler ou konnen ki’n vreman arive. Demann ou lekor, Eski i annan serten keksoz ki mon pa konnen? Pour konn tou detay lo sa ki’n arive, petet ou bezwen koz avek ansenyan ou zanfan oubyen paran sa lot zanfan.

   Prensip Labib: “Sa enn ki reponn avan ekoute, i montre konman i bet e i ganny gognarde.”​—Proverb 18:13.

•   Si ou zanfan pe ganny bouli, ed li realize ki lafason ki i reakte i kapab fer keksoz amelyore oubyen vin pli pir. Par egzanp, Labib i dir: “En larepons trankil i repous lakoler; me en parol brit i provok lakoler.” (Proverb 15:1) Byensir, revanze i kapab fer en sityasyon vin pli pir, akoz sa i kapab fer sa bouli entansifye son bann latak dan plas arete.

   Prensip Labib: “Pa rann mal pour mal, lensilt pour lensilt.”​—1 Pyer 3:9.

•   Eksplik ou zanfan ki i pa en kapon si i refize revanze. O kontrer, sa i montre ki i for akoz i refize ganny kontrole par en lot dimoun. Dan en sans, i pe bat en bouli san ki li menm i vin en bouli.

   I vreman enportan pour ou zanfan gard sa antet sirtou si i pe ganny bouli lo Enternet. Si ou zanfan pe esey revanze lo Enternet, sa pou fer sa bouli anvi kontinyen e sa i kapab fer ou zanfan vin en bouli li menm! Pour sa rezon, parfwa pli bon larepons i ler ou pa reponn. Sa i en taktik ki pou fer ou zanfan annan kontrol lo sa sityasyon e aret fer sa dimoun aret bouli li.

   Prensip Labib: “[Si napa] dibwa, dife i tennyen.”​—Proverb 26:20.

•   Dan serten ka, ou zanfan i kapab evit bann dimoun ek landrwa kot i kapab ganny bouli. Par egzanp, si i konnen kote sa dimoun oubyen group dimoun ki bouli li i kapab ete, i kapab evit problenm si i pa al dan sa menm landrwa.

   Prensip Labib: “Ler maler i vini, en zonm pridan i war e i al kasyet; sa enn ki san leksperyans, i fonse e pey son konsekans.”​—Proverb 22:3.

 ESEY SA: Ed ou zanfan pour mazin lo lavantaz ek dezavantaz lo sa ki i deside pour fer. Par egzanp:

•  Ki i kapab arive si i zis inyor sa bouli?

•  Avek lardyes i demann sa bouli pour arete?

•  Si i raport sa bouli kot lekol?

•  Eski i kapab esey koz zantiman avek sa bouli oubyen fer bann pti dyok pour li arete?

 Nenport ki landrwa ki sa dimoun i bouli ou zanfan, sak sityasyon i diferan. Alor, ed ou zanfan pour trouv en solisyon ki pratik. Donn li sa lasirans ki ou pou siport li dan sa sityasyon.

 Prensip Labib: “En vre zanmi i toultan demontre lanmour e i en frer ki la dan letan maler.”​—Proverb 17:17.