Yn ôl un arolwg, mae 97 y cant o bobl yn eu harddegau yn defnyddio’r cyfryngau cymdeithasol. Ydy eich plentyn chi’n gofyn am gael eu defnyddio hefyd? Os felly, dyma rai pethau ichi eu hystyried.

Yn yr erthygl hon

•  Amser eich plentyn

•  Agwedd eich plentyn at ffrindiau

•  Iechyd emosiynol eich plentyn

•  Ymddygiad eich plentyn ar y we

•  Oes rhaid defnyddio’r cyfryngau cymdeithasol?

•  Beth mae rhieni’n ei ddweud?

 “Mae’r cyfryngau cymdeithasol wedi eu dylunio i fachu eich sylw, i’ch cadw chi ar lein, ac i wneud ichi edrych ar eich dyfais o hyd i gael y newyddion diweddaraf,” meddai’r wefan HelpGuide.

 “Mae munudau’n troi’n oriau wrth imi sgrolio drwy negeseuon di-ben-draw ar y cyfryngau cymdeithasol. Gall fod yn anodd iawn rhoi’n ffôn i lawr a mynd i wneud rhywbeth mwy defnyddiol.”—Lynne, 20.

 Gofynnwch i chi’ch hun: A fydd gan fy mhlentyn ddigon o hunanreolaeth i gadw at fy rheolau o ran faint o amser y mae’n ei dreulio ar gyfryngau cymdeithasol? Ydy fy mhlentyn yn ddigon aeddfed i osod ei reolau ei hun a chadw atyn nhw?

 Egwyddor o’r Beibl: “Gwyliwch yn ofalus iawn eich bod chi’n cerdded . . . fel pobl ddoeth, gan ddefnyddio eich amser yn y ffordd orau.”—Effesiaid 5:15, 16.

 Mae’r term “cyfryngau cymdeithasol” yn awgrymu eu bod nhw’n dod â ffrindiau at ei gilydd, neu yn cysylltu pobl. Ond yn aml iawn, peth digon arwynebol yw’r cysylltiad hwnnw.

 “Dw i wedi sylwi bod llawer o bobl ifanc yn meddwl os bydd mwy yn eu ‘hoffi,’ neu’n eu dilyn, yna mae mwy o bobl yn malio amdanyn nhw, hyd yn oed os nad ydyn nhw’n ’nabod y bobl hynny.”—Patricia, 17.

 Gofynnwch i chi’ch hun: Ydy fy mhlentyn yn ddigon aeddfed i beidio â rhoi gormod o bwyslais ar faint o bobl sy’n ei hoffi neu’n ei ddilyn ar lein? Pa mor dda y mae’n gallu meithrin cyfeillgarwch â phobl wyneb yn wyneb?

 Egwyddor o’r Beibl: “Mae ffrind yn ffyddlon bob amser; a brawd wedi’i eni i helpu mewn helbul.”—Diarhebion 17:17.

 Mae ymchwilwyr wedi sylwi bod yna gysylltiad rhwng gorddefnyddio’r cyfryngau cymdeithasol ac unigrwydd, pryder, a hyd yn oed iselder ysbryd.

 “Dydy gweld lluniau o dy ffrindiau yn cael hwyl—a hynny hebddot ti—byth yn deimlad braf.”—Serena, 19.

 Gofynnwch i chi’ch hun: Ydy fy mhlentyn yn ddigon aeddfed i beidio â mynd yn hunanol ac yn gystadleuol, na gadael i’r pethau mae eraill yn ei wneud ar y cyfryngau cymdeithasol effeithio arno yn ormodol?

 Egwyddor o’r Beibl: “Dylen ni beidio â bod yn egotistaidd, yn creu ysbryd cystadleugar yn ein plith, yn eiddigeddus o’n gilydd.”—Galatiaid 5:26.

 Mae’r cyfryngau cymdeithasol yn gallu agor y drws i seiberfwlio, secstio, a gweld pornograffi. Hyd yn oed os nad ydy eich plentyn yn bwriadu gwneud y pethau hyn, mae’n ddigon posib y bydd yn dod i gysylltiad â nhw.

 “Dw i wedi sylwi bod hi’n hawdd i bethau ar y cyfryngau cymdeithasol droi i gyfeiriad drwg. Mae ’na lawer o iaith anweddus a cherddoriaeth anaddas.”—Linda, 23.

 Gofynnwch i chi’ch hun: Ydy fy mhlentyn yn ddigon aeddfed i ddefnyddio’r rhyngrwyd yn ddoeth? A fydd ganddo ddigon o gryfder moesol i wrthod edrych ar bethau anaddas?

 Egwyddor o’r Beibl: “Ni ddylai neb yn eich plith hyd yn oed sôn am anfoesoldeb rhywiol, . . . nac ymddygiad cywilyddus na siarad yn wirion na dweud jôcs anweddus.”—Effesiaid 5:3, 4.

 Dydy’r cyfryngau cymdeithasol ddim yn hanfodol i fywyd hapus a chyfforddus. Mae llawer o bobl ifanc yn fodlon byw hebddyn nhw—gan gynnwys rhai a oedd yn arfer eu defnyddio cyn penderfynu peidio.

 “Ar ôl imi weld effaith ddrwg y cyfryngau cymdeithasol ar fy chwaer, penderfynais stopio eu defnyddio. Ers hynny, dw i wedi bod yn llawer hapusach a dw i’n teimlo mod i’n cael mwy allan o fy mywyd.”—Nathan, 17.

 I grynhoi: Cyn caniatáu i’ch plentyn ddefnyddio’r cyfryngau cymdeithasol, gwnewch yn siŵr ei fod yn ddigon aeddfed i osod terfynau o ran amser, i gadw perthynas dda ag eraill, ac i osgoi pethau anaddas.

 Egwyddor o’r Beibl: “Mae’r call yn ystyried pob cam.”—Diarhebion 14:15, Beibl Cymraeg Newydd Diwygiedig.