˗Kwɛ 1920 ˗naan ꞊taa, ˈyö n ˗mɛn ˗nu ˗wo gagade dɔ. ˗Yö kë ˈˈdhʋ̈ kö ˈwii wo ˈkosü ꞊köŋ. A bhɔ ˗kwɛ 1939 zübhodhɛ ˈka. ˗Dhɛ ˈa kun ˈnën ˈka yi kun Angletɛɛ. ˗A kun ˈdho ˗ni ˈgü n ˗mɛn ˗nu ꞊keŋ˗ kletiɛn ˗nu ˗bha ˗bhɔkwëë ˗nu ˗ta. ˗Zlan ˗bha yö ꞊klaŋ ˗dhɔ ˗kun n kë ˗ni ˈgü ꞊dedewo. N man yö ˗blɛɛsü ˈa˗ ˗kë ꞊klaŋ ˈö bhë ˗a ˈˈdhiʋ̈, ˗yö ꞊tun n ˈˈɲaan. A˗ ˗da pë ˈbha ˗ta kö ˈa ˗kpan ˈˈtʋtomɛn ˗nu ˗bha. N ˗kwɛ ˗kun ˈˈsɔɔdo. ˈˈSuʋ̈ ˗kun n ˈgü ˈyö ˗tɔ ꞊dhɛ mɛn ˈˈgblʋ̈gblʋ̈ ˗nu dosɛnŋ ꞊nën ˈwo kun n wëëdhö.

˗Zlanwopö ˗kɔ ˈˈslö ˗bhaasü ˗nu ˈnën n dë ˈö˗ ˗bɛn zë pë ˗ta ˈö n ˗gba ˗a ˈka kö ˈa ˗zlanwopö ˗a ˈka. ˗Dhɛ ˈö man do ˈa ˗ya ˗zlanwopösü ˗bha ˈkɔ ˈgü ˈkɔ ˈgü n ˗kwɛ ˗kun ˈˈsaaga. ˗Zlanwopö ˗kɔ ˈˈslö ˈö kun ˗ya ˗sü ˈka n man ˈsëëdhɛ ˗ta bhë, ˗dhɛ ˈö gɔndënën do ˈö˗ ˗wo pö, ˈö ˗we ˈsëëdhɛ ˗be « Que Dieu soit reconnu pour vrai ! » ˗bha bhë, n zuʋ̈ˈˈ ꞊nii ꞊dede ˗yö ˗da. ˗A ˗wɔn ˈgü ˗a ˗bialö ˈyö ˈa dho ˗a pö n dë ˗dhɛ. ˗Zlanwopösü waa ˗dho ˗bhɔkwëë ˗nu ˗ta ˗sü ˗wo zuʋ̈niidadhe ˗nu n ˗dhɛ, ˈö ˈwo Zoova ˗dhɔkësü ˈö ˈˈtʋ̈ŋ ꞊gban ˈgü, ˗a ˗dhɔ ˗da n ˗bha.

˗Dhɛ ˈö n dë ˈö n ˈtɔ ˗ya ˈˈGlaadhiʋ̈ ˗tɔn ˗bha ˈyö gagade ˗nu ˈwo Biblö ˈgü ˈwo ˗ya ˈpa ˗sü ˗bha n zuʋ̈ˈˈ ˈka. ꞊Waa˗ ˗dɛɛ ˈbha bɔ n ˗dhɛ, ˗a ˈto ˈˈshia˗ ˗mü ˈyö ˈa˗ ꞊gban ˗wo pö. N man ˈdhaŋ ˗bho Zoova ˈˈdhiʋ̈ ˗sü ˗yö ˗dadhiʋ̈. ˗A ˗wɔn ˈgü, ˗a ˗we ˗a ˗bha kö ˈa n ˗de nu ˗a ˗dhɛ.

Kwa ˗bha ˗kɔlokota ˗yö yaa man ˈkɔdhigümɛn ˗nu yi ˗bɔ ˗kwɛ 1950 ˗bha ˗bhɔkwëë ˈkpii˗ ˈö˗ ˗gɔ ˗kë L’accroissement de la théocratie ˈka bhë ˗a ˗ta Nu Yɔkö. ˈˈMaandhoowayi ˗bha ˈwɔn ˗gɔ ˗kun « Journée des missionnaires » ꞊nën˗ ˈka. ˗Yö ˗kun ˈUtö ˈˈsu ˗dhɛkpɔɔyi 3 ꞊nën˗ ˈka. Kwa ꞊dhegblü Carey Barber ˈö ˗kë ꞊taabha kwa ˈˈdhiʋ̈ʒiöwomɛn do ˈka bhë ˈnën ˈö ˗bɔyibhaa ˈˈdhɛɛtadhiaŋ˗ zë yi ˈö bhë ˗a ˈka. ˗A ˗bha ˈˈdhɛɛtadhiaŋ˗ ˈˈdhiʋ̈tadhɛ ˈgü ˗yö dhɛɛˈˈ ꞊plɛ ˗kpɔ ˗bɔyibhaamɛn ˗nu ˗gɔ. ˗A ˗luu ˈyö ˈa˗ pö ꞊ii! N ˗kwɛ ˗kun 11 ˈˈkɛɛ ˗a ˈwɔn ˗kun n ˈˈɲaan ꞊dhɛ ʒiaan ˗së ꞊nën ˈa ˗da ˗a ˗ta bhë. N dë ˈzlaa˗ ˈnën dho n ˗dɔ  ˗bɔyibhaadhɛ ˈgü. ˈYi kun ˈdho ˗ni ˈgü, ˗yö n zuʋ̈ˈˈ kë ˗saa ˈö˗ pö n ˗dhɛ ꞊dhɛ ˈwɔn ꞊gban dho kë ˗së. ˗Dhɛ ˈö ˗kë ꞊dhɛ ˗yö kë ˈˈvaandhö bhë, n ˗gɛn ˗ʒian ˈyii yö ˈˈyi ꞊bhaadhɛ ꞊dede ˗bha. Kwa ꞊dhegblü ꞊plɛ ˈnën ˈa ʒiö ˗an ꞊kwɛɛ˗. ˗A mɛn do ˗yö n ˗bɔ ˈˈyi ꞊bhaa, ˈyö˗ mɛn ꞊plɛ ˗naan ˗yö go n ˈka ˈˈyi ꞊bhaa. ˈÖ sü ˗dhɛkpɔɔyi ˗së ˈö bhë˗ ˗bha, Zoova ˗yö n man ʒiaan ˗nu ˗dɔ ꞊zinŋ ˈgü ˗kplawo.

˗Dhɛ ˈa n bo ꞊klaŋ ˈka, ˗yö ˗kun n ˈˈpiʋ̈ ˈa kë ˗yödhiʋ̈ ˈka. ˈˈKɛɛ man ꞊klaŋgɔmɛn ˗nu ˗wo n ꞊faan ˗dɔ kö ˈa ꞊klaŋ ꞊gblɛɛn kë. A n ˈˈtʋ ˗to ˗an ˗wo ˗bha ˈyö ˈa dho Nivɛsite. ˈˈKɛɛ ˗a yi ˈyii ꞊gwëë ˈyö ˈa˗ yö ꞊dhɛ n ˈti ˈdho ꞊mɔɔn˗ ˗bha kö ˈa gagade ˗wɔn ˈsü n ꞊faan ˈka kö ˗a ˈˈtʋ̈ŋ do bhë˗ ˈka ˈa n ˈˈɲan ˗ya man ꞊klaŋ ˗bha. ˗A ˗wɔn ˈgü ˗a go Nivɛsite. ˗A ˗bhɛɛ Zoova ˗dhɛ ˈyö ˈa ˈsëëdhɛ bɔ man ꞊klaŋgɔmɛn ˗nu ˗dhɛ. A˗ ˗pö ˗an ˗dhɛ ꞊dhɛ man ˗kwɛ ˗blɛɛsü ˗ya yö ˈko ˈˈdhiʋ̈, ˗a ˗dho ˈgo Nivɛsite. ˗Dhɛ ˈa go Nivɛsite, ˗a yi ˈyii ꞊gwëë ˈyö ˗a ˗kë ˗yödhiʋ̈ ˈka ˈyö ˗tɔ ꞊dhɛ ˗a kun ˈdhaŋ bho ˗ni ˈgü Zoova ˈˈdhiʋ̈.

˗A n man ˈˈtʋ̈ŋ ꞊gban ˈgü ˗yödhiʋ̈dhɛ zü ˗bho ˈˈkwipö ˈwo˗ ˗dhɛ Wilinŋbro bhë ˗a ˈgü ˗kwɛ 1957 Ʒue ˈˈsu ˈgü. ˗Dhɛ ˈa ˗wo mü ˈyö ˈa˗ pö kwa ꞊dhegblü ˗nu ˈwo kun Lɔndrö ˗bha Betɛdhö ˈgü ˗an ˗dhɛ ꞊dhɛ ˗wo ˗yödhiʋ̈ ˗kiansü do ˈö ˈyi dho ˗zlanwopö yi ˈˈkwëë ˗a bɔ n ˗dhɛ. Kwa ꞊dhegblü Ber Vaisey ˗yö ˗kë n yökëyoo ˈka. ˗A ˗bha yökë ˗kɔ ˗yö n ˗takun ˈyö ˗a n man ˗zlanwopö ploglamö ˗së ˗ya. ꞊Ya ˈgo yaa kwa ꞊dhegblü Vasey yi ˈgü, ꞊dhegbʋʋdhe ˈˈsɔɔdo ꞊nën ˈwo kun yi ˗bha ˗zlanwokɔdhi ˈgü. N ˗de baaˈˈ ˗sü waa n ˗kɔ ˗da ˗bhɔkwëë ˈˈpɛpɛ ˈgü ˗sü ˗ya ˗kë ˈö n man ˈdhaŋ ˗bho Zoova ˈˈdhiʋ̈ ˗sü ˗yö ˗dadhiʋ̈, ˈyö ˗a n man ˗zoyödhe ˗ta ˗pʋ.

˗Dhɛ ˈa˗ pö ꞊dhɛ n ˈti ˈdho ˗da ˈˈsɔdha ˗dhɛ ˈgü, ˗wo n ˗da ˗kaso ˈgü. ˈˈKɛɛ ˗dhɛ ˈa go ˗kaso ˈgü, ˗a yi ˈyii ˗gwëë ˈyö ˗a ˗kpan kwa ꞊dhegblüdhe Barbara ˗bha. ˗Yö ˗kun ˗yödhiʋ̈ ˗yadetasü ˈka. Yi yi ˈkosü ˗kwɛ 1959 ˈka. Yi ˗kun ˗a ˈˈpiʋ̈ kö yi ˈdho ˗dhɛ ˈˈʋʋ ˗dhɛ ˈö ˈwo dho yi bɔ mü, ˗a ˈgü. ˗A zübhosü ˈka, ˗wo yi ˗bɔ Lankashaië. ˗Yö ˗kun Angletɛɛ ˈɲënŋ˗ ˗pö ˗ʒian ˈka kö mɛn ˈdho ˗ni ˈgü ˗a ˈˈdhʋŋ ʒian ˈka. ˗Kwɛ 1961 ˈka Zanvie ˈˈsu ˈgü, ˗wo n ˗dhɛ ˗Gblüdëdhɛ ˗yö ꞊klaŋ ˈˈdhiʋ̈ ˈˈsu do ˈˈpiʋ̈ Lɔndrö ˗bha Betɛdhö ˈgü. ˗Dhɛ ˈö ꞊klaŋ bhë ˈö ɲën, ˗wo n ˗bɔ ˈˈpian do ˈˈpiʋ̈ ˗maankëdhɛ ˗yö ˈgü. ˗A ˈwɔn ꞊dede ˗yö n ˗kun. ˈˈPian do ˈˈpiʋ̈ ˗maankëmɛn do ˈbha ˗yö n ˗kian Bimingamö ˗pö ˈgü ˈˈdhoogɔ ꞊plɛ ˈˈpiʋ̈. ˗A ˈˈtʋ̈ŋ bhë˗ ˈka kwa ˈˈdhiʋ̈ʒiöwomɛn ˗nu ˗wo ˗we ˗a ˗bha kö Barbara ˗yö kë n ꞊keŋ˗. ˗Dhɛ ˈö ö bo yi ˗kiansü ˈka, yi dho yi ˗bha yö ˈka ˈˈdhiʋ̈ Lankashaië waa Shɛshaië ˗nu ˈgü.

˗Kwɛ 1962 ˈka ˈUtö ˈˈsu ˈgü kö yi yi ˈˈtɛɛpa ˗ni ˈgü, ˈyö kwa ꞊dhegblü ˗nu ˈwo Betɛdhö ˈwo ˈsëëdhɛ bɔ yi ˗dhɛ. ˈSëëdhɛ ˗nu ˈwo mɛn ˈtɔ ˗ya ˗a ˗ta kö mɛn ˈdho Gadhaadö ˗bha ꞊klaŋ ˈˈdhiʋ̈ ˗kun ˗a ˈgü. ˗Dhɛ ˈyi yi bo bhɛɛˈˈ ˗sü ˈka ˗a ˗wɔn ˈgü, ˈö ˈyi yi ˈtɔ ˗ya ˈsëëdhɛ ˗nu bhë ˗an ˗ta ˈö ˈyi˗ ˈˈdhiʋ̈ yee ˗kë ˈˈvaandhö kwa ꞊dhegblü ˗nu ˈwo Betɛdhö ˗an ˗dhɛ. ˗Dhɛ ˈö ˈˈsu ˈˈsoodhu ˗yö ˗ʒiö kö yi Bluklinö, Nu Yɔkö ˗sɛ ʒiaan ˗ta kö ˈyi ˈdho Gadhaadö ꞊klaŋ ˈˈdhiʋ̈. ˗A ˗kɔ 38 ˗naan ꞊nën ˈyi kun ˈdho ˗ni ˈgü ˗a ˈˈdhiʋ̈. ˈˈSu ˗kɔŋ do ꞊klaŋ ˈö ˗gban Biblö ˗ta ꞊nën ˈyi dho ˗a kë mü.

Gadhaadö ꞊klaŋ ˈˈdhiʋ̈, ˈwii ˈwɔn ˈö ˗gban ˗Zlan ˈˈDhiwo waa˗ ˗bha ˗kɔlokota ˗bha ˗a ˗zɔn yi ˗dhɛ dosɛnŋ. ˗Wo ˈwɔn ˗nu ˈwo ˗gban yi ꞊dhegblü ˗nu ˗bha ˗a ˗zɔn yi ˗dhɛ ˈpö. ˈKö ˗kë ꞊dhɛ yi ˗kwɛ  ˗kun 20 ꞊zinŋ ˈgü, yi ˈwɔn ꞊va ꞊dede ˗draan kwa ꞊dhegblü ˈˈwɛɛ ˗nu ˈwo kun ꞊klaŋ bhë˗ ˈˈdhiʋ̈ ˗an ˗bha. Yö ˗kë kwa ꞊dhegblü Fred Rusk ˈö kun yi ꞊klaŋgɔmɛn do ˈka bhë, ˗a ˈˈpiʋ̈ ˗sü ˗kun ꞊bhlëë ˈkpii˗ ꞊dede ˈka n ˗maan ˈka. ˗Gleŋ ˗së ˈbha ˈö˗ ˗da n ˗bha ˈyö ˗tɔ ˈkwa˗ pö ˈkwa ˗dhioo dɔ mɛn ˈbha ˗ta, ˗a ˗gɛn dua ˗mü kö ˗yö ˗gban ꞊dedewo pë ˈö ˗Zlan ˗Wo ˗ya pö ˗a ˗ta. Kwa ꞊dhegblü ˗kiansü ˗nu ˈwo ˗kë ꞊dhɛ Nathan Knorr, Frederick Franz waa Karl Klein ˗nu ˈdhö bhë ˗wo ˗kun mɛn ˗nu ˈwo ˈˈdhɛɛtadhiaŋ˗ zë yi ˗bha ꞊klaŋkɔɔdhö ˗an kpö ˈgü. Yi ˗gleŋ ˗sü ˈpö kwa ꞊dhegblü A. H. Macmillan ˗bha ˗desütɩtɩsü ˈwɔnzuan ˗bha. ˗A ˗bha ˈˈdhɛɛtadhiaŋ˗ ˗yö kwa ˗takun kö ˗kɔ ˈö Zoova ˗yö ö ˗dhɔkëmɛn ˗nu ˗takun ˗a ˈka ˈˈtʋ̈ŋ ˈˈgbɩɩ˗ ˈwo bɔ ˗a ˈgü ˗kwɛ 1914 ˈka ˈö ˈdho ˈö yö ˗kwɛ 1919 ˗bha bhë, ˈkwa˗ dɔ.

˗Dhɛ ˈö yi kun ˗wo ˗ni ˈgü yi ˗bha ꞊klaŋ ˈˈdhiʋ̈todhɛ ˈgü, ˈyö kwa ꞊dhegblü Knorr ˗ya pö yaa Barbara yi ˗dhɛ ꞊dhɛ ˗wo ˗dho yi bɔ Burundi, Aflikö ˗sɛ ˈgü. ˗Dhɛ ˈö˗ pö ˈˈdhʋ̈, yi ˗dho ˗bia ˈka Betɛdhö ˗bha ˈsëëdhɛ ˗lodhɛ ˈgü kö ˈyi ˗dhɛga Annuaire ˈgü kö ˗zlanwopömɛn ˗nu ˈwo kun Burundi ˈˈtʋ̈ŋ bhë˗ ˈka kö ˈyi ˗an ˈˈdhi dɔ. ˈˈKɛɛ ˈyii ˗kpan ˈˈsɛ bhë ˗a ˈtɔ ˗bha. ˗A ˗wɔn yi kun ꞊dedewo. ꞊Ii! Yi kun ˈdho ˗ni ˈgü ˗dhɛ ˈö mɛn ˈbha ˈyii ˗zlanwopö mü do ˗a ˈgü. ˈYaa kun ˈˈsɛ ˈˈpian bhë, ˗a dɔ ˗ni ˈgü ˗së ˈka. Yi to ˈˈshia ˗mü ˈö ˈˈsuʋ̈ ˗yö ˗da yi ˈgü. ˗Bhɛɛ ˗Zlan ˗dhɛ ˗sü ꞊nën yi zuʋ̈ˈˈ ˈwaannu.

Pë ˈˈpɛpɛ ˈö ˈwo kun ˗dhɛ ˗dɛɛ ˈwo yi bɔ mü bhë ˗a ˈgü, ˈwaa kun ꞊dhɛ ˗a ˗dhɛ ˗nu ˈwo yi bɔ ˗an ˈgü zii ˈka bhë, ˗an ˈdhö. ˈˈTʋ̈ŋ waa mɛn ˗nu ˈwo kun mü, ˗an wɔkɔ ˗nu waa ˗an ˗wo ˗nu ˗kun wo ˗de ˗ta. Yi ˗bhawɔn ˗kun ˈˈkwiwo draansü ˗bha. ˗Dhɛ ˈö ˈyi dho wɔ˗ ˗bha ˈpö ˗a ˗dhɛ ˗kun ˗a ˗bha kö ˈyi˗ mɛɛnˈˈ. ˗Dhɛ ˈö ˈyi ˗wɔ mü, ˗a ˗dhɛkpɔɔyi ꞊plɛ ˗naan ˈö dɔ˗ ˈˈpiʋ̈, ˈö yi ˈˈtɛɛdo do ˈyi Gadhaadö ꞊klaŋ ˗kë ˈˈkwëë ˈö ˈwo˗ ˗dhɛ Harry Arnott, ˈö ˗nu ˗wo yi ˗dhɛ. ˗Yö ˗kun ö ˗yɛɛ kë ˗ni ˈgü Zanbi. ˗Yö yi ˗takun ˈö ˈyi ˈkɔ ˈbha ꞊slɔɔ. ˗A ˈkɔ ˈö ˈˈdhʋ̈ ˗yö ˗kë bɔmɛn ˈˈpɛpɛ ˗bha ˈkɔ ꞊blɛɛsü ˈka. ˈˈKɛɛ ˗a ˗dhɛ ˈyii ꞊gwëë ˈö ˈyi ˗ya ˈwɔn ꞊slɔɔ ˗sü ˗bha ˈˈsɛgɔdhiʋ̈mɛn ˗nu ˈwo kun mü ˗an ˈka ˈˈkɛɛ kö ˈwɔn ˈö ˗gban Zoova ˗bha ꞊Gbɛkiö ˗nu ˗bha ˈwaa˗ dɔ ˗ʒiaanwo. ˗Dhɛ ˈö ˗zlanwopösü ˈˈdhia ꞊dede kun ˈman ˗ni ˈgü yi ˈgü, ˈö ˈˈsɛgɔdhiʋ̈mɛn ˗nu ˗wa pö yi ˗dhɛ ꞊dhɛ ꞊ya kë ꞊dhɛ yö ˗kë ˗a ˈka ˈsëëdhɛ ˗së ˈyaa yi ˗gɔ, ˈyi ˈdho ꞊mɔɔn˗ ˗bha kö ˈyi ˈto mü. ˗Dhɛ ˈö ˗kë ˈˈdhʋ̈ ˈö ˈyi go mü ˈyi dho ˗ya ˈˈsɛ ˈˈwɛɛ ˈgü. ˈˈSɛ ˗dhɛ ˈö ˈyi dho ˗a ˈgü ˈyö ˗tɔ Uganda.

˗Dhɛ ˈö ˈyi ˗wo Uganda, viza ˈyaa kun yi ˗gɔ. ˗A ˈˈsuʋ̈ ˗kun yi ˈgü ˈˈkɛɛ yi yi ˗zoyö Zoova ˗dhɛ. Kwa ꞊dhegblü do ˈö Kanada mi ˈka ˈö ˗zlanwopö ˗dhɛ ˈö ˗zlanwopömɛn ˗nu ˈwaa mü ꞊va ˗a ˈgü Uganda ˗sɛ  bhë ˈgü, ˗ya ˈˈslë ˗mɛɛn ˈö ˈwɔn ˈö ˈyi kun ˗a ˈgü ˗a ꞊blɛɛ ꞊zaŋ ˈkpii˗ do ˈbha ˗dhɛ. ˗A ꞊zaŋ mi ˈö bhë ˗ya ˗pö yi ˗dhɛ ꞊dhɛ ˈˈsanni yi yi ˗bha ˈsëëdhɛ ˈˈkan, yi ꞊mɔɔn˗ ˗bha ˈyi to ˈˈsɛ bhë˗ ˈgü ˈˈsu ˈnën ˈbha ˈˈpiʋ̈. ˗Dhɛ ˈö˗ pö ˈˈdhʋ̈, yi˗ ˗yö ꞊dhɛ Zoova ˈnën kun yi ˗takun ˗ni ˈgü bhë.

˗Kɔ ˈö ˈwɔn ˗nu ˈwo kun ˗a ˈka ˈˈsɛ bhë˗ ˈgü waa˗ ˗dhɛ ˈö kun Burundi ˈwaa kun do. ˈKö ˗kë ꞊dhɛ Zoova ˗bha ꞊Gbɛkiö 28 ˈˈkpaan ꞊nën ˈwo kun mü, ˗yö ˗kun ˗a ˗zɔn ˗ni ˈgü ꞊dhɛ ˗wa ˗zlanwopö mü ˈsaadhö. Yi ˗kpan mɛn ꞊va ˈö ˈwo ꞊Glee˗ ˗wo pö ˗an ˗bha ˈˈyasa bhë˗ ˈgü. ˈˈKɛɛ yi˗ ˈgüman ˈˈvaandhö ꞊dhɛ ˈyi˗ ˈˈpiʋ̈ ˈyi mɛn ˗dɛɛ ˗nu ˗takun kö ˗an ˗gɛn ˈdho ˈˈdhiʋ̈, yi dua ˗mü kö ˗wo ˗nu ˈwo ˗an pö mü ˈyi˗ do ˗zë draanˈˈ. Yi ˗ya ˗zlanwopösü ˗bha Kanpala ˗pö ˈgü. ˗Dhɛ ˈö ˗kë ꞊dhɛ Luganda ˗wo ꞊nën ˈwo kun ˗a pö ˗ni ˈgü ꞊va bhë, yi ˈˈɲan ˗ya yö ꞊nën˗ draansü ˗bha. ˗Kwɛ ꞊va ꞊nën ˈyi˗ sü ˈö ˈyi ꞊tun ˗a pö ˗ni ˈgü ˗së ˈka. ˈˈKɛɛ ˗yö yi ˗takun ˈö ˗zlanwopösü ˗yö ˗dhi yi ˗gɔ. ˗Yö yi ˗takun ˈpö ˈö ˈwɔn ꞊dede ˈö yi ˗bha Biblö ꞊klaŋnën ˗bhawɔn ˈdhö kun ˗a ˗bha kö ˗an ˗gɛn ˈdho ˈˈdhiʋ̈ ˈyi˗ dɔ. ˗Dhɛ ˈö ˗kë ˈˈdhʋ̈ ˈö wo ꞊dee ˈwo ˗ya wo zuʋ̈ˈˈ ˈˈpʋ ˗sü ˗bha yi ˗dhɛ. Pë ˈwo kun ˗a draanˈˈ ˗ni ˈgü, ˗kɔ ˈwo˗ yö˗ ˈka, ˗wa ˗pö yi ˗dhɛ.

Yö ˈˈwɛɛ ˈbha ˈwo˗ dɔ yi ˗kɔ ˈka ˗yö zuʋ̈niidadhe ˈö ˈyi kun ˗a ꞊slɔɔ ˗ni ˈgü kö ˗desütɩtɩmɛn ˗nu ˗wa ˈˈwɩ gagade ˗bha bhë, ˗a ˈbha ˗da ˗ta. ˗A yö ˈö ˈˈdhʋ̈ ˈyö ˗tɔ ˗kë ˈˈpian do ˈˈpiʋ̈ ˗maankëmɛn ˈka ˈsü ˈö ˈˈsɛ bhë˗ ꞊gban ˈgü. Kwa ꞊dhegblü ˗nu ˈö ˈwo Kenia ˗bha Betɛdhö ˈgü, ˗wo yi ˗bɔ ˗dhɛ ˗nu ˈgü. ˗A ˈˈta ˗nu ˈwo ˈˈdhʋ̈ ˗wa ˗kë ˈö ˗dhɛ ˈö ˗yödhiʋ̈ ˗yadetasü ˗nu ˈwo ˗zlanwopö mü ꞊blɛɛsü ˈyi ˗kpan ˗an ˗bha. Mɛn ˗nu ˈö ˈwii wo ˈˈɲan ˗kpan do Zoova ˗bha ꞊Gbɛkiö ˗nu ˗bha, ˗wo wo ˗kɔ ˗ya yi ˗dhɛŋ ˗gɔ ˗së ˈka. ˗Wa ˗kë ˈö ˈyi ˗kë yi ˗de ˈgü ꞊dhɛ ˈpë ˈyi yi ˗de ꞊plöö ˗a ˈdhö. ˗Wo ˗kun pë kpa ˗ni ˈgü yi ˗dhɛ ˗ʒiaanwo.

ˈˈTa ˈˈwɛɛ ˈbha ˗kun dɔ ˗ni ˈgü yi ˗gɔ. ˗A ˗dhɛkpɔɔyi ꞊plɛ ˗kë ꞊trɛɛn ˈgü kö ˈa go ˗ni ˈgü Kanpala kö ˈa ˈdho Monbasa, ˈpödhɛ ˈbha ˈö Kenia ˈˈyi ˈˈsɔɔ ˗a ˈgü. ˗Dhɛ ˈa ˗wo mü, ˈyö ˈa ˈˈyitagɔ sü ˈa dho Seishɛlö ˗wo kwa ꞊dhegblü ˗nu kpö ˈnën ˈbha ˈö ˈwo ꞊weeyi ˈwo˗ Ɛndö ˗kë bhë ˗a ꞊zinŋ ˈgü, ˗an ˗dhɛ. ꞊Taabha ˗naan ˈyö man dhebɔ Barbara ˗yö kpa n ˗bha ˈö mɛn ꞊plɛ yi ˈdho ˗wo ˗zlanwokɔdhi ˗nu ˈwo Seishɛlö bhë, ˗an ˗dhɛ. ˗Yö ˗kun ˗kwɛ 1965 waa ˗kwɛ 1972 ꞊zinŋ ˈgü. ˗A ˈˈtʋ̈ŋ bhë˗ ˈka, ˗zlanwopömɛn ꞊plɛ ˈwo kun ˗dhɛ bhë˗ ˈgü, ˈwo dho ˈwo ˗kë mɛn kpö ˈnën ˈbha ˈka. ˈYö ˈwo go mü ˈzü ˈwo ˗kë ˗zlanwokɔdhi ˈkpii˗ do ˈka. ˈˈTa ˈˈwɛɛ ˈbha ˗nu ˈa˗ kpɔ ˗wa ˗kë ˈö ˈa ˗wo kwa ꞊dhegblü ˗nu ˈwo Eritre, Etiopi waa Sudan ˗dhɛ ˗nu ˈgü ˗an ˗dhɛ.

˗Dhɛ ˈa n ˗yɛɛ ˗kë Uganda, kö ˈˈsɛkɔɔwɔn ˗ya ˗bhluubhludhe ˗da ˈˈsɛ bhë˗ ˈgü, kö ˈˈsɔdha ˗nu ˗wa ˈˈsɛ ˈsü. ˈˈTʋ̈ŋ yaa ˈö dɔ ˗a ˈˈpiʋ̈ bhë ˗ya ˗kë ˈö n ˗zo ˗yö ˗bö ˗wo ˈö ˗Zlan ˗Wo ˈgü ˈö˗ pö ꞊dhɛ «˗ka ˈdho kö pë ˈdhɛ ˈö ˗gblüdë bha˗ ˗bha ˈka ˈka˗ dɔ˗ ˗gɔ» ˈka bhë ˗a ˈka, ˈyö ˈa˗ ˗ya ꞊bhlëë ˈgü. (Mak. 12:17) ˗A ˈˈtʋ̈ŋ bhë˗ ˈka ˗wa ˗pö ˗dhɛŋ ˈˈpɛpɛ ˗dhɛ ꞊dhɛ ˗wo ˈdho kö ˗wo wo ˈtɔ ˗ya ꞊zaŋplöödhɛ ˈö ˗an ˈˈsɔɔ ˗a ˗dhɛ ˈgü. ˗A to mü ˈyö ˈa dho n ˈtɔ ˗ya. ˗Dhɛ ˈö˗ ˗dhɛkpɔɔyi ˈbha ˗ya ʒiö, kö ˗a ʒiö ˗ni ˈgü Kanpala ˗pö ˈgü, ˈyö ˈˈsɔdha ꞊plɛ ˈwo nu yaa bɔmɛn do yi ˈˈdhiʋ̈ ˗gɔ. Yi zuʋ̈ˈˈ ˗yö ˗mën ꞊dedewo. ˗Wa ˗pö yi ˗dhɛ ꞊dhɛ ˗dhɛ ˈsuanbhomɛn ˗nu ˗mü yi ˈka. ˗A ˗wɔn ˈgü ˗wo yi ˗kun ˈö ˈwo ˈdho yi ˈka ˗an ˗bha ꞊zaŋplöödhɛ ˈkpii˗ ˈgü. ˈˈKɛɛ ˗dhɛ ˈyi ˗wo mü ˈö ˈyi˗ pö ˗an ˗dhɛ bɔmɛn ˗nu ˗mü yi ˈka, ˈyaa ˗gblü gɔn. Yi˗ ˗pö ˗an ˗dhɛ ˗zü ꞊dhɛ ya yi ˈtɔ ˗ya ꞊zaŋplöödhɛ ˈbha ˈgü ˈsaadhö. ˈˈKɛɛ ˗an ˈˈtʋ ˈyaa kun ˈwɔn ˈyi kun ˗a blɛɛˈˈ ˗ni ˈgü bhë, ˗a ˗bha. ˈˈSɔdha ˗nu ˈö buu ˈö kun ˗an ˗ta, ˗wo yi ˗kun ˈö ˈwo dho yi ˈka ꞊zaŋplöödhɛ ˈö kun bɔmɛn ˗nu ˗bha ˈkɔ ˈˈsɔɔ bhë ˗a ˈgü. ˗Dhɛ ˈö ˈyi ˗wo mü ꞊zaŋmi ˈö kun mü ˗yö yi ˗dɔ, ˈö˗ pö ꞊dhɛ ya yi ˈtɔ ˗ya ˈsaadhö, ˗wo ꞊kwaa yi ˗zü. ˗Dhɛ ˈö˗ pö ˈˈdhʋ̈ yi zuʋ̈ˈˈ ˗yö ˈwaannu.

˗A ˈˈtʋ̈ŋ bhë˗ ˈka yi saanˈˈ ˗sü ꞊va ꞊zaŋ ˗nu ꞊kwɛɛ˗. ˈˈKɛɛ ˈyi˗ ˗sü ˗a mɛn ˗dhɛ ˗nu ˈö ˗we ˗ʒiö ˗an ˗gɔ, ˈö ˈwo yi ˈduannu bhë wo ꞊nën ˗an ꞊kwɛɛ˗. ˗A ˈˈtʋ̈ŋ ˈˈpɛpɛ ˈka  yi ˗bhɛɛ ˗Zlan ˗dhɛ. ꞊Waa˗ pö ˈyi ʒiö ˈyö yi zuʋ̈ˈˈ ˗yö ˈwaannu. ˈˈKɛɛ ˗wëëwɔn ˈö ˗kë ˈyö ˗tɔ ˗kwɛ 1973 ˈka, ˈyö ˈwo˗ pö bɔmɛn ˈˈpɛpɛ ˗dhɛ ꞊dhɛ ˗wo ˈgo Uganda ˗sɛ ˈgü.

˗Dhɛ ˈö ˗kë ˈˈdhʋ̈ ˈyö kwa ˈˈdhiʋ̈ʒiöwomɛn ˗nu ˗wo yi bɔ ˗dhɛ ˈˈwɛɛ ˈgü. ˗Dhɛ ˈwo yi bɔ˗ ˗bha ˈyö ˗tɔ Biö ˈˈsɔn ˈˈsɛ. ˗Yö ˗kun Aflikö ˈɲënŋ˗ ˗pö ˗ʒian ˈka. ˗Yö ˗kun ˈwɔn ˈˈgbɩɩ˗ ˈka ˈzü yi ˗bhaa ˈka ˈyö ˗tɔ ꞊dhɛ yi dua ˗mü kö ˈyi wɔkɔ ˗dɛɛ draanˈˈ, kö ˈyi ˈˈkwi ˗wo pö yi ꞊gban ˈka, ˈgo mü ˈzü kö ˈyi ˗tosɛta ˗kë bɔmɛn ˈˈwɛɛ ˗nu ˈö yaa ˗nu yi wɔkɔ ˈyaa do ˗an ˈˈpiʋ̈ ˗sü draanˈˈ. ˈˈKɛɛ yi ˗kpan ˈzü Zoova ˗kɔ ˗bha. ˗Ya ˗kë ˈö ˗desütɩtɩmɛn ˗nu ˗wo ˗we ˈwɔn ˗taɔŋ ˗së ˗bha. Yi ˈdhaŋ ˗bho Zoova ˈˈdhiʋ̈ yi ˈˈkwëë, ˈö ö ˗bha ʒiaan ˗nu dɔ ꞊zinŋ dɔ ꞊zinŋ ˈgü.

ˈˈKɛɛ ˈˈgblaadhe, ˈö ˈwo˗ pö yi ˗dhɛ ꞊dhɛ ˈˈyua ˈwo˗ Kansɛɛ ˗kë bhë, ˗yö man dhebɔ Barbara ˗bha. ˗A ˗wɔn ˈgü ˗kwɛ 1983 ˈka yi yi ˗yee ˗kë ˗gɛnɲan ˈka ꞊va Edhɔpö. ˗Dhɛ ˈö ꞊ɲɔɔn mü ˈö ˈyi˗ ˈwɔn dɔ ꞊dhɛ ˈyi ˈdho ꞊mɔɔn˗ ˗bha kö ˈyi ˈto ˈzü Aflikö ˗sɛ ˈgü. ˗A ˈwɔn ˗yö mɛn ꞊gban ꞊plɛ yi ˈgü ˗ga ꞊dedewo.

˗Dhɛ ˈö yi kun yö kë ˗ni ˈgü Lɔndrö ˗bha Betɛdhö, man dhebɔ Barbara ˗bha ˈˈyua ˗yö ˗dadhiʋ̈, ˈö˗ ˗wɔn ˗yö ˗shiö. Betɛdhö ˗bha ˈkɔdhigümɛn ˗nu ˗wo n ˗takun ꞊dedewo. ˈˈKɛɛ ˈkosümɛn ˈbha ˗nu ˗wo n ˗takun ˈyö ˈa man ˈwɔn yö ˗kɔ bho ˈˈgblʋʋ, ˈö ˈa n ˗zoyö ˗kplawo Zoova ˗dhɛ. ˗Dhɛ ˈö ꞊ɲɔɔn mü, ˈyö ˈa ˗kpan kwa ꞊dhegblüdhe do ˈbha ˈö ˈyaa kun wɔ ˗ni ˈgü Betɛdhö ˈˈkɛɛ ˈö nu yö kë mü ˗a ˗bha. Yö ꞊dee ˈpö ˗yö kun ˗yödhiʋ̈ ˗yadetasü ˈka. ˗A ˗bha Zoova ˗dhɔ ˗kun ˗a ˗zɔn ˗ni ˈgü ꞊dhɛ ˗a ˗bha ˗Zlan ˗wɔn ˗kun ˈgbɩɩ˗. ˗Wo ˗kun ˗a ˗dhɛ ˗ni ˈgü Ann. Yaa Ann yi yi ˈko ˗sü ˗kwɛ 1989 ˈka. ˈÖ sü ˗kwɛ ˈö bhë ˗a ˗bha, yi yö ˗kë Lɔndrö ˗bha Betɛdhö ˈgü.

˗Kwɛ 1995 waa ˗kwɛ 2018 ꞊zinŋ ˈgü, a zuʋ̈niidadhe ˗slɔɔ ˗kë kwa ˈˈdhiʋ̈ʒiöwomɛn ˗nu ˗bha bɔmɛn ˈka ˗sü ˈgü. ˗Wo ˗kun yö ˈö bhë ˗a ˗dhɛ ˗ni ˈgü˗ be «ˈˈsɛ ꞊va ˗maankëmɛn.» Yö ˈö bhë ˗ya ˗kë ˈyö ˈa ˗wo kwa ꞊dhegblü ˗nu ˈwo ˈˈsɛ ˈö ꞊mɔɔn ˈˈsɛ 60 ˗bha, ˗an ˈgü, ˗an ˗dhɛ. ˈˈSɛ ˈˈpɛpɛ ˈa ˗wo ˗an ˈgü, a˗ yö mü ꞊dhɛ Zoova ˗dhɔkëmɛn ˗nu ˗wo ˗kë ˈwɔn suu ˈˈoo su ˈgü, Zoova ˗yö ö ˗zokë ˗an ˈˈpiʋ̈.

˗Kwɛ 2017 ˈka, man yö ˗ya ˗kë ˈyö ˈa n ˗yɛɛ ˗kë Aflikö ˗sɛ ˈgü. ˗Dhɛ ˈa dho Ann ˈka Burundi ˈö ˈyi˗ yö ꞊dhɛ kwa ꞊dhegblü ˗nu ˈwo mü ˗wa ˗dadhiʋ̈ bhë, ˗a ˈˈyi ˗yö ˗kan yi ˗dhɛ. ˗Dhɛ ꞊dede ˈa kun ˗zlanwopö ˗ni ˈgü ˗a ˗bha ˈkɔ ˈgü ˈkɔ ˈgü ˗kwɛ 1964 ˈka bhë, Betɛdhö ˗së do ˗yö dɔ ˗sü ˈka mü. ˗A Betɛdhö ˈö ˈˈdhʋ̈ ˗yö ö ˗zokë ˗zlanwopömɛn ˗nu ˈö ˈwo ˗ʒiö mɛn 15.500 ˗ta, ˗an ˈˈpiʋ̈.

˗Dhɛ ˈö kwa ˈˈdhiʋ̈ʒiöwomɛn ˗nu ˈwo ˈˈsɛ ˗nu ˈa dho ˈdho ˗an ˈgü ˗kwɛ 2018 ˈka ˗an ˗zɔn n ˗dhɛ, man zuʋ̈niidadhe ˗yö ˗dadhiʋ̈ ˈzü ˈyö ˗tɔ ꞊dhɛ Biö ˈˈsɔn ˈˈsɛ ˈtɔ ˗kun ˗a ˈgü. ˗Dhɛ ˈa ˗wo ˗an ˗bha ˈˈkwipö ˈkpii˗ ˈwo˗ Bia ˗dhɛ ˗kë bhë ˗a ˈgü, ˗yö ˗kun ꞊dhɛ pë ˈö ˈa n ˗yee kë ˗sü ˈka n ˗de ꞊plöö ˗a ˈdhö. ˗Dhɛ ˈa kun ˗dhɛga ˗ni ˈgü ˈsëëdhɛ ˈö mɛn ˗nu ˈwo yö ˗kë Betɛdhö ˗an ˗bha ˈˈnimlɔn ˈdhö ˈgü bhë ˗a ˈgü, ˈyö ˈa ˈsuan bho ꞊dhɛ kwa ꞊dhegblü ˈö˗ ˗bha ˈkɔdhi ˈö kun ˗dhɛŋ ˗nu ˗bha ˈˈsɔɔ bhë, ˈyö ˗tɔ Sossou. ˗Dhɛ ˈa ˗wo Bia ꞊blɛɛsü ˗yö ˗kun ˈˈkwipö bhë, ˗a ˗maankëmɛn ˈka. ˈˈKɛɛ ˈyaa kun Sossou ˈa˗ dɔ bhë˗ ˈka. Sossou ˈˈwɛɛ ꞊nën ˈa ˗kpan ˗a ˈtɔ ˗bha mü. ˈYö ˗a Sossou ˈö ˈˈdhʋ̈ ˈyö ˗tɔ ˗a gbö.

ˈYaa za ˈgü, Zoova ˗yö ˗to ö ˗wo ˗ta. ˈWɔn ˈˈgbɩɩ˗ ˈˈpɛpɛ ˈa bɔ ˗an ˈgü bhë, ˗wa ˗zɔn n ˗dhɛ ꞊dhɛ ꞊ya kë ꞊dhɛ ˈkwa kwa ˗zoyö Zoova ˗dhɛ yö ꞊dede ˗yö kwa ˗bha ʒiaan ˗nu ˗dɔ ꞊zinŋ ˈgü. ˈPë ˈyi˗ ˈˈpiʋ̈ ꞊dedewo ˈˈtʋ̈ŋ yö˗ ˈgü ˈyö ˗tɔ kö ʒiaan ˈö˗ ˈˈdhiʋ̈todhɛ ˈyi ˈdho kë, ˈö ˗dho ˗a wɔ kwa ˈˈɲan ˈˈdhiʋ̈ ˈˈpuu ˈka ˈˈkpɔnŋtaadhɛ ˗dɛɛ ˈgü bhë, ˈyi ˈto ˗a ˈˈpiʋ̈.​—Prov. 4:18.