Serten adolesan pa respekte sa ler ki zot paran i donn zot pour antre kot lakaz. Lezot i anbet zot paran par koz manti oubyen sove pour pas letan avek zot zanmi. Ki ou kapab fer si ou zanfan i fer en keksoz ki fer ou perdi konfyans dan li?

•  Eski mon adolesan i en rebel?

•  Ki mon devret fer si mon adolesan in anbet mwan?

•  Lekel ki devret ganny blanmen?

•  Ki mannyer mon kapab ed mon zanfan reganny mon konfyans?

•  Ki lezot paran i dir?

 Pa neseserman. Labib i dir: “Zanfan i kontan sa ki paret bet” e souvan sa ki bann adolesan i fer i montre ki sa i vre. (Proverb 22:15) Dr. Laurence Steinberg i dir: “Bann adolesan i fer serten desizyon bet e tro vitman. Nou bezwen ekspekte ki zot fer fot.” a

 Pa bezwen krwar ki ou adolesan i fer ekspre pour dezobei ou. Letid i montre ki bann adolesan i enterese pour konnen ki zot paran i dir lo zot, menm si zot fer krwar i pa leka. Menm si parfwa ou adolesan pa montre, i kapab ki i dezapwente avek son lekor e i menm enkyet akoz in dezapwent ou.

•    Eski i son lanvironnman? Labib i dir: “Move frekantasyon i gat bann bon labitid.” (1 Korentyen 15:33) Vreman, zanmi i kapab annan en gran lenfliyans lo bann adolesan. Rezo sosyal ek bann piblisite osi i kapab fer menm lefe. Deplis, bann adolesan i mank leksperyans e tousala i fer ki zot fer bann move desizyon. Byensir, zot bezwen aprann pran responsabilite pour zot desizyon si zot anvi vin bann adilt responsab.

•    Ki mon’n fer? Ou kapab krwar ki ou ti tro strik avek ou zanfan e sanmenm sa ki’n fer li dezobei ou. Petet ou kapab krwar ki ou ti tro lesefer avek ou zanfan e ou’n donn li tro bokou laliberte. Olye konsantre lo sa ki ou’n mal fer, konsantre lo sa ki ou kapab fer pour rezourd sa problenm.

•   Kontrol ou reaksyon. Petet ou adolesan i ekspekte ou pran lakoler avek li. Akoz ou pa azir dan en fason diferan? Dan en fason kalm, diskit lo akoz i’n azir dan sa fason. Eski i ti kirye? Annwiye? Tousel? Dezespere pour ganny zanmi? Tousala pa en leskiz pour sa ki i’n fer mal, me i kapab ed ou ek ou adolesan pour pli byen konpran akoz i’n azir dan sa fason.

   Prensip Labib: “En dimoun i devret pare pour ekoute, me i devret pran letan avan koze e avan pran lakoler.”​—Zak 1:19.

•   Ed ou adolesan pour reflesi lo sa ki’n arive. Demann li bann kestyon parey, ki ou’n aprann atraver sa leksperyans? Ki ou pou fer diferan si ou trouv ou dan sa sityasyon ankor? Sa bann kestyon i kapab ed ou adolesan devlop son abilite pour rezonnen.

   Prensip Labib: “Korize, reprimande, donn konsey, fer tousala avek bokou pasyans e par ansenny byen.”​—2 Timote 4:2.

•   Ed zot vwar ki zot aksyon i annan konsekans. I pou pli bon si ou disiplin ou adolesan dapre sa ki i’n fer mal. Par egzanp, si ou adolesan in pran ou transpor san demande, ou kapab anpes li dray pour en serten letan.

   Prensip Labib: “Sa ki en dimoun pe senmen, sanmenm ki i pou rekolte osi.”​—Galat 6:7.

•   Rod fason pour reganny konfyans. Sa pa pou ariv deswit. Par kont, ou adolesan i devret konpran ki menm si i’n fer en keksoz ki’n fer ou perdi konfyans dan li, avek letan i kapab reganny ou konfyans. Fer sir ki i konpran sa. Si ou adolesan i santi ki i pa pou zanmen reganny ou konfyans, i kapab aret fer zefor.

   Prensip Labib: “Pa bezwen fer zot zanfan ankoler pour ki zot pa dekouraze.”​—Kolosyen 3:21.