Adan ek Ev ti sa de premye dimoun pour fer pese. Ler zot ti dezobeir Bondye par manz fri dan “sa pye ki donn konnesans lebyen ek lemal,” zot ti fer sa ki bokou dimoun i apel sa premye pese. a (Zenez 2:16, 17; 3:6; Romen 5:19) Adan ek Ev ti napa drwa manz fri dan sa pye akoz i ti reprezant lotorite ouswa drwa Bondye pour deside kwa ki byen ek kwa ki mal pour imen. Ler zot ti manz sa fri, Adan ek Ev ti desid pour zot menm sa ki byen ek sa ki mal. Par zot aksyon, zot in rezet lotorite Zeova pour desid sa ki byen ek sa ki mal.

•  Ki mannyer sa “premye pese” ti annan en lefe lo Adan ek Ev?

•  Ki mannyer sa “premye pese” i annan en lefe lo nou?

•  Eski nou kapab ganny libere avek sa “premye pese”?

•  Serten fo krwayans konsernan sa “premye pese”

 Vi ki zot ti fer pese, Adan ek Ev ti vin vye e finalman zot ti mor. Zot ti gat zot lanmitye avek Bondye e perdi sa posibilite pour annan en lasante parfe e viv pour touzour.​—Zenez 3:19.

 Adan ek Ev ti transmet pese ek lanmor avek tou zot desandans. Sa i parey ler en paran i pas en defo zenetik avek son zanfan. (Romen 5:12) Alor tou dimoun in ne “dan pese,” b savedir nou’n ne enparfe e i fasil pour nou fer keksoz mal.​—Psonm 51:5; Efezyen 2:3.

 Vi ki nou’n erit pese, nou malad, vin vye e mor. (Romen 6:23) Nou osi soufer akoz nou prop lenperfeksyon e lenperfeksyon lezot.​—Eklezyast 8:9; Zak 3:2.

 Wi. Labib i dir ki Zezi ti mor “konman en sakrifis rekonsilyasyon pour nou pese.” (1 Zan 4:10) Sakrifis Zezi i kapab liber nou avek pese ki nou’n erite e permet nou ganny sa ki Adan ek Ev ti perdi, setadir sa posibilite pour annan en lasante parfe e viv pour touzour.​—Zan 3:16. c

 Fo krwayans: Akoz sa premye pese, nou pa pou zanmen kapab annan en bon lanmitye avek Bondye.

 Laverite: Bondye pa blanm nou pour sa ki Adan ek Ev in fer. I konpran ki nou enparfe e i pa ekspekte plis avek nou ki sa ki nou kapab fer. (Psonm 103:14) Menm si nou pe soufer akoz pese, nou annan sa loportinite ek privilez pour annan en lanmitye pros avek Bondye.​—Proverb 3:32.

 Fo krwayans: Batenm i efas sa premye pese, alor bann pti baba i bezwen ganny batize.

 Laverite: Menm si batenm i en pa enportan pour ganny sove, zis lafwa dan sakrifis Zezi ki kapab pirifye en dimoun avek pese. (1 Pyer 3:21; 1 Zan 1:7) Vre lafwa i baze lo konnesans, alor en pti baba pa kapab annan lafwa. Labib pa ansenny batenm pti baba. Sa ti evidan parmi bann premye Kretyen. Zot pa ti batiz bann pti baba, me bann “zonm ek fanm” ki ti annan lafwa dan Parol Bondye.​—Akt 2:41; 8:12.

 Fo krwayans: Bondye ti modi bann madanm akoz Ev ti premye pour manz sa fri.

 Laverite: Bondye pa ti modi bann madanm, plito i ti modi “sa premye serpan, sa enn ki ganny apele Dyab e Satan,” ki ti ankouraz Ev komet pese. (Revelasyon 12:9; Zenez 3:14) An plis ki sa, Bondye ti vwar Adan konman sa enn ki prensipalman responsab pour sa premye pese e non pa son madanm.​—Romen 5:12.

 Akoz Bondye ti dir ki Adan pou domin lo son madanm? (Zenez 3:16) Ler Bondye ti dir sa, i pa ti pe aksepte sa kalite konportman plito i ti pe montre ki konsekans pese pour anmennen. Bondye i ekspekte en zonm i kontan, onor son madanm e montre en gran respe anver bann madanm en zeneral.​—Efezyen 5:25; 1 Pyer 3:7.

 Fo krwayans: Sa premye pese ti relasyon seksyel.

 Laverite: Sa premye pese pa ti kapab relasyon seksyel pour sa bann rezon swivan:

•   Bondye ti donn lord Adan pour pa manz fri dan sa pye ki donn konnesans lebyen ek lemal pandan ki Adan ti li tousel, san en madanm.​—Zenez 2:17, 18.

•   Bondye ti donn lord Adan ek Ev pour “fer zanfan, zot ava ogmante.” (Zenez 1:28) I ti pou vreman kriyel pour Bondye pini sa premye koup imen pour en keksoz ki li menm i ti’n demann zot pour fer.

•   Adan ek Ev ti fer pese separeman. Ev ti fer premye apre son msye pli tar.​—Zenez 3:6.

•   Labib pa kondann relasyon seksyel ant en msye ki’n marye ek son madanm.​—Proverb 5:18, 19; 1 Korentyen 7:3.