ˈö Matiö ˗ya ˗bɛnzë 17:1-27
17 ˈDhɛ ˈö ˗dhɛkpaɔyi ˈˈsɔɔdo ˗yö ˗ʒiö, ˈyö Yesu ˗yö Piɛɛ, Zakö waa˗ ꞊dhegblü Zan ˗an sü ˈö waa˗ ˗nu ˈwo dho wo do ˈka ˗tɔn ꞊gblɛɛn do ˗ta.
2 ˈYö Yesu ˗yö ˈˈgla ˗kë ˗an ˈˈɲaan mü, ˈyö˗ ˈwëëdhɛ ˈbhü ˗yö ˗ya bhɔ ˗sü ˗bha ꞊dhɛ ˈɲaan˗ ˈdhö, ˈö˗ ˗bha sɔ ˈbhü ˗yö bhɔ* ꞊dhɛ ˈˈshiʋ̈ ˈbhü ˈdhö.
3 ˈWo ˗dho ˈˈkan wo ˗ta kö Moizö waa Edhi ˗wa ˗wo, kö waa Yesu ˗nu ˗wo ˈwɔn blɛɛˈˈ ˗ni ˈgü wo ˈko ˗dhɛ.
4 ˈYö Piɛɛ ˗ya pö Yesu ˗dhɛ: «N Dëmɛn, kwa ˗bha ˗kë ˈyö ˗sü ˗yö ˈˈdhiaasü ꞊dedewo. ˗Ya dhi ü ˗dhɛ, a ꞊mɔɔn˗ ˗bha ˈa sɔ ˈkɔ ˗yaaga dɔ ˈyö. Ü ˗bha do, Moizö ˗bha do, Edhi ˗bha do.»
5 Dhiaŋ ˗yö ˗to ˗a ˈˈdhi ˈyö ˈˈdhuu kpö ˈö˗ ˈbhü ˈdhö bhɔ ˗sü ˈka ˈö sɔ ˗an ˗ta, ˈyö ˗wo ˈbha ˗yö bɔ ˈˈdhuu ˈö bhë ˗a ˈgü ˈö ˗we ˈö˗ pö: «N Gbö dhɔɔbhaasü ˈnën ˈö dɔ bhë, ˗yö n zuʋ̈ˈˈ ꞊nii ˗da ꞊dedewo. ˗Ka ka ˈˈtʋ ˈto ˗a ˗wo ˗bha.»
6 ˈDhɛ ˈö Yesu ˗bha gwëëˈˈ ˗nu ˗wo ˗wo ˈö bhë ˗a man, ˈyö ˈˈsuʋ̈ ˗yö ˗an ˗kë ꞊dedewo ˈö ˈwo yö wo kpɔn ˈgü ˈwo ˈˈgblëënnu ˈˈshia˗.
7 ˈDhɛ ˈö ˗kë ˈˈdhʋ̈, ˈyö Yesu ˗yö ꞊ɲɔɔn ˗an ˗bha ˈyö ö ˗kɔ pa ˗an ˈka ˈö˗ pö: «˗Ka luuˈˈ ˈˈshia˗, ˈˈsuʋ̈ ˈya ˗dho ka kë.»
8 ˈDhɛ ˈwo wo ˗gɔ ꞊luu ˈwo ˗dhɛ ˗ga, wo ˈti ˗kpan mɛn ˈˈwɛɛ ˈbhaa ˗bha kö yö ˈti kë Yesu dosɛnŋ ˈka.
9 ˈDhɛ ˈwo kun yɔɔˈˈ ˗ni ˈgü ˗tɔn ˗bha, ˈyö Yesu ˗ya pö ˗an ˗dhɛ: «Pë ˈö ˈka˗ yö bhë, ˈka ˗dho ka ˈˈdhi bho ˗a ˗ta mɛn ˈbhaa ˗dhɛ toŋtoŋdhö, ˗yö ˈto ˗a ˈka ˈˈdhʋ̈ ˗yö yö ˗a ˈka mɛn Gbö ˗go ga ˈgü ˗yi ˗bha.»
10 ˈˈKɛɛ ˈyö˗ ˗bha gwëëˈˈ ˗nu ˗wo ˗a dhɛɛˈˈ kpɔ ˈwo˗ pö: «ˈMën ˗kë ˈö ˈtɔŋ˗ ˗gɔmɛn ˗nu ˗wa pö ꞊dhɛ Edhi dua ˗mü kö ˗yö nu ꞊köŋ ˗blɛɛsü?»
11 ˈYö Yesu ˗ya ˗yɔ bɔ ˗an ˗gɔ ˈö˗ pö: «˗Yö ˈˈdhʋ̈, Edhi ˗dho nu ˈö pë ꞊gban ˈˈpɛpɛ ˗mɔn ˈˈkwëë.
12 ˈˈKɛɛ a˗ ˗pö ka ˗dhɛ ꞊dhɛ Edhi ˗ya nu ˈsaadhö, ˗a dɔ ˈnën mɛn ˗nu ˈti˗ wo, ˈyö pë ˈö ˗dhi ˗an ˗dhɛ ˈwo˗ ˗kë ˗a ˈka. ˗Kɔ do ˈö bhë ˗a ˈka ˗wo ˗dho saanˈˈ wɔ maan mɛn Gbö ˗mɛn n ˗ta.»
13 ˈDhɛ ˈö˗ pö ˈˈdhʋ̈, ˈyö˗ ˗bha gwëëˈˈ ˗nu ˗wa ˈgüman ꞊dhɛ Zan mɛnbɔyibhaamɛn ˈnën ˈˈwɩ ˗ni ˈgü ˗a ˈka bhë.
14 ˈDhɛ ˈwo ˗lo mɛn ˈwo ˗kë ˈmü bhë ˗an ˈˈsuee, ˈyö gɔndënën do ˗yö ꞊ɲɔɔn Yesu ˗bha ˈö ˗gblü ˗a ˈˈdhiʋ̈ ˈyö˗ pö:
15 «N Dëmɛn, ˗bhö n gbö ˗wëëdhɛ yö. ˗Pupu ˗yua ˗ya ˗bha, ˈö˗ ꞊sëëbho ˗ni ˈgü ꞊dedewo. ˗Ya nu ˗a ˗ta ꞊shiöŋ, ˗yö ˗puö ˈˈshiʋ̈ ˈgü ɛɛnˈˈ ˗yö ˗puö ˈˈyi ꞊bhaa.
16 A ˗nu ˗a ˈka ü ˗bha gwëëˈˈ ˗nu ˈˈpiʋ̈ ˈˈkɛɛ ˗an ˗kɔ yö ˈti ˗mɔn ˗a ˗dhɛ bo ˗sü ˗bha.»
17 ˈYö Yesu ˗ya pö: «ˈˈTʋ̈ŋ ˈö yö ˗a ˈgümɛn ˗nu ˈö ˗zoyödhe ˈyaa ka ˗gɔ, ˈö ka ꞊suu ˈdhö ˈya˗ bhë, ˈˈtʋ̈ŋ ꞊dhɛ ˈö ˗ya ˈto kö ˈa˗ kë ka ˈˈpiʋ̈ ˈzü? A ꞊kun ka ꞊kwɛɛ˗ ˈgbinŋ˗ bun ˈˈtʋ̈ŋ ꞊dhɛ ˈˈpiʋ̈ ˈzü? ˗Ka nu ˈnën ˈö bhë ˗a ˈka n ꞊dhiaa.»
18 ˈYö Yesu ˗yö ˗gbla ˗zuu yaa ˈö ˈˈdhʋ̈ ˗a ˗ta, ˈyö go ˈnën ˈö bhë ˗a ˈgü, ˈyö to ˈˈshia˗ mü ˈö˗ ˗dhɛ ˗yö bo.
19 ˈDhɛ ˈö ˗kë ˈˈdhʋ̈, ˈyö Yesu ˗bha gwëëˈˈ ˗nu ˗wo ꞊ɲɔɔn˗ ˗a ˈˈsuee ꞊plɛdhe ˈgü, ˈyö ˈwo˗ dhɛɛˈˈ kpɔ ˈwo˗ pö: «ˈMën ˗kë ˈö yi ˗kɔ yö ˈti ˗mɔn ˗zuu yaa ˈö bhë ˗a ˗bho ˗a ˈgü ˗sü ˗bha?»
20 ˈYö Yesu ˗ya ˗yɔ bɔ ˗an ˗gɔ ˈö˗ pö: «Ka ˗bha ˗zoyödhe ˈö ˗kë ˈˈtɩtɩ yö ˗mü. A˗ ˗pö ka ˗dhɛ gagade ˈka ꞊dhɛ ˗zoyödhe ˈö ˗kë ˗ʒiaanwo ꞊dhɛ mutaadö ga ˈdhö ˗ya kë ka ˗gɔ, ka ˗dho ˗a pö ˗tɔn ˈö yö ˗a ˗dhɛ: ‹˗Bhö ˈgo ü pinŋ˗ ˈgü ˈü ˈdho ü dɔ ˗de,› ˈö˗ ˗kë ˈˈdhʋ̈ ka ˗wo ˈˈdhiʋ̈ ˗bha. Ka ˗kɔ yö ˈti ˗dho ˈkun pë gbɛ˗ kë ˗sü ˈka.»
21 ——
22 ˈDhɛ ˈö Yesu waa ö ˗bha gwëëˈˈ ˗nu ˈwo kun wo ˈkwëëdhö Galile, ˈyö˗ pö ˗an ˗dhɛ: «˗Wo ˗dho mɛn Gbö ˈˈdhoodɔ mɛnbhɩɩdhe ˗nu ˗gɔ,
23 ˈö ˈwo˗ zë. ˈˈKɛɛ ˗a ˗dhɛkpaɔyi ˗yaaga ˗naan ˈka, ˗yö ˗dho ˈgo ga ˈgü.» ˈDhɛ ˈö˗ ˗bha gwëëˈˈ ˗nu ˗wa man ˈˈdhʋ̈, ˈyö ˗wëë ˗yö kpɔ ˗an ˗ta ꞊dedewo.
24 ˈDhɛ ˈö Yesu waa ö ˗bha gwëëˈˈ ˗nu ˈwo ˗lo Kapɛɛnaɔmö, ˈyö ˗Zlan ˗dhɔkë ˗a ˈgü ˗kɔ ˈniinsɔnŋkunmɛn ˗nu ˗wo ꞊ɲɔɔn Piɛɛ ˈˈsuee ˈö ˈwo˗ dhɛɛˈˈ kpɔ ˈwo˗ pö: «Ka ˗gɔmɛn ˗yö ˗Zlan ˗dhɔkë ˗a ˈgü ˗kɔ ˈniin˗ ꞊sɔnŋ* ˗bho ˗ee?»
25 ˈYö˗ pö: «꞊Ii.» ˈˈKɛɛ ˈdhɛ ˈö Piɛɛ ˗yö ˗da ˈkɔɔ, ˈyö Yesu ˗yö ˈwɔn ꞊blɛɛ ˗a ˗dhɛ ˗blɛɛsü ˈö˗ pö: «Simɔn, ü ˗bha ˈgü de ˗nu ˈö ˗gblüdë ˗nu ˈwo ˈˈkpɔnŋ ꞊taa yö ˈwo gba kun ˗an ˗gɔ ɛɛnˈˈ ˈö ˈwo ˈniin˗ ꞊sɔnŋ kun ˗an ˗gɔ? ˗An gbö ˗nu ˗mü ˗ee ɛɛnˈˈ mɛn ˈˈwɛɛ ˗nu ˗mü?»
26 ˈYö Piɛɛ ˗ya ˗yɔ bɔ ˈö˗ pö: «Mɛn ˈˈwɛɛ ˗nu ˗mü.» ˈDhɛ ˈö ˗kë ˈˈdhʋ̈, ˈyö Yesu ˗ya pö ˗a ˗dhɛ: «˗Yö ˈˈdhʋ̈, ˗an gbö ˗nu ˈwaa ˈniin˗ ꞊sɔnŋ bho.
27 ˈˈKɛɛ ˗bhö ˈdho ꞊weeyi ꞊bhaa ˈü piʋ̈ˈˈ ˗da. ˈYuö˗ ˗blɛɛsü ˈü ˗dho ˗a ˈsü bhë ˈbha˗ ˈˈdhi ˈˈpʋ, ü ˗dho ˗kpan ˈwëë˗ ˈˈtamanga* do ˗bha. ˗A ˈsü ˈü nu ˗a ˈka ˗an ꞊dhiaa kö ˈü ko ˗bha ˈniin˗ ꞊sɔnŋ bho, kë ˈˈdhʋ̈ kö ˈwɔn ˈya ˗dho ˗shiö ˗an ˗dhɛ.»
-Zoto -a ˈˈpiʋ̈ -wɔn -nu
^ Ɛɛnˈˈ «˗flʋ̈.»
^ Glɛkö ˗wo ˈgü ˈyö ˗tɔ «drakümö ˈˈtamanga ꞊plɛ.» Yö ˈö mɛn ˗ya ˗kë ˗dhɛkpaɔyi ꞊plɛ ˈka ˗a ꞊saa ˗mü.
^ Glɛkö ˗wo ˈgü ˈyö ˗tɔ «sütatɛɛ.» ˗A do ˈnën ˈö ˗tɔ drakümö ˗yiishiö.
