ˈWƆN ˗GƆ 7
ˈˈTAN 15 ˗Zlan ˗bha ˈnën ˗blɛɛsü ˈtɔ ˗yö bhɔ!
ˈWɔn ˗së ˗mɛɛn ˈkwa˗ ꞊slɔɔ Zoova ˗bha kwa ˗bhawɔn ˈto ˗sü ˈgü?
«Mɛn ˗bhawɔntodhe ꞊dede ˗go bhi ꞊nën ü ˈˈpiʋ.»—PS. 130:4.
˗A ˗GƆ
Kwa ˗dho ˈwɔnzuan ˈbha ˗nu ˈwo Biblö ˈgü ˈwo Zoova ˗bha kwa ˗bhawɔn ˈto ˗sü ꞊dede ˗zɔn, ˗an yö. ˈWɔn ˗gɔ ˈö yö ˗yö ˗dho kwa ˗takun kö ˈkwa Zoova ˈˈnuɛ bho ꞊dedewo ˗a ˗bha kwa ˗bhawɔn ˈto ˗sü ˗bha.
1. Mɛn ˈbha ꞊yaa˗ pö ꞊dhɛ ˈya kwa ˗bhawɔn ˈto, ˈmën ˗kë ˈö ˈwɔn ꞊va ꞊mɔɔn˗ ˗bha ˈö go ˗a ˈgü?
«ˈMAN ü ˗bhawɔn ˈto.» ˗Wo suu ˗nu ˈwo bhë ˈkwa ˗an man, ˗wo kwa zuʋ̈ˈˈ ˗kë ˗saa. Mɛn ˈbha ˈö ˈkwa pë ˈˈdhiʋ̈˗ ˗kë ˗a ˈka ɛɛnˈˈ ˈö ˈkwa ˗wo yaa pö ˗a ˗dhɛ, ˗ya kwa ˗bhawɔn ˈto ˗yö ˗kë kwa ˗dhɛ ˗së ꞊dedewo. ˈˈKɛɛ ꞊waa˗ pö kwa ˗dhɛ «ˈman ü ˗bhawɔn ˈto,» ˗a ˗gɛn ˈnën ˗tɔ ˗mën? ˗A ˈbha ˗ya kë kö ˗a ˗mɛn ˗ya ˈˈpiʋ̈ kö ˈö˗ pö ꞊dhɛ kwa ö ˈˈtɔŋdë ˗tiaandhö ˈka ˗kplawo ɛɛnˈˈ ˈwɔn ˈö bɔ kwaa˗ ˗nu kwa ꞊zinŋgü bhë ˈyaa ˈˈpiʋ̈ kö ˈkwa˗ ˗wɔn blɛɛˈˈ ˈzü. Ɛɛnˈˈ kwa ˗bha ˈˈtɔŋdhɛ ˈti ˗dho kë ꞊dhɛ ˗kɔ ˈö˗ ˈka ˈˈdhiʋ̈ ˗be ˗a ˈdhö. ˗Ya kë ˈˈdhʋ̈ kö mɛnbhɩɩdhe ˗nu kwa ˗bha mɛn ˗bhawɔn ˈto ˗sü ˈö bhë, ˈwɔn ꞊va ꞊mɔɔn˗ ˗bha ˈö go ˗a ˈgü.
2. Biblö ˗yö Zoova ˗bha mɛn ˗bhawɔn ˈto ˗sü ˗wɔn ˗blɛɛ ˗kɔ ˗kë ꞊dhɛ? (Kpɔɔˈˈ ˈzü ˗zoto ˗a ˈˈpiʋ̈ ˗wɔn ˗bha.)
2 Mɛnbhɩɩdhe ˗nu ˈö ˈwɔn yaa kë ˗dhii ˈdhö kwa ˗bha yö, ˗kɔ ˈö Zoova ˗yö kwa ˗bhawɔn to ˗a ˈka ˈyaa ꞊dhɛ ˗kɔ ˈö ˈkwa kwa ˈko ˗nu ˗bhawɔn to ˗a ˈka ˗a ˈdhö. Zoova ˗bha mɛn ˗bhawɔn ˈto ˗sü ˗yö ö ˗de ˗ta. Psaume ˗bɛnzëmɛn ˗ya ˗pö Zoova ˗bha ꞊dhɛ: «Mɛn ˗bhawɔntodhe ꞊dede ˗go bhi ꞊nën ü ˈˈpiʋ, kë ˈˈdhʋ̈ kö mɛn ˗nu ˗wo ˈˈsuʋ̈ ü ˗gɔ.» a (Ps. 130:4) ꞊Ii, Zoova ˗bha mɛn ˗bhawɔn ˈto ˗sü ˈnën ˗tɔ «˗bhawɔntodhe ꞊dede.» Yö do ˈnën kwa ˗bhawɔn to ꞊dedewo. Biblö ˈˈɲan ˈbha ˗nu ˈwo Eblö ˗wo ˈgü bhë ˗an ˈgü, ˗a ˗bɛnzëmɛn ˗nu ˗wo ˗kɔ ˈö Zoova ˗yö mɛn ˗nu ˗bhawɔn to ˗a ˈka ˈö ˈyaa ꞊dhɛ mɛbhɩɩdhe ˗nu ˗bha ˈdhö toŋtoŋdhö, ˗a ˗wɔn ˗blɛɛ.
3. Zoova ˗bha mɛn ˗bhawɔn ˈto ˗sü ˈyaa ꞊dhɛ kwa ˗bha ˈdhö ˗kɔ ˗kë ꞊dhɛ? (Isaïe 55:6, 7)
3 Zoova ˗ya mɛn ˗bhawɔn ˈto kö ꞊yaa˗ ˗mɛn ˗bha ˈwɔn yaa bho mü ˈpapadhö, waa˗ ˗nu ˗an ˗bha ˈˈtɔŋdhɛ ˗ya kë ˈˈgbɩɩ˗ ˈzü. Zoova ˗bha kwa ˗bhawɔn ˈto ˗sü ˈö ˗kɔ ꞊gban ˗ta bhë, kwa˗ ˈˈnuɛ ˗bho ˗a ˗bha ꞊dedewo.—Isaïe 55:6, 7 ˗wo pö.
4. Zoova ˗yö kwa ˗takun ˗kɔ ˗kë ꞊dhɛ kö ˈkwa ˗bhawɔntodhe ꞊dede ˈgüman?
4 Zoova ˗bha mɛn ˗bhawɔn ˈto ˗sü ˈyaa ꞊dhɛ kwa ˗bha ˈdhö. ˗Ya kë ˈˈdhʋ̈ ˈsa kö mɛnbhɩɩdhe ˗nu ˈö ˈwɔn yaa kë ˗dhii ˈdhö kwa ˗bha yö, kwa ˗dho ꞊mɔɔn˗ ˗bha kö ˈkwa ˗bhawɔntodhe ꞊dede ˈgüman ˗ee? Zoova ˗yö ˗bɔ ˈwɔnzuan ˗sɛŋbɔ ˗nu ˗ta ˈö kwa ˗takun kö ˈkwa˗ ˈgüman. ˈWɔnzuan ˗nu ˈwo ˈˈdhʋ̈, kwa ˗dho ˗a ˈbha ˗nu yö ˈwɔn ˗gɔ ˈö yö ˗a ˈgü. ˗Wo ˗dho ˗kɔ ˈö Zoova ˗yö kwa ˗bha ˈwɔn yaa ˗nu ˗bhawɔn to ˗a ˈka, ˈö go mü ˈö ˈˈtɔŋdhɛ ˗së ˗da kwaa˗ ˗nu kwa ꞊zinŋgü ˈzü, ˗a ˗zɔn. ˈWɔnzuan ˗nu ˈwo bhë kwa ˗an ˗ga ˗ni ˈgü, kwa ˗dho Zoova ˗dhɔ ˈö kwa ˈgü ˗a ˗dadhiʋ̈, ˈö ˈkwa kwa Dë ˈˈGblüsësü ˈö mɛn ˗nu ˗bhawɔn to ˗kɔ ꞊va ˗ta bhë, ˗a ˈˈnuɛ bho.
ZOOVA ˗YÖ KWA ˗BHA ˈWƆN YAA ˗NU ˗BHO KWA ˗BHA
5. Zoova ˗ya kwa ˗bha ˈwɔn yaa ˗nu ˗bhawɔn ˈto, ˗mën ˈö˗ ˗kë?
5 ꞊Ya kë ꞊shiöŋ, Biblö ˗yö ˈwɔnyaakësü ˗zɔn ꞊kwɛɛ˗ ˈgbinŋ˗ ˈka. ˗Gblüdë Davi ˗yö ö ˗bha ˈwɔn yaa ˈö˗ ˗kë ˗a ˗blɛɛ ˈö˗ pö: «ˈWɔn yaa ˗nu ˈö ˈa ˗an ˗kë ˗wo dɔ ˗sü ˈka n ˗gɔ ˗ta ꞊dhɛ ꞊kwɛɛ˗ ˈgbinŋ˗ ˈdhö, ˈwo ˗ʒiö pë ˗nu ˈa ˗mɔn ˗an bun ˗sü ˗bha ˗an ˗ta.» (Ps. 38:4) ˈKö ˗kë ˈˈdhʋ̈ mɛn ˗nu ˗wa ˈgo wo ˗bha ꞊sɔnŋ yaa ˈgü, Zoova ˗yö ˗an ˗bhawɔn ˗to. (Ps. 25:18; 32:5) Eblö ˗wo ˈwo˗ ꞊dhiëëta Biblö ˈˈɲan ˈö bhë ˗a ˈgü ˈö ˗kë «˗bhawɔn ˈto» ˈka bhë, ˗a ˗gɛn ˈnën ˗tɔ pë ˈbha «˗lüü ˈˈshia ˗sü» ɛɛnˈˈ ˗a «bun ˗sü.» ˈDhɛ ˈˈdhʋ̈ Zoova ˗ya kwa ˗bha ˈwɔn yaa ˗nu ˗bhawɔn ˈto, ˗yö zuʋ̈dhiʋ̈tɛ ˈö kë ˗sü ˈka ꞊dhɛ ꞊kwɛɛ˗ ˈgbinŋ˗ ˈdhö kwa ˗ta bhë ˗a ˗bho mü.
«˗Ya kwa ˗bhawɔn ˈto.» (Ps. 32:5)
6. Zoova ˗yö kwa ˗bha ˈwɔn yaa ˗nu ˗bhɔ kwa ˗dhɛ ꞊taa ˗kɔ ˗kë ꞊dhɛ?
6 ˈWɔnzuan ˈbha ˗yö ˗dhö Biblö ˈgü ˈzü ˈö ˗kɔ ˈö Zoova ˗yö kwa ˗bha ˈwɔn yaa ˗nu bhɔ ˗a ˈka kwa ˗dhɛ ꞊taa, ˗a ˗zɔn. Psaume 103:12 ˗ya ˗pö kwa ˗dhɛ: «˗Kɔ do ˈö ˈɲaan˗ ˈgo ˗ʒian ˈdhö ˗a ˗puö ˗ʒian ˈka ꞊gblɛɛn ˗a ˈka bhë, ˗kɔ do ˈö bhë ˗a ˈka ˗ya kwa ˗bha ꞊sɔnŋ yaa ˗nu ˗blü kwa ˈka ꞊gblɛɛn.» ˈƝaan˗ ˈgo ˗ʒian waa˗ ˗puö ˗ʒian ˈwaa wo ˈˈkwöö ꞊klöö˗. ˗A ˗gɛn ˈnën ˗tɔ ꞊dhɛ Zoova ˗ya kwa ˗bha ˈwɔn yaa ˗nu ˗blü kwa ˈka ꞊gblɛɛn ꞊dedewo. ˗Yö kwa ˗zogban ꞊dhɛ ˗ya kwa ˗bha ˈwɔn yaa ˗nu ˗bhawɔn ˈto ꞊dedewo.
«ˈƝaan˗ ˈgo ˗ʒian ˗ya ˗pö ˗ʒian ˈka ꞊gblɛɛn.» (Ps. 103:12)
7. ˗Kɔ ˈö Zoova ˗yö kwa ˗bha ˈwɔn yaa ˗nu ˗bhawɔn to ˗a ˈka, Biblö ˗ya ˗zɔn ˗kɔ ˗kë ꞊dhɛ? (Michée 7:18, 19)
7 ˈKö ˗kë ꞊dhɛ Zoova ˗yö kwa ˗bha ˈwɔn yaa ˗nu ˗blü kwa ˈka ꞊gblɛɛn, kwa ꞊mɔɔn ˗bha ˈkwa˗ pö ꞊dhɛ ˗a ˗zo ˗yö ˗an ˈˈpiʋ̈ ˗kplawo ˗ee? ˗Abin. ˗Gblüdë Ezekiasö ˗ya ˗pö Zoova ˗bha ꞊dhɛ: «ˈBha n ˗man ˈwɔn yaa ꞊gban ˈˈpɛpɛ ˗zuö ü ꞊zlöö.» Ɛɛnˈˈ ꞊dhɛ ˗kɔ ˈö ˗zoto ˗a ˈˈpiʋ̈ ˗wɔn ˗ya ꞊blɛɛ ˗a ˈka ˗a ˈdhö: «ˈBha n ˗man ˈwɔn yaa ꞊gban ˈˈpɛpɛ bho ü ˈˈɲan ˈˈdhiʋ̈.» (Is. 38:9, 17; ztw.) ˈWɔnzuan ˈö bhë ˗ya ˗zɔn ꞊dhɛ mɛn ˗ya ˈgo ö ˗bha ꞊sɔnŋ yaa ˈgü, Zoova ˗ya ˗bha ˈwɔn yaa ˗nu ˗bho ö ˈˈɲan ˈˈdhiʋ̈ ˈö ˗an ˗zuö mü ꞊gblɛɛn. Kwa ꞊mɔɔn˗ ˗bha ˈzü ˈkwa˗ pö: «N ˗man ˈwɔn yaa ˗nu ˗wa kë ü ˈgü ꞊dhɛ pë ˈö n ˈti ˗an kë do ˗an ˈdhö.» Biblö ˗yö ˗bɔ ˈwɔnzuan ˈbha ˈö Michée 7:18, 19 ˈgü ˗a ˗ta, ˈö˗ ˗zɔn ˈzü. (˗A ˗wo pö.) ˗Ya ˗pö ꞊dhɛ Zoova ˗ya kwa ˗bha ˈwɔn yaa ˗nu ˗zuö ꞊weeyi ꞊bhaa. ꞊Kwɛŋzü pë ˈbha ˗ya ˗puö ꞊weeyi ꞊bhaa, ˈwaa ꞊mɔɔn˗ ˗bha kö ˗wa ꞊slɔɔ ˈzü.
«ˈBha n ˗man ˈwɔn yaa ꞊gban ˈˈpɛpɛ ˗zuö ü ꞊zlöö.» (Is. 38:17)
«Ü ˗dho ˗an ˗bha ˈwɔn yaa ꞊gban ˈˈpɛpɛ ˗zuö ꞊weeyi ꞊zinŋgü.» (Mich. 7:19)
8. ˈMën ˈkwa˗ yö ˈsaadhö ˈwɔn ˗gɔ ˈö yö ˗a ˈgü?
8 Biblö ˗ya ˗zɔn ˈˈpuu ˈka ꞊dhɛ Zoova ˗ya kwa ˗bha ˈwɔn yaa ˗bhawɔn ˈto, ˗ya ˗bho kwa ˗bha ˈpapadhö ˈö kwa zuʋ̈ˈˈ ˈyaa za dɔ kwa ˗bha ˈzü. Davi ˗ya ˗pö: ‹ˈMɛ ˈö ˗Zlan ꞊yaa˗ ˗nu ˗mawɔn ˈto, ˈö ꞊ya ö ˈˈtʋ̈ng ˈgo˗ ˗nu ˗bha ˈwɔn yaa ˗nu ˗wɔn ˈgü, ˗a ˗nu ˗bha ˗së. ˈMɛ ˈö ˗Zlan ˗zʋ ꞊ya bhɔ ꞊sɔng ˗kë ˗a ˗nu ˗bha ˗wɔn ˈka, ˗a ˗nu ˗bha ˗së ꞊dedewo.› (Wlɔ. 4:7, 8) ˈPë ˈwo˗ ˗dhɛ mɛn ˗bhawɔn ˈto ˗sü ꞊dede, ˈyö bhë.
ZOOVA ˗YÖ KWA ˗ZU ˈÖ KWA ˗BHA ˈWƆN YAA BHO KWA ˗BHA
9. ˗Kɔ ˗mɛɛn ˈö Biblö ˗ya ˗zɔn ˗a ˈka ꞊dhɛ Zoova ˗yö kwa ˗bhawɔn ˗to ꞊dedewo?
9 ˗Gɔtadhɔpë ˈsaa˗ ˈgü, Zoova ˗yö mɛn ˗nu ˈwo go wo ˗bha ꞊sɔnŋ yaa ˈgü, ˗an ˗bhawɔn ˗to. ˗Kɔ ˈö Biblö ˗yö ˈwɔn ˈö bhë ˗a ˗zɔn ˗a ˈka, ˗kwaa ˗ga. Zoova ˗bha kwa ˗bha ˈwɔn yaa ˗nu ˗bhawɔn ˈto ˗sü ˈö bhë Biblö ˗ya ˗zɔn pë ˈzu ˗sü waa ˗a ˗ʒiö ˈˈyi ꞊bhaa ˗sü ˗an ˈka. ˗A ˗kë ˈˈdhʋ̈ ˗sü ˗yö ˈwɔnyaakëmɛn ˗kë ˈˈslʋ̈ʋ̈slʋ̈. (Ps. 51:7; Is. 4:4; Jér. 33:8) Zoova ˗ya ˗blɛɛ ˈö˗ pö: «ˈKö ˗kë ꞊dhɛ ka ˗bha ˈwɔn yaa ˗nu ˗wo ꞊dhɛ pë ˈˈɲan ˗zɔɔndhö ˈdhö, ˗wo ˗dho kë ˈˈpuu ꞊dhɛ mënŋga ˈdhö. ˈKö ˗kë ꞊dhɛ ˗wo ˗zɔɔndhö ˈgbɛ ꞊dhɛ sɔ ˈˈpɛn ˗zɔɔndhö ˈdhö, ˗wo ˗dho kë ˈˈpuu ꞊dhɛ yɩɩˈˈ ˈˈviöö ˈdhö.» (Is. 1:18) Sɔ ˈˈpɛn ˗zɔɔndhö ˈzu ˗sü kö yö kë ˈˈpuu bhë pë ˈˈgbɩɩ˗ ꞊dede ˗mü. Zoova ˗yö ˗bɔ ˈwɔnzuan ˈö bhë ˗a ˗ta ˈö˗ ˗zɔn ꞊dhɛ ö ꞊mɔɔn˗ ˗bha ˈö kwa ˗zu kö kwa ˗bha ˈwɔn yaa ˗nu ˗wo ˈgo kwa ˗bha, kö mɛn ˈbha ˈya ˗dho ˗kpan ˗an ˗bha ˈzü.
«ˈKö ˗kë ꞊dhɛ ka ˗bha ˈwɔn yaa ˗nu ˗wo ꞊dhɛ pë ˈˈɲan ˗zɔɔndhö ˈdhö, ˗wo ˗dho kë ˈˈpuu ꞊dhɛ mënŋga ˈdhö.» (Is. 1:18)
10. Biblö ˗yö Zoova ˗bha kwa ˗bhawɔn ˈto ˗sü ˗wɔn ˗blɛɛ ˗kɔ ˗kë ꞊dhɛ?
10 ꞊Dhɛ ˗kɔ ˈkwa˗ yö ˗a ˈka ˈwɔn ˗gɔ ˈö˗ ˗dhɛ ˈö yö ˈö dɔ ˗a ˈˈpiʋ̈ ˗a ˈgü bhë ˗a ˈdhö, ˈwɔn yaa kë ˗sü ˗yö ˗kë ꞊dhɛ ˈˈpö ˈkun ˗sü ˈdhö. (Mat. 6:12; Dhu. 11:4) ˈDhɛ ˈˈdhʋ̈ ˈkwa ˈwɔn yaa kë ˗kplawo, kö ˈˈpö ˈö kwa ˗bha ˗yö kë ˗ni ˈgü ꞊va. Zoova ˗bha ˈˈpö ꞊va ˗yö kwa ˗bha. ˈˈKɛɛ Zoova ˗ya kwa ˗bhawɔn ˈto, ˗yö ˗kë ꞊dhɛ pë ˈö ˈˈpö ˈö ˈˈdhʋ̈ ꞊yaa˗ bho kwa ˗bha ˗a ˈdhö. ˈWɔn yaa ˗nu ˈö ꞊yaa˗ ˗an ˗bhawɔn ˈto ˈsaadhö, ˈyaa˗ pö kwa ˗dhɛ ˈkwa ˈˈpö bho. Zoova ˗bha kwa ˗bha ˈwɔn yaa ˗nu ˗bhawɔn ˈto ˗sü ˈö bhë ˗ya ˗kë ˈö kwa kë kwa ˗de ˈgü ˗së ꞊dedewo.
«˗Bhö yi ˗bha ˈwɔn yaa ˗nu ˗bhawɔn ˈto.» (Mat. 6:12)
11. Biblö ꞊yaa˗ pö kwa ˗bha ˈwɔn yaa ˗nu ˗wa shiʋ̈ˈˈ, ˗a ˗gɛn ˈnën ˗tɔ ˗mën? (Këwɔn ˗nu 3:19)
11 Zoova ˗bha kwa ˗bha ˈwɔn yaa ˗nu ˗bhawɔn ˈto ˗sü ˗gɛn ˈnën ˗tɔ ꞊yaa˗ ˗an bho ö ˈˈɲan ˈˈdhiʋ̈ ˈpapadhö. (Këwɔn ˗nu 3:19 ˗wo pö.) Mɛn ˈbha ˈö˗ ˗bha ˈˈpö ˈdhö kwa ˗bha ˈö ˈsëëdhɛ ˈdhö˗ ˗gɔ, ˗yö ꞊mɔɔn˗ ˗bha ˈö pë ˗ʒiö ˗a ˗ta ˈö˗ pö kwa ˗dhɛ ˗a bho ˗sü ˈto ˈˈdhʋ̈. ˈKö ˗kë ꞊dhɛ ˗a ˈwëëga ˗tɔ ˈö ˗bɛnzë ˗sü ˈka ˈsëëdhɛ ˗ta bhë ˗ya pë ʒiö ˗a ˗ta, mɛn ˗nu ˈˈɲan ꞊mɔɔn˗ ˗bha kö ˗ya yö. ˈˈKɛɛ ˈyaa ꞊dhɛ pë ˗bho ö ˈˈɲan ˈˈdhiʋ̈ ˗sü ˈö ˈpapadhö ˗a ˈdhö. ˈKwa˗ pö ˈkwa˗ ˈgüman ˗së ˈka, ˗kwaa ˈwɔn dɔ ꞊dhɛ ꞊kwɛŋzü ˗wa pë ˗bɛnzë ˗a shiʋ̈ˈˈ ˗dhɛ ˗kun ˗së. ˗Wo ꞊mɔɔn˗ ˗bha ˈwo fuu˗ zë ˈˈyi ˈka, ˗wo ˗ʒiö ˗a ˗ta. ˈDhɛ ˈˈdhʋ̈, ˗wa mɛn ˈbha ˗bha «ˈˈpö shiʋ̈ˈˈ» kö ˈwaa ꞊mɔɔn˗ ˗bha ˗wa yö ˈzü, kö ˗ya kë ꞊dhɛ ˈˈpö ˈö˗ ˗mɛn ˈti ˈkun do ˗a ˈdhö. ˗A ˈwɔn dɔ ˗sü ˈö ꞊dhɛ Zoova ˗bha kwa ˗bhawɔn ˈto ˗sü ˗yö ˗kë ꞊dhɛ pë ˈö kwa ˈti ˈwɔn yaa kë do ˗a ˈdhö bhë, ˗yö kwa zuʋ̈ˈˈ ˈˈgblü ˗dhi ꞊dedewo.—Ps. 51:9.
‹˗Ka ka wë ꞊slëë˗ ˗Zlan ˈˈpiʋ̈ kö ˗yö kaa˗ ˈwɔn yaa ˗nu ˗mawɔn ˈto.› (Këw. 3:19)
12. ˗Gleŋ ˗mɛɛn ˈkwa˗ sü ˈwɔnzuan ˈö ˗gban ˈˈdhuu kpö ˈkpii˗ ˗bha bhë ˗a ˈgü?
12 Zoova ˗ya ˗zɔn ˈzü ꞊dhɛ ˈya kwa ˗bha ˈwɔn yaa ˗nu ˗bhawɔn ˈto ˈpapadhö. ˗Ya ˗pö: «A ˗dho ü ˗bha ˈwɔn yaa ˗nu ˗bin ˈˈdhuu kpö ꞊zlöö, ˈwo ˗kë ꞊dhɛ pë ˗nu ˈwo ˈˈdhuu kpö ˈkpii˗ ꞊zlöö ˗an ˈdhö.» (Is. 44:22) Zoova ˗ya kwa ˗bha ˈwɔn yaa ˗nu ˗bhawɔn ˈto, ˗yö ˗kë ꞊dhɛ pë ˈö ˗an ˗bin ˈˈdhuu kpö ˈkpii˗ ˈgü ˗a ˈdhö. Kwaa Zoova ˗nu ˈkwaa ˗kpan ˗an ˗bha ˈzü.
«A ˗dho ka ˗bha ˈwɔn yaa ˗nu ˗bin ˈˈdhuu kpö ꞊zlöö.» (Is. 44:22)
13. Zoova ˗ya kwa ˗bha ˈwɔn yaa ˗nu ˗bhawɔn ˈto, kwa ˗kë kwa ˗de ˈgü ꞊dhɛ?
13 ˗Gleŋ ˗mɛɛn ˈkwa˗ sü ˈwɔnzuan ˗nu ˈwo bhë ˗an ˈgü? Zoova ˗ya kwa ˗bha ˈwɔn yaa ˗nu ˗bhawɔn ˈto, kwa zuʋ̈ˈˈ dua ˈyaa ˗mü kö ˗yö zadɔ kwa ˗bha ˗kplawo. Yesu ˗bha ˈˈsaa˗ ˗ya kwa ˗bha ˈwɔn yaa ˗nu bho kwa ˗bha ˈpapadhö. Zoova ˗ya mɛn ˗bha ˈwɔn yaa ˗nu ˗bhawɔn ˈto, ˗yö kë ˗sü ˈka ꞊dhɛ pë ˈö˗ ˗mɛn ˈti ˗an kë do toŋtoŋdhö ˗a ˈdhö. ˈKwa ˈgo kwa ˗bha ꞊sɔnŋ yaa ˈgü, ˗kɔ ˈö Zoova ˗yö kwa ˗bhawɔn to ˗a ˈka ˈyö bhë.
ZOOVA ˗YÖ ˗MLƐƐN ˗SË ˗DA KWAA˗ ˗NU KWA ꞊ZINŊGÜ ˈZÜ
Kwa Dë ˈö dhaŋ˗ ˈgü bhë, ˗a ˗bha kwa ˗bha ˈwɔn yaa ˗nu ˗bhawɔn ˈto ˗sü ˗yö ˗mlɛɛn ˗së ˗da kwaa˗ ˗nu kwa ꞊zinŋgü. (Kpɔɔˈˈ ˗wo ˗bhüöö kpö 14 ˈgü.)
14. ˈMën ˗kë ˈö ˈkwa dho ˈdhaŋ˗ bho Zoova ˗bha kwa ˗bhawɔn ˈto ˗sü ˈˈdhiʋ̈? (Kpɔɔˈˈ ˈzü pë ˈˈbin ˗nu ˗bha.)
14 Zoova ˗ya kwa ˗bhawɔn ˈto, ˗yö ꞊mɔɔn˗ ˗bha ˈö ga kwa ˈgü ꞊dhɛ ˈˈtɔŋdhɛ ˗së ˗ya ˗da kwaa˗ ˗nu kwa ꞊zinŋgü ˈzü. ˗Yö kwa ˗takun ˈö kwa zuʋ̈ga ˈyaa zadɔ kwa ˗bha. ˈˈSuʋ̈ dua ˈyaa ˗mü kö ˗yo kwa kë ꞊dhɛ ˈwɔn ˗yö ˗shiö ˗sü ˈka Zoova ˗dhɛ kwa ˗bha, ˈö˗ ˈˈslö mɛɛnˈˈ ˗ni ˈgü kö ˈö ˈwɔn bho kwa ˈgü. ˗Yö ˈti ˗dho ˗a kë ˈˈdhʋ̈ toŋtoŋdhö. ˈMën ˗kë ˈö Zoova ꞊yaa˗ pö ꞊dhɛ ˈya kwa ˗bhawɔn ˈto, ˈkwa dho ˈdhaŋ˗ bho ˗a ˈˈdhiʋ̈? Zoova ˗ya ˗pö ö ˗wodhiʋ̈lomɛn Zedhemi ˗dhɛ: «A ˗dho ˗an ˗bha ˈwɔn ˗nu ˈwo zë ˗an ˗gɔ ˗an ˗bhawɔn ˈto. N ˗zo ˈti ˗dho ˗da ˈwɔn yaa ˗nu ˈwo˗ ˗kë ˗an ˈˈpiʋ̈ ˈzü toŋtoŋdhö.» (Jér. 31:34) Bɔmɛn Pɔdhö ˗yö ˗gban ˗wo ˈö bhë ˗a ˗ta, ˈö˗ pö: «N ˗zʋ [˗dho] bhɔ˗ ˗nu këwɔn yaa ˗nu bha˗ ˈka.» (Ebl. 8:12) ˗A ˗gɛn ˈnën ˗tɔ ˗mën?
«N ˗zo ˈti ˗dho ˗da ˗an ˗bha ˈwɔn yaa ˗nu ˈˈpiʋ̈ ˈzü.» (Jér. 31:34)
15. ˗A pö ˗sü ˈö ꞊dhɛ Zoova ˗zo ˈti ˗dho ˗da kwa ˗bha ˈwɔn yaa ˗nu ˈˈpiʋ̈ ˈzü bhë, ˗a ˗gɛn ˈnën ˗tɔ ˗mën?
15 ˗Wo ˈö Biblö ˈgü ˈö ˗kë «˗zobo» ˈka bhë, ˈyaa ˗gban ˗kplawo mɛn ˈö˗ ˗zo ˗yö ˗da mɛn ɛɛnˈˈ pë ˈbha ˈˈpiʋ̈ ˗a ˗bha. ˗Yö ˗wɩ ꞊ʒiaan mɛn ˈö ˈwɔn ˈbha kë ˗ni ˈgü ˗a ˈka. ˈWɔnyaakëmɛn ˈö kun dɔ ˗sü ˈka ˈˈdhü ˗bha Yesu ˈˈsuee bhë, ˗ya ˗pö ˗a ˗dhɛ: «N Dëmɛ, yi ˈi dho nu˗ ˈka i ˗bha ˗gblüdëdhɛ ˈgü, ˈi dɔ ˈˈgbɩɩ˗ kö i ˗zʋ ˗yö ˗bö n ˗wɔn ˗ta.» (Dhu. 23:42, 43) Yö ˈti˗ pö Yesu ˗dhɛ ꞊dhɛ ˗yö ö ˗zota ö ˗wɔn ˈgü ˈˈtʋ̈ŋ ˈö bhë ˗a ˈka. Yesu ˗ya ˗pö ˗a ˗dhɛ ꞊dhɛ ö ˗dho ˗a bho ga ˈgü. ˈDhɛ ˗kë ˈˈdhʋ̈, Zoova ꞊yaa˗ pö ꞊dhɛ ö ˗zo ˈti ˗dho ˗da kwa ˗bha ˈwɔn yaa ˗nu ˈˈpiʋ̈ ˈzü, kö ˗ya ˗pö ꞊dhɛ ˈya kwa ˗bhawɔn ˈto, ˈö ˈti ˗dho ˈwɔn bho kwa ˈgü ˗dhɛkpaɔ dhiʋ̈ˈˈ ˈgü.
16. Biblö ˗yö kwa ˗zɔn de ˗nu ˈka?
16 Zoova ˗ya kwa ˗bhawɔn ˈto, kwa kë kwa ˗de ˈgü ˗së. Biblö ˗yö ˗bɔ ˈwɔnzuan do ˈbha ˗ta kö ˈö kwa ˗takun ˈkwa˗ ˈgüman. ˗Ya ˗pö ꞊dhɛ ˈdhɛ ˗kë ꞊dhɛ ˈkwaa ˈˈslʋ̈ʋ̈slʋ̈ bhë, kwa ‹꞊dhuëngdhɛ ˈgü ˈwɔn yaa kë ˗sü ˗gɔ.› Zoova ˗bha kwa ˗bhawɔn ˈto ˗sü ˈsaa˗ ˈgü, ‹ˈkwa ˈgo ꞊dhuëngdhɛ ˈgü ˈwɔn yaa kë ˗sü ˗gɔ.› (Wlɔ. 6:17, 18; ˗Dhɛ. 1:5) ˈKwa˗ ˈwɔn dɔ ꞊dhɛ Zoova ˗ya kwa ˗bhawɔn ˈto, kwa zuʋ̈ˈˈ ˈˈgblü ˗yö ˗dhi ꞊dhɛ mɛn ˈö ꞊waa˗ bho ꞊dhuëŋdhɛ ˈgü ˗a ˈdhö.
‹ˈKa ˈgo ˈwɔn yaa ˗gɔ ꞊dhuëngdhɛ ˈgü.› (Wlɔ. 6:18)
17. Zoova ˗bha kwa ˗bhawɔn ˈto ˗sü ˗yö kë ˗sü ˈka ꞊dhɛ kwa ˗dhɛ bo ˗sü ˈdhö ˗kɔ ˗kë ꞊dhɛ? (Isaïe 53:5)
17 ˗Bhö Isaïe 53:5 ˗wo pö. Biblö ˗ya ˗pö ˈdhɛ ˗kë ꞊dhɛ ˈwɔnyaakëmɛn ˗mü kwa ˈka bhë, kwa kë ˗sü ˈka ꞊dhɛ mɛn ˈö ˈˈyua ˈö ˈˈdhɛ ˈyaa ˈdhö ˈö˗ ˗bha ˗a ˈdhö. ˗Gɔtadhɔpë ˈö Zoova ˗yö bɔ ö Gbö ˗ta ˈö˗ nu kwa ˈwɔn ˈgü bhë, ˗yö kwa ˗kë ꞊dhɛ mɛn ˗nu ˈö ˗an ˗bha ˈˈyua ˗ya bo ˗an ˈdhö. (1 Piɛ. 2:24) ˈKwa ˈwɔn yaa kë, ˗yö kwaa Zoova kwa ˗bha ˗mlɛɛn ˗shiö. ˈˈKɛɛ ˗gɔtadhɔpë ˈsaa˗ ˈgü, Zoova ꞊mɔɔn˗ ˗bha ˈö kwa ˗bhawɔn to, ˈö kwaa˗ ˗nu kwa ˗bha ˗mlɛɛn ˗yö ˗kë ˗së ˈzü. ˈˈYua ˈˈgbɩɩ˗ ˈö mɛn ˗bha ˗ya bo, ˗a ˗mɛn zuʋ̈ˈˈ ˈˈgblü ˗yö ˗dhi ꞊dedewo. ˗Kɔ do ˈö bhë ˗a ˈka, Zoova ˗ya kwa ˗bha ˈwɔn yaa ˗nu ˗bhawɔn ˈto, ˗mlɛɛn ˗së ˗ya ˗da kwaa˗ ˗nu kwa ꞊zinŋgü ˈzü, ˗yö kwa zuʋ̈ˈˈ ˈˈgblü ˗dhi.
«˗A ˗gi ˈwo wo bhë ˗a ˗wɔn ˈgü, kwa ˗dhɛ ˗ya bo.» (Is. 53:5)
ˈWƆN ˗SË ˗MƐƐN ˗NU ˈKWA ˗AN ꞊SLƆƆ ZOOVA ˗BHA MƐN ˗BHAWƆN ˈTO ˗SÜ ˈGÜ?
18. ˗Gleŋ ˗mɛɛn ˈkwa˗ sü ˈwɔnzuan ˗nu ˈwo ˗gban Zoova ˗bha mɛn ˗nu ˗bhawɔn ˈto ˗sü ˗bha bhë, ˗an ˈgü? (Kpɔɔˈˈ ˈzü ˈkɔnën «Zoova ˗yö kwa ˗bha ˈwɔn yaa ˗nu ˗bhawɔn ˗to ˗kɔ ˗kë ꞊dhɛ?» ˗bha.)
18 ˗Gleŋ ˗mɛɛn ˈkwa˗ sü ˈwɔnzuan ˗nu ˈwo ˗gban Zoova ˗bha mɛn ˗nu ˗bhawɔn ˈto ˗sü ˗bha bhë, ˗an ˈgü? Zoova ˗ya kwa ˗bha ˈwɔn yaa ˗nu ˗bhawɔn ˈto, ˗yö kë ˗sü ˈka ꞊dhɛ ˈpë ˈkwa ˈti ˗an kë do toŋtoŋdhö ˗a ˈdhö. ˗Ya ˈgo mü, ˈyö ˈti ˗dho ˗gban ˗an ˗ta ˗dhɛkpaɔ dhiʋ̈ˈˈ ˈgü kö ˗yö ˈwɔn bho kwa ˈgü. ˗A ˗wɔn ˈgü kwaa kwa Dë ˈö ˗ya ˗sü ˈka dhaŋ˗ ˈgü bhë, ˗mlɛɛn ˗së ˗yö ˗da kwa ꞊zinŋgü ˈzü. Kwa˗ ˈwɔn ˗dɔ ˈpö ꞊dhɛ mɛn ˗bhawɔn ˈto ˗sü ꞊dede ˗yö gbɔɔdhe ˈka. Zoova ˗bha ˗dhɔ waa˗ ˗bha ˈˈgblüsë ꞊dede ˈö˗ ˗kë mɛnbhɩɩdhe ˗nu ˈö ˈwɔn yaa kë ˗dhii ˈdhö ˗an ˗bha ˗an ˗dhɛ, ˈyö ˗mü. Pë ˈö ˗an dua ˈka ˗be, ˈyaa ˗mü.—Wlɔ. 3:24.
19. (1) ˈMën kwa dua ˈdhö ˗mü kö ˈkwa Zoova ˈˈnuɛ bho ˗a ˗bha? (Wlɔmö 4:8) (2) ˈMën ˈkwa dho ˗a yö ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈, ˗a ˈgü?
19 ˗Bhö Wlɔmö 4:8 ˗wo pö. Mɛn ˈˈpɛpɛ kwa Zoova ˈˈnuɛ ˗bho ˗a ˗bha ‹mɛn ˗bhawɔn ˈto ˗sü ꞊dede› ˗wɔn ˈgü. (Ps. 130:4) ˈˈKɛɛ ˈkwa˗ pö ˗yö kwa ˗bhawɔn ˈto, kwa dua ˗mü kö ˈkwa pë ˗wɔngbɩɩsü do kë. Yesu ˗ya ˗blɛɛ ˈö˗ pö: ‹꞊Ya kë ꞊dhɛ ˈkii˗ mɛn ˗nu ˗bha ˈwɔn yaa ˗nu ˗mawɔn ˈto ˗zë wo, kaa ˗dɩ ˈpö ka Dë ˈyii dho ka ˗mawɔn to.› (Mat. 6:14, 15) ˈDhɛ ˈˈdhʋ̈, ˗kwa ˈto Zoova bha ˈwɔnzuan ˈˈpiʋ̈ kö ˈkwa mɛn ˈˈwɛɛ ˗nu ˗bhawɔn ˈto. ˗Kɔ ˗kë ꞊dhɛ? ˈWɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈, ˗yö ˗dho kwa ˗takun ˗a ˗kë ˈˈdhʋ̈ ˗sü ˗bha.
ˈˈTAN 46 Zoova ü ˈˈnuɛ ˈgbɛ
a Eblö ˗wo ˈwo˗ ꞊dhiëëta ˈö ˗kë «˗bhawɔn ˈto ˗sü» ˈka bhë, ˗a ˗gɛn ˈnën ˗tɔ mɛn ˗bhawɔn ˈto ˗sü ꞊dede dosɛnŋ ˈö ˗dhö, ˈkö ˗kë ꞊dhɛ mɛn ˗bhawɔn ˈto ˗kɔ ˈˈwɛɛ ˈbha ˗nu ˗wo ˗dhö. ˗Ya ˈˈkan Traduction du monde nouveau ˗bha, Biblö ˗dhɛ ˗nu ˈwo to ˗wo ˈti mɛn ˗bhawɔn ˈto ˗kɔ ˗nu ˗bhokopiʋ̈dhɛ ˗zɔn Psaume 130:4 ˈgü.
