Lekel ki al dan lesyel?
Sa ki Labib i dir
Bondye i swazir en serten kantite Kretyen fidel ki pou ganny resisite pou al viv dan lesyel. (1 Pyer 1:3, 4) Enn fwa ki zot in ganny swazir, zot bezwen kontinyen gard zot lafwa for e annan en bon kondwit pour zot pa perdi zot lespwar pour al dan lesyel.—Efezyen 5:5; Filipyen 3:12-14.
Ki sa bann ki al dan lesyel pour fer laba?
Zot pou travay ansanm avek Zezi konman bann lerwa ek pret pour 1,000 an. (Revelasyon 5:9, 10; 20:6) Zot pou form sa “nouvo lesyel” oubyen sa gouvernman dan lesyel, ki pou diriz lo sa “nouvo later,” oubyen bann dimoun. Sa bann ki pou dirize dan lesyel pou ede fer bann imen vin obeisan parey Bondye ti oule o konmansman.—Izai 65:17; 2 Pyer 3:13.
Konbyen ki pou ganny resisite pou al dan lesyel?
Labib i montre ki 144,000 dimoun pou ganny resisite pour al dan lesyel. (Revelasyon 7:4) Dan en vizyon dan Revelasyon 14:1-3, zapot Zan ti vwar “sa Pti Mouton ti pe debout lo Montanny Siyon e avek li, i ti annan 144,000.” Dan sa vizyon, sa “pti Mouton” i reprezant Zezi ki’n ganny resisite. (Zan 1:29; 1 Pyer 1:19) “Montanny Siyon” i reprezant sa o pozisyon ki Zezi i annan ek sa 144,000 ki pour dirize ansanm avek li dan lesyel.—Psonm 2:6; Ebre 12:22.
Bann “ki’n ganny apele e swazir” pour dirize ansanm avek Kris dan sa Rwayonm i osi ganny apele “pti troupo.” (Revelasyon 17:14; Lik 12:32) Sa i montre ki zot pou pti gin konpare avek lakantite tou bann mouton Zezi.—Zan 10:16.
Fo krwayans lo bann ki pou al dan lesyel
Fo: Tou bann bon dimoun i al dan lesyel.
Vre: Bondye i promet ki bann bon dimoun pou viv pour touzour lo later.—Psonm 37:11, 29, 34.
Zezi ti dir: “napa personn ki’n mont dan lesyel.” (Zan 3:13) Alor i ti montre ki bann bon dimoun ki ti’n mor avan li, parey Abraam, Moiz, Zob ek David, pa ti al dan lesyel. (Akt 2:29, 34) O kontrer, zot annan sa lespwar pour ganny resisite pour viv lo later.—Zob 14:13-15.
Sa rezireksyon pour al dan lesyel i ganny apele “sa premye rezireksyon.” (Revelasyon 20:6) Sa i montre ki i pou annan en lot rezireksyon. I pou enn ki pou lo later.
Labib i dir ki anba Rwayonm Bondye, “i pou nepli annan ni lanmor.” (Revelasyon 21:3, 4) Sa promes i bezwen aplik pour later, vi ki lanmor pa’n zanmen egziste dan lesyel.
Fo: Sak dimoun i swazir si i pou al viv dan lesyel oubyen lo later.
Vre: Bondye ki swazir lekel sa bann Kretyen fidel ki pou ganny “sa pri,” setadir, sa lespwar pour al dan lesyel. (Filipyen 3:14) Zot lanbisyon oubyen zot dezir personnel pa pour fer zot ganny swazir.—Matye 20:20-23
Fo: Sa lespwar pour ganny lavi eternel lo later i pa tro bon e i pour bann dimoun ki pa merite pou al dan lesyel.
Vre: Bondye i apel sa bann ki pou ganny lavi eternel lo later “mon pep,” “sa bann ki mon’n swazir” e “bann ki Zeova in beni.” (Izai 65:21-23) Zot pou annan sa privilez pour akonpli plan Zeova pour bann imen, setadir lavi eternel e parfe dan paradi lo later.—Zenez 1:28; Psonm 115:16; Izai 45:18.
Fo: Sa sif 144,000 ki ganny mansyonnen dan Revelasyon i senbolik, pa literal.
Vre: Menm si dan Revelasyon i annan bann sif ki senbolik, i annan serten sif ki literal. Par egzanp, i koz lo “sa 12 zapot sa Pti Mouton.” (Revelasyon 21:14) Annou vwar bann levidans ki montre ki sa sif 144,000 osi i devret ganny konsidere konman en sif literal.
Revelasyon 7:4 i montre “lakantite sa bann ki ti’n ganny sele, [oubyen konfirmen pour al viv dan lesyel], 144,000.” Dan menm sapit, en dezyenm group ki diferan i ganny mansyonnen: “en gran lafoul ki personn pa ti kapab konte.” Sa bann ki dan sa “gran lafoul” osi i ganny delivrans sorti kot Bondye. (Revelasyon 7:9, 10) Si sa sif 144,000 ti senbolik e i ti pe refer avek en group dimoun ki napa en kantite egzakt, alor i pa ti pou neseser pour fer en konparezon dan lakantite dimoun ki annan dan sa de group. a
Deplis, sa 144,000 i ganny “aste parmi bann imen konman bann premye fri.” (Revelasyon 14:4) Sa lekspresyon “premye fri” i reprezant en pti group ki’n ganny swazir. I dekri tre byen sa bann ki pou dirize dan lesyel ansanm avek Kris lo en gran pep lo later ki pa kapab ganny konte.—Revelasyon 5:10
a Pareyman, Profeser Robert L. Thomas ti ekri sa konsernan sa sif 144,000 dan Revelasyon 7:4. I ti dir: “Sa i en lakantite ki egzakt konpare avek sa lakantite ki pa kapab ganny konte dan 7:9. Si nou konsider sa sif konman en sif senbolik, nou pa pou kapab konsider okenn sif dan sa liv literal.”—Revelation 1-7: An Exegetical Commentary, paz 474.
Ou pou kapab kontan sa osi
ESSENTIAL BIBLE TEACHINGS
Kisisa Rwayonm Bondye?
Ler Zezi ti lo later, i ti koz lo Rwayonm Bondye plis ki lezot size. Pour plizyer syek, son bann disip in priye pour ki sa Rwayonm i vini.
LO LABIB
Seye nou letid Labib
Konmans en letid Labib enteraktif ki gratwit avek en ansenyan zis pour ou.