Sa latwal ki dan lavil Turin, Itali pa ganny mansyonnen dan Labib. Sa i en bout latwal linenn ki bokou i krwar i sa latwal ki Zezi ti ganny anvlope ladan ler i ti mor. Vi ki bokou dimoun i krwar sa, sa bout latwal i ganny konsidere konman en keksoz vreman sakre par sa bann Kretyen. Ozordi sa bout latwal i dan en legliz dan lavil Turin, Itali kot i ganny byen proteze.

 Eski Labib i dir ki sa bout latwal ti sanmenm sa enn ki Zezi ti ganny anvlope ladan? Non.

 Annou vwar trwa keksoz ki montre ki sa latwal i diferan avek sa ki Labib i koz lo la.

1.   Sa bout latwal i en sel bout latwal e i mezir 442 santimet par 113 santimet avek en bout latwal 8 santimet ki’n ganny koud dan son longer.

    Sa ki Labib i dir: Lekor Zezi pa ti’n ganny anvlope dan en sel bout latwal linenn me dan plizyer bout latwal. Son latet ti ganny anvlope dan en lot bout latwal. Apre ki Zezi ti’n ganny resisite, enn parmi son bann zapot ti vin kot tonbo e i ti “vwar sa latwal linenn ki ti’n ganny mete la.” Labib i dir: “Sa latwal ki ti’n ganny mete lo latet Zezi pa ti avek lezot bout latwal, me i ti’n ganny roule akote.”​—Zan 20:6, 7.

2.   Lo sa bout latwal, i annan bann latras disan ki sipoze sorti lo en lekor mor ki pa ti’n ganny lave.

    Sa ki Labib i dir: Ler Zezi ti mor, son bann disip ti prepar son lekor “dapre koutim lanterman pour bann Zwif.” (Zan 19:39-42) Bann Zwif ti abitye benny sa lekor, servi delwil ek zepis ki santi bon avan en lanterman. (Matye 26:12; Akt 9:37) Alor bann disip Zezi ti pou’n bezwen lav lekor Zezi avan anvlop son lekor dan en latwal.

3.   Dapre Encyclopædia Britannica, lo sa bout latwal, i annan portre en zonm ki ti ganny mete an longer lo lanmwatye sa latwal e lot lanmwatye sa latwal ti ganny ploye lo latet sa lekor e kouver son lekor antye.

    Sa ki Labib i dir: Bann disip Zezi ti koz lo son lanmor, latonm ki ti vid e nouvel ki bann madanm ti’n vwar “bann lanz ki ti dir ki i vivan.” (Lik 24:15-24) Si sa bout latwal ek sa portre ki lo la ti dan latonm Zezi, son bann disip ti pou’n bezwen koz lo la. Me Labib pa dir nanryen lo sa size.

 Non. Menm si sa ti vreman sa bout latwal ki Zezi ti ganny anvlope ladan, i pa ti pou byen pour ador li. Annou vwar serten prensip Labib ki pou ed nou konnen akoz.

1.   I pa neseser. Zezi ti eksplike: “Bondye i en Lespri e sa bann ki ador li i devret ador li an armoni avek lespri sen ek laverite.” (Zan 4:24) Pour ador Bondye an armoni avek laverite, i pa neseser servi okenn keksoz oubyen lobze relizye.

2.   I defann. Sa Dis Komannman ti defann ador okenn zidol. (Deterononm 5:6-10) Pareyman, Labib i dir nou: “Reste lwen avek bann zidol.” (1 Zan 5:21) Serten i kapab dir ki sa bout latwal pa en zidol me en senbol oubyen reprezantasyon lafwa zot larelizyon. Par kont, en senbol i vin en zidol pour sa dimoun ki ador li. a Alor en dimoun ki anvi fer plezir Bondye pa pou sitan atase avek en lobze oubyen senbol enkli sa bout latwal.