Ler bann koup marye napa menm lentere, labitid ouswa zot personnalite i diferan, i kapab difisil pour zot. Me i vin pli difisil ankor ler zot bezwen pran serten desizyon dan serten domenn parey sa bann ki swiv:

•   Ki kantite letan pour pase avek fanmir

•   Ki mannyer pour depans larzan

•   Eski zot pou annan zanfan

 Ki ou kapab fer si ou ek ou konzwen pa tonm dakor lo sa bann size?

•  Sa ki ou devret konnen

•  Sa ki ou kapab fer

 Al byen ansanm pa vedir ki de dimoun i parey. Menm en koup i paret pe al byen ansanm, i pa vedir ki zot pou touzour annan menm pwennvi, menm lo bann topik pli serye.

 “Mon’n grandi dan en fanmir kot nou ti touzour ansanm. Dan wikenn, nou ti kot granmanman, granpapa, tonton, tantin ek kouzen kouzin. Fanmir mon msye pa ti vreman pas letan avek kanmarad. Alor nou pwennvi konsernan lakantite letan ki nou sipoze pase avek lafanmir ouswa lakantite letan nou pase pour koze avek en fanmir ki reste lwen i diferan.”​—Tamara.

 “Lafason ki nou’n grandi i fer ki mwan ek mon madanm nou annan diferan pwennvi lo fason ki nou devret depans nou larzan. Ler nou ti’n fek marye, tanzantan nou ti dispit akoz sa. Problenm pa ti rezourd deswit, menm apre enn de koze.”​—Tyler.

 Serten problenm pa kapab ganny rezourd par en senp konpromi. Par egzanp, si en manm fanmir i malad e bezwen ganny okipe. Oubyen si enn i anvi zanfan e lot pa anvi? a

 “Detrwa fwa, nou de mon madanm, nou’n diskit pour en bon pe letan lo sa size pour annan zanfan. Pli ale sa i preokip son lespri plis ankor e nou vin pli diferan ankor dan sa laspe. Mon pa vwar ki mannyer nou kapab fer konpromi.”​—Alex.

 Ou maryaz i kapab reisi menm si zot lopinyon i diferan. Serten eksper i dir ki si ou ek ou konzwen pa pe tonm dakor lo bann size vreman serye, ou devret fer tou sa ki ou kapab pour ganny sa ki ou oule, menm si sa i vedir met en lafen avek ou maryaz. Me sa “solisyon” i met tro bokou lanfaz lo ou santiman e i pa pe pran kont ou ve ki ou ti fer devan Bondye pour reste avek ou konzwen dan botan ek movetan.

 Determinen pour onor ou ve maryaz. Si ou determinen pour gard ou ve maryaz, ou pou pli pare pour fer fas avek zot problenm konman en tim non pa konman de oponan.

 Prensip Labib: “Sa ki Bondye in ini ansanm zonm pa devret separe.”​—Matye 19:6.

 Kalkile konbyen i pou koute. Par egzanp, si enn i anvi zanfan e lot pa anvi. I annan plizyer fakter pour pran kont, par egzanp:

•   Eski zot annan en bon relasyon maryaz?

   Eski zot maryaz pou kapab tenir bann presyon an plis ki vin avek elve zanfan?

•   Responsabilite en paran.

   Paran pa responsab zis pour fourni manze, lenz ek en landrwa reste.

•   Ou sityasyon finansyel.

   Eski ou kapab balans ou responsabilite kot travay, kot lakour ek lezot responsabilite ki ou annan?

 Prensip Labib: “Lekel parmi zot ki oule konstri en lakaz ki pa premyerman asize e kalkile konbyen i pou kout li?”​—Lik 14:28.

 Pran kont tou laspe ki enplike. Petet ou pou kapab trouv en solisyon dan serten domenn ki zot pa tonm dakor. Par egzanp, si problenm i konsernan si zot pou annan zanfan, sa enn ki pe ezite i kapab demann son lekor:

•   ‘Ler mon dir mon pa oule zanfan, eski sa i vedir mon pa oule ditou oubyen mon pa oule zanfan pour lemoman?’

•   ‘Eski mon ezite akoz mon pa asire si mon pou vin en bon paran?’

•   ‘Eski mon per pangar mon konzwen ava negliz mwan?’

 De lot kote, sa enn ki anvi zanfan i kapab demann son lekor bann kestyon parey:

•   ‘Eski nou pare pour pran responsabilite en paran?’

•   ‘Eski nou pou annan ase larzan pour pran swen avek nou zanfan?’

 Prensip Labib: “Lasazes ki sorti dan lesyel i . . . rezonnab.”​—Zak 3:17.

 Vwar bann pwen pozitif dan pwennvi ou konzwen. De dimoun i kapab get menm keksoz e pourtan vwar li dan en fason diferan. Pareyman, en koup i kapab get en problenm e vwar li sakenn dan son fason. Par egzanp, konsernan ki mannyer zot devret depans larzan. Ler zot pe diskit lo en problenm kot zot annan pwennvi diferan, esey diskit bann pwen ki zot annan an komen avan.

•   Ki lobzektif zot tou le de zot annan an komen?

•   Ki lavantaz i annan dan tou le de lopinyon?

•   Eski enn oubyen zot tou le de i kapab aziste zot pwennvi pour fer plezir ou konzwen?

 Prensip Labib: “Fodre pa ki sakenn i rod son prop lentere, me lentere lezot.”​—1 Korentyen 10:24.