ˈö Matiö ˗ya ˗bɛnzë 22:1-46
22 Yesu ˗yö ˈwɔn ˗blɛɛ ˗an ˗dhɛ ˈwɔnzuan ˗nu ˈka ˈzü ˈö˗ pö:
2 «˗Gblüdëdhɛ ˈö dhaŋ˗ ˈgü ˗yö ꞊dhɛ ˗gblüdë do ˈö ö gbö ˗bha dhe ˈsü ˈwlaan˗ ˗ya ˗a ˈdhö.
3 ˗Yö ö ˗bha yökëmɛn ˗nu ˗bɔ mɛn ˗nu ˈö ˗an ˗dhɛ ˈwlaan˗ bhë ˗a ˗ta ˗an ˈˈpiʋ̈ kö ˗wo nu, ˈˈkɛɛ ˈyö wo ˈti ˈˈwɩ ˗a ˗bha kö ˈwo nu.
4 ˈYö ö ˗bha yökëmɛn ˈˈwɛɛ ˈbhaa ˗nu bɔ ˈzü ˈö˗ pö: ‹˗Ka ˈdho ˈka˗ pö mɛn ˗nu ˈa ˗an ˗dhɛ ˈwlaan˗ ˗ta bhë ˗an ˗dhɛ: «ˈMan ˗bhöpë ˗kpa, ˈman n ˗man ˗du gɔn ˗nu waa wü ˈˈɲɔnsü ˗nu zë, pë ꞊gban ˈˈdhiʋ̈ ˗ya ˗mɔn ˈˈkwëë. ˗Ka nu ˈkwa ˈwlaan˗ kë.»›
5 ˈˈKɛɛ ˈyö mɛn ˗nu ˈwo ˗an ˗dhɛ bhë, wo ˈti wo ˈˈtʋ kë ˗a ˗wo ˗bha, ˈyö˗ mɛn ˈbhaa ˗nu ˗wo dho ˈbhlaa˗, ˈyö˗ mɛn ˈbhaa ˗nu ˗wo dho wo ˗bha ˈˈdhoodɔ.
6 ˈYö˗ mɛn ˈˈwɛɛ ˈbhaa ˗nu ˈwo to ˈwo˗ ˗bha yökëmɛn ˗nu kun, ˈö ˈwo ˗an ˗man, ˈwo ˗an zë.
7 «ˈWɔn ˗yö ˗shiö ˗gblüdë ˈö bhë ˗a ˗dhɛ ˈyö ö ˗bha ˈˈsɔdha ˗nu bɔ, ˈyö mɛn ˗nu ˈö ˈwo˗ ˗bha yökëmɛn ˗nu zë bhë ˈwo ˗an zë ˈpö, ˈö ˈwo ˗an ˗bha ˈpödhɛ ˗gʋ̈.
8 ˈDhɛ ˈö ˗kë ˈˈdhʋ̈, ˈyö˗ pö ö ˗bha yökëmɛn ˗nu ˗dhɛ: ‹ˈWlaan˗ ˗bhöpë ˗ya man, ˈkɛɛ mɛn ˗nu ˈö ˈa ˗an ˗dhɛ bhë, ˗nu ˈwlaan˗ ˈö yö ˗a ˗ta ˗mɛn ˗nu ˈwaa kë ˈˈdhʋ̈.
9 ˈDhɛ ˈö ˈˈdhʋ̈ ˗ka ˈdho ˗kpinŋga ˗nu ˈwo ˗da ˈplöö bhë ˗an ˗ta, kö mɛn ˈˈpɛpɛ ˈö ˈka ˗dho ˗kpan ˗an ˗bha, ˈka˗ pö ˗an ˗dhɛ ˗wo nu ˈkwa ˈwlaan˗ kë.›
10 ˈDhɛ ˈö ˗kë ˈˈdhʋ̈, ˈyö˗ ˗bha yökëmɛn ˗nu ˗wo dho ˗kpinŋ ˈˈpiʋ̈, ˈyö mɛn ˈˈpɛpɛ ˈö ˈwo ˗kpan ˗an ˗bha, ˗wo ˗kë ˈwɔnyaakëmɛn ˈka oo, ɛɛnˈˈ ˈwɔnsëkëmɛn ˈka oo, ˈwo ˗an ˗dhɛ. ˈYö ˈkɔ ˈö ˈwo ˈwlaan˗ ˗kë ˗a ˈgü bhë ˈö pa mɛn ˗nu ˈwo ˗an ˗dhɛ* ˗an ˈka.
11 «ˈDhɛ ˈö ˗gblüdë ˗yö ˗da ˈkɔɔ kö ˈö ˗kpan mɛn ˗nu ˈö ˈwo nu ˈwlaan˗ ˗ta bhë ˗an ˗bha, ˈyö gɔndënën do yö kö dhe ˈsü ˈwlaan˗ ˈö bhë ˗a sɔ ˈyaa˗ ˗bha.
12 ˈYö˗ dhɛɛˈˈ kpɔ ˈö˗ pö: ‹ˈYö n ˈˈtɔŋdë, ü ˗da ˈkɔ ˈö yö ˗a ˈgü ˗kɔ ˗kë ꞊dhɛ kö dhe ˈsü ˈwlaan˗ ˈö yö ˗a sɔ ˈyaa ü ˗bha?› ˈˈKɛɛ ˗a ˗yɔ yö ˈti ꞊slɔɔ gɔndënën ˈö bhë ˗a ˗gɔ kö ˗ya bɔ.
13 ˈDhɛ ˈö ˗kë ˈˈdhʋ̈, ˈyö ˗gblüdë ˗ya pö ö ˗bha yökëmɛn ˗nu ˗dhɛ: ‹˗Kaa ˗kɔ ˗nu waa˗ ˗gɛn ˗nu ˗lö ˈka˗ ˗zuö ˈˈkpɛnŋ ˗dhɛtiidhɛ ˈgü. ˗Dhɛ ˈö bhë ˈyö ˗dho ˈˈgbʋ bɔ ˗a ˗bha ˈö ö ˈˈsɔn ˗bhö mü.›*
14 «˗A ˗gɛn ˗mü ꞊dhɛ ˗Zlan ˗yö mɛn ꞊va ˗dhɛ, ˈˈkɛɛ mɛn ˗nu ˈö ö ˗kɔ ˗yɛ ˗an ˗bha ˈwaa ꞊va.»
15 ˈDhɛ ˈö ˗kë ˈˈdhʋ̈ ˈyö Fadhiziɛn ˗nu ˗wo dho ˈö ˈwo ˗yakwëë ˗kë, ˗yö kë ˈˈdhʋ̈ kö ˈwo dɔ ˗a ˗wo ˗nu ˗ta kö ˈwo˗ ˈkun ˗dhɛ yö.
16 ˈYö ˈwo wo ˗bha gwëëˈˈ ˗nu waa Edhɔdö ˗bha mɛn ˈbhaa ˗nu bɔ, ˈyö ˈwo˗ pö Yesu ˗dhɛ: «˗Gɔmɛn, yi˗ ˈwɔn ˗dɔ ꞊dhɛ ü gagade ˗pö. ˈWɔn ˗nu ˈü ˗an blɛɛˈˈ ˗ni ˈgü ˈö ˈwo ˗gban ˗Zlan ˗bha bhë, gagade ˗mü. ˗Ya ˈgo mü ˈzü, ˈbhaa ˗kpla mɛn ˈˈoo ˗mɛn ˗gɔ kö ˈü˗ ˈˈɲan ˗ta ˗pë kë, ˈyö sü ꞊dhɛ ˗duɛɛ ˈö mɛn ˗gɔ ˈyaa ˈnën ˈü˗ ˗ga ˈü ü ˗bha ˈwɔn ˗nu ˗kë ˗a ˗bha.
17 ˈDhɛ ˈö ˈˈdhʋ̈, ü ˗bha ˈgü, ˗a ˗dhɛ ˗a ˗bha kö ˈkwa ˈniin˗ ꞊sɔnŋ bho Sezaa ˗dhɛ ˗ee? Ɛɛnˈˈ kwa dua ˈyaa ˗mü kö ˈkwa˗ bho ˗ee?»
18 ˈˈKɛɛ ˈdhɛ ˈö ˗kë ꞊dhɛ Yesu ˗yö ˗zotadhe yaa ˈö ˗an ˈgü ˗a ˗dɔ bhë, ˈyö˗ pö ˗an ˗dhɛ: «ˈˈKpënŋ˗ ˗kë mɛn ˗gɔ ˗mɛn ˗nu, ˈmën ˗kë ˈö ˈka n ˈgüdan?
19 ˈWëë˗ ˈˈtamanga ˈö ˈwo ˈniin˗ ꞊sɔnŋ ˗nu bho ˗a ˈka bhë, ˗kaa do ˗zɔn.» ˈYö ˈwo nu denie ˈˈtamanga do ˈka ˗a ꞊dhiaa.
20 ˈYö˗ pö ˗an ˗dhɛ: «ˈDe ˈö˗ ˗gɔ ˈˈbin waa˗ ˈtɔ ˈdhö ˗a ˗ta yö?»
21 ˈYö ˈwo˗ pö ˗a ˗dhɛ: «Sezaa ˗mü.» ˈDhɛ ˈö ˈwo˗ pö ˈˈdhʋ̈, ˈyö˗ pö ˗an ˗dhɛ: «ˈDhɛ ˈö ˈˈdhʋ̈, pë ˗nu ˈwo Sezaa ˗bha ˈka ˗ka ˗an nu Sezaa ˗dhɛ, kö pë ˗nu ˈwo ˗Zlan ˗bha ˈka ˈka ˗an nu ˗Zlan ˗dhɛ.»
22 ˈDhɛ ˈö˗ pö ˈˈdhʋ̈ ˈö ˈwo˗ man, ˗a ˈwɔn ˗yö ˗an ˗kun ꞊dedewo, ˈyö˗ ˈwo˗ to mü ˈwo ˗ʒiö.
23 Yi ꞊dede ˈö bhë ˗a ˈka, ˈyö Sadusiɛn ˗nu ˈö ˈwo˗ pö ꞊dhɛ ˗go ga ˈgü ˗sü ˈyaa ˈdhö bhë, ˈwo nu ˈwo˗ dhɛɛˈˈ kpɔ ˈö ˈwo˗ pö:
24 «˗Gɔmɛn, Moizö ˗ya ˗pö ˈkpa ꞊dhɛ: ‹Gɔɔn˗ ˈö waa ö ˗bha dhebɔ wo ˈti ˈnën ˈkpɔ ˗ya ga, ˗a ꞊dhegblü gɔɔn˗ dua ˗mü kö ˗a ˗bha ꞊gɛandhe ˈö to bhë ˗ya ˈsü dhe ˈka kö ˗wo ˈnën ˈkpɔ, kö ˗yö kë mɛn ˈö ga bhë ˗a ꞊suugünën ˈka.›
25 ˈˈKɛɛ ˈnën gɔɔn˗ ˗nu ˈˈsɔɔplɛ ˈwo kun ꞊dhegblüzë ˗nu ˈka, ˗wo ˗kë yi ˈˈpiʋ̈. ˈDhɛ ˈö˗ mɛn ˗blɛɛsü ˗yö dhe sü, waa ö ˗bha dhebɔ wo ˈti ˈnën ˈkpɔ ˈyö ga, ˈyö ˗a ˗bha dhebɔ ˗yö to ˗a ꞊dhegblü ˗gɔ.
26 ˈYö ˈwɔn do ˈö bhë ˈö ˗kë ˗a mɛn ꞊plɛ ˗naan ˈka, ˈö ˗kë ˈzü ˗a mɛn ˗yaaga ˗naan ˈka, ˈyö ˗kë ˈˈdhʋ̈ ˗kɔ ˈwo˗ ˗bha ˈˈsɔɔplɛ ˗an ꞊gban ˈka.
27 ˈYö˗ dhebɔ ˗de ˈpö ˈö ga ꞊taabha.
28 Kë ˈö˗ wo ꞊dhɛ ˗yö ˗kë ˗an ꞊gban ˈˈpɛpɛ ˗bha dhebɔ ˈka bhë, ˗go ga ˈgü ˗yi ˈka, mɛn ˈˈsɔɔplɛ ˈwo bhë ˗a de ˈö dhebɔ ˈö bhë ˈö ˗dho ˈto ˗a ˗gɔ?»
29 ˈYö Yesu ˗ya ˗yɔ bɔ ˗an ˗gɔ ˈö˗ pö: «ˈKa ʒiaan ˈto. ˈYö ˗tɔ ꞊dhɛ pë ˈö ˗Zlan ˗Wo ˗ya pö ˈkaa˗ dɔ ɛɛnˈˈ ˈkaa ˗Zlan ˗bha ˈˈpiigbɩɩdhɛ dɔ.
30 ˈPë ˗kë ˈa˗ pö ˈˈdhʋ̈ ˈyö ˗tɔ ˗go ga ˈgü ˗yi ˈka, gɔɔn˗ ˗nu ˈti ˗dho dhe ˈsü ɛɛnˈˈ wo ˈti ˗dho dhebɔ ˗nu dɔ gwan˗ ˗bha. ˗An ꞊gban ˗dho kë ꞊dhɛ ˗Zlan ˗bha ˈˈkiö ˗nu ˈdhö dhaŋ˗ ˈgü.
31 Pë ˈö ˗Zlan ˗ya pö ka ˗dhɛ ˈö ˗gban ˗go ga ˈgü ˗sü ˗bha, ka ˈti˗ ˗wo pö do ˗ee? ˗Ya ˗pö:
32 ‹Man ˈnën ˈa ˗tɔ Ablaamö ˗bha ˗Zlan, Izaakö ˗bha ˗Zlan waa Zakɔbö ˗bha ˗Zlan.› ˗Yö mɛn ˗nu ˈö ˈwo ˈˈbhɩɩ˗ ˗an ˗bha ˗Zlan ˈka, ˈyaa mɛn ˗nu ˈö ˗wa ga ˗an ˗bha ˗Zlan ˈka.»
33 ˈDhɛ ˈö mɛn ˗nu ˈwo kun mü ˈwo˗ man ˈˈdhʋ̈, ˗a ˗bha mɛn ꞊klaŋ kë ˗kɔ ˈwɔn ˗yö ˗an ˗kun ꞊dedewo.
34 ˈDhɛ ˈö Fadhiziɛn ˗nu ˗wa man ꞊dhɛ Yesu ˗ya yö Sadusiɛn ˗nu ˈˈdhi ˗ta, ˈyö ˗an ꞊gban ˈˈpɛpɛ ˗wo dho wo ˈkwëë˗ ˈwo nu ˗a ˈˈpiʋ̈.
35 ˈYö ˗an ˗bha mɛn do ˈö ˈTɔŋ˗ ˗nu dɔ ˗së ˈka, ˗yö Yesu ˈgüdan ˈö˗ pö:
36 «˗Gɔmɛn, ˗Zlan ˗bha ˈtɔŋ˗ ˗nu bhë ˗a ˗mɛɛn ˈö ˗tɔ ˗a ˈkpiisü?»
37 ˈYö Yesu ˗ya pö ˗a ˗dhɛ: «‹Ü dua ˗mü kö Zoova ü ˗bha ˗Zlan ˗dhɔ ˗yö ü kë ü zuʋ̈ˈˈ ꞊gban ˈka, ü ˈnii˗ ꞊gban waa ü ˗zota ˗kɔ ꞊gban ˈka.›
38 ˗Zlan ˗bha ˈtɔŋ˗ ˗nu ˈˈpɛpɛ ˈwo ˈdhö, ˗a ˈkpiisü ˈö˗ ˗blɛɛsü ˈka ˈyö bhë.
39 ˗A ꞊plɛ ˗naan ˈö dɔ ˗a ˈˈpiʋ̈, ˈö bhɔ ˗a ˗blɛɛsü ˈö bhë ˗a ˗bha ˈpö ˗ya ˗pö: ‹Ü dua ˗mü kö ü ˗yayoo ˗dhɔ ˗yö ü kë ꞊dhɛ ü ˗de ˈdhö.›
40 ˈTɔŋ˗ ꞊plɛ ˈwo bhë wo ˈnën ˈö ˈtɔŋ˗ ˈˈpɛpɛ ˈwo to waa pë ˈö ˗Zlan ˗wodhiʋ̈lomɛn ˗nu ˗wa pö, ˈwo ˗gban ˗an ˗ta.»
41 ˈDhɛ ˈö ˗kë ꞊dhɛ Fadhiziɛn ˗nu ˗kun wo ˈkwëëdhö ˗dhɛ ˈö bhë ˗a ˈgü, ˈyö Yesu ˗yö dhɛɛˈˈ kpɔ ˗an ˗gɔ ˈö˗ pö:
42 «Ka ˗zota ˗a ˈgü ˗wɔn ˈö ˗gban Klito ˗bha ˈyö ˗tɔ ˗mën? Ka ˗bha ˈgü ˈde ˈö˗ gbö ˈdhö ˗mü?» ˈYö ˈwo˗ ˗yɔ ˗bɔ ˗a ˗gɔ ˈwo˗ pö: «Davi gbö ˗mü.»
43 ˈDhɛ ˈwo˗ pö ˈˈdhʋ̈, ˈyö Yesu ˗ya pö ˗an ˗dhɛ: «ˈMën ˗kë ˈsa ˈö ˈdhɛ ˈö ˗zuu ˈˈslʋ̈ʋ̈slʋ̈ ˗yö nu Davi ˗ta, ˈö Davi ˗ya ˗dhɛ ö Dëmɛn, ˈö˗ pö:
44 ‹Zoova ˗ya ˗pö n Dëmɛn ˗dhɛ: «˗Bhö ˗ya n ˗kɔ ˗së ˈgü, kö ˗yö ˈto ˗a ˈka ˈˈdhʋ̈ ˗yö yö ˗a ˈka ˈˈtʋ̈ŋ ˈa ˗dho ü ˈyɔɔ˗ ˗nu ˗da ˗a ˈka ü ˗gɛn ꞊löö bhë ˗a ˗bha»›?
45 ˗Ya kë ꞊dhɛ Davi ꞊yaa˗ ˗dhɛ ö Dëmɛn, kö ˗ya gbö ˈka ˗kɔ ˗kë ꞊dhɛ ˈsa?»
46 Dhɛɛˈˈ ˈö bhë ˗a ˗yɔ yö ˈti ꞊slɔɔ mɛn ˈbhaa ˗gɔ. ˈÖ sü yi ˈö bhë ˗a ˗bha, mɛn ˈbhaa yö ˈti ꞊mɔɔn˗ ˗bha ˈzü toŋtoŋdhö kö ˗ya dhɛɛˈˈ ˈkpɔ.
-Zoto -a ˈˈpiʋ̈ -wɔn -nu
^ Ɛɛnˈˈ «mɛn ˗nu ˈwo kun pë ˗bhö ˗ni ˈgü ˈtaablö ˈˈdhiʋ̈.»
^ ˗Wo ˗we «mɛn ˈö˗ ˈgü ˗ya ga, ˈö ˗naanzuëdhe ꞊yaa˗ pa ˗a ˗bha ö ˈˈsɔn ˗bhö ˗sü ˈka.»
