1. ˈMën ˈkwa˗ man kwa ˗bha ˗kwɛ 2023 ˗bhɔkwëë ˗ta?

 KWA ˗bha ˗kwɛ ˗bha ˗bhɔkwëë ˈkwa˗ ˗kë 2023 ˈgü bhë, a kwa ˈwɔngümankɔ ꞊dɛɛ ˗sɛŋbɔ ˈbha ˗nu ˗slɔɔ ˈwo ˗gban kwa ˗bha ˗zoyödhe waa kwa ˗bha ˗zlanwopösü ˗an ˗bha. ˗A ˈwɔnzuan ˈnën ˗tɔ kwa˗ ˗man ꞊dhɛ ˗wa wo bo Babidhɔnö ˗pö ˈkpii˗ ˈgü shiʋ̈ˈˈ ˗sü ˈka ꞊ʒianwo, mɛn ˈbha ˗nu ꞊mɔɔn˗ ˗bha ˈwo nu kwa ˈˈpiʋ̈ kö kwaa˗ ˗nu ˈkwa Zoova ˗dhɔkë. Kwa˗ ˗man ˈzü ꞊dhɛ ˈö sü ˗kwɛ 2023 Novanblö ˈˈsu ˗bha, ˗zlanwopömɛn ˈbha ˗nu ˈti ˗dho ˈˈtʋ̈ŋ ˈwo˗ ˗kë ˗zlanwopösü ˈgü ˗a ˈˈklɔɔnbho. ˈWɔn ˗nu ˈwo bhë ˗wo ꞊bhlëë ˗bho kwa ˗bha ˗zlanwopösü bha ˗ee? ˗Abin toŋtoŋdhö!

2. ˗Dhɛkpaɔyi ˗nu ˗wo ʒiö ˗ni ˈgü, ˈmën ˗kë ˈö kwa ˗bha ˗zlanwopösü ˗wɔn dho kë ˈˈgbɩɩ˗ ˗kplawo? (Makö 13:10)

² ˗Dhɛkpaɔyi ˗yo ʒiö ˗ni ˈgü kö kwa ˗bha ˗zlanwopösü ˗wɔn ˗yö kë ˗ni ˈgü ˈˈgbɩɩ˗ ˗kplawo. ˈMën ˗kë? ˈYö ˗tɔ ꞊dhɛ ˈˈtʋ̈ŋ ˈö to kwa ˗gɔ ˈyaa ꞊va ˈzü. Pë ˈö Yesu ˗ya pö ˈö ˗gban ˗zlanwopösü ˗bha ˈˈtʋ̈ŋ ˗totaabhasü ˈgü, ˗kwaa ˗ga. (Makö 13:10 ˗wo pö.) ˈKwa ˗dhɛ ˗ga Matiö ˗bha ˈsëëdhɛ ˈgü, Yesu ˗ya ˗pö ꞊dhɛ nɔɔn˗ ˗së ˗dho pö ˈˈsɛtadhɛ ˗todhʋ̈sü ˈgü ˈö ‹ˈˈkpɔnŋtaadhɛ ˈˈdhiʋ̈ ˗yö ꞊kun ˈto.› (Mat. 24:14) ˗Yö ˗wɩ Sɔtraan ˗bha ˈˈkpɔnŋtaadhɛ yaa ˈö yö ˗a ˗bha ˗go ˈˈshia ˗sü ˈö ˈpapadhö bhë, ˗a ˈka. ‹˗Dhɛkpaɔyi waa ˈˈlɛlɛ› ˈö ˈwɔn ˗nu ˈwo ˈˈdhʋ̈ ˈwo dho kë ˗a ˈka bhë, Zoova ꞊yaa˗ ˗an ˗ya ˈsaadhö. (Mat. 24:36; 25:13; Këw. 1:7) ˗Dhɛkpaɔyi ˗nu ˗wo  ʒiö ˗ni ˈgü kö kwa ꞊ɲɔɔn ˗ni ˈgü ˗an ˗bha. (Wlɔ. 13:11) ˗Yö dɔ kö ˈˈtʋ̈ŋ ˈö ˈˈdhʋ̈ ˗yö ˗wo kwa dua ˗mü kö ˈkwa ˗zlanwopö ˗kplawo.

3. ˈMën kwa ˗blü ˗zlanwopösü ˗bha?

³ Dhɛɛˈˈ do ˈö ˈkwa dho kwa ˗zota ˗a ˈgü ˈyö ꞊nɛn: «ˈMën ˗kë ˈö ˈkwa nɔɔn˗ ˗së pö mɛn ˗nu ˗dhɛ?» ˗Dhɔ ˈnën kwa ˗blü ˗a ˗kë ˈˈdhʋ̈ ˗sü ˗bha. ˈKwa ˗zlanwopö kö ˈkwa˗ ˗zɔn ˗ni ˈgü ꞊dhɛ nɔɔn˗ ˗së waa mɛn ˈˈwɛɛ ˗nu ˗dhɔ ˗yö kwa ˗kë. ˗A ˗de ꞊ʒiaan pë ˗wɔngbɩɩsü ꞊dede ˈö kwa ˗blü ˗a ˗kë ˈˈdhʋ̈ ˗sü ˗bha ˈyö ˗tɔ Zoova waa ö ˈtɔ ˗an ˗dhɔ ˈö kwa ˈgü. ˗Dhɔ suu ˗nu ˈwo ˈˈdhʋ̈, ˗kwa ˗an ˈsü do do kö ˈkwa ˗an ˗wɔn blɛɛˈˈ.

NƆƆN˗ ˗SË ˗DHƆ ˈNËN KWA ˗BLÜ ˗ZLANWOPÖSÜ ˗BHA

4. ˈKwa nɔɔn˗ ˗së man, ˈmën ˈkwa˗ ˗kë?

⁴ ˈDhɛ ˈka˗ man ꞊dhɛ ˈnën do ˗ya bhɔ ˈka ˗bha ˗kɔdhi ˈgü ɛɛnˈˈ yö ˈö˗ ˗dhɔ ˗yö ˈka ˗kë ˈka˗ ꞊slɔɔ, ka ˗kë ka ˗de ˈgü ꞊dhɛ? ˗A ˈbha ˗ya kë kö nɔɔn˗ ˗së ˈö ˈˈdhʋ̈, ˈka ˗kun ˗a ˈˈpiʋ̈ kö ˈka˗ blɛɛˈˈ ka ˗bha ˈkɔdhigümɛn waa ka ˈˈtɔŋdë ˗nu ˗dhɛ. Nɔɔn˗ ˗së ꞊dede ˈö ˗gban ˗Zlan ˗bha ˗Gblüdëdhɛ ˗bha, ˈdhɛ ˈka˗ man pë do ˈö bhë ˈyö ˈka˗ ˗kë ˗ee?

5. ˈˈTʋ̈ŋ ˗blɛɛsü ˈö ˈkwa gagade ˈö Biblö ˈgü ˗a man ˗a ˈka bhë, kwa ˗kë kwa ˗de ˈgü ꞊dhɛ? (Kpɔɔˈˈ ˈzü pë ˈˈbin ˗nu ˗bha.)

⁵ ˈˈTʋ̈ŋ ˗blɛɛsü ˈö ˈkwa gagade ˈö ˗Zlan ˈˈDhiwo ˈgü ˗a man ˗a ˈka, ˗kɔ ˈö ˈkwa ˗kë ˗a ˈka kwa ˗de ˈgü ˗kwa kwa ˗zota ˗a ˈgü. Kwa˗ ˗yö ꞊dhɛ kwa Dë ˈö ˈdhaŋ˗ ˈgü bhë kwa ˗dhɔ ˗ya ˗kë. ˗Ya ˈˈpiʋ̈ kö ˈkwa ö gba. ˗Ya ˗pö ꞊dhɛ ö ˗dho pë ˈˈdhiʋ̈˗ ˗nu waa saanˈˈ ˗an bho kwa ˗bha. ˗Yö ˗go mü ˈzü ˈö˗ pö ꞊dhɛ kwa dhɔɔbhaamɛn ˗nu ˈö ˗wa ga bhë, ˗wo ˗dho ˈgo ga ˈgü ˈˈkpɔnŋtaadhɛ ꞊dɛɛ ˈgü. Kwa pë ˗së ꞊va ˈˈwɛɛ ˈbha ˗nu ˗draan ˈzü. (Mak. 10:​29, 30; Zan 5:​28, 29; Wlɔ. 8:​38, 39; ˗Dhɛ. 21:​3, 4) Gagade ˗nu ˈwo ˈˈdhʋ̈ ˗wo kwa zuʋ̈ˈˈ ˈˈgblü ˗dhi ꞊dedewo. (Dhu. 24:32) Pë ˗nu ˈkwa kun ˗an draanˈˈ ˗ni ˈgü ˈˈdhʋ̈ ˗an ˗dhɔ ˗yö kwa ˗kë, ˈö ˈkwa kun ˗a ˈˈpiʋ̈ kö ˈkwa˗ blɛɛˈˈ mɛn ˗nu ˗dhɛ.—Jér. 20:9.

6. ˗Gleŋ ˗mɛɛn ˈkwa˗ sü Ɛnɛsö waa Rozö ˗an ˗bha?

⁶ Kwa ꞊dhegblü do ˈwo˗ ˗dhɛ Ɛnɛsö ˈö˗ dë  ˈwɔn ˗yö ˗kë kö ˗a ˗kwɛ ˗ya kë ˗kɔŋ do, ˗kwaa ˗bha ˈwɔnzuan ˗ga. ˗Ya ˗pö: «A n ˗de dhɛɛˈˈ ˗kpɔ ꞊dhɛ ˗ya ˈdho ˈdhaŋ˗ ˈgü ˗ee? Ɛɛnˈˈ ˗yö ˗dho ˈto ga ˈgü ˗toëpö ˈka ˗ee? N zuʋ̈ˈˈ ˗kun bhɔ ˗ni ˈgü ˈnën ˗nu ˈö ˗an dë ˗nu ˈdhö kun wo ˈˈɲaan ˗an ˗bha.» Ɛnɛsö ˗yö ˗dho zoodhö zoodhö bun ꞊taa ˈö yö ö kpɔn ˈgü ö dë ˗wɛɛbhodhɛ ˈgü ˈö ˗bhɛɛ, ˈö˗ pö: «˗Zlan ˗bho dɔ ˈˈgbɩɩ˗ kö ˗dhɛ ˈö n dë ˈdhö˗ ˗bha ˈü˗ pö n ˗dhɛ.» ˗Dhɛ ˈö˗ dë ˈwɔn ˗yö ˗kë ˈö ˗kwɛ 17 ˗yö ˗ʒiö ˗wa ˗pö Ɛnɛsö ˗yö Biblö draanˈˈ, ˈö to mü ˈö ˗wɩ ˗a ˗bha. ˗Ya ˗yö Biblö ˈgü ꞊dhɛ mɛn ˗nu ˈö ˗wa ga bhë ˈwaa pë ˈbha dɔ, ˗wo ꞊dhɛ mɛn ˗nu ˈwo yi ˈgü ˗an ˈdhö. ˗Dhɛ ˈö˗ yö Biblö ˈgü ˈzü ꞊dhɛ ˗wo ˗dho ˈgo ga ˈgü ˗dhɛkpaɔ dhiʋ̈ˈˈ ˈgü, ˗a ˈˈyi ˗yö ˗kan ˗a ˗dhɛ ꞊dedewo. (Eccl. 9:​5, 10; Këw. 24:15) ˗Yö ˗dho ˈö dhɛɛˈˈ ˗nu ˈö kun ˗an ˈkpɔ ˗ni ˈgü ö ˗de ˗gɔ ˗kwɛ ꞊va ˈˈpiʋ̈ bhë, ˗an ˗yɔ ꞊slɔɔ. Gagade ˗nu ˈö Ɛnɛsö kun ˗an draanˈˈ ˗ni ˈgü ˈˈdhʋ̈, ˗wa zuʋ̈ˈˈ ˈˈgblü ˗dhi ˈgbɛ. ˗A ˗bha dhebɔ Rozö ˗yö ˗da ˗a ˈˈpiʋ̈ ˈö waa˗ ˗nu ˈwo Biblö ꞊draan. Yö ˗de ˈpö pë ˗nu ˈö ˗an ꞊draan ˗an ˗dhɔ ˗kun ˗a kë ˗ni gü. ˗Kwɛ 1978 ˈgü, ˗wo ˗bɔ ˈˈyi ꞊bhaa. Gagade ˗wɔngbɩɩsü ˗nu ˈwo kun ˗a draanˈˈ ˗ni ˈgü ˈˈdhʋ̈, ˗wa ˗wɔn ˗blɛɛ wo ˗bha ˈkɔdhigümɛn ˗nu, wo ˈˈtɔŋdë ˗nu waa mɛn ˈˈwɛɛ ˗nu ˗dhɛ. ˗Wo ˗dho ˈwo mɛn ˗nu ˈwo ˗ʒiö 70 ˗ta ˗an ˗takun ˈwo bɔ ˈˈyi ꞊bhaa ˈpö.

7. Gagade ˈö Biblö ˈgü bhë ˗a ˗dhɔ ˗ya da kwa zuʋ̈ˈˈ ˈgü, ˈmën ˈkwa˗ ˗kë? (Dhukö 6:45)

⁷ Pë ˗nu ˈkwa ˗an ꞊draan Biblö ˈgü ˗an ˗dhɔ ˗ya kwa kë, kwa˗ ˗yö ꞊dhɛ kwa dua ˗mü kö ˈkwa˗ blɛɛˈˈ mɛn ˈˈwɛɛ ˗nu ˗dhɛ. (Dhukö 6:45 ˗wo pö.) Kwa ˗kë kwa ˗de ˈgü ꞊dhɛ Yesu ˗bha gwëëˈˈ ˗nu ˈwo kun ˗kwɛ ˗këŋ do ˗blɛɛsü ˈgü bhë ˗an ˈdhö. ˗Wa ˗pö: «Yi ˗zë ˈyii ˈdho ꞊mɔɔ˗ ˗bha kö ˈyi yi bo ˈwɔn ˈyi˗ yö, ˈˈɛɛn ˈyi˗ ma ˗a pö ˗sü ˈka!» (Këw. 4:20) Gagade ˗dhɔ ˗yö kwa ˗kë ꞊dedewo. ˗A ˗wɔn ˈgü, ˈkwa˗ ˈˈpiʋ̈ kö ˈkwa˗ blɛɛˈˈ mɛn ꞊va ˗dhɛ.

MƐN ˗NU ˗DHƆ ˈNËN KWA ˗BLÜ ˗ZLANWOPÖSÜ ˗BHA

8. ˈMën kwa ˗blü nɔɔn˗ ˗së ˗pö mɛn ˗nu ˗dhɛ ˗sü ˗bha? (Kpɔɔˈˈ ˈkɔnën « Mɛn ˗nu ˗dhɔ ˗yö kwa kë: ˗Kwa mɛn ˗nu kë Yesu ˗bha gwëëˈˈ ˗nu ˈka» ˗bha.) (Kpɔɔˈˈ ˈzü pë ˈˈbin ˗bha.)

⁸ ꞊Dhɛ Zoova ˈwaa ö Gbö ˗an ˈdhö, mɛn ˗nu ˗dhɔ ˗yö kwa ˗kë. (Prov. 8:31; Zan 3:16) Mɛn ˗nu ˈö «˗Zlan ˈyaa ˗an ˗gɔ» ɛɛnˈˈ ˈö «˗zoyödhe ˈyaa ˗an ˗gɔ» bhë, ˗an ˗wëë ˗yö kwa ˗kë ꞊dedewo. (Efɛ. 2:​12, NWT) ˗An ˗bha ˈwɔn ˈˈgbɩɩ˗ ˗nu ˗wɔn ˈgü ˗wo ˗kë ꞊dhɛ mɛn ˗nu ˈö ˈwo ˗gblü ˈˈdhi ꞊gblɛɛn ˈgü ˗an ˈdhö. ˈˈKɛɛ kwa ˗zë ˗Zlan ˗bha ˗Gblüdëdhɛ nɔɔn˗ ˗së ˈö˗ ꞊tɛɛ ˗kë ꞊dhɛ bhʋʋˈˈ ga ˈdhö ˗yö kwa ˗gɔ kö ˈkwa ˗an bho ˗a ˈka mü. ˈDhɛ ˗kë ꞊dhɛ ˗an ˗dhɔ waa ˗an ˗wëë ˗yö kwa ˗kë bhë, kwa˗ ˈˈpiʋ̈ kö ˈkwa pë ˈˈpɛpɛ kë ˈkwa nɔɔn˗ ˗së pö ˗an ˗dhɛ. Nɔɔn˗ ˗së ˈö ˈˈdhʋ̈ ꞊waa˗ man, ˗yö ꞊mɔɔn˗ ˗bha ˈö ˗zoyödhe nu ˗an  ˗dhɛ ˈö ˗an ˗takun ꞊dɛɛ kö zuʋ̈gblüdhi ˗yö kë ˗an ˗gɔ, kö «˗tosɛta ꞊dede» ˗ʒian ˈˈdhi ˗yö ˈˈpʋ ˗an ˗gɔ ˈˈkpɔnŋtaadhɛ ꞊dɛɛ ˈgü.—1 Tim. 6:19.

9. Mɛn ˗nu kpɔɔwo ˗mɛɛn ˈkwa˗ pö ˗an ˗dhɛ ˈö ˗gban ˗dhɛkpaɔ dhiʋ̈ˈˈ ˗bha? ˈYö ˈmën ˗kë? (Ézéchiel 33:​7, 8)

⁹ Mɛn ˗nu ˗dhɔ ˈö kwa ˈgü bhë ˗yö kwa ˗blü ˈpö kö ˈkwa ˗an kpɔɔ ꞊dhɛ ˈˈkpɔnŋtaadhɛ ˈˈdhiʋ̈toyi ˗ya ˈto ꞊klöö˗. (Ézéchiel 33:​7, 8 ˗wo pö.) Kwa këyɔɔ ˗nu waa kwa ˗bha ˈkɔdhigümɛn ˗nu ˗wëë ˗yö kwa ˗kë. Mɛn ꞊vadhɛ ˈwo ˗tosɛta kë ˗ni ˈgü, ˈwaa˗ ˈwɔn dɔ ꞊dhɛ «ˈˈklʋʋbhɔdhe ˈkpii˗ ˈö ˗dho kë bhë, ˗a ꞊suu yö ˈti kë ˈˈkpɔnŋ ꞊taa do toŋtoŋdhö ɛɛnˈˈ yö ˈti ˗dho kë ˈzü ˈpö ꞊taabha.» (Mat. 24:21) Kwa˗ ˈˈpiʋ̈ kö ˈwɔn ˈö dho kë ˈˈtʋ̈ŋ ˈö ˈˈdhʋ̈ ˗a ˈka, ˗wa dɔ. ˗Wo ˗dho ꞊sua ˗zlanwo ˗nu bho ˈˈshia˗, ˈö Sɔtraan ˗bha ˈˈkpɔnŋtaadhɛ yaa ˈö yö ˈö˗ ˈgü ˗yö ꞊shiʋ̈ Aamagedɔn ˗gblü yi ˈka. (˗Dhɛ. 16:​14, 16; 17:​16, 17; 19:​11, 19, 20) Kwa ˗bhɛɛ kö ˗a mɛn ꞊vadhɛ ˗wo nu kwa ˈˈpiʋ̈ kwaa˗ ˗nu ˈkwa ˗Zlan ˗dhɔkë ˗kɔ ˗së kë ꞊dɛɛ. ˈˈKɛɛ mɛn ˗nu ˈö wo ˈti wo ˈˈtʋ ˈto ˗an kpɔɔwo ˗bha ꞊dɛɛ, ˈö˗ mɛn ˈbha ˗nu ˗kë kwa ˗bha ˈkɔdhigümɛn ˗nu ˈka bhë, ˈmën dho kë ˗an ˈka?

10. ˈMën ˗kë ˈö˗ ˗wɔn ˈdhö ˈˈgbɩɩ˗ kö ˈkwa mɛn ˗nu kpɔɔ ˗kplawo?

¹⁰ ꞊Dhɛ ˗kɔ ˈkwa˗ yö ˗a ˈka ˈwɔn ˗gɔ ˈö˗ ˗dhɛ ˈö yö ˈö dɔ ˗a ˈˈpiʋ̈ ˗a ˈgü ˗a ˈdhö, Zoova dhɔɔbhaawɔn ˈö ˗dhö ˈyö ˗tɔ kö mɛn ˗nu ˗wa ˗kpan Babidhɔnö ˗pö ˈkpii˗ ˈgü shiʋ̈ˈˈ ˗sü ˗bha ˗wo wo zuʋ̈ˈˈ slëëˈˈ kö ˗wo dha. ꞊Ya kë ꞊dhɛ ˗yö ˈˈdhʋ̈, kö ˗a ˗dhɛ ˗mü ꞊dedewo kö ˈkwa ˗an kpɔɔ ꞊dɛɛ. Kwa ˗zo ˈya ˗dho bɔ ꞊dhɛ pë ˈö ˈkwa˗ ꞊blɛɛ ˗an ˗dhɛ ꞊dɛɛ bhë, ˈnën ˗an ˗zo dho ˗bo ˗a ˈka yi ˈö ˈˈdhʋ̈ ˗a ˈka. (Ézéch. 33:33) ˗A ˈbha ˗ya kë kö ˈwɔn ˈkwa˗ ꞊blɛɛ ˗an ˗dhɛ bhë, mɛn ˗nu ˗zo ˗dho ˗da ˗a ˈˈpiʋ̈ ˈö ˗an ˗blü ˈwo nu kwa ˈˈpiʋ̈ kö kwaa˗ ˗nu ˈkwa Zoova ˗dhɔkë kö ˈˈtʋ̈ŋ ˗yö ˗kun ˗an ˗gɔ ꞊köŋ. ꞊Dhɛ ˈˈɲan ˗to ˗kashokɔbhamɛn ˈö ˗kpan ‹ˈˈsɛ ˗bha ꞊zii ˗sü ˈˈgbɩɩ˗ ꞊dede ˗bha› ˈö ö zuʋ̈ˈˈ ꞊slëë bhë ˗a ˈdhö Fidhipö ꞊kwɛŋzü, mɛn ˈbha ˗nu ˗wa ˗kpan Babidhɔnö ˗pö ˈkpii˗ ˈgü shiʋ̈ˈˈ ˗sü ˗bha ˗wo ꞊mɔɔn˗ ˗bha ˈwo wo zuʋ̈ˈˈ ꞊slëë ˈpö.—Këw. 16:​25-34.

ZOOVA WAA˗ ˗TƆ ˗DHƆ ˈNËN KWA ˗BLÜ ˗ZLANWOPÖSÜ ˗BHA

11. Kwa Zoova ˈtɔ ˗kë ꞊va, ˈkwa ꞊bhlëë ˗ya ˗a ˗bha, ˈö ˈkwa kwa ˗bha ˗kɔmɔnwɔnbhasü nu ˗a ˗dhɛ ˗kɔ ˗kë ꞊dhɛ? (˗Dhɛkpaɔ dhiaˈˈ ˈsëëdhɛ 4:11) (Kpɔɔˈˈ ˈzü pë ˈˈbin ˗nu ˗bha.)

¹¹ Pë ˗wɔngbɩɩsü ˈö kwa ˗blü nɔɔn˗ ˗së pö ˗sü ˗bha ˈyö ˗tɔ Zoova waa ö ˗tɔ ˈˈslʋ̈ʋ̈slʋ̈ ˗an ˗dhɔ ˈö kwa ˈgü. Kwa ˗zlanwopösü ˗yö ꞊dhɛ ˗Zlan ˈö˗ ˗dhɔ ˗yö kwa ˗kë bhë ˗a ˈtɔ bhɔ ˗sü ˈdhö. (˗Dhɛkpaɔ dhiaˈˈ ˈsëëdhɛ 4:11 ˗wo pö.) Kwa˗ ˗pö kwa zuʋ̈ˈˈ ꞊gban ˈka ꞊dhɛ ˗a ˗dhɛ ˗mü ꞊dedewo kö Zoova ˗dhɔkëmɛn ˗nu ˗wa ˈtɔ bhɔ, ˗wo ꞊bhlëë ˗ya ˗a ˗bha, ˗wa ˈwɔn dɔ ꞊dhɛ a ˈˈpii ˗yö ˈˈgbɩɩ˗. Kwa˗ ˗zɔn mɛn ˈˈwɛɛ ˗nu ˗dhɛ ꞊dhɛ ˗Zlan ˈnën «pë suu ꞊gban ˈˈpɛpɛ ˗da,»  ˈö kwa gba ˗këdhösü ˈka. Kwa˗ ˗kë ˈˈdhʋ̈ kö ˈkwa˗ ˈtɔ kë ꞊va, ˈkwa ꞊bhlëë ˗ya ˗a ˗bha. Kwa kwa ˗bha ˈˈtʋ̈ŋ, kwa ꞊faan waa pë ˗nu ˈwo kwa ˗gɔ ˗an ˗nu kö ˈkwa ˗zlanwopö mɛn ꞊va ˗dhɛ, kë ˈˈdhʋ̈ kö ˈkwa˗ ˗zɔn Zoova ˗dhɛ ꞊dhɛ kwa kwa ˗bha ˗kɔmɔnwɔnbhasü ˗nu ˗a ˗dhɛ. (Mat. 6:33; Dhu. 13:24; Kodh. 3:23) ˗Zlan ˈö˗ ˗dhɔ ˗yö kwa ˗kë bhë, ˗a ˗wɔn ˗blɛɛ mɛn ˗nu ˗dhɛ ˗sü ˗yö kwa ˗dhɛ ˗së. ˗Dhɔ ˈö ˈˈdhʋ̈, ˗yö kwa ˗blü ˈzü kö ˈkwa˗ ˈtɔ waa mɛn ˈö˗ ˈka ˗an ˗zɔn mɛn ˗nu ˗dhɛ. ˗Mën ˗kë?

12. Kwa ˗bha ˗zlanwopösü ˗yö Zoova ˈtɔ ˗kë ˈˈslʋ̈ʋ̈slʋ̈ ˗kɔ ˗kë ꞊dhɛ?

¹² Zoova ˗dhɔ ˈö kwa ˈgü bhë, ˗yö kwa ˗blü kö ˈkwa˗ ˈtɔ kë ˈˈslʋ̈ʋ̈slʋ̈. (Mat. 6:9) ˗A ˗gɛn ˈnën ˗tɔ ꞊dhɛ kwa˗ ˈˈpiʋ̈ kö ˈkwa˗ pö mɛn ˈˈwɛɛ ˗nu ˗dhɛ ꞊dhɛ ꞊suawɔn ˗nu ˈnën Sɔtraan ˗ya ꞊blɛɛ Zoova ˗bha. (ˈWun. 3:​1-5; Job 2:4; Zan 8:44) Kwa ˗zlanwopö ˗ni ˈgü, mɛn ˈˈpɛpɛ ˈwo wo ˈˈtʋ to kwa ˗bha bhë kwa mɛn ꞊dede ˈö Zoova ˈdhö˗ ˈka ˗a ˗zɔn ˗an ˗dhɛ. Kwa˗ ˈˈpiʋ̈ kö mɛn ˈˈpɛpɛ ˗wa ˈwɔn dɔ ꞊dhɛ ˗a ˗bha ˈˈklʋʋsë ˈkpii˗ ˈnën ˗tɔ ˗dhɔ, ˈö˗ ˗bha mɛn ꞊kɔɔnsü ˈdhö kpɛnŋdhö. ˗Ya ˈgo mü, ˗a ˈˈtʋ̈ŋ ˈyaa ꞊gblɛɛn ˈzü kö ˗a ˗bha ˗Gblüdëdhɛ ˗yö saanˈˈ ˈˈpɛpɛ bho kwa ˗bha, ˗yö mɛn ˗nu gba zuʋ̈waannusü waa zuʋ̈gblüdhi ˗an ˈka. (Ps. 37:​10, 11, 29; 1 Zn. 4:8) ˈWɔn ˗nu ˈwo bhë ˈkwa ˗an blɛɛˈˈ mɛn ˗nu ˗dhɛ kö kwa Zoova ˈtɔ kë ˗ni ˈgü ˈˈslʋ̈ʋ̈slʋ̈. ˗A ˗kë ˈˈdhʋ̈ ˗sü ˗yö kwa zuʋ̈ˈˈ ˈˈgblü ˗dhi ˈzü, ˈyö sü ꞊dhɛ pë ˈö Zoova ˗bha ꞊Gbɛkiö ˗nu dua ˈdhö ˗mu kö ˗wa kë, kwa˗ kë ˗ni ˈgü. ˗Kɔ ˗kë ꞊dhɛ?

13. ˈMën ˗kë ˈö kwa ˈtɔ ˈö ˗kë Zoova ˗bha ꞊Gbɛkiö ˗nu ˈka bhë ˈö ꞊bhlëëwɔn ˈka? (Isaïe 43:​10-12)

¹³ Zoova ˗yö ˈö ˗kɔ ˗yɛ kwa ˗bha kö ˈkwa kë ö ˗bha «꞊Gbɛkiö ˗nu ˈka.» (Isaïe 43:​10-12 ˗wo pö.) ˗A ˗kwɛ ꞊va ˗ya ʒiö ˈö kwa ˈˈdhiʋ̈ʒiöwomɛn ˗nu ˗wo ˈsëëdhɛ bɔ kwa ˗dhɛ, ˈwo˗ pö: «꞊Bhlëëwɔn ˈkpii˗ ꞊dede ˈö ˗dhö kwa ˗bha ˈka ˈyö ˗tɔ kwa ˗bha ˗kë Zoova ˗bha  ꞊Gbɛkiö ˗nu ˈka ˗sü.» ˈMën ˗kë? ˈWɔnzuan do ˈö yö ˗kwaa ˗ga. Kö kwa ˗bhawɔn yö mɛn do ˗bha kö ˗yö kwa ˗ta ˗zadɔ zakanmɛn ˗kuu ˈˈdhiʋ̈, kwa ˗dho kwa ˗kɔ ˈˈyɛ mɛn ˈkwa˗ dɔ, ˈö ˈdhaŋ˗ ˗bho ˗a ˈˈdhiʋ̈ ˗mɛn ˈka ˗a ˗bha. Zoova ˗yö ö ˗kɔ ˗yɛ kwa ˗bha kö ˈkwa kë ö ˗bha ꞊Gbɛkiö ˗nu ˈka ˈyö sü ꞊dhɛ ˗yö kwa dɔ ˗së ˈka, ˈö˗ ˈwɔn dɔ ꞊dhɛ kwa ˗dho ˗a pö mɛn ˗nu ˗dhɛ yö do ˈnën ˗tɔ ˗Zlan ꞊dede. Kwa ˗bha ˗kë ˗a ˗bha ꞊Gbɛkiö ˗nu ˈka ˗sü ˈö bhë, ˗yö ꞊bhlëëwɔn ꞊dede ˈka kwa ˗bha ˈka. ˗A ˗wɔn ˈgü ˗dhɛ ˈˈoo ˗dhɛ ˈkwa˗ ˗bha, ˈkwa˗ ˈˈpiʋ̈ kö ˈkwa˗ ˈtɔ ˗zɔn mɛn ˗nu ˗dhɛ, ˈkwa ˈˈdhɛ bho ꞊suawɔn ˗nu ˈwo˗ ꞊blɛɛ ˗a ˗bha bhë ˗an ˗ta. ˈKwa˗ kë ˈˈdhʋ̈, kö kwa ˈto ˗ni ˈgü kwa ˈtɔ ˈö ˗kë Zoova ˗bha ꞊Gbɛkiö ˗nu ˈka bhë, ˗a ˗gɛn ˈˈpiʋ̈.—Ps. 83:18; Wlɔ. 10:​13-15.

KWA ˗DHO ˗ZLANWOPÖ ˗KPLAWO ˈÖ DHO ˈÖ YÖ ˗A ˈKA ˗A ˈˈDHIƲ̈TODHƐ ˗BHA

14. ˈWɔn ˗së ˗mɛɛn ˗nu ˈwo kwa ˈˈdhiʋ̈ ˈˈgan ˗ni ˈgü?

¹⁴ ˈWɔn ˗nu ˈö ˗an kë ˗yi ˗ya to ꞊klöö˗ bhë, ˗kpan ˗an ˗bha ˗sü ˈˈshiʋ̈ ˗yö kwa ˗ta. Zoova ˗bha ˗takundhe ˈsaa˗ ˈgü, ˈˈsanni ˈˈklʋʋbhɔdhe ˈkpii˗ ˈzü ˗yö dɔ kwa˗ ˈˈpiʋ̈ kö mɛn ꞊va ꞊dede ˗wo ˈˈwɩ gagade ˗bha. ˗Ya ˈgo mü ˈzü, kwa˗ ˈˈpiʋ̈ kö ˈˈklʋʋbhɔdhe ˈkpii˗ ˈˈtʋ̈ŋ ˈö ˗kë ˈˈtʋ̈ŋ ˈˈgbɩɩ˗ ˈka bhë ˗a ˈgü, mɛn ꞊va ˈbha ˗wo ˈgo Sɔtraan ˗bha ˈˈkpɔnŋ ꞊taa ˗wo nu kwa ˈˈpiʋ̈ kö kwaa˗ ˗nu ˈkwa Zoova ˈtɔ bhɔ.—Këw. 13:48.

15-16. ˈMën ˈkwa dho ˗a kë ˗kplawo? ˈYö ˈkwa dho ˗a ˈˈdhiʋ̈ta ˈˈtʋ̈ŋ ˗mɛɛn ˈka?

¹⁵ ˗Yö dɔ kö ˈˈtʋ̈ŋ ˈö ˈˈdhʋ̈ ˗yö ˗wo, kwa dua ˗mü kö ˈkwa yökë. ˈYö sü ꞊dhɛ yö suu ˈö ˈˈdhʋ̈, ˈˈtʋ̈ŋ ˈbha ˗ya ˗wo kwa ˈti ˗dho ˗a kë ˈzü. Yö ˈnën ˗tɔ nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha ˗a pö ˗sü ˈö ˈˈkpɔnŋtaadhɛ ˗todhʋ̈sü ˈgü, ˈkwa ˗an kpɔɔ ˈwɔn ˗nu ˈö ˗an kë ˗sü ˈˈtʋ̈ŋ ˗ya ˈto ꞊klöö˗ ˗an ˈka. Mɛn ˗nu dua ˗mü kö ˗wa ˈwɔn dɔ ꞊dhɛ ˈˈkpɔnŋtaadhɛ ˈyaa ˈö yö ˗a ɲën ˈˈtʋ̈ŋ ˗ya ˗lo. Kwa˗ ˗kë ˈˈdhʋ̈ kö zadɔyi ˈka ˗wa ˈwɔn dɔ ꞊dhɛ kwa ˗bha nɔɔn˗ ˗wo ˗yö ˗go Zoova ˗Zlan ˈˈpiʋ̈.—Ézéch. 38:23.

¹⁶ ˈDhɛ ˈˈdhʋ̈, ˗mën ˈkwa dho kwa ˈgü dɔ ˈˈgbɩɩ˗ kö ˈkwa˗ kë? Nɔɔn˗ ˗së ˗dhɔ, mɛn ˈˈwɛɛ ˗nu ˗dhɔ, Zoova waa ö ˈtɔ ˗an ˗dhɔ ˗dho kwa ˗blü kö ˈkwa ˗zlanwopö kwa ꞊sɔbhɛɛ ˈka ˗yö ˈdho ˗yö yö ˗a ˈka yi ˈö Zoova dho ˗a pö ˗a ˈka ꞊dhɛ ˗ya ɲën, ˗a ˗bha.