1. Zuifö ˗nu ˈwo kun ˈˈgan ˈgü bhë, ˈwɔn ˗së ˗mɛɛn ˈö kun ˗an ˈˈdhiʋ̈ ˈˈgan ˗ni ˈgü?

 ZUIFÖ ˗nu zuʋ̈ˈˈ ˈˈgblü ˗kun dhi ˗sü ˈka ꞊dedewo. Zoova «˗yö ˗pa Pɛsö ˗gblüdë Sidhisö zuʋ̈ˈˈ ˈka», ˈyö ö ˗wo bho Izraɛdhömɛn ˗nu ˈö ˗wa ˗kwɛ ˗kɔŋ ꞊va kë ˈˈgan ˈgü Babidhɔnö bhë ˗an ˗ta, kö ˗wo ˈdho. ˗Gblüdë ˗yö nɔɔn˗ ˗bɔ ˈˈsɛ ꞊gban ˈgü ꞊dhɛ Zuifö ˗nu ˗wo ˈdho wo ˗gɔ ˈˈsɛ ˈgü kö ˗wo «Izraɛdhö ˗bha ˗Zlan Zoova ˗dhɔkëgükɔ dɔ.» (Esd. 1:1, 3) ˗Yö ˗kun mɛn zuʋ̈niidawɔn ꞊dede ˈka, ˈyö ˗tɔ ˗a pö ˗sü ˗mü ꞊dhɛ Zuifö ˗nu ˗dho ꞊mɔɔn˗ ˗bha ˈzü ˈö ˈwo ˗Zlan ꞊dede ˗dhɔkë ˈˈsɛ ˈö˗ nu ˗an ˗dhɛ bhë, ˗a ˈgü.

2. ˈDhɛ Zuifö ˗nu go ˈˈgan ˈgü ˈwo dho Zedhizadhɛmö, ˗mën ˗blɛɛsü ˈwo˗ ˗kë?

² ˗Kwɛ 537 ˈgü K.Y.B., Zuifö ˗nu kpö ˗blɛɛsü ˗wo ˗lo Zedhizadhɛmö ˈö kun ˗an ˗bha ˈˈkwipö ˈkpii˗ ˈka bhë, ˗a ˈgü. Zuifö ˗nu ˈwo wo ꞊yɛɛ˗ ˗kë bhë ˗wo ˗kpo ˈwo ˗ya ˗Zlan ˗dhɔkëgükɔ dɔ ˗sü ˗bha, ˈyö ˈdhɛ ˈkwa dɔ ˗kwɛ 536 ˈgü K.Y.B., kö ˗wa wo bo ˈsaadhö ˗a ˈˈkpan ˗ya ˗sü ˈka.

3. De ˗nu ˈwo ˗gban Zuifö ˗nu ˗gɔ? ˈYö ˈwo˗ ˗kë ˈˈdhʋ̈ ˗kɔ ˗kë ꞊dhɛ?

³ ˈDhɛ Zuifö ˗nu ˗wo ˗Zlan ˗dhɔkëgükɔ dɔ ˗sü züdɔ, mɛn ꞊vadhɛ ˗ya ˗gban ˗an ˗gɔ ˗sü ˗bha. ˈˈSɛgɔ ˗nu ˈwo kun ˗an ˗züzü «˗wo ˗kun Zuifö ˗nu ˈgügawɔn ˗nu kë ˗ni ˈgü ˗kplawo, ˈwo ˈˈsuʋ̈ ˗da ˗an ˈgü kö ˗wo wo ꞊kwaa ˈkɔ dɔ ˗sü ˈzü.» (Esd. 4:4) ˗Yö ˗kun ˗an ˗gɔ ˈwɔn ˈˈgbɩɩ˗ ˈka. ˈˈKɛɛ ˗a ˗dhɛ ˈˈgbɩɩdhɛ ˈbha ˗kun mü. ˗Kwɛ 522 ˈgü K.Y.B., ˈyö Aatazɛsɛsö ˗yö ˗kë Pɛsö ˗gblüdë ˗dɛɛ ˈka. * Zuifö ˗nu ˈyɔɔ˗ ˗nu ˗wa ˗yö ꞊dhɛ, ˈdhɛ ˗kë ꞊dhɛ ˗wa ˗gblüdë ˗dɛɛ ˗ya bhë, ˗a ˈˈtʋ̈ŋ ˗së ˗ya ˗wo kö ˈwo bɔ ˈtɔŋ˗ ˗nu ˗ta ˈwo «ˈˈyi ˗lo ˗Zlan ˗dhɔkëgükɔ dɔ ˗sü ˈgü, kö ˗a ˗yö ˗yö ˈduannu.» (Ps. 94:20) ˗Wo ˗dho ˈwo˗ pö ˗gblüdë Aatazɛsɛsö ˗dhɛ ꞊dhɛ Zuifö ˗nu ˗wa ˈˈpiʋ̈ ˈwo ˗gban ˗a ˗gɔ. (Esd. 4:11-16) ˗Gblüdë ˗yö ˈdhaŋ˗ ˗bho ˗an ˈˈdhiʋ̈, ˈyö Zuifö ˗nu ꞊kɛɛ˗  ˗kan ˗Zlan ˗dhɔkëgükɔ dɔ ˗sü ˗bha. (Esd. 4:17-23) Zuifö ˗nu ˈwo kun ˗Zlan ˗dhɔkëgükɔ dɔ ˗ni ˈgü zuʋ̈gblüdhi ˈka bhë, ˗an ˗bha yö ˗yö ˈduannu.—Esd. 4:24.

4. ˈDhɛ mɛn ˗nu ˗wo ˗gban Zoova ˗dhɔkëgükɔ ˗dɔ ˗sü ˗gɔ, ˗mën ˈö˗ ˗kë? (Isaïe 55:11)

⁴ Mɛn ˗nu ˈö ˈwaa kun ˗Zlan ˗dhɔkëmɛn ˗nu ˈka ˈˈsɛ ˈö bhë ˗a ˈgü waa Pɛsö ˈˈsɛkɔɔnmɛn ˈbha ˗nu ˗wo ˗kun ˗a ˈˈpiʋ̈ ꞊dedewo kö ˈwo ˗Zlan ˗dhɔkëgükɔ dɔ ˗sü ˈduannu. ˈˈKɛɛ Zoova ˗de ˈpö ˗yö ˗kun ˗a ˈˈpiʋ̈ kö Zuifö ˗nu ˗wo ö ˗dhɔkëgükɔ bhë ˗a dɔ. Pë ˈˈpɛpɛ ˈö˗ ˈˈpiʋ̈ ˗ya ˗kë ˗kplawo. (Isaïe 55:11 ˗wo pö.) ˗Yö ö ˗kɔ ˗yɛ ö ˗wodhiʋ̈lomɛn do ˈö ˈˈsuʋ̈ ˈyaa˗ kë ˈwo˗ ˗dhɛ Zakadhi bhë ˗a ˗bha, ˈyö ˈˈɲɛɛn ˗sɛŋbɔ ˈˈsaaga ˈö dho ˗a pö Zuifö ˗nu ˗dhɛ kö ˗yö ˗an ꞊faan ˈmën, ˗an ˗zɔn ˗a ˗dhɛ. ˈˈƝɛɛn ˗nu ˈwo ˈˈdhʋ̈ ˗wa ˗zɔn Zuifö ˗nu ˗dhɛ ꞊dhɛ ˈˈsuʋ̈ dua ˈyaa ˗mü kö ˗yö ˗an kë ˗an ˈyɔɔ˗ ˗nu ˗gɔ. ˗An dua ˗mü ꞊ʒiaan kö ˗wo Zoova ˗bha yö ˗wɔn bɔ ˈˈdhiʋ̈. ˗A ˈˈɲɛɛn ˈˈsoodhu ˗bha ˗naan ˈgü, Zakadhi ˗yö ˗kpan ꞊laŋba ˗dɔtapë do waa odhivö ˗dhü ꞊plɛ ˗bha.

5. ˈMën ˈkwa dho ˗a draanˈˈ ˈwɔn ˗gɔ ˈö yö ˗a ˈgü?

⁵ Mɛn ˈˈpɛpɛ kwa ˈgü ˗yö ˗ga ˈˈtʋ̈ŋ ˈbha ˗nu ˈka. ˗A ˗wɔn ˈgü, ꞊faanmëndhe ˈö Zoova ˗ya nu Izraɛdhömɛn ˗nu ˗dhɛ, ˈö bɔ ˗a ˈka Zakadhi ˗bha ˈˈɲɛɛn ˈˈsoodhu ˗bha ˗naan ˗ta bhë, ˗yö ꞊mɔɔn˗ ˗bha ˈpö ˈö kwa ꞊faanmën. ˗A ˈˈɲɛɛn ˈgüman ˗sü ꞊mɔɔn˗ ˗bha ˈö kwa ˗takun kö ˗wa ˗gban kwa ˗gɔ, ˗wa yö ˗dɛɛ dɔ kwa ˗kɔ ˈka, ɛɛnˈˈ ˈzü kö ꞊ya kë ꞊dhɛ ʒiaan ˈbha ˈö ˈwo˗ ˗zɔn kwa ˗dhɛ ˈkwaa˗ ˈgüman ˗ni ˈgü, ˈkwa ˈto ˗klu ˗sü ˈka Zoova ˗bha.

6. ˈˈƝɛɛn ˈö ˗gban ꞊laŋba ˗dɔtapë waa odhivö ˗dhü ꞊plɛ ˗bha ˈö Zacharie 4:1-3 ˈgü bhë, ˗yö ꞊faan ˗nu Zuifö ˗nu ˗dhɛ ˗kɔ ˗kë ꞊dhɛ? (Pe ˈˈbin ˈö˗ kwi ˗ta bhë ˗a ˗ga.)

⁶ ˗Bhö Zacharie 4:1-3 ˗wo pö. ˈˈƝɛɛn ˈö Zakadhi ˗ya bho ˈö ˗gban ꞊laŋba ˗dɔtapë waa odhivö ˗dhü ꞊plɛ ˗bha bhë ˗yö ꞊faan ˗nu Zuifö ˗nu ˗dhɛ, ˈkö ˗kë ꞊dhɛ ˗wo ˗gban ˗an ˗gɔ. ˗Kɔ ˗kë ꞊dhɛ? Kwa˗ ˗yö ꞊dhɛ ˗a ꞊laŋba ˗dɔtapë ˈö ˈˈdhʋ̈ ˈˈɲɔn ˈö˗ ˈgü ˈyaa bhʋ̈ʋ̈ˈˈ. ˈˈƝɔn ˈö go odhivö ˗dhü ꞊plɛ ˈgü, ˗wo ˗yö ˗a ˈtɛanën ˈgü, ˈyö ˗kë ꞊laŋba ˈˈsɔɔplɛ bhë ˗an ˈsɔnpë ˈka. ˈˈƝɔn ˈö ˈˈdhʋ̈, ˈyö˗ ˗kë ˈö ꞊laŋba ˗nu ˈwaa dhuuˈˈ. Zakadhi dhɛɛˈˈ ˗kpɔ ˈö˗ pö: «Pë ˗nu ˈwo bhë ˗an klɔɔ˗ ꞊nɛn ˗tɔ ˗mën?» ˈYö ˗Zlan ˗bha ˈˈkiö ˗ya ˗daakë ˗a ˗gɔ nɔɔn˗ ˈö go Zoova ˈˈpiʋ̈ ˗a ˗dɔ ˗a ˗gɔ ˗sü ˈka, ˈö˗ pö: «‹Pë ˗nu ˈwo bhë ˗an ꞊gban ˗dho kë, ˈˈkɛɛ ˈˈsodha ˗nu ɛɛnˈˈ mɛnbhɩɩdhe ꞊faan ˈgü ˗wɔn ˈyaa ˗mü, a ˗dho bɔ n ˗bha ˗zuu ˗ta ˈa ˗an ˗kë.› Pë ˈö ˗Gblüdë Zoova ˗ya pö ˈyö bhë.» (Za 4:4, 6) ˈˈƝɔn ˈö go ˈˈdhü ˗nu ˈgü bhë ˈnën ˗tɔ Zoova ˗bha ˗zuu ˈˈslʋ̈ʋ̈slʋ̈ ˈö ˈyaa ɲën. ˗Zuu ˈˈslʋ̈ʋ̈slʋ̈ ꞊faan ˗yö ˈˈgbɩɩ˗ ˈö ˗ʒiö ˗a ˈka Pɛsö ˈˈsodha ˗nu ˈˈpɛpɛ ˗ta. ˈDhɛ ˗kë ꞊dhɛ Zoova ˗kun ˗an ˈˈpiʋ̈, ˗a ˗dhɔkëgükɔ dɔmɛn ˗nu ꞊mɔɔn˗ ˗bha ˈwo ˗gban wo ˈyɔɔ˗ ˗nu ˗gɔ, kö ˗wo ˈdho ˗wo wo bo ˗a ˗bha ˈkɔ ˗dɔ ˗sü ˈka. -Yö ˗kun mɛn ꞊faanmën ˗wɔn ꞊dede ˈka. ˗A ˗dhɛ ˗kun ˗a ˗bha kö Zuifö ˗nu wo ˗zo yö Zoova ˗dhɛ, kö ˗wo ˈdho wo ˗bha yö ˈka ˈˈdhiʋ̈. Pë ꞊dede ˈwo˗ ˗kë ˈyö bhë, ˈkö ˗kë ˗ʒianwo ꞊dhɛ ˈdhɛ ˗kë ˈˈdhʋ̈ kö wo ˈti wo ˗wo bho ˗an ˗ta ꞊köŋ.

7. ˗Mën ˈbha ˈö Zuifö ˗nu ˗takun ˈzü?

⁷ ˈWɔn ˈbha ˈö go ˈˈgblʋʋ Pɛsö ˗yö ˗Zlan ˗dhɔkëgükɔ dɔmɛn ˗nu zuʋ̈ˈˈ ˗dho ˈˈshia ˈzü. ˗Mën ˗wɔn ˗mü? ˗Kwɛ 520 ˈgü K.Y.B., Dadhisö ˗kë ˗gblüdë ˈka Pɛsö. ˗A ˗bha ˗kwɛ ꞊plɛ ˗bha ˗naan ˈgü, ˗ya ˗yö ꞊dhɛ Zuifö ˗nu ꞊kɛɛ˗ ˈˈkan ˈwo˗ wo ˗Zlan ˗dhɔkëgükɔ dɔ ˗sü ˗bha bhë, ˈwɔn yaa ˗mü. ˈYö Dadhisö ˗yö ö ˗wo bho ˗an ˗ta kö ˗wo yö ˈö bhë ˗a kë ˗yö ɲën. (Esd. 6:1-3) ˗A ˈwɔn ˗yö mɛn ꞊gban ˗kun. ˈˈKɛɛ ˗gblüdë ˈyii ö ˈˈdhiʋ̈ ˈto bhë, ˗ya ˗pö ˈˈsɛgɔ ˈˈpɛpɛ ˈwo ˗an ˗züzü ˗an ˗dhɛ ꞊dhɛ ˗wo wo ˈˈdhi bho Zuifö ˗nu ˗bha ˈkɔ dɔ ˗yö ˈgü. ˈYö go mü ˈzü ˈö˗ pö ˗wo ˈwëëga waa pë ˈˈpɛpɛ ˈö ˗an ˗bhawɔn yö ˗an ˗bha ˗an nu ˗an ˗dhɛ. (Esd. 6:7-12) ˈWɔn ˗së ˗mɛɛn ˈö go ˗a ˈgü? ˈDhɛ ˗kwɛ ˗yiishiö ˗yö ˗ʒiö, ˈö ˈkwa dɔ ˗kwɛ 515 ˈgü K.Y.B., Zuifö ˗nu ˗wo wo ˗bo ˗Zlan ˗dhɔkëgükɔ dɔ ˗sü ˈka.—Esd. 6:15.

8. ˈMën ˗kë ˈö ˗wa ˗gban kwa ˗gɔ, kwa ˈgü dua ˈdhö ˗mü kö ˗yö kë ˈˈgbɩɩ˗?

 ⁸ ꞊Dɛɛ ˈpö, mɛn ˗nu ˗wo ˗gban ˗ni ˈgü Zoova ˗dhɔkëmɛn ˗nu ꞊vadhɛ ˗gɔ. ˗A mɛn ˈbha ˗nu ˗bha ˈˈsɛ ˈgü, ˈˈsɛgɔdhiʋ̈mɛn ˗nu ˗wa kwa ˗bha yö ꞊kɛɛ˗ ˈˈkan. ˈˈSɛ ˗nu bhë ˗an ˈgü, ˗wo kwa ꞊dhegblü ˗nu ˗kun ‹ˈwo dho ˗an ˈka ˈˈsɛgɔdhiʋ̈mɛn ˗nu waa ˗gblüdë ˗nu ˗kuu ˈˈdhiʋ̈› kë ˈˈdhʋ̈ kö ˗wo ˈˈsɛɛdhɛ kë ˗an ˗dhɛ. (Mat. 10:17, 18) ˈˈTʋ̈ŋ ˈbha ˗nu ˈka ˗an ˗bha ˈˈsɛgɔdhiʋ̈mɛn ˗dɛɛ ˈbha ˗ya nu, ˗yö ö ˗wo ˗bho kwa ꞊dhegblü ˗nu ˗ta, ˈö ˈwo ˗Zlan ˗dhɔkë wo ˈflëëgü. Ɛɛnˈˈ ˈzü zakanmɛn ˈö˗ zuʋ̈ˈˈ ˈdhö ˗së, ˗yö ꞊mɔɔn˗ ˗bha ˈö ö ꞊kwaa kwa ꞊dhegblü ˗nu ˗zü kö ˗wo ˗Zlan ˗dhɔkë. Zoova ˗bha ꞊Gbɛkiö ˈbha ˗nu ˈwo ˈdhö ˈpö, ˗an ˗bha ˈˈsɛ ˈgü ˗potaadhe ˗yö ˗an ˗gɔ kö ˗wo ˗Zlan ˗dhɔkë. ˈˈKɛɛ ˗an ˗bha ˈkɔdhigümɛn ˗nu ˈö ˈwaa Zoova ˗dhɔkëmɛn ˗nu ˈka, ˗wa ˈˈpiʋ̈ ꞊dedewo kö ˈwo ˗an ˈˈkan ˗Zlan ˗dhɔkësü ˗bha. (Mat. 10:32-36) ˗A ꞊vadhɛ ˗ya kë ꞊shiöŋ, mɛn ˗nu ˈwo ˗gban ˗ni kwa ꞊dhegblü ˗nu ˗gɔ ˈˈdhʋ̈ bhë ꞊waa˗ ˗yö ꞊dhɛ ˈwa pë ˈˈpɛpɛ kë ˈˈkɛɛ ˗an ˈgü ˈyaa ga, ˗wo wo ˗kwaa ˗gban ˗an ˗gɔ ˗sü ˗zü. ˈˈTʋ̈ŋ ˈbha ˗nu ˈka ˗ʒianwo mɛn ˗nu ˈwo kun ˗gban kwa ˗gɔ ˗mɛn ˗nu ˈka ˗wo ˗kë Zoova ˗bha ꞊Gbɛkiö ˈka, ˈö ˈwo˗ ˗dhɔkë wo ꞊faan ˈka. ˗Dhɛ ˈö ˈˈdhʋ̈ ˗wa ˗gban kwa ˗gɔ, kwa ˈgü ˈya ˈdho ga, kwa ˈgü ˗yö kë ˈˈgbɩɩ˗. Zoova waa ö ˗bha ˗zuu ˈˈslʋ̈ʋ̈slʋ̈ ˗wo kwa ˈˈpiʋ̈, ˈkwa ˗dho ˈˈsuʋ̈ pë ˈbha ˗gɔ.

9. ˈDhɛ Zuifö ˈbha ˗nu ˗kpan ˗Zlan ˗dhɔkëgükɔ ˈˈkpan ˗bha, ˈmën ˗kë ˈö ˗an ˈgü ˗yö ga?

⁹ ˈDhɛ ˈwo wo bo ˗Zlan ˗dhɔkëgükɔ ˈˈkpan ˗ya ˗sü ˈka ˈˈsɛɛdhö, Zuifö ˈbha ˗nu ˈö ˗wa kë zii ˗wo ˈˈgbʋ ˗bɔ. (Esd. 3:12) ˗Zlan ˗dhɔkëgükɔ ˈö Sadhomɔn ˗ya dɔ ˈkpa ˗wa ˗bha ˗sëdhɛ ˗yö, ˈö kun ˗an ˈgü ꞊dhɛ ˗a ˗dɛɛ ˈwo kun ˗a dɔ ˗ni ˈgü bhë waa˗ zii ˗an «˗zɔnkwöödhɛ ˈti ˗dho kë ˗dhö.» (Agg. 2:2, 3) ˈˈKɛɛ ˈdhɛ ˈwo ˗an ˗zɔn ˈˈkwöö, ˗an ˈgü ˗yö ˗ga. Zakadhi ˗bha ˈˈɲɛɛn ˈö bhë ˗yö ˗dho ˗an ˗takun kö zuʋ̈gblüdhi ˗yö kë ˗an ˗gɔ ˈzü. ˗Kɔ ˗kë ꞊dhɛ?

10. ˗Wo ˈö ˗Zlan ˗bha ˈˈkiö ˗ya pö ˈö ˗bɛnzë ˗sü ˈka Zacharie 4:8-10 ˈgü bhë, ˗yö ꞊faan ˗nu Zuifö ˗nu ˗dhɛ ˗kɔ ˗kë ꞊dhɛ?

¹⁰ ˗Bhö Zacharie 4:8-10 ˗wo pö. ˗A pö ˈö ˗Zlan ˗bha ˈˈkiö ˗ya wo ꞊dhɛ Zuifö ˗nu «zuʋ̈ˈˈ ˈˈgblü ˗dho dhi, ˈö ˈwo ˗kpan [˗an ˗bha ˈˈsɛkɔɔnmɛn] Zodhobabɛlö ˗bha kö ˗gwö kpö ˈö bhüʋ̈ˈˈ ˈdhö˗ ˗bha ˗ya ꞊kwɛɛ» bhë, ˈmën kun ˗a ˈˈpiʋ̈ ˈö˗ pö? ˗Gwö kpö ˈö ˈˈdhʋ̈ bhë yö ˈnën ˈwo˗ sü ꞊kwɛŋzü, ˈyö ꞊ya kë ꞊dhɛ ˈkɔ ˈˈbhaŋ ˗yö ꞊zinŋgü ɛɛnˈˈ ˗yö dɔ ˗sü ˈka ö ˗gɛan ˗së ˈka, ˈwo˗ ˈwɔn dɔ. ˗Wo ˈö ˗Zlan ˗bha ˈˈkiö ˗ya pö bhë ˗ya  ˗zɔn ˈˈsɛgümɛn ˗nu ˗dhɛ ꞊dhɛ, ˈkö ˗kë ꞊dhɛ ˗Zlan ˗dhɔkëgükɔ ˈwo dho ˗a dɔ bhë ˗yö mɛn ˈbha ˗nu ˈgü ˗bhaasü ˗a ˗blɛɛsü ˗bha, ˗wo ˗dho ˗a dɔ ˈö˗ ˗yö dho ˈö ɲën˗ ˈka. ˗Ya ˈgo mü ˈzü, ˗yö ˗dho kë ꞊dhɛ ˗kɔ ˈö Zoova ˈdhö˗ ˈˈpiʋ̈ kö ˗yö kë˗ ˈka ˗a ˈdhö. ꞊Waa˗ dɔ, Zoova zuʋ̈ˈˈ ꞊nii ˗dho ˗da. ˗A ˗wɔn ˈgü, wo ꞊dede ˗an dua mü ˈpö kö ˗an zuʋ̈ˈˈ ꞊nii kë ˗da ˗sü ˈka. Pë ˈdhɛ ˗wɔn kun Zoova ˗gɔ ˈˈgbɩɩ˗ ˈyö ˗tɔ ö ˗dhɔkë ˗kɔ ˈö ö ˗dhɛ ˗së ˗wa kë ˈkɔ ˗dɛɛ ˈö bhë, ˗a ˈgü. ˗Wa wo ˈˈɲan ˗klu ˗a ˗dhɔkë ˗kɔ ˗së ˗bha, ꞊waa˗ dhɔɔbhaawɔn kë, zuʋ̈gblüdhi ˗dho kë ˗an ˗gɔ ˈzü.

11. ˈWɔn ˈˈgbɩɩ˗ ˗mɛɛn ˗nu ˈö Zoova ˗dhɔkëmɛn ˈbha ˗nu ˈdhö bɔ ˗ni ˗an ˈgü ꞊dɛɛ?

¹¹ ˈWɔn ˗nu ˗wa ˈgo ˈˈgblʋʋ kwa ˗bha ˗tosɛta ˈgü, ˗a bun ˗sü ˗kë mɛn ꞊vadhɛ kwa ˗kɔa ˈˈgbɩɩ˗. Mɛn ˈbha ˗nu ˈö ˈwo ˗kwɛ ꞊va ˗kë Zoova ˗bha ˈˈtʋ̈ŋ ꞊gban ˈgü ˗yö ˈgü, ˗wo ˗an ˗bho ˗a ˈgü ˈwo yö ˈˈwɛɛ dɔ ˗an ˗kɔ ˈka. Mɛn ˈbha ˗nu ˗kwɛ ˗wɔn ˈgü, ˗wo yö ˈbha ˗nu ˈö ˗an kë ˗dhɔ ˗yö ˗an ˗kë, ˗an ˗bho ˗an ꞊kwɛɛ˗. ˈWɔn ˗nu ˗wa ˈgo ˈˈgblʋʋ ˈˈdhʋ̈, ˗a ˗dhɛ ˗mü kö kwa ˈgü ˗yö ga. ˗A ˈbha ˗ya kë, ˈpë ˗kë ˈwo˗ ˗kë ˈˈdhʋ̈ ˈkwa ˈti ˗dho ˗kpo ˈkwa˗ ˈgüman ɛɛnˈˈ ˈkwa ˗wɩ ˗a ˗bha. Pë ˗nu ˈkwa kun ˗an kë ˗ni ˈgü ˗be ˗an ˗dhɔ ꞊mɔɔn- ˗bha ˈö to kwa ˗bha, ˈö kwa ˈgü ˗yö ga, ˈö ˈkwa˗ ˗ga ꞊dhɛ ˈkwaa ꞊mɔɔn- ˗bha ˈzüdho ˈkwa pë ꞊va kë Zoova ˗dhɛ. (Prov. 24:10) Zakadhi ˗bha ˈˈɲɛɛn ˈö bhë ˗yö ˗dho kwa ˗takun ˗kɔ ˗kë ꞊dhɛ kö pë ˈdhɛ ˈkwa ꞊mɔɔn˗ ˗bha ˈkwa˗ kë kwa ˗bha ˗Zlan ˗dhɛ?

12. ˈWɔn ˗nu ˗wa ˈgo ˈˈgblʋʋ kwa ˗bha ˗tosɛta ˈgü, Zakadhi ˗bha ˈˈɲɛɛn ˗dho kwa ˗takun ˗kɔ ˗kë ꞊dhɛ kö zuʋ̈gblüdhi ˗yö ˈto kwa ˗gɔ?

¹² ˈKwa ˈwɔn ˗nu yö ꞊dhɛ Zoova ˈdhö, ˈwɔn ˗nu ˗wa ˈgo ˈˈgblʋʋ kwa ˗bha ˗tosɛta ˈgü, ˗a bun ˗sü ˗dho kë ˈˈplëëplë. ˗Yö ˈwɔn ˈˈmlünmlünsü ˗nu kë ˗ni ˈgü ꞊dɛɛ, ˈö ꞊bhlëë ˈkpii˗ ˗ya ˗sü ˈka kwa ˗bha kö ˈkwa yökë ö ˈˈpiʋ̈. (1 Ko. 3:9) Yö ˈbha ꞊mɔɔn˗ ˗bha ˈö dha kwa ˗gɔ, ˈˈkɛɛ kwa ˗dhɔ ˈö Zoova ˈgü ˈyii ˗dho ˈgo ˈˈgblʋʋ. ˈWɔn ˗bho ˈˈgblʋʋ ˗kɔ ˈbha ˈwo˗ ˗kë Zoova ˗bha ˗kɔlokota ˈgü ˗ya ˈˈyɛ kwa ˗bha ꞊dedewo, ˈkwa ˗dho kwa ˗bha ˈˈtʋ̈ŋ shiʋ̈ˈˈ ˈpë ˗kë ˈwo˗ ˗kë ˈˈdhʋ̈, ˗a ˗gɛn mɛɛnˈˈ ˗sü ˗bha. ˈˈSanni kwa zuʋ̈ˈˈ ˗yö bhɔ ˗kɔ ˈö kwa ˗bha ˗tosɛta kun ˗a ˈka ˗be zii ˈka ˗a ˗bha, ˗kwa bhɛɛˈˈ Zoova ˗dhɛ kö ˗yö kwa ˗takun kö ˈwɔn ˈö bhë ˗a ˗sëdhɛ ˈö˗ ˈgü ˈkwa˗ yö. (Eccl. 7:10) ˈˈSanni ˈkwa kwa ˗zota pë ˗nu ˈö ˈkwaa ꞊mɔɔn˗ ˗bha ˈkwa ˗an kë ˈzüdho ˗an ˈgü, ˗kwa kwa ˗zota ꞊ʒiaan pë ˈˈpɛpɛ ˈö kwa ˗mɔn ˗an kë ˗sü ˗bha ꞊taabha, ˗an ˈgü. Zakadhi ˗bha ˈˈɲɛɛn ˗ya ˗zɔn ꞊dhɛ ˈwɔn yö ˗kɔ ˗së ˗bha ˗kë kwa ˗gɔ ˗sü ˗wɔn ˗yö ˈˈgbɩɩ˗. ꞊Ya kë ˈˈdhʋ̈, ˈwɔn ˗nu ˗wa ˈgo ˈˈgblʋʋ kwa ˗bha ˗tosɛta ˈgü, zuʋ̈gblüdhi ˗dho ˈto kwa ˗gɔ ˈö ˈkwa to ˗klu ˗sü ˈka ˗Zlan ˗bha.

13. ˈMën ˗kë ˈö kun Izraɛdhömɛn ˈbha ˗nu ˈgü ꞊dhɛ ˗Zlan ˗dhɔkëgükɔ baaˈˈ ˗sü ˗kun ˈˈslö yaa ˈka?

¹³ ˗Wo Zuifö ˗nu ꞊kɛɛ˗ ˗kan ˗Zlan ˗dhɔkëgükɔ baaˈˈ ˗sü ˗bha. ˈˈKɛɛ ˈˈsaabhomɛn ˈkpii˗ Ʒozue waa ˈˈsɛkɔɔnmɛn Zodhobabɛdhö ˈwo kun ˈˈdhiʋ̈sümɛn ˗nu ˈka, «˗wo ˗ya ˈzü ˗Zlan ˗bha ˈkɔ ˈö bhë ˗a dɔ ˗sü ˗bha.» (Esd. 5:1, 2) ˗A ˈbha ˗ya kë kö ˗yö ˗kë Zuifö ˈbha ˗nu ˈgü ꞊dhɛ ˈwɔn yaa ˈnën ˈwo˗ kë ˗ni ˈgü bhë. Zuifö ˗nu ˈwaa ꞊mɔɔn˗ ˗bha kö ˗wo wo ˗bin ˗wo ˗Zlan ˗dhɔkëgükɔ dɔ. ˗Wa ˈwɔn ˗dɔ ꞊dhɛ wo ˈyɔɔ˗ ˗nu ˗dho pë ˈˈpɛpɛ kë kö ˗a yö ˗yö ˈduannu. Ʒozue waa Zodhobabɛdhö ˈwo kun ˈˈdhiʋ̈sümɛn ˗nu ˈka, ˗an ˗bhawɔn ˗kun pë ˈbha ˈö dho ˗an ˗zogban ꞊dhɛ Zoova ˗yö ˗an ˈˈpiʋ̈, ˗a ˗bha. ˗A pë ˈö ˈˈdhʋ̈ Zoova ˗ya ˗zɔn ˗an ˗dhɛ. ˗Kɔ ˗kë ꞊dhɛ?

14. Zacharie 4:12, 14 ˈgü, ˗zogbandhe ˗mɛɛn ˈö Zoova ˗ya nu ˈˈsaabhomɛn ˈkpii˗ Ʒozue waa ˈˈsɛkɔɔnmɛn Zodhobabɛdhö ˗an ˗dhɛ?

¹⁴ ˗Bhö Zacharie 4:12, 14 ˗wo pö. Zakadhi ˗bha ˈˈɲɛɛn ˈˈpian ˗dhɛ ˈö bhë ˗a ˈgü, ˗Zlan ˗bha ˈˈkiö ˗ya ˗zɔn ꞊dhɛ odhivö ˗dhü ꞊plɛ ˈwo bhë ˈyö ˈwo ˗tɔ «mɛn ꞊plɛ ˈö ˗Zlan ˗yö ˈˈɲɔn ˗lo ˗an ꞊troo», ˈwo ˗kë Ʒozue waa Zodhobabɛdhö ˗an ˈka. Mɛn ꞊plɛ ˈwo bhë ˗wo ˗kun ꞊dhɛ mɛn ˗nu ˈwo dɔ ˗sü ˈka «ˈˈkpɔnŋtaadhɛ ˗todhʋ̈sü ˗bha ˗Gblüdë» Zoova ˈˈsuee ˗a ˈdhö. ˗Yö ˗kun ꞊bhlëëwɔn ˈkpii˗ ꞊dede ˈka ˗an ˗bha ˈka. Zoova ˈdhaŋ˗ ˗bho ˗an ˈˈdhiʋ̈. ˗A ˗dhɛ ˗kun ˗a ˗bha kö Izraɛdhömɛn ˗nu ˗wo ˈdhaŋ˗ bho pë ˈˈpɛpɛ ˈö mɛn ꞊plɛ ˈwo bhë ˈwo dho ˗a pö ˗an ˗dhɛ ˗wa kë ˗a ˈˈdhiʋ̈, ˈö sü ꞊dhɛ wo ˈnën Zoova ˗yö bɔ ˗an ˗ta ˈö ˈˈdhiʋ̈sü ˗an ˈka.

15. Kwa ˗dho ˗a ˗zɔn ˗kɔ ˗kë ꞊dhɛ ꞊dhɛ ʒiaan ˗nu ˈö Zoova ˈdhö ˗an ˗zɔn ˗ni ˈgü kwa ˗dhɛ ö ˗Wo ˈgü bhë, kwa ˗an ꞊bhlëë ˗ya?

¹⁵ Pë ˗nu ˈö Zoova bɔ ˗an ˗ta ꞊dɛɛ ˈö ʒiaan ˗zɔn ö ˗dhɔkëmɛn ˗nu ˗dhɛ ˗a do ˈnën ˗tɔ ˗a ˗Wo ˈö ˗kë Biblö ˈka. ˈSëëdhɛ ˗be ˈˈslʋ̈ʋ̈slʋ̈ ˈö bhë ˗a ˈgü, ˗yö ö ˗dhɔkë ˗kɔ ˈö ö ˗zokun ˗a ˗zɔn kwa ˗dhɛ. Kwa ˗dho ˗a ˗zɔn ˗kɔ ˗kë ꞊dhɛ ꞊dhɛ ˗a ˗bha ʒiaan ˗nu ˈö ˗an ˗zɔn kwa ˗dhɛ ö ˈˈDhiwo ˈgü, kwa˗ ꞊bhlëë ˗ya ˗a ˗bha? Kwa dua ˗mü ˈkwa ˈˈtʋ̈ŋ ˈsü ˈkwa˗ ˗wo pö ˗së ˈka, kö ˈkwa˗ ˈgüman ˗ʒian mɛɛnˈˈ. ˗Kwa kwa ˗de dhɛɛˈˈ ˈkpɔ: «ˈMan Biblö ɛɛnˈˈ kwa ˗bha ˈsëëdhɛ ˈbha ˗wo pö, a ˈˈtʋ̈ŋ ˗sü ˈa n ˗zota ˗a ˈgü ˗ee? ˈWɔn ˗nu ˈwo Biblö ˈgü ˈö ˗an ‹ˈgümandhɛ ˈdhö ˈˈgbɩɩ˗› a ˈˈtʋ̈ŋ ˗sü ˈa ˗an ꞊draan ˗ee? Ɛɛnˈˈ pë ˗nu ˈwo Biblö ˈgü a ˗an ˗wo ˗pö ˗bia ˗ta?» (2 Piɛ. 3:16) ˈWɔn ˗nu ˈö Zoova ˈdhö kwa ꞊klaŋkë ˗ni ˈgü ˗an ˈka bhë ˈkwa ˈˈtʋ̈ŋ ˈsü ˈkwa ˗an ˈˈpiʋ̈ ˈˈpɔn, kwa ˗dho ꞊mɔɔn- ˗bha ˈkwa to ˗a ˗bha ˗dhioo ˗nu ˈˈpiʋ̈, ˈö ˈkwa dho ˈˈdhiʋ̈ kwa ˗bha ˗zlanwopösü ˈka.—1 Tim. 4:15, 16.

16. Ʒiaan ˈbha ˈö «gwëëmi ˗towotasü ˈö ꞊kpaɔsü» ˗ya ˗zɔn kwa ˗dhɛ ˗a ˈgüman ˗sü ˗ya kë kwa ꞊kwaa ˈˈgbɩɩ˗, ˈmën ˗dho kwa ˗takun kö ˈkwa ˈto ˗a ˈˈpiʋ̈?

 ¹⁶ Zoova ˗bɔ ˈzü «gwëëmi ˗towotasü ˈö ꞊kpaɔsü» ˗a ˗ta ꞊dɛɛ, ˈö ʒiaan ˗nu ˗zɔn kwa ˗dhɛ. (Mat. 24:45) ˈˈTʋ̈ŋ ˈbha ˗nu ˈka, ˗yö ˗dho ʒiaan ˈbha ˈö ˈkwaa˗ ˈsü ˗gɛn dɔ, ˗a ˗zɔn kwa ˗dhɛ. ˗A ˈwɔnzuan ꞊nɛn: ˗Yö ꞊mɔɔn˗ ˗bha ˈö˗ pö kwa ˗dhɛ ˈkwa kwa ˗de baaˈˈ ˈwɔn ˈˈgbɩɩ˗ ˗nu ˈwo ˗kë ꞊dhɛ ˈˈsɛ ˗bha ꞊ziisü ˗nu ɛɛnˈˈ ˈˈyi ˗bha pa ˗sü ˗nu ˈdhö ˗an ˗gɔ, ˈˈkɛɛ ˈsa kö kwa ˗bha ˈgü ˈwaa ꞊mɔɔn˗ ˗bha ˗wo kë kwa ˗bha ˈˈpian ˗ta. ˗Yö ꞊mɔɔn˗ ˗bha ˈö ˗kë kwa ˈgü ˈzü ꞊dhɛ ˗sükwëëyua ˗nu ˗wa ˗pɛn, gwëëmi ˈö bhë ˗yö ˈwɔn ˗nu ˗ʒiö ꞊gɔɔ ˈgbɛ. ꞊Ya kë kwa ˈgü ꞊dhɛ ˗dhioo ˗nu ˈwo˗ dɔ ˗ni ˈgü kwa ˗ta bhë ˈwaa ˗së, ˈmën kwa dua ˈdhö ˗mü ˈkwa˗ kë? ˈWɔn ˗së ˗nu ˈö Izraɛdhömɛn ˗nu ˗wa ꞊slɔɔ ˈˈtʋ ˗to Ʒozue waa Zodhobabɛdhö ˗an ˗wo ˗bha ˗sü ˈgü, ˗kwa kwa ˗zota ˗an ˈgü. Kwa ꞊mɔɔn˗ ˗bha ˈzü ˈkwa kwa ˗zota ˗kwɛzlan ˈbha ˗nu ˈkwa ˗an ˗wo pö Biblö ˈgü, ˗an ˈgü. ˈˈTʋ̈ŋ ˈbha ˗nu ˈka, ʒiaan ˗nu ˈwo˗ ˗zɔn ˗Zlan ˗dhɔkëmɛn ˗nu ˗dhɛ ˈwaa kun mɛnbhɩɩdhe ˗nu ˈgü ˗së. ˈˈKɛɛ ˈdhɛ ˈwo to ˗a ˈˈpiʋ̈, ˗wo ˗dha ˈwɔn ˈˈgbɩɩ˗ ˗nu ˗gɔ.—Juges 7:7; 8:10.

17. ˈˈƝɛɛn ˈö ˗gban ꞊laŋba ˗dɔtapë do waa odhivö ˗dhü ˗an ˗bha bhë, ˗yö ꞊faan ˗nu Zuifö ˗nu ˗dhɛ ˗kɔ ˗kë ꞊dhɛ?

¹⁷ ˗A ˈbha ˗ya kë kö ˈˈɲɛɛn ˈˈsoodhu ˗bha ˗naan ˈö Zakadhi ˗ya bho bhë ˗yö ˗kun ꞊klöö, ˈˈkɛɛ ˗yö ꞊faan ˗nu Zuifö ˗nu ˗dhɛ ˈö ˈwo dho ˗Zlan ˗dhɔkëgükɔ dɔ ˗sü ˈka ˈˈdhiʋ̈. ˈDhɛ ˗gleŋ ˈwo˗ sü Zakadhi ˗bha ˈˈɲɛɛn ˈgü ˈwo to ˗a ˈˈpiʋ̈, ˗wo Zoova ˗bha ˗takundhe ˗dhɛ ˗yö, ˈö ʒiaan ˗nu ˗zɔn ˗an ˗dhɛ. Zoova ˗bɔ ꞊faan ˈˈgbɩɩ˗ ˈö ˗kë ˗zuu ˈˈslʋ̈ʋ̈slʋ̈ ˈka bhë ˗a ˗ta ˈö ˗an ˗takun ˈyö ˈwo dho ˈˈdhiʋ̈ wo ˗bha yö ˈka, ˈwo zuʋ̈gblüdhi ꞊slɔɔ ˈzü.—Esd. 6:16.

18. Zakadhi ˗bha ˈˈɲɛɛn ˈö bhë ˗yö ˗yɛ ü ˗bha ˗kɔ ˗kë ꞊dhɛ?

¹⁸ ˈˈƝɛɛn ˈö ˗gban ꞊laŋba ˗dɔtapë do waa odhivö ˗dhü ꞊plɛ ˗bha bhë, ˗yö ꞊mɔɔn- ˗bha ˈö ꞊faan nu kwa ˗dhɛ. Kwa˗ ˗yö ꞊dhɛ ˗wa ˗gban kwa ˗gɔ, ˗yö ꞊mɔɔn- ˗bha ˈö kwa ˗takun kö ꞊faan ˗yö kë kwa ˗gɔ. ˈWɔn ˗nu ˗wa ˈgo ˈˈgblʋʋ kwa ˗bha ˗tosɛta ˈgü, ˗yö ꞊mɔɔn- ˗bha ˈö kwa ˗takun kö zuʋ̈gblüdhi kë kwa ˗gɔ. ˈGo mü ˈzü ˗wa ʒiaan ˗nu ˈö ˈkwaa ˗an ˈsü ˗gɛn dɔ ˗së ˈka ˗an ˗zɔn kwa ˗dhɛ, ˗yö ˗dho ˗a kë kö ˗zoyödhe ˈö kwa ˗bhawɔn ˈdhö˗ ˗bha kö ˈkwa ˈto ˗an ˈˈpiʋ̈, ˗yö kë kwa ˗gɔ. ˈWɔn ˈˈgbɩɩ˗ ˗nu ˗wa kë kwa ˗bha, kwa ˗dho ˗a kë ꞊dhɛ? ˗Blɛɛsü ˈka, pë ˈö Zakadhi ˗ya yö bhë, ˗kwaa ˈˈslö mɛɛnˈˈ kö ˈkwa˗ yö ˈpö. Pë ˈö˗ ˗zɔn ꞊dhɛ ˗Zlan ö ˗zokë ö ˗dhɔkëmɛn ˗nu ˈˈpiʋ̈, ˗kwaa mɛɛnˈˈ. ˗Ya ˈgo mü, ˗kwa ˗gban pë ˗nu ˈkwa ˗an yö bhë ˗an ˗ta kö ˈkwa ˈwɔn ˗nu kë ˗zoyö Zoova ˗dhɛ ˗sü waa˗ ˗dhɔkë kwa zuʋ̈ˈˈ ꞊gban ˈka ˗sü ˈka ˗kplawo. (Mat. 22:37) ˈKwa˗ kë ˈˈdhʋ̈, Zoova ˗dho kwa ˗takun ˈö ˈkwa˗ ˗dhɔkë zuʋ̈gblüdhi ˈgü ˗toëpö ˈka.—Kodh. 1:10, 11.