Nɔɔn˗ ˗së ˈsëëdhɛ ˈö Lukö ˗ya ˗bɛnzë 14:1-35
-
Gɔndënën do ˈö ˗bhla ˗yua ˗yö kun ˗a ˗bha, Yesu ˗ya ˗dhɛ ˗bo ꞊Glooyi ˈka (1-6)
-
‹˗Wa ü ˗dhɛ ˈwlaan˗ ˗ta, ˗bhö ü ˗de ˈsü ˈˈtɩtɩ› (7-11)
-
Mɛn ˗nu ˈö ˈˈse ˈyaa ˗an ˗dhɛ kö ˗wo ˈˈpɔ bho ü ˗gɔ, ˗an ˗dhɛ ü ˗bha ˈwlaan˗ ˗ta (12-14)
-
Mɛn ˗nu ˈwo ˗an ˗dhɛ ˈwlaan˗ ˗ta ˈö ˈwo ˗kɔ ˈdho ˗sü ˈka, ˗an ˗bha ˈwɔnzuan (15-24)
-
ˈWɔn ˈˈgbɩɩ˗ ˗nu ˈwo ˗kë Yesu ˗bha gwëëˈˈ ˈka ˗sü ˈgü (25-33)
-
꞊Wee ˈö˗ din ˗ya ˈgo ˗a ˗bha (34, 35)
14 ꞊Glooyi do ˈbhaa ˈka, Yesu ˗yö ˗dho pë ˗bhö Fadhiziɛn ˗nu ˗gɔmɛn do ˈbhaa ˗gɔ ˈkɔɔ. Mɛn ꞊gban ˈˈpɛpɛ ˈˈɲan ˗kun ˗a ˗bha.
2 ˈWo dho ˗dhɛ ˗ga kö gɔndënën do ˈbhaa ˈö ˗bhla ˗yua ˈdhö˗ ˗bha ˗yö dɔ ˗sü ˈka Yesu ˈwëëdhö.
3 ˈDhɛ ˈö ˗kë ˈˈdhʋ̈, ˈyö Yesu ˗yö mɛn ˗nu ˈwo ˈTɔŋ˗ ˗nu dɔ ˗së ˈka waa Fadhiziɛn ˗nu ˗an dhɛɛˈˈ kpɔ ˈö˗ pö: «˗A ˗dhɛ ˗ya ˗bha kö ˗wo mɛn ˗dhɛ bo ꞊Glooyi ˈka ˗ee?»
4 ˈˈKɛɛ wo ˈti wo ˈˈdhi bho ˈkwëë˗ kö ˗wa ˗yɔ bɔ ˗a ˗gɔ. ˈDhɛ ˈö ˗kë ˈˈdhʋ̈, ˈyö Yesu ˗yö ö ˗kɔ pa gɔndënën ˈö bhë ˗a ˈka ˈö˗ ˗dhɛ bo, ˈyö˗ pö ˗a ˗dhɛ ˗yö ö ˗bha ˈdho wo.
5 ˈDhɛ ˈö ö bo ˗a ˗kë ˈˈdhʋ̈ ˗sü ˈka, ˈyö˗ pö: «ˈMɛn ˈö ˈka ˗lo bhë, de ˈö˗ gbö ɛɛnˈˈ ˗a ˗bha ˗du ˗ya ˗puö ˗klɔŋ ˈgü ꞊Glooyi ˈka ˈö yo ˈti ˗dho ˈto ˈˈshia˗ mü kö ˗ya bho mü?»
6 ˈˈKɛɛ wo ˈti ꞊mɔɔn˗ ˗bha kö ˗wa ˗yɔ bɔ ˗a ˗gɔ.
7 ˈDhɛ ˈö˗ yö ꞊dhɛ mɛn ˗nu ˈwo ˗an ˗dhɛ kö ˗wo nu pë ˗bhö bhë, ˗yɛɛ ꞊bhlëësü ˗nu ˈnën ˈwo kun ˗an mɛɛnˈˈ ˗ni ˈgü kö ˈwo ˗ya mü, ˈyö˗ pö* ˗an ˗dhɛ:
8 «Mɛn ˈbhaa ˗ya ü ˗dhɛ dhe ˈsü ˈwlaan˗ ˗ta, ˈbha ˗dho ˈdho ˈü ˗ya ˗yɛɛ ˈö ꞊bhlëësü ˗a ˈgü. ˗A ˈbhaa ˗ya kë kö mɛn ˈbhaa ˈö˗ ꞊bhlëë ˈdhö ˈkpii˗ ˈö ˗ʒiö ˗a ˈka ü ˗ta ꞊waa˗ ˗dhɛ ˈpö.
9 ˗Ya kë ˈˈdhʋ̈ mɛn ˈö ka ˗dhɛ bhë ˗yö ˗dho nu ˈö˗ pö ü ˗dhɛ: ‹˗Bhö luuˈˈ ˗dhɛ ˈü ˗ya ˗a ˗bha bhë ˗a ˈgü kö gɔndënën ˈö yö ˗yö ˈɲaannu mü,› ˈö ü ꞊luu ü ˗gɔ ˈlëësü ˈö bhë ˗a ˈka ˈü dho ˈü ˗ya ꞊taabha.
10 ˗Wa ü ˗dhɛ ˈwlaan˗ ˈbhaa ˗ta, ˗bhö ˈdho ꞊ʒiaan ˈü ˗ya ˗yɛɛ ˈö ꞊taabha ˗a ˈgü. ˈBha˗ kë ˈˈdhʋ̈, mɛn ˈö ü ˗dhɛ bhë ˗yö ˗dho nu ˈö˗ pö ü ˗dhɛ: ‹N ˈˈtɔŋdë, nu ˈü ˗ya ˗yɛɛ ꞊bhlëësü ˈö yö ˗a ˈgü.› ˗Ya kë ˈˈdhʋ̈, ü ˗dho kë ꞊bhlëësü mɛn ˈˈpɛpɛ ˈwo ˗an ˗dhɛ bhë ˗an ˈˈɲan ˈˈdhiʋ̈.
11 ˗A ˗gɛn ˗mü ꞊dhɛ, mɛn ˈö ö ˗de sü ˈkpii˗, ˗Zlan ˗dho ˈlëë˗ dɔ ˗a ˗bha, ˈö mɛn ˈö ö ˗de ˗kë ˈˈtɩtɩ ˈö ˗Zlan ˗ya ˗gɔ ˈˈdhiʋ̈ ꞊luu.»
12 ˈYö go mü ˈö˗ pö mɛn ˈö˗ ˗dhɛ ˗bhöpë ˈka bhë ˗a ˗dhɛ: «ˈBha˗ pö ˈü mɛn ˗nu ˗dhɛ ˗bhöpë ˈka ü ˗gɔ ˈkɔɔ ˈɲënŋ˗ ˈgü ɛɛnˈˈ ˈˈdooka, ˈbha ˗dho ü ˈˈtɔŋdë ˗nu, ü ꞊dhegblü ˗nu, ü ˗bha ˈkɔɔmɛn ˗nu ɛɛnˈˈ mɛn ˗nu ˈwo ü ˈˈsuee ˈö ˈwo ꞊bhɔɔmɛn ˗nu ˈka ˗an ˗dhɛ. ˗A ˗gɛn ˗mü ꞊dhɛ wo ˗zë ˈpö, ˗wo ꞊mɔɔn˗ ˗bha ˈwo ü ˗dhɛ ˗bhöpë ˈka ꞊taabha. ˗Ya kë ˈˈdhʋ̈ kö ˈwɔn ˗së ˈü˗ ˗kë bhë ˗a ꞊trɔɔn ˈnën bhë.
13 ˈˈKɛɛ ˈbha ˈwlaan˗ ˗ya, ˗bhö ˈˈfleemɛn ˗nu, ꞊niɔɔnmɛn ˗nu, mɛn ˗nu ˈö ˗an ˗gɛn ˗dhɛ ˈdhö˗ ˗bha waa ˈˈɲɛɛntiimɛn ˗nu ˗an ˗dhɛ.
14 ˈBha˗ kë ˈˈdhʋ̈, ü zuʋ̈ˈˈ ˈˈgblü ˗dho dhi, ˗a ˗gɛn ˗mü ꞊dhɛ pë ˈbhaa ˈyaa ˗an ˗gɔ kö ˈwɔn ˗së ˈü˗ ˗kë bhë ˗wa ˈˈpɔ bho ü ˗gɔ. Ü ˗dho ˗a ꞊trɔɔn ꞊slɔɔ mɛn kpɛnŋdhö ˗nu ˗go ga ˈgü ˗yi ˈka.»
15 ˈDhɛ ˈö mɛn ˗nu ˈwo ˗an ˗dhɛ ˗bhöpë ˈka bhë ˗a mɛn do ˗ya man ˈˈdhʋ̈, ˈyö˗ pö Yesu ˗dhɛ: «Mɛn ˈö ˗dho ˗bhöpë ˗bhö* ˗Zlan ˗bha ˗Gblüdëdhɛ ˈgü ˗a ˗bha ˗yö ˗së.»
16 ˈYö Yesu ˗ya pö ˗a ˗dhɛ: «Gɔndënën do ˈbhaa ˈnën ˈö ˈwlaan˗ ˈkpii˗ do ˗ya ˈö ˗gɔ ˈˈkwɛnŋdhö, ˈyö nɔɔn˗ bɔ mɛn ꞊va ˗dhɛ kö ˗wo nu ˗a ˗ta.
17 ˈDhɛ ˈö ˈwlaan˗ ˈö bhë ˗a ˈˈlɛlɛ ˗yö ˗lo, ˈyö ö ˗bha yökëmɛn bɔ kö ˗yö ˈdho ˗ya pö mɛn ˗nu ˈö ˗an ˗dhɛ ˈwlaan˗ ˗ta bhë ˗an ˗dhɛ: ‹Pë ꞊gban ˈˈpɛpɛ ˈˈdhiʋ̈ ˗ya ˗mɔn ˈˈkwöö, ˗ka nu.›
18 ˈˈKɛɛ ˈyö ˗an ꞊gban ˈˈpɛpɛ ˗wa ˈˈslö ꞊mɛɛn kö ˈwa ˗dho ˈdho ˈwlaan˗ ˈö bhë ˗a ˗ta. ˈYö˗ mɛn ˗blɛɛsü ˗ya pö: ‹ˈMan ˈbhladhɛ do ˈbhaa ˈdhɔ, n dua ˗mü kö ˈa ˈdho ˈa n ˈˈɲan ˗kpan ˗a ˗bha. ˗Yö n ˗bhawɔn ˈto, n ˈti ˗dho ꞊mɔɔn˗ ˗bha kö ˈa nu.›
19 ˈYö˗ mɛn do ˈbhaa ˗ya pö: ‹ˈMan ˗du ˗kɔŋ do ˈwo ˗klu ˗sü ˈka wo ˈkwëë˗ ꞊plɛ ꞊plɛ ˗an ˈdhɔ, a ˗dho ˈdho kö ˈa yö ˗kë ˗an ˈka ˗sü ˈgüdan. ˗Yö n ˗bhawɔn ˈto, n ˈti ˗dho ꞊mɔɔn˗ ˗bha kö ˈa nu.›
20 ˈYö˗ mɛn ˈˈwɛɛ ˈbhaa ˗ya pö ˈzü: ‹ˈGo ˈnën ˈa˗ wo ˗ni ˈgü n ˗man dhe ˈsü yö, ˗a ˗wɔn ˈgü n ˈti ˗dho ꞊mɔɔn˗ ˗bha kö ˈa nu.›
21 ˈDhɛ ˈö ˗kë ˈˈdhʋ̈, ˈyö yökëmɛn ˈö bhë ˈö dho ˈö ˗ʒiö ˗wo ˗nu bhë ˗an ꞊gban ˈˈpɛpɛ ˈgü ö ˗gɔmɛn ˗dhɛ. ˈYö ˈwɔn ˗yö ˗shiö gɔndënën ˈö bhë ˗a ˗dhɛ, ˈö˗ pö ö ˗bha yökëmɛn ˗dhɛ: ‹˗Bhö ˈdho ˈˈvaandhö ˗kpinŋ ˗nu waa ʒiaan ˈsɛɛn˗ ˈˈpɛpɛ ˈwo ˈplöö yö ˗an ˈˈpiʋ̈ kö ˈü ˈˈfleemɛn ˗nu, ꞊niɔɔnmɛn ˗nu, ˈˈɲɛɛntiimɛn ˗nu waa mɛn ˗nu ˈö ˗an ˗gɛn ˗dhɛ ˈdhö˗ ˗bha ˗an ˗dhɛ, kö ˈü yö ˗an ˗dhɛ ˈˈdhiʋ̈ kö ˈka nu yö.›
22 ˈDhɛ ˈö yökëmɛn ˈö bhë ˈö nu, ˈyö˗ pö: ‹˗Gɔmɛn, pë ˈü˗ pö n ˗dhɛ bhë ˈman˗ kë, ˈˈkɛɛ ˗yɛɛ ˈbhaa ˗nu ꞊kun ˗dhö ˈkɔɔ.›
23 ˈYö˗ ˗gɔmɛn ˗ya pö ˗a ˗dhɛ: ‹˗Bhö ˈdho ˗kpinŋga ˗nu ˈwo ˗da ˈplöö waa ˈbhla˗ ˗ʒian ˗nu ˈka kö ˈü ˗gban mɛn ˗nu ˗bha ˗fɛfɛsü ˈka kö ˗wo nu, kö n ˗man ˈkɔ ˗yö pa.
24 ˗A ˗gɛn ˗mü ꞊dhɛ mɛn ˗nu ˈa ˗an ˗dhɛ ˗blɛɛsü bhë, ˗a mɛn ˈˈwɛɛ ˈbhaa yö ˈti ˗dho n ˗man ˈwlaan˗ ˈö yö ˗a ˗bhöpë ˗da ö ˈˈdhii, man ˈnën ˈa˗ pö ü ˗dhɛ ˈˈdhʋ̈.›»
25 ꞊Taabha, ˈdhɛ Yesu kun ˈdho ˗ni ˈgü ˈˈta ˈgü, mɛn ꞊va ꞊dede ˗wo ˗ʒiö ˗a ꞊kee˗. ˈYö ꞊slëë ö ˗zü ˈö˗ pö ˗an ˗dhɛ:
26 «Mɛn ˈˈoo ˗mɛn ˈö ˗ʒiö n ꞊kee˗, ˈˈkɛɛ ˈö˗ dë, ˗a dhe, ˗a ˗bha dhebɔ, ˗a ˗bha ˈnën ˗nu, ˗a ꞊dhegblü gɔɔn˗ ˗nu, ˗a ꞊dhegblü dhoo ˗nu ɛɛnˈˈ ˗ʒiaanwo ˗a ˗de ˗bha ˗tosɛta* ˗san ˈyaa˗ kë,* yö ˈti ˗dho ꞊mɔɔn˗ ˗bha kö ˗yö kë n ˗man gwëëˈˈ ˈka.
27 Mɛn ˈö yö ˈti ö ˗bha ˗ga ˗a ˗ta ˗dhü ˈsü kö ˗yö ʒiö ˗a ˈka n ˈˈpiʋ̈, kö ˈyaa ꞊mɔɔn˗ ˗bha kö ˗yö kë n ˗man gwëëˈˈ ˈka.
28 ˗A ˈwɔnzuan ꞊nɛn: Mɛn ˈö ˈka ˗lo bhë, de ˈö ꞊yaa˗ pö ö ˈkɔ ˈkpii˗ dɔ ˈö ˈyaa ˈɲaannu ꞊köŋ ˗blɛɛsü kö ˗yö ö ˗zota, kö ˗ya kë ꞊dhɛ ˈkɔ ˈö ˈˈdhʋ̈ ˗a ˗dɔ ˗a ˈka ˗pë ˗ya ˗gɔ kö ˗yö ˈdho ˗yö ɲën ˗a ˗bha, ˗ya ˈwɔn dɔ?
29 Yö ˈti˗ kë ˈˈdhʋ̈, ˗yö ꞊mɔɔn˗ ˗bha ˈö˗ ˈkɔ ˈˈkpan ˗ya ˈˈsɛɛdhö, ˈˈkɛɛ ˈö kun ˗a dɔ ˗sü ˈka, ˈö mɛn ˈˈpɛpɛ ˈwo ˗dho ˗kpan ˗a ˗bha ˈwo ˈˈyɩɩ to ˗a ˗bha.
30 ˗Wo ˗dho ˗a pö: ‹Gɔndënën ˈö yö ˗yö ˈkɔ dɔ ˗sü züdɔ, ˈˈkɛɛ ˗ya ˈkun ˗a dɔ ˗sü ˈka ˗wa!›
31 Ɛɛnˈˈ ˈzü ˗gblüdë ˈö ˈˈsɔdha ˈˈgblü ˗kɔŋ do (10.000) ˈdhö˗ ˗gɔ, ꞊yaa˗ pö ˈö luuˈˈ ˈö ˈdho ˗gblüdë ˈbhaa ˈö˗ ˗bha ˈˈsɔdha ˈdhö ˈˈgblü ˗kɔŋ ꞊plɛ (20.000) ˗a ˗gɔ, yö ˈti ˗dho ˗dhioo ˗dɔ ö ˗ta ˗mɛn ˗nu dhɛɛˈˈ ˈkpɔ, kö ˗ya kë ꞊dhɛ ö ˗kɔ ˗dho ˗mɔn ˗a ˗bha ˈö˗ ˈwɔn dɔ ˗ee?
32 ꞊Yaa˗ yö ꞊dhɛ ö ˗kɔ ˈyaa ˗mɔn ˗a ˗bha, ˗yö ˗gblüdë ˈö bhë ˗a ˗to mü ꞊gblɛɛn ˈö ö ˗bha mɛn ˗nu bɔ kö ˈö ˗dhikodhɛ mɛɛnˈˈ ˗a ˈˈpiʋ̈.
33 ˗Kɔ do ˈö bhë ˗a ˈka, mɛn ˈö yö ˈti ˈˈwɩ ˗a ˗bha kö ˈö ö ˗kɔ bho ö ˗bha ꞊nɔɔn ˗kwɛɛ ˗nu ꞊gban ˈˈpɛpɛ ˈgü,* yö ˈti ˗dho ꞊mɔɔn ˗bha kö ˗yö kë n ˗man gwëëˈˈ ˈka.
34 «˗Yö ˈˈdhʋ̈ gagade ˈka ꞊dhɛ ꞊wee ˗yö ˗së. ˈˈKɛɛ kö ꞊wee din ˗yö ˈgo ˗a ˗bha, ˗mën ˈö ꞊mɔɔn˗ ˗bha ˗ya kë kö ˗a din ˗yö kë ˗a ˗bha ˈzü ˗dɛɛwo?
35 ˗Ya kë ˈˈdhʋ̈ kö ˈwaa ꞊mɔɔn˗ ˗bha ˈzü kö ˗wa kaanˈˈ ˈˈsɛ ˈka ɛɛnˈˈ ˗wa kaanˈˈ tapë ˗nu dhipë ˈka. Kö ˗a ˗wɛnŋ ˈˈkpɛnŋ ˗sü ˈnën ˗ya ˈto. Mɛn ˈö ˈwɔn ˈgüman ˗tʋ ˈdhö˗ ˗gɔ, ˗yö ö ˈˈtʋ ˈto ˗së ˈka.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈyö ˈwɔnzuan do ˗zɔn.»
^ Glɛkö ˗wo ˈgü ˈyö ˗tɔ «ˈbluu˗ ˗bhö.»
^ Ɛɛnˈˈ «ˈniin˗.»
^ Ɛɛnˈˈ «˗dhɔ ˗ya ˗kë ˈgbɛ ˈö ˗ʒiö ˗a ˈka n ˗ta.»
^ Glɛkö ˗wo ˈgü ˈyö ˗tɔ «ö ˗wo ˗da ö ˗bha ꞊nɔɔn ˗kwɛɛ ˗nu ꞊gban ˈˈpɛpɛ ˗dhɛ.»
