Yn fuan, pan fydd llywodraeth nefol newydd Duw yn rheoli dros y ddynoliaeth gyfan, bydd y ddaear yn lle hapus lle gall pobl fyw gyda’i gilydd mewn undod, gwneud gwaith da, a chael boddhad o hynny. Mae Duw wedi penodi Iesu Grist i reoli dros y ddaear. Yn wahanol i gymaint o arweinwyr heddiw, bydd Iesu wastad yn gwneud beth sydd orau i’r bobl. Cariad fydd sail ei reolaeth, ac fe fydd yn Frenin caredig, trugarog, a theg.—Eseia 11:4.

Fydd pobl ddim yn cael eu gwahanu gan genedl na hil. Bydd y ddynoliaeth gyfan yn gwbl unedig. (Datguddiad 7:9, 10) Bydd pawb ar y ddaear yn caru Duw a’u cymydog, a byddan nhw’n cydweithio mewn heddwch i gyflawni pwrpas gwreiddiol Duw i ofalu am eu cartref, y ddaear.—Salm 115:16.

Pan fydd Teyrnas Dduw yn rheoli’r ddaear, bydd y Creawdwr hefyd yn rheoli’r tywydd yn llwyr, gan ei gadw mewn cydbwysedd perffaith. (Salm 24:1, 2) Tra oedd ef ar y ddaear, dangosodd Iesu beth roedd yn gallu ei wneud â phŵer Duw pan wnaeth ef dawelu storm ofnadwy. (Marc 4:39, 41) O dan reolaeth Crist, fydd gan neb reswm i ofni trychinebau naturiol. Bydd Teyrnas Dduw hefyd yn adfer yr harmoni gwreiddiol oedd rhwng natur a bodau dynol.—Hosea 2:18.

Bydd pawb yn mwynhau iechyd perffaith. Fydd neb yn mynd yn sâl, yn heneiddio, nac yn marw. (Eseia 35:5, 6) Bydd pobl yn mwynhau amgylchiadau prydferth a glân, fel gwnaeth y cwpl cyntaf eu mwynhau yng ngardd Eden. Yn y byd newydd, yn union fel yn Eden, bydd y tir yn cynhyrchu digonedd o fwyd i bawb ar y ddaear. (Genesis 2:9) Fel pobl Dduw yn Israel gynt, bydd gan bawb ym Mharadwys “fwy na digon i’w fwyta.”—Lefiticus 26:4, 5.

O dan lywodraeth fyd-eang Duw, bydd pawb yn mwynhau heddwch ac yn trin ei gilydd mewn ffordd gariadus a theg. Fydd ’na ddim rhyfeloedd, fydd neb yn camddefnyddio eu hawdurdod, a fydd dim angen stryffaglu i ofalu am anghenion sylfaenol bywyd. Mae’r Beibl yn addo: “Bydd pawb yn eistedd dan ei winwydden a’i goeden ffigys ei hun, heb angen bod ofn.”—Micha 4:3, 4.

Bydd gan bob teulu gartref, heb orfod poeni am ei golli. A bydd yr holl waith byddwn ni’n ei wneud yn werth chweil. Fel mae’r Beibl yn dweud, fydd y rhai sy’n byw ym myd newydd Duw “ddim yn gweithio’n galed i ddim byd.”—Eseia 65:21-23.

Mae’r Beibl yn addo: “Llenwir y ddaear â gwybodaeth yr ARGLWYDD.” (Eseia 11:9, BCND) Bydd pobl sy’n byw o dan Deyrnas Dduw, yn dysgu oddi wrth ddoethineb di-ben-draw eu Creawdwr, Jehofa, ac am y pethau hyfryd gwnaeth ef eu creu. Fyddan nhw ddim yn defnyddio’r hyn maen nhw’n ei wybod i adeiladu arfau nac i frifo pobl eraill. (Eseia 2:4) Yn hytrach, byddan nhw’n dysgu sut i fyw gyda’i gilydd mewn heddwch a sut i ofalu am y ddaear.—Salm 37:11.

Cymerodd Duw ofal mawr i baratoi’r ddaear fel ein bod ni’n gallu mwynhau pob diwrnod o’n bywydau. Mae’n bwriadu i bobl fyw ar y ddaear am byth. (Salm 37:29; Eseia 45:18) I wneud hynny’n bosib, bydd Duw yn sicrhau y bydd “marwolaeth wedi’i lyncu am byth.” (Eseia 25:8) Mae’r Beibl yn addo: “Ni fydd marwolaeth mwyach, ac ni fydd galar na llefain na phoen mwyach.” (Datguddiad 21:4) Bydd Duw yn rhoi’r cyfle i fyw am byth i bawb—y rhai mae’n eu hachub pan fydd yn dinistrio’r byd drygionus hwn, yn ogystal â’r nifer enfawr bydd yn eu hatgyfodi yn y byd newydd sydd i ddod.—Ioan 5:28, 29; Actau 24:15.

 Mae miliynau o bobl wedi dechrau paratoi i fyw o dan Deyrnas Dduw sydd ar y gorwel. Er eu bod nhw’n amherffaith, maen nhw eisoes yn ceisio bod y math o berson mae Duw eisiau yn ei fyd newydd. Sut? Drwy ddysgu am Jehofa Dduw, a’r un gwnaeth ef ei anfon, Iesu Grist.—Ioan 17:3.

Dysgwch fwy am sut gallwch chi oroesi diwedd y byd hwn a byw yn y byd gwell sydd ar y gorwel. Beth am drio cwrs rhyngweithiol am y Beibl am ddim gydag un o Dystion Jehofa, gan ddefnyddio’r llyfr Mwynhewch Fywyd am Byth!