A lafen de fen, sa bann zonm ti’n reste trankil. Petet sel son ki ti annan ti son sa divan so sorti dan dezer Arabi. Zob ti’n nepli konnen ki pour dir ankor, i ti’n epwize apre sa gran deba. Imazin li pe fikse sa trwa zonm: Elifaz, Bildad ek Zofar. I konmsi ti pe esper zot dir ankor en lot parol. Me sel keksoz zot ti kapab fer se get anba oubyen vir zot latet. Zot fristre akoz tou zot bann largiman malen ek parol blesan pa’n marse. (Zob 16:3) O kontrer, Zob i pli determinen pour defann son lentegrite.

I posib ki Zob ti panse ki son lentegrite ti sa sel keksoz ki ti reste li. I ti’n perdi tou son byen, son dis zanfan, sipor ek respe son bann zanmi ek vwazen e menm son prop lasante. Sa maladi ki i ti’n gannyen ti fer son lapo vin nwanr. I ti ranpli avek boubou ki ti’n enfeste avek lever. Menm son lespirasyon ti pi. (Zob 7:5; 19:17; 30:30) Pourtan, se sa bann lakizasyon ki ti fer Zob vreman ankoler. I ti a tou pri anvi montre ki kontrerman avek sa ki zot ti pe dir, i en dimoun ki toultan fer zefor pour fer sa ki byen. I ti napa nanryen ki zot ti kapab dir apre ki Zob ti’n aret koze. Zot ti’n nepli annan parol blesan pour dir. Par kont, Zob ti ankor pe soufer akoz zot parol. I ti vreman bezwen led e deswit!

Rezonnman Zob pa ti korek e nou kapab konpran akoz. I ti bezwen gidans ek koreksyon, ensi ki vre konsolasyon ek rekonfor. Se sa ki sa trwa zonm ti’n devret fer pour li. Eski ou’n deza santi ou koumsa, kot ou ti vreman bezwen gidans ek rekonfor? Eski en dimoun ki ou ti konsider konman en zanmi in deza dezapwent ou? Annou vwar ki mannyer Zeova ti ed son serviter Zob ek lafason ki Zob ti azir anver son led. Sa pou kapab donn ou lespwar e konnen ki pour fer dan sa bann sityasyon.

Resi Zob i revel en keksoz enteresan. I ti annan en lot dimoun ki ti la, en zenn onm ki apel Eliyou. I’n la tou sa letan. I ti pe asize trankil pe ekout sa bann zonm pli aze kot pe fer zot bann largiman. Sa ki i ti tande pa ti fer li kontan ditou.

Eliyou ti dezapwente avek Zob. I pa ti kontan vwar li pe ganny anbete pour dir ki “i annan rezon” olye Zeova. Me kantmenm sa, i ti annan konpasyon pour Zob. I ti kapab vwar ki Zob ti dan soufrans, ki i ti senser e ki i ti vreman bezwen bann bon konsey ek rekonfor. I pa drol alor ki pasyans Eliyou ti’n ariv lo bout ler i ti tann sa trwa zonm pe koze! I’n tann zot pe akiz Zob, pe esey fer li krwar i pa reste li okenn dinyite, fer li perdi son lentegrite ek lafwa dan Bondye. Pli pir ankor, zot in devir parol an dizan ki Bondye i anfet move. Eliyou ti pe esper son tour pour li koze avek enpasyans!​—Zob 32:2-4, 18.

I ti dir: “Mon ankor zenn, e zot, zot pli vye.” I pour sa rezon ki i pa ti oze koze an premye. Me i ti’n nepli kapab reste trankil. I ti azoute: “Dimoun pa ganny lasazes zis akoz i vin aze; pa laz ki fer ou konpran sa ki zis.” (Zob 32:6, 9) Dan sa ki i ti kontinyen dir, Eliyou ti montre ki sa ki i ti’n fek dir ti vre. Son lapros ti vreman diferan avek sa ki pour Elifaz, Bildad ek Zofar. I ti asir Zob ki i pa pou abes li oubyen fer li santi li pli mal ki i deza pe santi. I ti osi tret Zob avek dinyite par servi son non e dir ki sa trwa zonm ti’n mank respe pour li. * Avek respe, i ti dir li: ‘Aprezan Zob, ekout sa ki mon annan pour dir ou.’​—Zob 33:1, 7; 34:7.

Eliyou ti’n tann Zob dir, “Mon san repros, mon pa’n fer pese; mon pir” e ki kantmenm sa Bondye i trouv rezon pour repros li. Alor i ti donn li serten konsey fran ki ti tous vre problenm Zob: “Eski ou sitan asire ki ou ou byen, ki sa i fer ou dir, ‘mwan mon pli zis ki Bondye’?” Eliyou pa ti kapab les sa pwen pase. I ti dir li: “Ou napa rezon.” (Zob 33:8-12; 35:2, NWT) I ti konnen ki Zob ti vreman ankoler akoz i ti’n perdi en kantite keksoz e bann dimoun ki ti sipoze rekonfort li pa ti pe tret li byen. Me Eliyou ti met Zob an gard: ‘Atansyon! Pa les lakoler fer ou fer keksoz ki bles lezot.’​—Zob 36:18.

Pli enportan, Eliyou ti defann Zeova. I ti dir sa laverite de baz dan zis detrwa fraz: “I pa kestyon ki Bondye i komet lemal . . . Zizman Bondye liniver i touzour drwat.” (Zob 34:10, 12) I ti ed Zob konpran ki Zeova in azir avek lazistis anver li par demontre mizerikord e pa pini li pour sa bann parol blesan ek mank respe. (Zob 35:13-15) I pa ti fer krwar ki i konn tou keksoz, plito i ti dir avek limilite: “Bondye i pli gran ki sa ki nou kapab konpran.”​—Zob 36:26, NWT.

Menm si son konsey ti fran, Eliyou ti azir avek labonte anver Zob. I ti donn li en zoli lespwar ki Zeova pou redonn li son lasante. I ti dir Bondye pou dir sa lo li: “Fer son lapo vin pli fre ki dan son zenes; fer li reganny lafors son zenn tan.” En lot fwa kot Eliyou ti demontre labonte: Olye fer en sermon avek Zob, i ti envit Zob pour koz avek li, pour reponn li. I ti dir li: “Pa per koze, akoz mon anvi donn ou rezon.” (Zob 33:25, 32, NWT) Me Zob pa ti reponn, petet i ti santi ki i pa ti neseser pour li defann son lekor akoz sa bann konsey ti bon e ankourazan. Petet i ti menm plere akoz i ti pe ganny soulaze.

Nou kapab aprann en kantite keksoz avek sa bann zonm fidel. Avek Eliyou, nou kapab aprann ki mannyer pour konsey e rekonfort bann ki bezwen. En vre zanmi pa pou per pour dir ler en dimoun i vreman mal oubyen pe pran semen pour fer en move aksyon. (Proverb 27:6) Nou anvi vin sa kalite zanmi, enn ki toultan demontre labonte e ki ankourazan anver bann ki dekouraze, menm ler zot dir bann move keksoz san reflesir. Ler nou ki bezwen sa kalite konsey, legzanp Zob i rapel nou pour demontre limilite e pran aker sa konsey. Nou tou nou bezwen konsey ek koreksyon. Nou lavi pou ganny sove si nou aksepte konsey.​—Proverb 4:13.

Ler Eliyou ti koze, souvan i ti mansyonn divan, nyaz, loraz ek zekler. Par egzanp, i ti fer li ekout son divan e apre dir: “Lavwa Bondye i ronfle dan son labous parey loraz.” Zis apre i ti refer avek en “tanpet.” (Zob 37:2, 9) I paret ki anmezir Eliyou ti pe koze, en movetan ti devlope. I ti konmans avek loraz e gradyelman vin pli pir ziska ki en tanpet divan ti’n formen. Apre sa, en keksoz enpresyonan ti arive, Zeova ti koze!​—Zob 38:1.

Ler nou lir liv Zob, i rekonfortan pour lir sa bann zoli pasaz kot Zeova i koz avek Zob. Zis parey en tanpet divan i balye tou dan son semen, parol Zeova i balye tou sa bann parol blesan ki Elifaz, Bildad ek Zofar ti’n dir Zob. Zeova ti donn Zob tou son latansyon, i ti koz serye avek li, parey en papa i koriz son garson. I ti koz avek sa trwa zonm pli tar.

Zeova ti konn douler Zob. I ti annan pitye pour li zis parey i annan pour tou son bann zanfan ler zot soufer. (Izai 63:9; Zekarya 2:8) Me i ti osi konnen ki Zob ti pe koz “san konnen” e sa ti pe fer li menm fer son bann problenm pli grav. Alor Zeova ti koriz Zob par demann li plizyer kestyon pour fer li reflesir. I ti konmans par demann li: “Dir mwan si ou konpran: Kote ou ti ete ler mon ti poz fondasyon later? Dir mwan si ou krwar ou konpran.” Ler Zeova ti pe kree later, “bann zetwal granmaten,” setadir lafanmir lanz Zeova, ti kriye avek lazwa e aplodir telman zot ki kontan sa bann zoli kreasyon. (Zob 38:2, 4, 7) Byen sir, Zob pa ti konn nanryen dan tousala.

Aprezan Zeova i koz lo bann keksoz ki i’n kree. Denozour, nou ti pou dir ki Zeova ti koz avek li lo lasyans. I’n koz lo astronomi, biolozi, geology ek physics. Zeova in koz an partikilye lo plizyer zannimo ki ti viv dan sa parti later kot Zob ti pe reste, tel ki lyon, korbo, leg, Beemot (ipopotanm) e finalman Levyatan (probableman krokodil.) Imazin sa privilez: Kreater liniver pe fer en leson avek ou lo lasyans! *

Akoz Zeova in koz lo tousala? Zob ti vreman bezwen devlop en pe plis limilite. I ti santi ki Zeova ti pe maltret li e sa ti fer konplent. Me sa ti pe zis agrav son douler e elwanny li avek son Papa ki vreman kontan li. Alor Zeova ti demann li ankor e ankor kote i ti ete letan li Zeova ti kree tou sa bann keksoz merveye e si Zob ti kapab donn zot manze, kontrol zot oubyen fer zot vin dosil. Si Zob pa ti kapab reponn sa bann kestyon pli senp lo kreasyon Zeova, ki mannyer i kapab ziz son Kreater? Pa Zeova i azir e mazin dan en fason bokou pli gran ki Zob i kapab imazinen?

Dan tou sa ki Zeova in dir, nou kapab santi son lanmour pour Zob. I konmsi Zeova ti pe rezonn avek li: ‘Mon garson, si mon kapab kree e pran swen avek tou sa bann keksoz, ou pa krwar ki mon pou pran swen avek ou? Eski mon pou vreman abandonn ou, pran ou bann zanfan avek ou, pran keksoz ki fer ou santi ou an sekirite e menm ou lasante? Pa zis mwan ki kapab donn ou tou sa ki ou’n perdi e geri sa gran douler ki ou pe santi?’

Zob in koz zis de fwa ler Zeova ti pe demann li sa bann kestyon pour fer li reflesir. I pa ti ni argimante, ni esey zistifye son lekor. I ti demontre limilite par aksepte ki i pa konn preski nanryen e i ti demann pardon pour sa bann move keksoz ki i ti’n dir. (Zob 40:4, 5; 42:1-6) En zoli legzanp ki Zob in demontre lo lafwa. Apre tou sa ki i ti’n pas ladan, i’n reste en dimoun ki annan bokou lafwa. I ti pran koreksyon Zeova aker e sanz son latitid. Sa i kapab pous nou pour demann nou lekor, ‘Eski mon annan ase limilite pour aksepte koreksyon ek konsey ki mon gannyen?’ Nou tou nou bezwen sa kalite led. Nou kapab imit lafwa Zob par aksepte konsey ek koreksyon.

Zeova i aprezan pran aksyon pour rekonfort Zob dan son douler. I adres laparol avek Elifaz akoz tre probab li ki ti pli aze dan sa trwa zonm. Zeova ti dir li: “Mon ankoler kont ou ek ou de zanmi, akoz zot pa’n koz laverite lo mwan, parey mon serviter Zob in fer.” (Zob 42:7) Reflesir lo sa parol, eski Zeova ti pe dir ki tou sa ki sa trwa zonm in dir ti fo oubyen tou sa ki Zob in dir ti korek? Non pa ditou. * Par kont, i ti annan en gran diferans ant sa ki Zob ek son bann akizater ti’n dir. Leker Zob ti’n brize, i ti ranpli avek sagrinasyon e ti dekouraze akoz fo lakizasyon. Nou kapab konpran akoz parfwa i’n koz san reflesir. Par kont, Elifaz ek son de zanmi ti napa sa bann problenm. Zot in dir tou sa bann keksoz akoz zot ti arogan e napa ase lafwa dan Bondye. Zot pa’n selman atak en zonm inosan, me pli pir ankor, zot pa’n koz laverite lo Zeova. Dan zot fason koze zot ti pe anfet dir Bondye i move!

I pa drol alor ki Zeova ti demann sa bann zonm pour fer en gro sakrifis. Zot ti bezwen sakrifye set toro ek set mal mouton. Sa ti en gran sakrifis akoz pli tar Lalwa Moiz ti spesifye ki gran pret i bezwen sakrifye en toro si son pese in fer nasyon antye koupab. (Levitik 4:3) I ti zannimo pli ser ki ti bezwen ganny ofer konman sakrifis dapre Lalwa Moiz. Deplis, Zeova ti pou aksepte sakrifis sa bann zonm ki’n akiz Zob selman si Zob ti priy pour zot. * (Zob 42:8) Zeova ti retir repros ki ti’n ganny anmennen lo non Zob e fer sir ki i annan lazistis. Sirman sa ti rekonfort leker Zob!

Zeova ti konfidan ki Zob ti pou fer sa ki i ti’n demann li, setadir pardonn sa bann zonm ki ti’n bles li en kantite. Zob pa ti dezapwent son Papa. (Zob 42:9) Son lobeisans ti donn levidans son lentegrite, plis ki bokou parol. Sa ti osi fer li posib pour Bondye beni Zob en kantite.

Zeova ti “annan en kantite konpasyon ek mizerikord” anver Zob. (Zak 5:11) Dan ki fason? Zeova ti redonn li son lasante. Zis mazinen ki mannyer Zob ti santi ler i ti realize ki son lapo ti’n vreman “vin pli fre ki dan son zenes” zis parey Eliyou ti’n dir! Anfen son bann fanmir ek zanmi ti vin vwar li pour senpatiz avek li e anmenn bann kado. Zeova ti donn Zob tou sa ki i ti’n perdi, i ti donn li de fwa plis ki oparavan. Kant a lanmor son bann zanfan, ki Zeova ti fer pour soulaz Zob dan sa pli gran pert? Zob ek son madanm ti ganny en mezir rekonfor par vin paran dis lezot zanfan! I ti osi azout plizyer lannen avek lavi Zob. I ti viv pour plis ki 140 lannen ankor, ase letan pour li vwar 4 zenerasyon son bann desandans. “Finalman,” Labib i dir i “ti mor apre en lavi long e satisfezan.” (Zob 42:10-17, NWT) An plis ki sa, Zob pou reini dan Paradi avek son madanm ek zanfan, enkli sa dis ki ti mor akoz Satan.

Akoz Zeova ti beni Zob sa kantite? Labib i reponn: “Zot in tann koz lo landirans Zob.” (Zak 5:11) Zob in pas dan plis difikilte ki okenn nou in deza pas atraver. Sa mo “landirans” i fer nou konpran ki Zob in fer plis ki zis sap sa bann leprev. I’n andire avek son lafwa ek lanmour pour Zeova entak. Dan plas devlop en leker dir e vin anmer, i ti touzour pare pour pardonn menm bann ki’n fer ekspre pour fer li soufer. I pa ti ni perdi son lespwar, ni son lentegrite.​—Zob 27:5.

Sakenn nou i bezwen andire. Satan pou esey fer nou dekouraze zis parey i ti fer avek Zob. Me si nou kontinyen gard nou lafwa, demontre limilite, toultan pare pour pardonn lezot e determinen pour protez nou lentegrite, nou osi nou pou kapab annan konfyans dan sa zoli lespwar pour lavenir. (Ebre 10:36) I napa nanryen ki kapab fer Satan pli ankoler oubyen fer leker Zeova vreman kontan ki ler nou imit lafwa Zob!