ˈö Matiö ˗ya ˗bɛnzë 12:1-50
-
Yesu ˈnën ˈö ˗tɔ «꞊Glooyi Dëmɛn» (1-8)
-
˗Kɔ ˈö gɔndënën do ˈö˗ ˗kɔ ˗yö ga ˗a ˗bha ˗a ˗dhɛ ˗yö bo ˗a ˈka (9-14)
-
˗Zlan ˗bha yökëmɛn dhɔɔbhaasü (15-21)
-
˗Zuu yaa ˗bho mɛn ˗nu ˈgü ˗sü ˈö ˗zuu ˈˈslʋ̈ʋ̈slʋ̈ ˈka (22-30)
-
ˈWɔn yaa ˈö˗ ˗bhawɔn ˈto ˗dhɛ ˈyaa ˈdhö (31, 32)
-
˗Wo ˈˈdhü ˗dɔ ˗a bhɛ ˗bha (33-37)
-
˗Dhidha ˈö ˗kë Ʒonasö ˈka (38-42)
-
˗Zuu yaa ˗bha ö ꞊yɛɛ kë ˗sü ˈö nu (43-45)
-
Yesu dhe waa˗ ꞊dhegblü ˗nu (46-50)
12 -A ˈˈtʋ̈ŋ ˈö bhë ˗a ˈgü, Yesu ˗yö ˗kun ʒiö ˗ni ˈgü ˈble˗ ˗bhla do ˈbhaa ˈgü ꞊glooyi ˈka, ˈyö din˗ ˗yö ˗a ˗bha gwëëˈˈ ˗nu kun. ˈYö ˈwo ˗ya ˗a ˈble˗ ˗kpaa ga ˈbhaa ˗nu ˗bho ˗a ˈgü ˗sü ˗bha ˈö ˈwo˗ ˗bhö.
2 ˈDhɛ ˈö Fadhiziɛn ˗nu ˗wo ˗an yö, ˈyö ˈwo˗ pö Yesu ˗dhɛ: «˗Dhɛ ˗ga! ˈPë ˈö ˈtɔŋ˗ ˗ya pö ˈwaa˗ kë ꞊glooyi ˈka bhë, ˗a ˗ga ˈö ü ˗bha gwëëˈˈ ˗nu ˈwo˗ kë ˗ni ˈgü bhë.»
3 ˈYö˗ ˗yɔ bɔ ˗an ˗gɔ ˈö˗ pö: «Pë ˈö Davi ˗ya ˗kë kö din˗ ˗yö waa ö ˗bha mɛn ˗nu ˗an kë ˗ni ˈgü bhë, ka ˈti˗ ˗wo pö ˗Zlan ˗bha ˈsëëdhɛ ˈgü ˗ee?
4 ˗Yö ˗da ˗Zlan ˗gɔ ˈkɔɔ ˈö ˈwo ˈbluu˗ ˗nu ˈwo ˈˈsaabho ˗an ˈka ˗Zlan ˗dhɛ bhë ˗an ˗bhö, ˈˈkɛɛ kö waa ö ˗bha mɛn ˗nu ˗a ˗dhɛ ˈyaa˗ ˗bha ˗be kö ˗wa ˗bhö. ˈˈSaabhomɛn ˗nu dosɛnŋ ˈnën ˗an dua ˈdhö ˗mü kö ˗wa ˗bhö.
5 Ɛɛnˈˈ ˈzü ˗a pö ˈö ˈTɔŋ˗ ˗ya wo ꞊dhɛ ˈˈsaabhomɛn ˗nu ˈö ˈwo ˗dho yö kë ˗Zlan ˗dhɔkë ˗a ˈgü ˗kɔ ˈgü ꞊Glooyi ˈka ˗wo ꞊Glooyi ˈtɔŋ˗ ˗lögü, ˈˈkɛɛ ˈö ˈwaa za dɔ ˗an ˗bha bhë, ka ˈti˗ ˗wo pö ˗ee?
6 A˗ ˗pö ka ˗dhɛ gagade ˈka ꞊dhɛ pë do ˈbhaa ˈö ˈkpii˗ ˈö ˗ʒiö ˗a ˈka ˗Zlan ˗dhɔkë ˗a ˈgü ˗kɔ ˗ta, ˗yö ˗dhɛ ˈö yö ˗a ˈgü.
7 ˗A pö ˈö ˗Zlan ˗Wo ˗ya wo ꞊dhɛ ‹mɛn ˗wëë zë ˗sü ꞊nën a ˈˈpiʋ̈, ˈˈsaa˗ ˗nu ˈwaa ˗mü› bhë ka˗ ˈgüman ˗be, ka ˈti ˗dho za dɔ mɛn ˗nu ˈö wo ˈti ˈwɔn yaa kë bhë ˗an ˗bha.
8 ˗A ˗gɛn ˗mü ꞊dhɛ maan mɛn Gbö ˗mɛn man ˈnën ˈa ˗tɔ ꞊Glooyi Dëmɛn.»
9 ˈDhɛ ˈö go ˗dhɛ ˈö bhë ˗a ˈgü, ˈyö dho ˗an ˗bha ˗yakwëë ˗kë ˗a ˈgü ˗kɔ ˈgü.
10 ˈDhɛ ˈö bhë ˗a ˈgü, gɔndënën do ˈö˗ ˗kɔ ˗yö ga ˗a ˗bha ˗yö ˗kë mü. ˈYö ˈwo Yesu dhɛɛˈˈ kpɔ ˈwo˗ pö: «˗A ˗dhɛ ˗ya ˗bha kö ˗wo mɛn ˗dhɛ bo ꞊Glooyi ˈka ˗ee?» ˗Wo dhɛɛˈˈ ˈö bhë ˗a ˗kpɔ ˗a ˗gɔ ˈˈdhʋ̈ kö ˈwo˗ ˈkun ˗dhɛ yö.
11 ˈYö˗ ˗yɔ bɔ ˗an ˗gɔ ˈö˗ pö: «Mɛn ˈö ˈka ˗lo bhë, de ˈö˗ ˗bha ˈˈbhlaa dosɛnŋ ˈö˗ ˗gɔ ˗ya ˗puö ꞊gluudhö ꞊Glooyi ˈka, ˈö yö ˈti ˗dho ˈdho ˗a bho mü?
12 Mɛnbhɩɩdhe ꞊bhlëë ˗yö ˈkpii˗ ˈö ˗ʒiö ˗a ˈka ˈˈbhlaa ˗ta. ˈDhɛ ˈö ˈˈdhʋ̈, mɛn ꞊mɔɔn˗ ˗bha ˈö ˈwɔn ˗së ˗kë ꞊glooyi ˈka.»
13 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö˗ pö gɔndënën ˈö bhë ˗a ˗dhɛ: «˗Bhö ü ˗gbe ˈgü ˈˈpʋ.» ˈYö˗ ˗pʋ, ˈyö˗ ˗gbe ˗yö bo, ˈyö ˗kë ꞊dhɛ ˗a ˗gbe ˈˈwɛɛ ˈö to ˗a ˈdhö.
14 ˈDhɛ ˈö ˗kë ˈˈdhʋ̈ ˈyö Fadhiziɛn ˗nu ˗wo yö ˈˈkpɛnŋ, ˈyö ˈwo ˗ya Yesu zë ˗wɔn ˗yökodhiʋ̈ kë ˗sü ˗bha.
15 ˈDhɛ ˈö Yesu ˗ya ˈwɔn dɔ ˈˈdhʋ̈, ˈyö ˗ʒiö ˈö go ˗dhɛ ˈö bhë ˗a ˈgü. Mɛn ꞊va ꞊dede ˗wo ˗ʒiö ˗a ꞊kee˗ ˈpö, ˈyö ˗an ꞊gban ˈˈpɛpɛ ˗dhɛ bo.
16 ˈˈKɛɛ ˈyö ˗dhioo dɔ ˗an ˗ta glɔɔgblɔɔdhö ˈö˗ pö mɛn ˈö˗ ˈka ˈwa ˗dho ˗a blɛɛˈˈ mɛn ˈbhaa ˗dhɛ toŋtoŋdhö.
17 ˗Yö ˗kë ˈˈdhʋ̈ kö ˗wo ˈö ˗Zlan ˗wodhiʋ̈lomɛn Izai ˗ya to ˈˈdhiʋ̈ ˈö˗ pö bhë, ˗yö yökodhiʋ̈. ˗Ya ˗pö:
18 «N ˗man yökëmɛn ˈa n ˗kɔ ˗yɛ ˗a ˗bha ˈyö ꞊nɛn! ˗A ˗dhɔ ˗yö n ˗kë ꞊dedewo, ˈö n zuʋ̈ˈˈ ꞊nii ˗da. A ˗dho n ˗man ˗zuu ˗nu ˗a ˗dhɛ kö ˗yö ˈwɔn ˈö kpɛnŋdhö ˗a kë ˗sü ˗zɔn mɛn ꞊gban ˈˈpɛpɛ ˗dhɛ.
19 Waa mɛn ˈbhaa wo ˈti ˗dho ˗dɔn bho. Yö ˈti ˗dho ˈˈgbla mɛn ˗nu ˗ta ɛɛnˈˈ wo ˈti ˗dho ˗a ˗wo man ˗kpinŋ ˈˈpiʋ̈ ˗dhɛ ˗nu ˗bha.
20 ˗Kadhüga ˈö ga ˗ni ˈgü yö ˈti ˗dho ˗a yɛɛˈˈ, ɛɛnˈˈ ꞊laŋba ˈnɛɛn˗ ˈö ˗ya ꞊ɲɔɔn ˈˈshiaa yö ˈti ˗dho ˗a dhuuˈˈ ꞊klöö˗ do. ˗Yö ˗dho ˈto ˗a ˗kë ˈˈdhʋ̈ ˗sü ˗bha ˈö dho ˈö ˈwɔn ˈö kpɛnŋdhö ˗a ˗gɛn ˗gban.
21 ˗Zoyödhe ˗dho kë mɛn ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an ˗gɔ ˗a ˈtɔ ˈgü.»
22 ˈDhɛ ˈö ˗kë ˈˈdhʋ̈ ˈyö ˈwo nu gɔndënën do ˈö ˗zuu yaa ˈdhö˗ ˈgü, ˈö ˈˈɲɛɛn ˈdhö tii, ˈö ˈyaa ˈˈwɩ ˗a ˈka Yesu ꞊dhiaa. ˈYö Yesu ˗ya ˗dhɛ bo, ˈyö ˗mɔn ˈwɔn blɛɛˈˈ ˗sü ˗bha ˈö ˗dhɛ yö.
23 ˈYö mɛn ˈˈpɛpɛ ˈwo kun mü ˗a ˈwɔn ˗yö ˗an kun ˈö ˈwo˗ pö: «Mɛn ˈö yö Davi Gbö ˈyaa ˗mü ˈˈwɛɛ ˗ee?»
24 ˈDhɛ ˈö Fadhiziɛn ˗nu ˗wa man ˈˈdhʋ̈, ˈyö ˈwo˗ pö: «Gɔndë ˈö dɔ bhë Bɛɛzebubö ˈö ˗kë ˗zuu yaa ˗nu ˗gɔmɛn ˈka bhë, yö ˈnën ꞊faan nu ˗a ˗dhɛ ˈö ˗zuu yaa ˗nu bho ˗ni ˈgü ˗a ˈka mɛn ˗nu ˈgü bhë.»
25 ˈDhɛ ˈö ˗kë ꞊dhɛ Yesu ˗yö ˗an zuʋ̈ˈˈ ˈˈpiʋ̈ ˗wɔn ˗dɔ bhë, ˈyö˗ pö ˗an ˗dhɛ: «˗Gblüdëdhɛ ˈö˗ ˈgümɛn ˗nu ˗wo ˗gban wo ˈko ˗nu ˗gɔ, ˗a ˈˈdhiʋ̈ ˗yö ˗to ˈwü ˗sü ꞊nën˗ ˗ta. ˗Ya ˈgo ˗a ˈgü ˈzü ˈpödhɛ ɛɛnˈˈ ˈkɔdhi ˈö ˗a ˈgümɛn ˗nu ˗wo ˗gban wo ˈko ˗nu ˗gɔ, ˗a ˗gɛn ˈyaa ꞊mɔɔn˗ ˗bha kö ˗yö ˗gban, ˈwü ꞊nën ˈö˗ wo.
26 ˗Kɔ do ˈö bhë ˗a ˈka, Sɔtraan ˗ya ö ˗de ˗bha ˗zuu yaa kë mɛn ˗nu ˈgü, kö ˗yö ˈko zë ni ˈgü ö ˗de ˈka. ˈYö ˗ya kë ˈˈdhʋ̈, ˗a ˗bha ˗gblüdëdhɛ ˗gɛn ˗dho ˗gban ˗kɔ ˗kë ꞊dhɛ?
27 ˗Ya kë ꞊dhɛ Bɛɛzebubö ˈnën ꞊faan nu n ˗dhɛ ˈö ˈa ˗zuu yaa nu bho mɛn ˗nu ˈgü, ˗a ˈdhɛ ˈö ka ˗bha gwëëˈˈ ˗nu ˈdhö˗ kë ˗ni ˈgü bhë ˈpö, de ˈö˗ ꞊faan nu ˗an ˗dhɛ? ˈPë ˗kë ˈö ka ˗bha gwëëˈˈ ˗nu ꞊dede ˈnën ˈwo ˗dho ka zë za ˈka, ˈyö bhë.
28 ˈˈKɛɛ ˗ya kë ꞊dhɛ ˗Zlan ˗bha ˗zuu ˈnën ˈa bɔ ˗a ˗ta ˈa ˗zuu yaa ˗nu ˗kë mɛn ˗nu ˈgü, kö ˗ya ˗zɔn ꞊dhɛ ˗Zlan ˗bha ˗Gblüdëdhɛ ˗ya nu ˗ya yö ka ˗bha.*
29 De ˈö ꞊mɔɔn˗ ˗bha ˗yö ˗da gɔɔn˗ ˈgügbɩɩsü ˈbhaa ˗gɔ ˈkɔɔ kö ˗ya ˗bha ꞊kwɛɛ˗ ˗nu ˈsü kö yö ˈti ˈgügbɩɩmɛn ˈö bhë ˗a ˗klu ꞊köŋ ˗blɛɛsü? ˗Ya ˈö bo ˗a ˗klu ˗sü ˈka, ˈyö ˗dho ˗mɔn ˗a ˗bha ꞊kwɛɛ˗ ˗nu ˈsü ˗sü ˗bha.
30 ˈMɛn ˈö yö ˈti bɔ n ˈka, kö ˗yö ˗nu n ˗gɔ. ˈMɛn ˈö yö ˈti kpa n ˗bha ˈpö kö ˈyi mɛn ˗nu ˗lo wo ˈkwëëdhö n ˈˈpiʋ̈, kö mɛn ˗nu ˗kan n ˗bha ˗mɛn ˗mü.
31 «˗A ˗wɔn ˈgü a˗ ˗pö ka ˗dhɛ, mɛn ˈö ˈwɔn yaa ꞊suu ˈˈoo ˗su ˗kë ɛɛnˈˈ ˈö ˈsi ꞊suu ˈˈoo ˗su bho, ˗Zlan ˗dho ˗a ˗bhawɔn ˈto. ˈˈKɛɛ mɛn ˈö ˗Zlan ˗bha ˗zuu ꞊bhlëë ˗shiö, yö ˈti ˗dho ˗a ˗bhawɔn ˈto.
32 ˗A ˈwɔnzuan ˈnën ˗tɔ, mɛn ˈö ˈwɔn yaa ꞊blɛɛ maan mɛn Gbö ˗mɛn n ˈka, ˗yö ˗dho ˗bhawɔntodhe ꞊slɔɔ. ˈˈKɛɛ mɛn ˈö ˈwɔn yaa ꞊blɛɛ ˗Zlan ˗bha ˗zuu ˈka, yö ˈti ˗dho ˗bhawɔntodhe ꞊slɔɔ ꞊dɛɛ ɛɛnˈˈ yö ˈti ˗dho ˗a ꞊slɔɔ dhiʋ̈ˈˈ.*
33 «ˈKa kë ˈˈdhü ˗së ˈka, ka bhɛ ˗dho kë ˗së. ˈKa kë ˈpö ˈˈdhü yaa ˈka, ka bhɛ ˗dho kë ˈya˗. ˗A ˗gɛn ˗mü ꞊dhɛ ˗kɔ ˈö ˈˈdhü ˈdhö˗ ˈka, ˗wa ˗yö ˗a bhɛ ˗bha.
34 ꞊Bhöö ꞊suugünën ˗nu, ka ˗dho ˈwɔn ˗së blɛɛˈˈ ˗kɔ ˗kë ꞊dhɛ ˈˈkɛɛ kö ka ꞊suu ˗yö ˈya˗? ˗A ˗gɛn ˗mü ꞊dhɛ ˈpë ˈö mɛn zuʋ̈ˈˈ ˈˈpiʋ̈* ˈyö ˗wo mɛn ˈˈdhi ˗ta.
35 ˈWɔnsëkëmɛn ˗yö ˈwɔn ˗së ˗blɛɛ, ˗a ˗gɛn ˗mü ꞊dhɛ ˈwɔn ˗së ˗nu ˈnën ˈwo pa ˗sü ˈka ˗a zuʋ̈ˈˈ ˈgü. ˈˈKɛɛ ˈwɔnyaakëmɛn ˗zë, ˈwɔn yaa ˈnën ˈö˗ ꞊blɛɛ, ˗a ˗gɛn ˗mü ꞊dhɛ ˈwɔn yaa ˗nu ˈnën ˈwo pa ˗sü ˈka ˗a zuʋ̈ˈˈ ˈgü.
36 A˗ ˗pö ka ˗dhɛ ꞊dhɛ za ˈˈkan ˗yi ˈka, ˈˈwlaa˗ ˗dhiaŋ* ˈˈpɛpɛ ˈö mɛn ˗nu ˗wa zë, ˗Zlan ˗dho ˗a za dɔ ˗an ˗bha.
37 ˗A ˗gɛn ˗mü ꞊dhɛ ü ˈˈdhiwo ˈnën ˈö ˗dho ˗a ˗zɔn ꞊dhɛ ü kpɛnŋdhö ɛɛnˈˈ ˈzü ˈö ˗dho ü zë za ˈka.»
38 ˈDhɛ ˈö ˗kë ˈˈdhʋ̈, ˈyö ˈtɔŋ˗ ˗gɔmɛn ˗nu waa Fadhiziɛn ˈbhaa ˗nu ˈwo˗ pö ˗a ˗dhɛ: «Yi ˗gɔmɛn, ˗yö yi ˈˈpiʋ̈ ꞊dhɛ ü ˗dhidha do kë kö ˈyi˗ yö.»
39 ˈYö Yesu ˗ya ˗yɔ bɔ ˗an ˗gɔ ˈö˗ pö: «ˈˈTʋ̈ŋ ˈö yö ˗a ˈgümɛn ˗nu ˈö ˗an ꞊suu ˈdhö ˈya˗, ˈö ˈwaa ˗klu ˗Zlan ˗bha bhë, ˗wa ˈˈpiʋ̈ ˗kplawo ꞊dhɛ ˗dhidha do ˗yö kë kö ˈwo ˗kpan ˗a ˗bha. ˈˈKɛɛ ˗dhidha ˈˈwɛɛ ˈbhaa yö ˈti ˗dho kë ˗an ˗dhɛ, kö yö ˈti kë ˗a ˗dhɛ ˈö ˗kë ˗Zlan ˗wodhiʋ̈lomɛn Ʒonasö ˈka bhë ˗a ˈka.
40 Ʒonasö ˗yö ˗dhɛkpaɔyi ˗yaaga waa gbeŋ ˗yaaga ˗kë ˈyuö˗ ˈkpii˗ do ˈˈgblüü. ˗Kɔ do ˈö bhë ˗a ˈka, maan mɛn Gbö ˗mɛn ˗a ˗dho ˗dhɛkpaɔyi ˗yaaga waa gbeŋ ˗yaaga kë ga ˗gblü ˈgü.
41 Za ˈˈkan ˗yi ˈka, Ninivö ˗mɛn ˗nu waa ˈˈtʋ̈ŋ ˈö yö ˗a ˈgümɛn ˗nu ˗wo ˗dho ˈgo ga ˈgü, ˈö Ninivö ˗mɛn ˗nu ˗wo ˈˈtʋ̈ŋ ˈö yö ˗a ˈgümɛn ˗nu zë za ˈka. ˗A ˗gɛn ˗mü ꞊dhɛ ˈdhɛ ˈö Ʒonasö ˗yö ˗zlanwopö Ninivö ˗mɛn ˗nu ˗dhɛ, ˗wo wo ˗kwaa wo kë ˗sɔŋ yaa ˗nu ˗zü. ˈˈKɛɛ ka ˗dhɛ ˗ga! Mɛn ˈbhaa ˗yö yö ˈö ˈkpii˗ ˈö ˗ʒiö ˗a ˈka Ʒonasö ˗ta.
42 Za ˈˈkan ˗yi ˈka, ˗gblüdhe ˈö go ˈˈshiaa ꞊ʒiaan waa ˈˈtʋ̈ŋ ˈö yö ˗a ˈgümɛn ˗nu ˗wo ˗dho ˈgo ga ˈgü, ˈö ˗gblüdhe ˈö go ˈˈshiaa ꞊ʒiaan ˈö ˈˈtʋ̈ŋ ˈö yö ˗a ˈgümɛn ˗nu zë za ˈka. ˗A ˗gɛn ˗mü ꞊dhɛ ˗yö ˗go ˗dhɛ ꞊gblɛɛn ˈgü ˈö nu ö ˈˈtʋ ˈto˗ Sadhomɔn ˗bha ꞊kpɔɔdhɛ ˗dhiaŋ ˗bha. ˈˈKɛɛ ka ˗dhɛ ˗ga! Mɛn ˈbhaa ˗yö yö ˈö ˈkpii˗ ˈö ˗ʒiö ˗a ˈka Sadhomɔn ˗ta.
43 «˗Zuu yaa ˗ya ˈgo mɛn ˈbhaa ˈgü, ˗yö ˗dho ˈö ˗glü ˗dhɛkpɛɛdhɛ ˈgü kö ˈö ö ˈˈtɛɛpadhɛ mɛɛnˈˈ, ˈˈkɛɛ ˈyaa ˗dhɛ ˈbhaa ꞊slɔɔ.
44 ˗Ya kë ˈˈdhʋ̈ ˈyö˗ pö: ‹A ˗dho ˈdho n ˗man ˈkɔ ˗a go ˗a ˈgü bhë ˗a ˈgü ˈzü.› ˗Ya ö ꞊yɛɛ kë mü, ˈyö˗ yö ꞊dhɛ mɛn ˈbhaa ˈyaa ˈkɔɔ mü, ˗a ˈkɔɔdhɛ ˗yö ˗gwö ˗sü ˈka ˈö ˗wa ˈkɔɔdhɛ dhi ˗pë ˗nu dɔ mü.
45 ꞊Yaa˗ yö ˈˈdhʋ̈, ˈyö dho ˈö ˗zuu yaa ˈˈwɛɛ ˈˈsɔɔplɛ ˈwo ˈˈdhiʋ̈˗ ˈwo ˗ʒiö ˗a ˈka ˗a ˗ta ˗an ꞊mɛɛn ˈö nu ˗an ˈka ˈkɔ ˈö bhë ˗a ˈgü, ˈö waa˗ ˗nu ˈwo ˗ya mü. ˗Ya kë ˈˈdhʋ̈, ˗a ˗mɛn ˗bha ˗yö ˗kë ˈzü ˗wëësü ꞊dedewo ˈö ˗ʒiö ˗a ˈka ˈˈdhiʋ̈ ˗be ˗ta. ˈPë ˈö ˗dho kë ˈwɔnyaakëmɛn ˗nu ˈwo ꞊dɛɛ ˗an ˈka ˈyö bhë.»
46 ˈDhɛ Yesu ˗yö kun dhiaŋ zë ˗ni ˈgü mɛn kpö ˈwo bhë ˗an ˗dhɛ, kö ˗a dhe waa˗ ꞊dhegblü ˗nu ˗wo dɔ ˗sü ˈka ˈˈkpɛnŋ kö ˗wa ˈˈpiʋ̈ ˈwo ˈwɔn blɛɛˈˈ ˗a ˗dhɛ.
47 ˈYö mɛn do ˈbhaa ˗ya pö ˗a ˗dhɛ: «˗Dhɛ ˗ga! Ü dhe waa ü ꞊dhegblü ˗nu ˗wo dɔ ˗sü ˈka ˈˈkpɛnŋ, ˗wa ˈˈpiʋ̈ ˈwo ˈwɔn blɛɛˈˈ ü ˗dhɛ.»
48 ˈYö Yesu ˗ya ˗yɔ bɔ ˗a ˗gɔ ˈö˗ pö: «De ˈö ˗tɔ n dhe, ɛɛnˈˈ de ˗nu ˈwo ˗tɔ n ꞊dhegblü ˗nu?»
49 ˈYö ö ˗kɔ ˗zɔn ö ˗bha gwëëˈˈ ˗nu ˈka ˈö˗ pö: «˗Dhɛ ˗ga! N dhe waa n ꞊dhegblü ˗nu ˈnën ˈwo ꞊nɛn.
50 ˗A ˗gɛn ˗mü ꞊dhɛ, mɛn ˈˈoo ˗mɛn ˈö n Dë ˈö dhaŋ˗ ˈgü bhë ˗a ˗zokunwɔn ˗kë, ˗a mɛn ˈö bhë yö ˈnën ˈö ˗tɔ n ꞊dhegblü gɔɔn˗, n ꞊dhegblü dhebɔ ɛɛnˈˈ n dhe.»
-Zoto -a ˈˈpiʋ̈ -wɔn -nu
^ Ɛɛnˈˈ «˗ya ˈˈkan ka ˈgü.»
^ Ɛɛnˈˈ «ˈˈkpɔnŋtaadhɛ ˈö nu ˗ni ˈgü bhë, ˗a ˈgü.»
^ Glɛkö ˗wo ˈgü ˈyö ˗tɔ «pë ˈö pa ˗sü ˈka mɛn zuʋ̈ˈˈ ˈgü, ˈyö ˗wo mɛn ˈˈdhi ˗ta.»
^ Ɛɛnˈˈ «ˈˈdhiwo yaa.»
