˗Dhɛ ˈö n ˗kwɛ ˗kë 13, ˈyö ˗mlɛɛn ˗së ˈö kun yaa Zoova yi ꞊zinŋgü bhë, ˈö ˗ya shiʋ̈ˈˈ ˗sü ˗bha. ˈYö ˗kë n ˈgü ꞊dhɛ ˈpë n ˈˈtɛɛbɔ ˗nu ˈwo ꞊klaŋplöö ˈö ˗potaadhe ꞊dede ˈdhö ˗an ˗gɔ, ˈö n ˗mɛn ˗nu ˗bha ˈtɔŋ˗ waa kletiɛn ˗nu ˗bha, ˗an ˈkun ˗dhɛ ˈdhö ˈˈgbɩɩ˗, ˗a ˈdhö. ˗Yö ˗kun ga ˗sü ˈka n ˈgü ꞊dhɛ Zoova ˗yö ˗dhö, ˈˈkɛɛ ˈyaa kun n ˈgü ꞊dhɛ mɛn ˈö n ˈˈsuee ˗a ˈdhö.

N ˈti ˈˈkan ˗zlanwopösü ˗bha, ˈˈkɛɛ ˈmaan kun ˗a kë ˗ni n ꞊faan ˈka. ˈDhɛ ˗kë ꞊dhɛ ˈmaan n ˗de baaˈˈ kö ˈa ꞊kun ˈdho ˗zlanwopö bhë, dhiaŋ˗ züdɔ mɛn ˗nu ˈˈpiʋ̈ ˗sü ˈwo dho˗ ˈka ˈˈdhiʋ̈, ˗yö ˗kë n ˗gɔ ˈˈgbɩɩ˗. ˗A ˗wɔn ˈgü, ˗womɛndhɛsü ˗dɛɛ waa Biblö ꞊klaŋ gbɛ˗ ˈyaa kun n ˗gɔ. ˗Ya ˗kë ˈzü ˈö ˈman ˗zlanwopö, n zuʋ̈ˈˈ ˈˈgblü ˈyaa dhi. ˈYö ˈa˗ pö n ˗de ˗dhɛ: «ˈMën ˗kë n dua ˈdhö ˗mü ˈa ˗zlanwopö ˈˈdhoogɔ waa ˈˈsu ˈˈpɛpɛ ˈka?»

ˈDhɛ n ˗kwɛ ˗kë 17, ˗yö ˗kun n ˈˈpiʋ̈ kö ˈa ˗ya n ˗de ˗ta. ˈYö ˗dhɛkpaɔyi do ˈka, ˈa man ꞊kwɛɛ˗ ˗nu sü, ˈa go ˈkɔɔ, ˈa dho Ɔstrali. ˈYaa kun dhi ˗sü ˈka n ˗mɛn ˗nu ˗dhɛ. ˈˈKɛɛ ˗wo ˗kun ˗a pö ˗ni wo ˗de ˗dhɛ ꞊dhɛ a ˗dho Zoova ˗dhɔkë ˗kplawo.

 ˈDhɛ ˈa ˗lo Ɔstrali, ˈyö n ˗kɔ ˗ya ꞊zɔɔ ˗sü ˗bha Zoova ˗dhɔkësü ˗bha ˈzü ˈgbɛ. A ˗ya ˗kan ˗dho ˗bhɔkwëë ˗nu ˗ta ˗sü ˗bha. ˈYö wlüünën ˗nu ˈwo ˗zlanwokɔdhi ˈgü ˈwo ˗kë ꞊dhɛ n ˈdhö ˈpö, ˈö ˗wa ˈdho ˗bhɔkwëë ˗ta ꞊dɛɛ, ˈö˗ ˗tadhɛ ˗ya ꞊kpɔɔ ˈwo dho wemüdhɛ waa ˈˈtankëdhɛ ˗nu ˈgü bhë, ˈa ˗ya ꞊nënŋ ˗sü ˗bha ˗an ˗bha.

ˈDhɛ ˗kwɛ ꞊plɛ ˗ya ʒiö, ˈyö yaa kwa ꞊dhegblüdhe do ˈyi ˗kpan yi ˈkwëë˗. ˈYaa kun ˗a ˈˈɲaan ꞊dhɛ ö kë ˗kɔ ꞊yaa˗ kë, a n ˗zota ˗ni ˈgü n ˗bha ˗tosɛta kë ˗kɔ ˈgü. Yaa kwa ꞊dhegblü dhebɔ ˈˈsɔɔdo ˈnën ˈyi kun ˈkɔ do ˈgü. ˈˈTʋ̈ŋ do ˈka, kö yi ˗bha ˈˈpian do ˈˈpiʋ̈ ˗maankëmɛn waa ö ˗bha dhebɔ Tamara ˗wa nu ˗wo yi ˗bha ˗zlanwokɔdhi ˗dhɛ, yi ˗an ˗dhɛŋ ˗bun, ˈö ˈwo ˈˈdhoogɔ bhë ˗a ˗kë yi ˗gɔ ˈkɔɔ. Tamara ꞊gɔɔn ˗yö ˗zlanwokɔdhi ˈgü ˗wɔn ˗nu ˈˈɲanbhɔ ˗ni, kö yaa˗ ˗nu yi ˈˈgbɛɛta zë ˗ni, yi ˈˈyɩɩ ˗nu ˈto ˗ni ˈgü. Yi ˈˈtʋ̈ŋ ˗së ꞊dede ˗kë yi ˈkwëë˗. ˗A ˈˈyi ˗kan n ˗dhɛ. ˗Yö ˗kun ˈmɛn ˈö mɛn ˗dhɔ ˗ya ˗kë, ˈö ˈˈdoo ˗dɔ ˗a ˈˈpiʋ̈ ˗sü kun ˗së, ˗a ˈka. ˗A ˈwɔn ˗yö n ˗kun, ˈyö ˗tɔ ˈyaa n ˈˈɲaan ˗be ꞊dhɛ ˈmɛn Zoova ˗bha yö ˗wɔn kun ˈˈgbɩɩ˗ ꞊dhɛ ˗a ˈdhö, ˗yö ꞊mɔɔn˗ ˗bha kö ˗yö kë ˈˈgbɛɛtazëmɛn ˈka.

Tamara ˗kun mɛn ˈˈwowosü ˈka. Gagade waa ˗zlanwopösü ˗dhɔ ˈö kun ˗a ˈgü bhë, ˗wo ˗ʒiö ˗a ˗bha ˈwɔnzuan ˈˈpiʋ̈ ˗sü ˗dhɔ ˗da mɛn ˈgü. Yö ꞊va ˈö kun ˗a kë ˗ni ˈgü Zoova ˗dhɛ bhë ˗ya zuʋ̈ˈˈ ˈˈgblü ˗dhi ꞊dedewo. ˈˈKɛɛ man ˗zë n zuʋ̈ˈˈ ˈˈgblü ˈyaa kun dhi ˗sü ˈka, ˈyö sü ꞊dhɛ ˈmaan yö ˗tiaandhö kë Zoova ˗dhɛ. ˗A ˗bha ˈwɔn yö ˗kɔ ˗së waa˗ ˗bha zuʋ̈gblüdhi ˗wo ˗pa n ˈka. ˗Yö n ˗zo ˗bö ˈwɔn ꞊bhlëësü do ˈö Biblö ˈgü, ˗a ˈka: Zoova ˗ya ˈˈpiʋ̈ ˈkwa ö ˗dhɔkë «zuʋ̈gblüdhi ˈka.»​—Ps. 100:2.

A ˗kun ˗a ˈˈpiʋ̈ kö zuʋ̈niidadhe ˈö kun Tamara ˗gɔ bhë, ˗yö kë n ˗gɔ ˈpö. ˈˈKɛɛ ˗a ˗dhɛ ˗kun ˗a ˗bha kö ˈa pë ꞊va bho ˈˈgblʋʋ n ˗bha ˗tosɛta ˈgü. ˗Yö ˈˈtʋ̈ŋ ˈnën ˈbha ˗sü, ˈˈkɛɛ a ˗dho ˗a ˗bha ˈdɔni ˈdɔni ˈka, ˈa ˗mɔn ˗a ˗bha. A˗ züdɔ n ˗de baaˈˈ ˗sü ˗ta kö ˈa ꞊kun ˈdho ˗zlanwopö, ˈö go mü ˈa ˗kë ˗yödhiʋ̈ ˗kɔ ꞊löö ˈka. ˗Yö n ˗takun ˈyö ˈa ˗zlanwopö ˗zogbandhe ˈka. Yökë Biblö ˈka ˗sü ˗yö ˗zlanwopösü ˈˈdhia ˗da n ˈgü. ˗A yi ˈyii ꞊gwëë, ˈya˗ pö a ˗dho kë ˗yödhiʋ̈ ˗kɔ ꞊löö ˈka ˈˈsu ˈˈpɛpɛ ˈka.

 A ˗ya ˈˈtɔŋdhɛ ˈkun ˗sü ˗bha mɛn ˈˈpɛpɛ ˈwo Zoova ˗bha yö ˗kë wo ꞊faan ˈka, ˗an ˗bha. ˗An ˗bha ˈwɔnzuan ˗së ˗yö n ˗takun, ˈa n ˈˈtʋ̈ŋ ˗kë pë ˗dhɛ ˈö˗ ˗wɔn ˈdhö ˈˈgbɩɩ˗, ˗a ˈgü. A ˗ya Biblö ˗wopösü ˗bha ˗dhɛkpaɔyi ˈˈpɛpɛ ˈka. ˈDhɛ ꞊ɲɔɔn mü, kö ˗zlanwopö ˗yö ˗ya kë n ˗dhɛ ˗së ꞊dedewo, ˈya ˗kë ˈˈtʋ̈ŋ ꞊gban ˈgü ˗yödhiʋ̈ ˈka. N ˗bha ˗kë ˗zlanwokɔdhigümɛn ˗nu ˈˈpiʋ̈ ˗sü ˗yö n zuʋ̈ˈˈ ꞊nii ˗da. ˗A ˗kwɛ ˗ya kë ꞊va, n ˈti n ˗de yö ˈˈdhʋ̈.

ˈDhɛ ˗kwɛ do ˗ʒiö, ˈyö ˈnëngɔɔnnën do ˈˈgblüsë ˗sü ˈwo˗ ˗dhɛ Alɛsö, ˈö Zoova waa ˗zlanwopösü ˗dhɔ ˗ya ˗kë, ˈa ˗kpan ˗a ˗bha. ˗Yö ˗kun mɛn zii ˗kɔ ꞊löö ˈö ˗ya ˗kwɛ ˈˈsɔɔdo kë ˗yödhiʋ̈dhɛ ˈgü, ˗a ˈka. ˈGo mü, ˗ya ˗zlanwopö Malawi ˈˈsu ˈˈsɔɔplɛ ɛɛnˈˈ ˈˈsaaga ˈˈpiʋ̈. Bɔmɛn ˈbha ˗nu ˈwo kun ˈˈsɛ bhë ˗a ˈgü, ˗wo ˗kun ˈwɔnzuan ˗së ˈka ˗a ˗bha ˈka, ˈwo˗ ꞊faanmën kö ˗yö Zoova ˗bha yö ˗wɔn bɔ ˈˈdhiʋ̈ ö ˗bha ˗tosɛta ˈgü.

˗Kwɛ 2003 ˈgü, ˈyö yaa Alɛsö ˈyi yi ˈko sü. ˈÖ sü yi ˈö bhë ˗a ˗bha, yi ˗Zlan ˗bha ˈˈtʋ̈ŋ ꞊gban ˈgü ˗yö ˈgü. ˈYa ˗gleŋ ˈsü ˈwɔn ꞊vadhɛ ˈgü, ˈö Zoova ˗ya ˈdhuëë˗ ꞊dede ˈkpɔ yi ˗bha.

˗Kwɛ 2009 ˈgü, ˗wo yi ˗bɔ Timɔɔ˗Odhiantalö, ˈˈsɛ ˈdɛdɛ ˈö ˗ya ˗sü ˈka Ɛndonezi, ˗a ˈgü. ˗A ˗wɔn ˗yö yi ˗kun ꞊dedewo, ˈö˗ ˗lele kun yi ˗ta, ˈˈkɛɛ ˗a ˈˈsuʋ̈ ˈnën ˈbha ˗kë yi ˗bha. ˈDhɛ ˈˈsu ˈˈsoodhu ˗ʒiö, ˈyö ˈyi ˗lo ˗an ˗bha ˈˈkwipö ˈkpii˗ ˈwo Dili ˗kë bhë, ˗a ˈgü.

Wɔkɔ ˈö ˈdhɛ bhë ˗a ˈgü, waa yi ˗bha ˗nu ˈwaa do. ˗A ˗dhɛ ˗kun ˗a ˗bha kö ˈyi ˗an ˗bha wɔkɔ ˗nu, ˗an ˗wo ˗nu, ˗an ˗bhöpë waa ˗an ˈwɔn kë ˗kɔ ˗nu draanˈˈ. ˗Ya kë ꞊shiöŋ, yi ˗kpan ˈˈfleemɛn ˗nu, mɛn ˗nu ˈö ˈwii ꞊klaŋ kë, ɛɛnˈˈ mɛn ˗nu ˈwo ˗an ˗wëëdhɛ bho ˗ni ˈgü ˗an ˗bha, ˗zlanwopödhɛ ˈgü. Yi ˗kpan ˈpö mɛn ˗nu ˈö ˗gblü ˗yö ˗an ꞊niɔɔn ɛɛnˈˈ ˈö ˈwo saanˈˈ ˈsü ˗ni ˈgü, ˗an ˗bha. *

 ˗Zlanwopösü ˗kun ˗së ꞊dedewo. ˗A ˈwɔnzuan ˈtɔ˗ ˗dhɛkpaɔyi do ˈka, yi ˗kpan ˈnëndhiëŋ˗ do ˈö˗ ˗kwɛ ˈdhö 13 ˈwo˗ ˗dhɛ Maria, * ˗a ˗bha. ˈÖ ˗kë ˈˈdhʋ̈, kö ˗a dhe ˗ya ga ˗ya ˗mɔn ˗kwɛ ꞊va ˗bha. ˗A dë ˈˈtʋ ˈyaa kun ˗a ˗bha ˈzü. ꞊Dhɛ wlüünën ꞊vadhɛ ˈdhö, ˈpë Maria dho ˗a kë ö ˗bha ˗tosɛta ˈgü, ˈyaa kun ˗a dɔ ˗ni. Yi do ˈka, ˗yö ö ˗zopiʋ̈wɔn ˗nu ˗blɛɛ n ˗dhɛ ˈˈgbʋ ˈka. ˈˈKɛɛ ˈpë kun ˗a blɛɛˈˈ ˗ni n ˗dhɛ bhë ˈmaan kun ˗a ˈgüman ˗ni, ˈyö sü ꞊dhɛ ˈˈtʋ̈ŋ bhë ˗a ˈka, kö ˈmaan ˗an ˗wo pö ˗dhɛ dɔ ˗së ˈka. A ˗bhɛɛ Zoova ˗dhɛ kö ˗yö n ˗takun kö ˈa Maria ꞊faanmën, ˈyö ˈa ˗ya Biblö ˈˈɲan ˗nu ˈwo mɛn ˗zogban ˗an ˗wopösü ˗bha ˗a ˗dhɛ. ˗A ˗kwɛ ˗nu ˈwo dɔ ˗a ˈˈpiʋ̈, gagade ˗ya ˗bha ˗tosɛta ˗bho ˈˈgblʋʋ. ˗A ˈwɔn kë ˗kɔ ˗nu, ˗a sɔ ˗da ˗kɔ ˗nu, ˗a ꞊gban ˗go ˈˈgblʋʋ, ˈö dho ˈö bɔ ˈˈyi ꞊bhaa, ˈö˗ ˗de ˗bha Biblö ꞊klaŋnën ˗nu ˗kë ˗dhö. ꞊Dɛɛ, Maria ˗ya kë Zoova ˗bha ˈkɔdhi ˈkpii˗ ˈgümɛn do ˈka, ˈö˗ ˈwɔn dɔ ꞊dhɛ ö ˗dhɔ ˗yö ö ꞊dhegblü ˗nu ˗kë.

Zoova ˗yö ˈdhuëë˗ ˈkpɔ ˗ni ˗zlanwopösü ˗bha Timɔɔ˗Odhiantalö. ˈKö ˗kë ꞊dhɛ kwa ꞊dhegblü ˗nu ˈwo mü ˗a mɛn ꞊vadhɛ ˗wo ˗bɔ ˈˈyi ꞊bhaa ˗kwɛ ˗kɔŋ do ˈwo ˗ʒiö yö ˗an ˈgü, ˗wa kë ˗yödhiʋ̈ ˗nu, mɛn zii ˗nu waa mɛn zii ˗kɔ ꞊löö ˗nu ˈka. ˗A mɛn ˈbha ˗nu yö ˗kë ˗wodhiëëtadhɛ ˈgü, ˈö ˈwo wo ˗kɔ ˗ya ˗ni ˈgü ˗zuugü ˗bhöpë ˗yökësü ˗gɔ, ˗wo ꞊va ˈgü. ˈMan ˗an yö kö ˗wo ˈˈtan bho ˗ni ˗bhɔkwëë ˗nu ˗ta, kö ˗an ˈˈdhi ˗yö ˈˈyɩɩ ˈka, kö ˗an ˗gɛn ˈdho ˗ni ˈˈdhiʋ̈, n zuʋ̈ˈˈ ꞊nii ˗yö ˗da.

Yi ˗bha ˗tosɛta ˈö kun Timɔɔ˗Odhiantalö, ˈyaa kun ꞊dhɛ ˗a ˈdhɛ ˈyi˗ ˗kë Ɔstrali ˗a ˈdhö. ˈˈKɛɛ ˗yö zuʋ̈gblüdhi ˗nu n ˗dhɛ ꞊dedewo. ˈˈTʋ̈ŋ ˈbha ˗nu ˈka, yi ˗ya gɔ ˈnën ˈsɛɛn˗ ˗nu ˈgü, ˈö ˈwo yaa ˈyuöö˗ ˈˈkpɛɛ ˗nu, ˈˈtʋʋ ꞊kwɛɛ˗ ˗nu, yi ꞊nënŋ ˈkoo. Yi ˈbha ˗nu ˈka ˈzü, yi Biblö ˗zɔn mɛn ˗nu ˗dhɛ ˈkɔ ˈsɛɛn˗ ˗nu, ˈö ˈˈwo dɔ mɛn ˗nu ˈka mü, ɛɛnˈˈ ˈö ˗an ˈgüdhɛ ˈdhö ˗saa ˗an ˈgü, kö ˗tɔ ˗nu ˗wo ˈˈglü ˗ni yi ˗züzü, ˗wo ˗dhɛ blüüˈˈ ˗ni ˈkɔɔ mü. ˈKö ˈyi bɔ pë suu ˗nu ˈwo ˈˈdhʋ̈ ˗an ˈgü, ˈman ˈɲaannu ꞊shiöŋ a˗ ˗pö n ˗de ˗dhɛ: ‹ˈMën˗ ˗së ˗kë ꞊ni?›

ˈMan ˗n ˗zota n ˗bha ˗tosɛta ˈö ꞊kwɛŋzü ˗a ˈgü, a n ˗mɛn ˗nu ˈˈnuɛ ˗bho Zoova ˗bha ʒiaan ˗zɔn n ˗dhɛ ˗sü ˗bha. ˗Wo wo zuʋ̈ˈˈ ˗kë ˗saa n ˈˈpiʋ̈, ˈö ˈˈtʋ̈ŋ ˈa kun ˗a ˈka ˈˈtëëtë Zoova ˗dhɔkësü ˈgü bhë, ˈwo n ˗takun. ˈMan˗ yö ꞊dhɛ ˈpë Proverbes 22:6 ˗ya pö bhë, gagade ˗mü. N dë waa n dhe ˗an zuʋ̈ˈˈ ˈˈgblü ˗yö dhi ˗sü ˈka ꞊dedewo, yaa Alɛsö yi ˗bha Zoova ˗dhɔkësü ˗wɔn ˈgü. ˈÖ go 2016 ˗bha, yi ˈˈpian do ˈˈpiʋ̈ ˗maankëmɛn ˈka Ɔtralazi.

ˈPë ˗kë ˈa ˗zlanwopösü yö ꞊dhɛ ꞊kwɛɛ˗ ˈgbinŋ˗ ˈdhö ˈˈtʋ̈ŋ bhë ˈgü, man ꞊dede ˈmaan˗ dɔ. ꞊Dɛɛ, ˗zlanwopösü ˗ya kë n ˗dhɛ ˗së. A˗ ˗yö ꞊dhɛ ˈkö pë ˈˈoo ˗pë ˗kë kwa ˈka, kwa ꞊mɔɔn˗ ˗bha ˈkwa zuʋ̈gblüdhi ꞊dede ꞊slɔɔ ˗Zlan ˗bha yö ˗kë zuʋ̈ˈˈ ꞊gban ˈka ˗sü ˈgü. ꞊Ii, ˗kwɛ 18 ˈö yaa Alɛsö ˈya˗ kë yi ˈkwëë˗ Zoova ˗bha yökësü ˈgü bhë, ˗wo n zuʋ̈ˈˈ ˈˈgblü dhi ˗kwɛ ꞊dede ˗nu ˈka n ˗bha ˗tosɛta ˈgü. ˗Wo ˈö Davi ˗ya pö Zoova ˗dhɛ bhë, ˈman˗ yö ꞊dhɛ gagade ˗mü. ˗Ya ˗pö: «Mɛn ˈˈpɛpɛ ˈö ˈwo wo ˗bin ü ꞊zlöö ˗an zuʋ̈ˈˈ ꞊nii ˗dho ˗da. ˗Wo ˗dho ˈˈgbla zuʋ̈niidadhe ˈka ˈˈtʋ̈ŋ ꞊gban ˈgü. Mɛn ˗nu ˈö ü ˈtɔ ˗dhɔ ˗yö ˗an ˗kë, ˗wo ˗dho zuʋ̈niidadhe ꞊slɔɔ˗.»​—Ps. 5:11.