•  Ki ou devret konnen?

•  Ki ou kapab fer?

•  Ki lezot zenn i dir?

• Napa okenn relasyon ant dimoun ki napa problenm. Vi ki ou zanmi, menm ou pli bon zanmi i enparfe, i kapab fer oubyen dir en keksoz ki bles ou. Me ou osi tou ou enparfe. Si ou mazin byen, eski ou pa’n deza bles en dimoun ou osi?​—Zak 3:2.

• Enternet i kapab fer li pli fasil pour ganny blese. Par egzanp, en zenn ki apel David i dir: “Ler ou lo Enternet e ou vwar bann portre ou zanmi dan en parti, ou kapab konmans demann ou lekor akoz ou pa’n ganny envite. Sa i kapab fer ou sagren e santi ki ou zanmi in trai ou.”

• Ou kapab aprann ki pour fer ler sa i arive.

Egzamin ou. Labib i dir: “Pa pran lakoler tro vit, akoz bann ki sot ki gard rankin.”​—Eklezyast 7:9.

“Parfwa, ou realize pli tar ki sa keksoz ki’n bles ou pa ti sitan en gran zafer.”​—Alyssa.

Mazin lo sa: Eski ou en pe tro sansib? Eski ou kapab fer plis zefor pour les pase lenperfeksyon lezot?​—Eklezyast 7:21, 22.

Mazin lo akoz i bon pour pardonnen. Labib i dir: “I en zoli keksoz pour . . . les pase en lofans.”​—Proverb 19:11, NWT.

“Menm si ou annan rezon pour konplent, i bon pour pardonn volonterman. Sa i vedir ki ou pa kontinyen fer sa dimoun rapel sa ki i’n fer e fer li demann ou leskiz sak fwa ou lev sa size. Enn fwa ki ou’n pardonnen, oubliy tou sa ki’n pase.”​—Mallory.

Mazin lo sa: Eski sa sityasyon i sitan enportan? Eski ou kapab pardonnen pour ki ou gard lape?​—Kolosyen 3:13.

Mazin sa lot dimoun. Labib i dir: “Pa rod zis zot prop lentere, me lentere lezot osi.”​—Filipyen 2:4.

“Kan i annan lanmour ek respe dan en lanmitye, sa i donn ou en bon rezon pour rezourd problenm vitman akoz ou form par sa lanmitye. Ou’n deza travay pour devlop sa lanmitye e ou pa anvi perdi li.”​—Nicole.

Mazin lo sa: Eski ou kapab vwar serten keksoz ki bon dan pwennvi sa lot dimoun?​—Filipyen 2:3.

Konklizyon: Ler ou konnen ki mannyer pour fer fas avek ou santiman ler en dimoun i bles ou, sa i en skil ki pou ed ou menm ler ou vin en adilt. Akoz ou pa aprann sa skil la konmela?