ˈBha ˗dhɛga Biblö ˈgü ü ˗dho ˗kpan ˗wo kpö ꞊va ꞊dede ˗bha, ˗a ˈgü. ˈˈKɛɛ ˈya ˈdho ü ˈgü ga Biblö ˗wopösü ˈka. Pë ˈü dho ˗a kë ꞊ӡiaan ˈyö ˗tɔ ˗bhö Biblö yö ꞊dhɛ tablötadhɛ ˈö ˗bhöpë suu ꞊va ꞊dede ˈdhö mü, ˗a ˈdhö. ˗Bhöpë ˈö˗ ˗ta ˈbhaa ꞊mɔɔn˗ ˗bha kö ˈü˗ ꞊gban ˗bhö ˗dhɛ do ˈgü. ˈˈKɛɛ ü ꞊mɔɔn˗ ˗bha ˈü ü ˗kɔ ˗yɛ ˗a ˗së ˈbha ˗bha.

 ˈBha˗ pö ˈü ü ˗bha Biblö «˗wopösü» ꞊trɔɔn ꞊dede ꞊slɔɔ, ü dua ˗mü kö ˈü ü ˈˈɲan ˗ya pë ˈü˗ ˗wo pö ˗ni ˈgü, ˗a ˗bha.

ˈPë ˈkwa ˗dho ˗a yö ˈwɔn ˗gɔ yö ˗a ˈgü ˈyö ˗tɔ

•  ˈMën ˗kë ˈö ˗së kö ˈü ü ˈˈɲan ˗ya pë ˈü˗ ˗wo pö ˗ni ˈgü Biblö ˈgü ˗a ˗bha?

•  Ü ˗dho ü ˗bha Biblö ˗wopösü ꞊trɔɔn ꞊dede ꞊slɔɔ ˗kɔ ˗kë ꞊dhɛ?

•  Pë ˈö wlüünën ˗nu ˗wa pö

 ˈBha ü ˈgü dɔ ˈˈgbɩɩ˗ ˈbha ü ˈˈɲan ˗ya ü ˗bha Biblö ˗wopösü ˗bha, ˗yö ˈwɔn ˗së ꞊va ˗kë ü ˗dhɛ. ˗A ˈwɔnzuan do ꞊nɛn: ˈBha ˈtee˗ ˈˈmlanŋ do ˗ya ˈˈyi ˈˈwoosü ꞊bhaa ˈˈtʋ̈ŋ ˈdɛdɛ ˈˈpiʋ̈, ü ˗dho ˗a din ˈnënbha ꞊slɔɔ. ˈˈKɛɛ ˈbha˗ ˗ya ˈˈyi ˈˈwoosü ꞊bhaa ˗ya ꞊gwëë mü, ˗a din ꞊dede ˗kë ˗së.

 ˈWɔn do bhë ˈnën˗ ˈka ˈpö Biblö ˗wopösü ˈgü. ˈBha ˈdho Biblö ˗wo pö ˗biata. ˈBha˗ ˗wo pö, ˗bhö ü ˗zota ꞊dedewo ˈpë ˈü˗ ˗wo pö ˗a ˈgü. Pë ˈö Psaume 119 ˗bɛnzëmɛn ˗ya ˗kë ˈyö bhë! Pë ˈö˗ pö ˈö ˗gban ˗Zlan ˗bha ˈtɔŋ˗ ˗bha, yö ꞊nɛn: «˗Dhɛ ˈˈpɛpɛ ˈö ꞊kpɔɔ, a ˗to n ˗zota ˗sü ˗bha ˗a ˈgü ˗kplawo.»—Psaume 119:97.

 ˗Yö ˈˈdhʋ̈, ˈˈkɛɛ ˗a ˗kë ˈˈdhʋ̈ ˗sü ˗gɛn ˈyaa ˈnën ˗tɔ ü ˗dhɛkpaɔyi do ˗todhʋ̈sü ꞊dede ˈsü kö ˈü Biblö ˗wo pö kö ˈü ü ˗zota ˗a ˈgü, ˗abin. ˈPë ˈyi˗ ˈˈpiʋ̈ kö ˈyi˗ pö, yö ꞊nɛn: Psaume ˗bɛnzëmɛn ˈö bhë, ˗yö ˈˈtʋ̈ŋ ˗sü ˈö ö ˗zota ˗Zlan ˗Wo ˈgü. ˈYö ˗a ˗kë ˈˈdhʋ̈ ˗sü ˗ya ˗takun ˈö ˗da ˈwɔn ˗së ˗ӡian ˗ta.—Psaume 119:98-100.

 «N dhe ˗ya ˗pö n ˗dhɛ yi ˈbha ˈka. ‹˗Dhɛkpaɔyi ˈˈsɔɔplɛ ꞊nën ˈö ü ˗gɔ ˈˈdhoogɔ do ˈgü. ˈYö ˈˈdhoogɔ bhë ˗a ˈgü ü pë ꞊va ꞊dede ˗kë ü ˗de ˗bhaa ˈka. ˗Bhö ˈˈtʋ̈ŋ bhë ˗a ˈbha nu Zoova ˗dhɛ. ˈBha˗ kë ˈˈdhʋ̈ ˗yö ˗së.›»—Melani

 ˈBha ü ˗zota Biblö ˗bha ˈtɔŋ˗ ˗gɛngbandhɛ ˗nu ˈgü, ˗yö ˗dho ü ˗takun kö ˈü ˗da ˈwɔn ˗së ˗ӡian ˗ta. ˗A ˈwɔnzuan ˈbha ˗nu ꞊nɛn. ˈÜ˗ ˈˈpiʋ̈ ˈü ˈˈtɔŋdëdhɛ ˈkun mɛn ˈbha ˗bha ɛɛnˈˈ ˈwɔn yaa kë ˗sü ˗dhɔ ˗ya ˗da ü ˈgü, ˗wo ꞊mɔɔn˗ ˗bha ˈwo ü ˗takun.

•   ˈPë ˈü ˗dho ˗a kë ˗yö kë ü ˈˈɲaan. Pë ˈö wlüünën do ˈbha ˈwo˗ ˗dhɛ Ӡili ˈö˗ pö, yö ꞊nɛn: «Biblö ˗wopösü ploglamö ˗yö kë ü ˗gɔ. Ü dua ˗mü kö pë ˈü ˗dho ˗a ˗wo pö, ˈˈtʋ̈ŋ ˈü ˗dho ˗a ˗wo pö ˗a ˈka waa ˗dhɛ ˈü ˗dho ˗a ˗wo pö ˗a ˈka ˈü ˗an dɔ.»

•   ˗Dhɛ ˈü dho ˗a ˗wo pö ˗a ˗bha ˈö dho kë ˗së, ˗bhö ˗a mɛɛnˈˈ. Dhebɔnën do ˈwo˗ ˗dhɛ Giana ˗ya ˗pö: «˗Bhö ˗dhɛ ˗së ˈbha ˈö ˗fɛɛ ˈyaa mü ˗a mɛɛnˈˈ. ꞊Ya ˈgo mü, ˈˈtʋ̈ŋ ˈü ˗dho ü ˗bha Biblö ˗wo pö ˗a ˈka, ˗bhö ˗a pö ü ˗bha ˈkɔdhigümɛn ˗nu ˈwo to ˗an ˗dhɛ, kë ˈˈdhʋ̈ kö ˈwa ˈdho ˗a ˈˈtʋ̈ŋ shiʋ̈ˈˈ.»

   ꞊Ya kë ꞊dhɛ ü ˗dho ˗a ˗wo pö telefɛnö ˗ta, ˗bhö nɔɔn˗ ˗nu bɔdhɛ ꞊gban ˈˈdhiʋ̈ta. Ü ꞊mɔɔn˗ ˗bha ˈü Biblö ˗be ꞊dede sü kö ˈü˗ ˗wo pö. Pë ˈˈpiʋ̈ ˈpɔn ˗mɛn ˗nu ˗wa ˗pö ꞊dhɛ pë ˗wopösü ˈö ˈsëëdhɛ ꞊dede ˈgü bhë, ˗ya ˗kë ˈö ˗mɛn ˈö˗ ˈgüman ˗së ˈka. ˈˈKɛɛ ˈwo˗ ˗wo pö ˗ni ˈgü eklan ˗ta, mɛn ˈyaa ꞊mɔɔn˗ ˗bha ꞊dedewo kö ˈmɛn mɛn ˈˈɲan ˗ya ˗a ˗bha.

   «Pë ˗wopösü ˈö telefɔnö ˈgü bhë, ˗yö trʋʋˈˈ ˗da mɛn ˈgü. Nɔɔn˗ ˗nu ˗wo ˗yö ˈˈkpɛnŋ ˗a ˗ta, ˗a bateli ˗dho ˈˈshia˗ ɛɛnˈˈ ˈzü ɛntɛnɛtö ˈyaa kë ˗së yi ˈbha ˗nu ˈka. ꞊Ya kë ˈsëëdhɛ ꞊dede ˈka, pë dosɛnŋ ˈö ü ˗bhawɔn ˗yö yö ˗a ˗bha ˈyö ˈtɔ˗ ˈˈwo ˈbhü ˗së.»—Elena

•   ˗A züdɔ bhɛɛsü ˗ta. ˗Bhö ˗a pö Zoova ˗dhɛ kö ˗yö ü ˗takun kö Biblö ˈˈpian ˈü ˗dho ˗a ˗wo pö bhë ˈü˗ ˈgüman, ˗yö ˈto ü ˈˈɲaan, ˈgo mü ˈzü kö ˈü˗ ꞊trɔɔn ꞊slɔɔ.—Zakö 1:5.

   ˈBha˗ pö ˈü˗ ˗zɔn Zoova ˗dhɛ ꞊dhɛ pë ˈü˗ ˗dhɛ ˗a ˗gɔ bhë ü˗ ˈˈpiʋ̈, ˗bhö ˗kwɛzlan ˈü dho ˗a ˗wo pö bhë, ˗a ˈˈpiʋ̈ ˈpɔn. ˈYö ü ˗dho ˗a kë ˈˈdhʋ̈ ˗kɔ ˗kë ꞊dhɛ? ꞊Ya kë ꞊dhɛ ˈü Biblö ˗wo pö ˗ni ˈgü JW Library ɛɛnˈˈ ɛntɛnɛtö ˗ta, ü ꞊mɔɔn˗ ˗bha ˈü ü ˗kɔ ꞊nënŋ ˗a Biblö ˈˈɲan do ˗ta kö ˈü ˗kpan pë ˈbha ˗nu ɛɛnˈˈ ˈwɔn ˗gɔ ˗nu ˈwo ˗gban ˗a ˗bha, ˗an ˗bha.

•   Dhɛɛˈˈ ˗nu ˈkpɔ ü ˗de ˗gɔ. ˗A dhɛɛˈˈ ˗nu ˈwo ˈˈdhʋ̈, ˗a ˈbha ˗nu ꞊nɛn: ‹ˈMën ˗kwɛzlan ˈö bhë ˈö˗ ˗zɔn n ˗dhɛ ˈö ˗gban Zoova ˗bha? ˗A ˗bha ˈˈklʋʋsë ˗mɛɛn ˈö˗ ˈgü ˈa ꞊mɔɔn˗ ˗bha ˈa ˗ӡiö ˗a ˈˈpiʋ̈?› (Efɛzö 5:1) ‹˗Gleŋ ˗mɛɛn ˈa˗ sü ˗kwɛzlan ˈö bhë ˗a ˈgü ˈa ꞊mɔɔn˗ ˗bha ˈa˗ ˗ya ꞊bhlëë ˈgü n man ˗tosɛta ˈgü.› (Psaume 119:105) ‹Pë ˈa˗ ˗wo pö bhë, a ˗dho ˗a ˈsü ˗kɔ ˗kë ꞊dhɛ kö ˈa mɛn ˈˈwɛɛ ˗nu ˗takun ˗a ˈka?›—Wlɔmö 1:11.

   ˗Bhö ü ˗de dhɛɛˈˈ ˈkpɔ: ‹Pë ˈa˗ ˗wo pö bhë ˗yö ˗gban ˗kɔ ˗kë ꞊dhɛ ˈwɔn ˗gɔ ˈö Biblö ˈgü ˗a ˗bha?› Dhɛɛˈˈ ˈö bhë, ˗a ˗wɔn ˗yö ˈˈgbɩɩ˗. ˈMën ˗kë? ˈYö ˗tɔ ꞊dhɛ pë ˈˈpɛpɛ ˈö Biblö ˈgü, ˈö sü ˈWunzüdɔdhɛ ˗bha ˈö dho ˈö yö˗ ˈka ˗Dhɛkpaɔ dhiaˈˈ ˈsëëdhɛ ˗bha ˗wo ˗gban ˗sü ˈka ˈwɔn ˗gɔ do ˗bha. ˗A ˈwɔn ˗gɔ ˈö ˈˈdhʋ̈ ˈyö ˈtɔ˗: ˗Kɔ ˈö Zoova ˈö ˗dho bɔ ˗a ˈka ö ˗bha ˗Gblüdëdhɛ ˈö dhaŋ˗ ˈgü ˗a ˗ta kö ˗yö ö ˈtɔ bhɔ, kö ˗ya ˗zɔn ꞊dhɛ yö ꞊nën ˈö˗ dua ˈdhö ˗mü kö ˗yö ˈˈkpɔnŋtaadhɛ ꞊kɔɔn, ˈgo mü ˈzü ˗a ˗bha mɛn ꞊kɔɔn ˗kɔ ˈnën ˗së.