BIBLÖ ˗bɛnzëmɛn ˗nu ˗wo ˗wo kpö ˈbha ˗nu ˗pö ˈko ˗ta ꞊va. Pë ˗yaaga ˈö ˗an ˗wɔn ˈgü ˈwo˗ ˗kë ˈˈdhʋ̈, ˗kwa ˗an ˗ga.

ˈˈTʋ̈ŋ ˈwo˗ ˗bɛnzë ˗a ˈka. Izraɛdhö ꞊kwɛŋzü, ˈtɔŋ˗ ˈsëëdhɛ ˈyaa kun mɛn ꞊vadhɛ ˗gɔ. ˈˈSɛgümɛn ˗nu ˗wa nu wo ˈkwëëdhö ˗Zlan ˗dhɔkëgükɔ ˈgü, ˈyö ˈwo ꞊kun ˈtɔŋ˗ ˗wo pö ˗an ˗dhɛ. (Deut. 31:​10-12) ˈYaa za ˈgü ꞊dhɛ ˗wa dɔ wo ˗gɛn ˗ta mɛn kpö ˈkpii˗ ˈgü ˈˈlɛlɛ ꞊va ˈˈpiʋ̈, ˗an ˈˈtʋ ꞊mɔɔn˗ ˗bha ˈö go pë ˈwo˗ ˗wo pö ˗an ˗dhɛ ˗a ˈˈpiʋ̈. (Néh. 8:​2, 3, 7) ˈˈTʋ̈ŋ ˗nu ˈwo ˈˈdhʋ̈ ˗an ˈka, ˈtɔŋ˗ ˈˈpian ˗dhɛ ˗nu ˈö˗ ˗wɔn ˈdhö ˈˈgbɩɩ˗ ˗wa ˗wo ˗pö ˗an ˗dhɛ ˈko ˗ta ꞊va kö ˗yö ˈto ˗an ˗zo ˈˈpiʋ̈, ˗wa ˗ya ꞊bhlëë ˈgü. ˈWɔn ga ˈbha ˗nu ˗wa ˗kë ˈö ˗an ˗zo ˈyaa bhɔ ˈtɔŋ˗ ˗nu ˈö Zoova ˗ya nu ˗an ˗dhɛ ˗an ˈka.—Lév. 18:​4-22; Deut. 5:1.

Pë ˗bɛnzë ˗kɔ. ˗Wo Biblö ˈˈpian ˈbha ˗nu ˗bɛnzë ꞊dhɛ mɛn ˈˈtan ˗bɛnzë. ˗A ˈbha ˗nu ˈnën ˈwo ˗tɔ Psaumes, Chant de Salomon waa Lamentations. ˗Wo ˗nu ˈwo ˗an ˈgü, ˗wa ˗pö ˈko ˗ta ꞊va ˈö mɛn ˗nu ˗takun kö ˗yö ˈto ˗an ˈˈɲaan. ˗A ˈwɔnzuan do ˈnën ˗tɔ ˗wo ˈö Psaume 115:​9-11 ˈgü. ˗Ya ˗pö: «ˈAa Izraɛdhö, ˗ka ˈdhaŋ˗ bho Zoova ˈˈdhiʋ̈. Yö ˈnën ˗tɔ ˗nu ˗an ˗dhɛ ˗mɛn waa ˗an ˗bha ˗gblü ˈdhaa˗. ˈAa Aadhɔn ˗bha ˈkɔdhigümɛn ˗nu, ˗ka ˈdhaŋ˗ bho Zoova ˈˈdhiʋ̈. Yö ˈnën ˗tɔ ˗nu ˗an ˗dhɛ ˗mɛn waa ˗an ˗bha ˗gblü ˈdhaa˗. Mɛn ˗nu ˈö ˈka ˗suʋ̈ Zoova ˗gɔ, ˗ka ˈdhaŋ˗ bho ˗a ˈˈdhiʋ̈. Yö ˈnën ˗tɔ ˗nu ˗an ˗dhɛ ˗mɛn waa ˗an ˗bha ˗gblü ˈdhaa˗.» ˗Wo ˗nu ˈwo bhë ˈˈtanbhomɛn ˗nu ꞊waa˗ pö, ˈwɔn ˗së ˗nu ˈwo ˈˈdhʋ̈ ˗wo ˗to ˗an ˈˈɲaan.

˗Wa ˗kë ˈˈdhʋ̈ kö ˗wo wo ˈˈɲan ˗klu pë ˗nu ˈö ˗an ˗wɔn ˈdhö ˈˈgbɩɩ˗ ˗an ˗bha. Biblö ˗bɛnzëmɛn ˗nu ˗wo ˗wo ˗bhüöö kpö ˗nu ˈö ˗an ˗wɔn ˈdhö ˈˈgbɩɩ˗ ˗an ˗pö ˈko ˗ta ꞊va. ˗A ˈwɔnzuan ˈnën ˗tɔ ˈdhɛ Zoova ˗ya pö Izraɛdhömɛn ˗nu ˗dhɛ ꞊dhɛ ˗an dua ˈyaa ˗mü kö ˗wo ꞊ɲɔɔn ˗bhö, ˗ya ˗pö Moizö ˗dhɛ ˗ya blɛɛˈˈ ˗an ˗dhɛ ˈko ˗ta ꞊va. ˗Zlan ˗kun ˗a ˈˈpiʋ̈ kö ˗wa ˈwɔn dɔ ꞊dhɛ ˗këdhösü ˗yö ꞊ɲɔɔn ˈgü ɛɛnˈˈ ꞊ɲɔɔn ˈö bhë ˗këdhösü ˗mü. (Lév. 17:​11, 14) ꞊Taabha bɔmɛn ˗nu waa mɛn zii ˗nu ˈwo kun Zedhizadhɛmö, ˗wa ˗zɔn ꞊dhɛ kletiɛn ˗nu ꞊waa˗ pö ˈwo kë ˗Zlan ˗dhɛ ˗së ˗an dua ˗mü kö ˗wo wo ˗de ˈkun ꞊ɲɔɔn ˗bha.—Këw. 15:​20, 29.

Zoova ˈyaa kun ˗a ˈˈpiʋ̈ kö ˈkwa Biblö ˈˈɲan ˈbha ˗nu ˗wo pö ˈko ˗ta ꞊va ꞊dhɛ mɛn ˗geebɔ ˗dhɔkë. ˗A ˈwɔnzuan ˈnën ˗tɔ Yesu ˗ya ˗pö: «ˈKa bhɛaˈˈ sië [˗Zlan] ˗dhɛ, ˈka ˈdho˗ wo ˗dhɛ do ˈgü kplɔnkplɔndhö ꞊dhɛ mɛ˗ pë wo ˗dhɔkëpë ˗nu ˗dhɛ.» (Mat. 6:7) ˗Yö ˗go mü ˈö pë ˈö ˈkwa dho bhɛɛˈˈ ˗a ˗wɔn ˈgü ˗a ˈbha ˗nu ˗zɔn. (Mat. 6:​9-13) ˈKö ˗kë ꞊dhɛ kwa ˈti ˈwɔn ga do ˗wɔn blɛɛˈˈ ˈko ˗ta ꞊va, kwa ꞊mɔɔn˗ ˗bha kö ˈkwa ˈwɔn ˗gɔ ˗nu do ˗nu pö ˗kplawo.—Mat. 7:​7-11.

˗A ˗dhɛ ˗mü ꞊dedewo kö Zoova ˗ya pö Biblö ˗bɛnzëmɛn ˗nu ˗wo ˈwɔn ga ˈbha ˗nu ˗wɔn blɛɛˈˈ ˈko ˗ta ꞊va. ˗Kɔ ˗nu ˈö kwa ˗bha ꞊Klaŋgɔmɛn ˈkpii˗ ˗ya ˗kë ˗a ˈka kö ˈö kwa ꞊klaŋkë kwa ˗bha ˈwɔn ˗së ˈka, ˗a do ˈnën bhë.—Is. 48:​17, 18.