Eski Bondye i partou?
Sa ki Labib i dir
Bondye i kapab vwar tou keksoz e pran aksyon nenport landrwa kot i anvi. (Proverb 15:3; Ebre 4:13) Par kont, Labib pa dir ki Bondye i partou, konmsi i dan tou dimoun oubyen keksoz. O kontrer, i montre ki i en vre personnaz e i annan en landrwa kot i ete.
Laform Bondye: Bondye i en lespri. (Zan 4:24) I envizib, alor imen pa kapab vwar li. (Zan 1:18) Bann vizyon dan Labib konsernan Bondye i toultan dekrir li dan zis en landrwa an partikilye. I pa zanmen ganny dekrir konmsi i partou kote.—Izai 6:1, 2; Revelasyon 4:2, 3, 8.
Landrwa kot Bondye i ete: Bondye i reste dan en landrwa envizib, ki vreman diferan avek kreasyon fizik. Laba dan sa landrwa envizib, Bondye in fer son “demer dan lesyel.” (1 Lerwa 8:30) Labib i koz lo en lokazyon kot bann lanz ti “prezant zot devan [Zeova],” a ki dan en sans i montre ki Bondye i ete dan en landrwa spesifik.—Zob 1:6.
Si Bondye pa partou, eski i kapab pran swen avek mwan personnelman?
Wi. Bondye i vreman enterese avek sak dimoun. Menm si i ete dan en landrwa envizib, i remark bann dimoun lo later ki vreman anvi fer li plezir e i pran aksyon pour ed zot. (1 Lerwa 8:39; 2 Kronik 16:9) Annou vwar ki mannyer Zeova i montre ki i enterese avek son bann serviter ki senser:
Ler ou fer lapriyer: Zeova i tann ou lapriyer osito ki ou konmans koze.—2 Kronik 18:31.
Ler ou perdi kouraz e santi ou dan en depresyon: “[Zeova] i pros avek sa enn ki’n dekouraze. I sov sa enn ki’n perdi tou lespwar.”—Psonm 34:18.
Ler ou bezwen konsey: Zeova “pou montre ou ki semen ou pou swiv” atraver son Parol, Labib.—Psonm 32:8.
Fo krwayans lo Bondye
Fo: Bondye i partou dan tou kreasyon.
Vre: Bondye pa reste ni lo later, ni dan okenn landrwa fizik ki enkli liniver. (1 Lerwa 8:27) I vre ki zetwal ek lezot kreasyon “i rakont laglwar Bondye.” (Psonm 19:1) Me Bondye pa reste dan son kreasyon, zis parey en artis pa kapab reste dan son bann desen. Pareyman, nou aprann en kantite keksoz lo en artis atraver son travay lar. Osi, ler nou obzerv nou lemonn fizik, nou aprann ki nou Kreater i annan “bann kalite,” par egzanp pwisans, lasazes ek lanmour.—Romen 1:20.
Fo: Bondye i bezwen partou pour li kapab konn tou keksoz e montre ki i annan tou pouvwar.
Vre: Lespri sen oubyen lafors aktif Bondye, i lafors Bondye an aksyon. Atraver son lespri sen, Bondye i kapab konn tou keksoz e fer nenport kwa ki i anvi, nenport ki bor e nenport ki ler. I pa bezwen dan sa landrwa pour li azir.—Psonm 139:7.
Fo: Psonm 139:8 i montre ki Bondye i partou akoz i dir: “Si mon mont dan lesyel, ou la. Si mon desann dan lemonn lanmor, ou la.”
Vre: Sa verse pa pe koz lo kote Bondye i ete. I pe montre nou dan en fason poetik ki napa en landrwa ki tro lwen pour Bondye ed nou.
a Zeova i non Bondye dan Labib.
Ou pou kapab kontan sa osi
BANN LANSENNYMAN ENPORTAN DAN LABIB
Eski Bondye i vreman egziste?
Egzamin bann levidans ki montre ki i lozik pour krwar dan Bondye.
LAREPONS SORTI DAN LABIB
Kisisa lespri sen?
Dan en fason apropriye, Labib i konpar lespri sen avek “lanmen” Bondye.
KONSERNAN NOU
Eski ou ti a kontan en vizit?
Diskit en kestyon lo Labib oubyen aprann plis lo Temwen Zeova.