ˈˈGlaadhiʋ̈ ˗tɔn ˗nu ˈwo yö ˈˈkpɛɛn ˗kwɛ ˈö yö ˗a ˈgü bhë, ü ˗an ˗wo ˗pö ˗së ˈka ˗ee? ˗Ya kë ꞊dhɛ ˗yö ˈˈdhʋ̈, kö ü ꞊mɔɔn˗ ˗bha ˈü dhɛɛˈˈ ˗nu ˈwo yö ˗an ˗yɔ bɔ:

ˈWɔnzuan ˗mɛɛn ˈö Zoova ˗ya to ˈö ˗gban ˗kɔ ˈkwa dho dhebɔ ˗nu ˈsü ˗a ˈka, ˗a ˗bha?

Mɛn ˈˈpɛpɛ kwa ˗ta ˗yö do Zoova ˈˈɲan ˈˈdhiʋ̈. ˈYaa gɔɔn˗ ˗nu ˈsü ˗tiaandhö dhebɔ ˗nu ˗bha. ˗Yö ö ˈˈtʋ ˗to dhebɔ ˗nu ˗bha ˈö ö ˈˈtʋ̈ŋ ˗kë ˗an ˗bha ˈwɔn yö ˗kɔ waa ˗an zuʋ̈dhiʋ̈tɛ ˗wɔn ˗nu ˈgü. ˗Yö ˈdhaŋ˗ ˗bho ˗an ˈˈdhiʋ̈ ˈö yö dɔ ˗an ˗kɔ ˈka ˈpö.—w24.01, ˈˈp. 15-16.

Kwa ˗dho Efɛzö 5:7 ˈö˗ pö ꞊dhɛ ‹ka ˗gɛn ˈya ˈdho ˗da ˗a ˗nu ˈˈpiʋ› bhë, ˗a ˗ya ꞊bhlëë ˈgü ˗kɔ ˗kë ꞊dhɛ?

Bɔmɛn Pɔdhö ˗ya ˗pö kwa ˗dhɛ ꞊dhɛ ˈkwa ˗dho ꞊nënŋ mɛn ˗nu ˈwo dho ˗klu ˗Zlan ˗bha ˈtɔŋ˗ ˗nu ˗bha ˗sü kë kwa ˗kɔa ˈˈgbɩɩ˗ ˗an ˗bha. ˗Yö ˗we mɛn ˗nu ˈö kwaa˗ ˗nu ˈkwa ˈˈtʋ̈ŋ ˗kë kwa ˈko ꞊bhaa ɛɛnˈˈ Ɛntɛnɛtö ˗ta ˗an ˈka.—w24.03, ˈˈp. 22-23.

꞊Suawo ˗nu ˗mɛɛn ˈkwa dho kë kwa ˈsuan˗ ˈka ˗an ˗gɔ?

Pë ˗nu ˈwo ˗kë ꞊dhɛ nɔɔn˗ ˗nu ˈö kwa ˈˈtɔŋdë ˗nu ˈti ˗an ˗ga ˗së ˈka ɛɛnˈˈ ˗a ˗dhɛ ˗nu ˈö ˈkwaa ˗an ˈgodhɛ dɔ waa ˗ta ˗yö ˗Zlan ˗bha ˗mɛn ˗nu ˗bha dhiaŋ ˗nu ˈdhö bhë, kwa dua ˗mü kö ˈkwa kwa ˗de ˈkun ˗an ˗gɔ.—w24.04, ˈˈp. 12.

ˈMën ˈkwa˗ dɔ ˈö ˗gban Zoova ˗bha zadɔ ˗sü ˈö Sadhomɔn, mɛn ˗nu ˈwo ga Sodɔmö waa Gomɔɔ ɛɛnˈˈ ˈˈyi ˈkpii˗ ꞊kwaa bhë, ˗a ˗bha? ˈYö ˈmën ˈkwaa˗ dɔ ˈpö?

˗Ya kë ꞊dhɛ Zoova ˗dho ˗an ˈto ga ˈgü ˗toëpö ˈka, ˈkwaa ˈwɔn dɔ. ˈˈKɛɛ kwa˗ ˈwɔn ˗dɔ ꞊dhɛ ˈwɔn ˗nu ˈwo ˗kë bhë Zoova ˗yö ˗an ꞊gban ˗dɔ, ˈö go mü ˗yö mɛn ˗bhawɔn ˗to ꞊dedewo.—w24.05, ˈˈp. 3-4.

˗Zlan ˗bha ˗kë «˗gwö ˈgbɔŋ» ˈka ˗sü ˗yö kwa ˗zogban ˗kɔ ˗kë ꞊dhɛ? (Deut. 32:4)

Kwa ꞊mɔɔn˗ ˗bha ˈkwa Zoova ˗kë kwa ˗bindhɛ ˈka. ˈDhaŋ˗ ˗bho ˗a ˈˈdhiʋ̈ ˗mɛn ˈö to ö ˗wo ˗ta ˗kplawo yö ˗mü. Zoova ˈyaa ˈgo ö ˈˈgblʋʋ. ˗A ˗bha ˈˈklʋʋsë ˗nu waa˗ dhɔɔbhaawɔn ˗nu ˗wo ˗to wo pinŋ˗ ˈgü.—w24.06, ˈˈp. 26-28.

ˈKwa ˈdho ˗zlanwokɔdhi ˗dɛɛ ˈgü, ˈmën dho kwa ˗takun kö kwa ˗zo ˗yö bhɔ?

˗Kwa kwa ˗zo yö Zoova ˈö ö ˗dhɔkëmɛn ˗nu ˗takun ꞊kwɛŋzü bhë ˗a ˗dhɛ. ˈKwa ˗dho kwa ˗bha ˗zlanwokɔdhi ˗dɛɛ ˗zɔn ˗a zii ˈka. ˗Kwa yökë kwa ˗bha ˗zlanwokɔdhi ˗dɛɛ ˈgü, ˈkwa ˈˈtɔŋdë ˗dɛɛ ˗nu ˈkun.—w24.07, ˈˈp. 26-28.

˗Gleŋ ˗mɛɛn ˈkwa ˗an sü ˈwɔnzuan ˗yaaga ˈwo Matiö 25 ˈgü bhë, ˗an ˈgü?

ˈWɔnzuan ˈö ˗gban ˈˈbhlaa waa ˗bho ˗an ˗bha bhë, ˗yö kwa ꞊faanmën ˗zoyö ˗Zlan ˗dhɛ ˗sü waa ˗towotasü ˗bha. ˗A ˈdhɛ ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˈwo ꞊kpɔɔsü waa˗ mɛn ˗nu ˈö ˈwaa ꞊kpɔɔsü ˗an ˗bha, ˗yö kwa ˗takun kö ˈkwa kwa ˗de baaˈˈ, ˈkwa ˗ya kwa ˈˈɲaan. ˗A ˈdhɛ ˗gban ˈwëë˗ talan ˗nu ˗bha ˈpö, ˗ya ˗zɔn ꞊dhɛ yökë ö ꞊sɔbhɛɛ ꞊dede ˈka ˗sü ˗wɔn ˗yö ˈˈgbɩɩ.—w24.09, ˈˈp. 20-24.

˗Zlan ˗dhɔkëgükɔ ˈö Sadhomɔn ˗ya dɔ bhë, ˗a ˗da ˈkɔɔdhɛ ˗gɔ ˗ta ˗yö ˗kë ꞊dhɛ?

ˈKwa ˗dhɛ ˗ga 2 Chroniques 3:4 ˈgü, Biblö ˗be zii ˈbha ˗nu ˈgü ˗wa ˗pö «kude 120» ˈö ˗kë ꞊dhɛ ˈkɔ ˈö˗ ˗gɔ ˗ta ˈdhö mɛtrö 53 ˈka ˗a ˈdhö. ˈˈKɛɛ Biblö ꞊dhiëëtasü ˈˈwɛɛ ˈbha ˗nu ˈö mɛn ˗nu ˗wo ˈdhaŋ˗ bho ˗an ˈˈdhiʋ̈ ˗an ˈgü, ˗wa ˗pö «kude 20» ˈö ˗kë mɛtrö 9 ˈka. ˗Yö ˗bɛ ꞊dedewo ˗a ˈkɔ kplüüŋgüdhɛ ˗bha.—w24.10, ˈˈp.31.

ˈMën ˗tɔ ‹dhe do ˗bha ˗kë mɛn zii ˗kɔ ꞊löö ˗gɔ› ˗sü? (1 Tim. 3:12)

˗A ˗gɛn ˈnën ˗tɔ ꞊dhɛ ˗a ˗bha dhebɔ ˗yö do ˈö dua ˈyaa ˗mü kö ˗yö ꞊niënŋ. ˗Ya ˈgo mü, ˈya ˗dho ö ˈˈɲan kë dhebɔ ˈˈwɛɛ ˗bha toŋtoŋdhö.—w24.11, ˈˈp. 19.

ˈMën ˗kë ˈö ˈkwa ꞊mɔɔn˗ ˗bha ˈkwa˗ pö ꞊dhɛ Zan 6:53 ˈgü, Yesu ˈti ˈˈwɩ Dëmɛn ˗bha ˗bhöpë ˈka?

Zan 6:53 ˗ya ˗pö ꞊dhɛ mɛn ˗nu dua ˗mü kö ˗wo Yesu kwi ˗bhö, ˗wa ꞊ɲɔɔn mü. Yesu ˗yö ˗wo ˈö bhë ˗a ˗pö Zuifö ˗nu ˈö ˗an ˗bhawɔn kun ˗zoyö ö ˗dhɛ ˗sü ˗bha ˗an ˗dhɛ ˗kwɛ 32 K.Y. ˈgü, Galile. Dëmɛn ˗bha ˗bhöpë ˗zë ˗yö ˗kë Zedhizadhɛmö kö ˗kwɛ do ˗ya ʒiö. ˈˈTʋ̈ŋ ˈö bhë ˗a ˈka, Yesu ˗yö dhiaŋzë mɛn ˗nu ˈö waa˗ ˗nu ˈwo dho kë ˗Gblüdë ˗nu ˈka dhaŋ˗ ˈgü ˗an ˗dhɛ.—w24.12, ˈˈp. 10-11.