ˈö Matiö ˗ya ˗bɛnzë 9:1-38
-
Yesu ˗yö mɛn do ˈö˗ ˗dhɛ ꞊gban ˗yö ga ˗a ˗bha ˗a ˗dhɛ ˗bo (1-8)
-
Yesu ˗yö Matiö ˗dhɛ (9-13)
-
ˈWɔn ˈö ˗gban ˈsunŋ˗ ˈmën ˗sü ˗bha (14-17)
-
Zailusö ˈdhu waa dhebɔnën ˈö pa Yesu ˗bha sɔ ˈˈtʋ ˈka (18-26)
-
Yesu ˗yö ˈˈɲɛɛntiimɛn ˗nu waa ˈˈbhʋbhʋ do ˗dhɛ ˗bo (27-34)
-
«Pë ꞊va ˈˈkan ˗wɔn ˗yö ˗dhö ˈbhlaa, ˈˈkɛɛ yökëmɛn ˗nu ˈwaa ꞊va» (35-38)
9 ˈDhɛ ˈö ˗kë ˈˈdhʋ̈, ˈyö Yesu ˗yö ˗da ˈˈyitagɔ ˈgü ˈyö ˈˈyi ˗kan ˈzü ˈö dho ö ˗gɔ ˈplöö.
2 ˈYö mɛn ˗nu ˗wo gɔndënën do ˈö˗ ˗dhɛ ꞊gban ˗ya ga ˗a ˗bha, ˈö wɔ ˗sü ˈka ö ˗wɔ ˗a ˗ta ˗pë ˗ta, ˗a sü ˈwo nu ˗a ˈka Yesu ꞊dhiaa. ˈDhɛ Yesu ˗ya yö ꞊dhɛ ˗zoyödhe ˗yö mɛn ˗nu ˈwo bhë ˗an ˗gɔ, ˈyö˗ pö gɔndënën ˈö bhë ˗a ˗dhɛ: «N ˗man ˈnën, ˗bhö ü ˗zo ˗gban. ˈMan ü ˗bha ˈwɔn yaa ˗nu ˗bhawɔn ˈto.»
3 ˈDhɛ ˈö ˗kë ˈˈdhʋ̈, ˈyö ˈtɔŋ˗ ˗gɔmɛn ˈbhaa ˗nu ˗wo ˗ya ˗a pö ˗sü ˗bha wo zuʋ̈ˈˈ ˈˈpiʋ̈: «ˈMɛn ˈö dɔ bhë ˗yö ˗Zlan ꞊bhlëë ˗shiö ˗ni ˈgü ˗kɛɛ!»
4 ˈˈKɛɛ ˗dhɛ ˈö ˗kë ꞊dhɛ Yesu ˗yö ˗an ˗zota ˗a ˈgüwɔn ˗nu ˗dɔ, ˗ya ˗pö ˗an ˗dhɛ: «ˈMën ˗kë ˈö ˗zotadhe yaa ꞊suu ˗nu ˈwo ˈdhʋ̈ ˗wo ˗kë ka ˗gɔ.
5 ˗A ˗ga ˈö ˈka˗ wo bhë, ˗a pö ˗sü ˈö mɛn ˗dhɛ ꞊dhɛ ‹ˈMan ü ˗bha ˈwɔn yaa ˗nu ˗bhawɔn ˈto,› waa˗ pö ˗sü ˈö ꞊dhɛ ‹˗bhö luuˈˈ ˈü ˈˈta ˈsü bhë,› ˗a ˗mɛɛn ˈö ˈˈgbɩɩ˗?
6 ˗Ka dɔ kö ˈa˗ ˗zɔn ka ˗dhɛ ꞊dhɛ maan mɛn Gbö ˗mɛn ˗a ˈˈse ˗yö n ˗dhɛ kö ˈa mɛn ˗nu ˗bha ˈwɔn yaa ˗nu ˗bhawɔn ˈto ˈˈkpɔnŋ ꞊taa yö.» ˈDhɛ ˈö ˗kë ˈˈdhʋ̈, ˈyö˗ pö mɛn ˈö˗ ˗dhɛ ꞊gban ˗ya ga ˗a ˗bha bhë ˗a ˗dhɛ: «˗Bhö luuˈˈ ˈü ü ˗wɔ ˗a ˗ta ˗pë ˈsü kö ˈü ˈdho ü ˗gɔ ˈˈkwɛnŋdhö.»
7 ˈYö gɔndënën ˗yö ꞊luu ˈö dho ö ˗gɔ ˈˈkwɛnŋdhö.
8 ˈDhɛ ˈö mɛn ꞊va ˈwo kun mü ˗an ˈˈɲan ˗yö ˗da ˈwɔn ˈö bhë ˗a ˈgü, ˈyö˗ ˈwɔn ˗yö ˗an kun ꞊dedewo. ˈYö ˈwo ˗ya ˗Zlan ˈö ˈwɔn ꞊suu ˈö ˈˈdhʋ̈ ˗a kë ˗sü ꞊faan nu mɛnbhɩɩdhe ˗dhɛ bhë ˗a ˈtɔ bhɔ ˗sü ˗bha.
9 ˈDhɛ Yesu ˗yö go ˗dhɛ ˈö bhë ˗a ˈgü, ˈyö ˗kpan gɔndënën do ˈwo˗ ˗dhɛ Matiö ˗a ˗bha kö ˗yö ˗ya ˗sü ˈka ˈniin˗ ꞊sɔnŋ ˗bho ˗a ˈgü ˗kɔ ˈgü. ˈYö˗ pö ˗a ˗dhɛ: «˗Bhö ʒiö n ꞊kee˗.» ˈYö Matiö ˗yö ꞊luu ˈö ˗ʒiö ˗a ꞊kee˗.
10 ꞊Taabha, ˈdhɛ ˈö Yesu waa ˈö ˗bha gwëëˈˈ ˗nu ˈwo kun pë ˗bhö ˗ni ˈgü* Matiö ˗gɔ ˈkɔɔ, ˈniinsɔnŋkunmɛn ˗nu ꞊va waa mɛn ˗nu ˈö ˗an ˈtɔ ˗yö bhɔ ˈwɔn yaa kë ˗sü ˗bha, ˗wo ˗nu ˗an ꞊kee˗, ˈyö waa˗ ˗nu ˈwo pë ˗bhö wo ˈkwëë˗.
11 ˈDhɛ Fadhiziɛn ˗nu ˗wa yö ˈˈdhʋ̈, ˈyö ˈwo˗ pö Yesu ˗bha gwëëˈˈ ˗nu ˗dhɛ: «ˈMën ˗kë ˈö ka ˗gɔmɛn ˗yö pë ˗bhö ˈniinsɔnŋkunmɛn ˗nu waa ˈwɔnyaakëmɛn ˗nu ˈˈpiʋ̈?»
12 ˈDhɛ ˈö Yesu ˗ya man, ˈyö˗ pö ˗an ˗dhɛ: «Mɛn ˗nu ˈö ˈwaa wo ˈflëëgü wo ˈnën ˗an ˗bhawɔn ˈdhö ꞊dhɔtrɔɔ˗ ˗bha, ˈmɛn ˈwo wo ˈflëëgü ˈwaa ˗mü.
13 ˈDhɛ ˈö ˈˈdhʋ̈, ˗a pö ˈö ˗Zlan ˗Wo ˗ya wo ꞊dhɛ: ‹Mɛn ˗wëë zë ˗sü ˈnën ˈa˗ ˈˈpiʋ̈, ˈˈsaa˗ ˗nu ˈwaa ˗mü› bhë, ˗ka ˈdho ˈka ka ˗zota ˗a ˈklɔɔ˗ ˈgü. ˗A ˗gɛn ˗mü ꞊dhɛ a ˗nu kö ˈa ˈwɔnyaakëmɛn ˗nu ˗dhɛ, ˈmii nu kö ˈa ˈwɔnsëkëmɛn ˗nu ˗dhɛ.»
14 ˈYö Zan ˗bha gwëëˈˈ ˗nu ˗wo nu Yesu ˈˈpiʋ̈ ˈö ˈwo˗ dhɛɛˈˈ kpɔ ˈwo˗ pö: «ˈMën ˗kë ˈö yaa Fadhiziɛn ˗nu ˈyi ˈsunŋ˗ mën, ˈˈkɛɛ ˈö ü ˗bha gwëëˈˈ ˗nu ˗zë ˈwaa ˈsunŋ˗ ˈmën?»
15 ˈYö Yesu ˗ya pö ˗an ˗dhɛ: «Dhe ˈsü ˈwlaan˗ ˗ta, ˈˈtʋ̈ŋ ˈö dhesügɔn ˈdhö ꞊kun ˗a ˈka ˈö ˈˈtɔŋdë ˗nu ˈˈpiʋ̈ bhë, ˗a ˗dhɛ ˈyaa˗ ˗bha kö ˗a ˈˈtɔŋdë ˗nu ˗wo kë ˗wëë ˈgü, ˈyaa ˈˈdhʋ̈ ˗ee? ˈˈKɛɛ ˗a yi ˗dho ˗wo ˈö ˈwo dhegɔndë sü ˗an ˈˈpiʋ̈. ˈˈTʋ̈ŋ ˈö ˈˈdhʋ̈ bhë ˈyö ˈwo ˗dho ˈsunŋ˗ ˈmën ˗a ˈka.
16 Mɛn ˈbhaa ˈyaa sɔ ˗dɛɛ ˈˈklu ꞊nënŋ sɔ zii ˗bha kö ˗ya ˗wɔ. ˈYaa ˈˈdhʋ̈ ˗a sɔ ˈˈpɛn ˗dɛɛ ˗dhö sɔ zii bhë ˗a ˈˈgan ˈö˗ ˈˈpɛdhɛ ˗yö ˗da ˈˈdhiʋ̈.
17 ˈWaa we ˗dɛɛ ˗da ˈpö puuˈˈ zii ˈgü, ˈyaa˗ ˈka ˗a puuˈˈ ˗dhö pʋ̈ʋ̈ˈˈ ˈö˗ we ˗yö ꞊wɛnŋ, ˈö˗ puuˈˈ ꞊dede ˗yö ꞊shiʋ̈. ˗Wo we ˗dɛɛ ˗da ꞊ʒiaan puuˈˈ ˗dɛɛ ˈgü, ˈyö ˗an ꞊plɛ ꞊gban ˗wo to ˗së ˈka.»
18 ˗Yö ˗to ˈwɔn ˗nu bhë ˗an blɛɛˈˈ ˗sü ˗bha, ˈyö gɔndënën do ˈö kun mɛn ꞊bhlëësü ˈka ˈö ꞊ɲɔɔn ˗a ˈˈsuee ˈö ˈˈgblëënnu ˗a ˈˈdhiʋ̈ ˈö˗ pö ˗a ˗dhɛ: «ˈDhɛ ˈa nu ˗ni ˈgü yö kö n ˈdhunën ˗ya wɔ ˈya˗, ˗a ˈbhaa ˗ya kë kö ˗ya ga ˈsaadhö. ˈˈKɛɛ dɔ ˈˈgbɩɩ˗ ˈü nu kö ˈü ü ˗kɔ ˈpa ˗a ˈka kö ˗yö ˗buö.»
19 ˈYö Yesu ˗yö ꞊luu ˈö waa ö ˗bha gwëëˈˈ ˗nu ˈwo ˗ʒiö gɔndënën ˈö bhë ˗a ꞊kee˗.
20 ˈDhɛ ˈwo kun ˈdho ˗ni ˈgü, ˈyö dhebɔnën do ˈö ꞊ɲɔɔn ˗bhɔ dhebɔ ˗nu ˗bha ˈˈyua ˗ya ˗kwɛ ˗kɔŋ do ö ga ꞊plɛ (12) kë ˗a ˗bha, ˈö bɔ Yesu ꞊taabha ˈö ꞊ɲɔɔn ˗a ˗bha, ˈö pa ˗a ˗bha sɔ ˈˈtʋ ˈka.
21 ˈYö ˗tɔ ꞊dhɛ ˗yö ˗kun ˗a pö ˗ni ˈgü ö ˗de ˗dhɛ: «ˈKö ˗kë ꞊dhɛ ˗a ˗bha sɔ ˈˈtʋ ˈˈkpaan ˈnën ˈa pa ˗a ˈka, a ˗dho dha.»
22 ˈDhɛ Yesu ˗yö ꞊slëë ö ˗zü ˈö ˗kpan ˗a ˗bha, ˈyö˗ pö ˗a ˗dhɛ: «N ˈdhu, suʋ̈ˈˈ ˈya ˗dho ü kë, ü ˗bha ˗zoyödhe ˗ya ü dha.» Dhebɔnën ˈö bhë ˗yö ˗to ˈˈshia˗ mü ˈö˗ ˗bha ˈˈyua ˗yö bo.
23 ˈDhɛ ˈö Yesu dho ˈö ˗lo gɔndënën ꞊bhlëësü ˈö bhë ˗a ˗gɔ ˈˈkwɛnŋdhö ˈö ˗kpan ˈˈtruunën ˗piömɛn ˗nu ˗bha kö ˗wo ˗wëë ˈˈtan ˗nu bho ˗ni ˈgü, kö mɛn ꞊va ˈˈgbʋ bɔ ˗ni ˈgü,
24 ˈyö˗ pö ˗an ˗dhɛ: «˗Ka yö ˈˈkpɛnŋ ˈka ˈgo yö, ˗a ˗gɛn ˗mü ꞊dhɛ ˈnën ˈö bhë yö ˈti ga. Yi ˈnën ˈö˗ zë ˗ni ˈgü.» ˈDhɛ Yesu ˗ya pö ˈˈdhʋ̈ ˈyö mɛn ˗nu wo bhë ˈwo ˗ya ꞊wɛɛ˗ ˗dɔ ˗a ˗bha ˗sü ˗bha.
25 ˈDhɛ ˈö mɛn ˗nu ˗wo yö ˈˈkpɛnŋ, ˈyö Yesu ˗yö ˗da ˈkɔɔ. ˈYö ˈnën ˈö bhë ˗a ˗kɔ kun, ˈyö˗ ˈnën ˗yö ꞊luu.
26 ˈYö ˈwɔn ˈö bhë ˗a ˗tɔɔ ˗yö ˗pɛn ˈˈsɛ ˈö bhë ˗a ˗dhɛ ꞊gban ˈgü.
27 ˈDhɛ ˈö Yesu ˈdhö ˈgo ˗ni ˈgü ˗dhɛ ˈö bhë ˗a ˈgü, ˈyö ˈˈɲɛɛntiimɛn ˗nu ꞊plɛ ˗wo ˗ʒiö ˗a ꞊kee˗ kö ˗wo ˈˈgbla ˗ni ˈgü ˈö ˈwo˗ pö: «Davi gbö, ˗bhö yi ˗wëëdhɛ yö!»
28 ˈDhɛ ˈö Yesu ˗yö dho ˈö ˗da ˈkɔɔ, ˈyö ˈˈɲɛɛntiimɛn ˗nu bhë ˈwo nu ˗a ꞊kee˗. ˈYö Yesu ˗yö ˗an dhɛɛˈˈ kpɔ ˈö˗ pö: «˗Yö ga ˗sü ˈka ka ˈgü ꞊dhɛ a ˗mɔn ˗a ˗bha ˈa ka ˗dhɛ bo ˗ee?» ˈYö ˈwo˗ ˗yɔ bɔ ˗a gɔ ˈö ˈwo˗ pö: «꞊Ii, yi Dëmɛn.»
29 ˈDhɛ ˈö ˗kë ˈˈdhʋ̈, ˈyö Yesu ˗yö pa ˗an ˈˈɲan ˈka ˈö˗ pö: «Kö ˗yö kë ˈsa ka ˗dhɛ ꞊dhɛ ˗kɔ ˈö ˈka ka ˗zo yö ˗a ˈka n ˗dhɛ bhë ˗a ˈdhö.»
30 ˈDhɛ ˈö ˗kë ˈˈdhʋ̈, ˈyö ˗an ˈˈɲan ˗yö ˗dhɛ yö. ˈˈKɛɛ ˈyö Yesu ˗ya pö ˗an ˗dhɛ: «ˈKa ˗dho ˗a pö mɛn ˈbhaa ˗dhɛ toŋtoŋdhö.»
31 ˈˈKɛɛ ˈdhɛ ˈwo yö ˈˈkpɛnŋ, ˈyö ˈwo ˗ya ˗a ˗wɔn blɛɛˈˈ ˗sü ˗bha ˗dhɛ ꞊gban ˈgü.
32 ˈDhɛ ˈwo kun ˈdho ˗ni ˈgü, ˈyö mɛn ˗nu ˗wo nu gɔndënën do ˈö ˈyaa ˈˈwɩ, ˈö ˗zuu yaa ˗yö kun ˗a ˈgü bhë ˗a ˈka ˗a ꞊dhiaa.
33 ˈDhɛ ˈö Yesu ˗yö ˗zuu yaa ˈö bhë ˗a ˗kë, ˈyö˗ gɔndënën ˗yö ˗ya ˈˈwɩ ˗sü ˗bha. ˈYö˗ ˈwɔn ˗yö mɛn ˗nu ˈwo kun mü ˗an kun ꞊dedewo, ˈyö ˈwo˗ pö: «ˈWɔn ꞊suu ˈö yö ˈkwa ˈti ˗kpan ˗a ˗bha Izraɛdhö ˈˈsɛ ˈö yö ˗a ˈgü do toŋtoŋdhö.»
34 ˈˈKɛɛ ˈyö Fadhiziɛn ˗nu ˗wa pö: «˗Zuu yaa ˗nu ˗gɔmɛn ˈnën ꞊faan nu ˗a ˗dhɛ ˈyö ˗mɔn ˗zuu yaa ˗nu ˗bho mɛn ˗nu ˈgü ˗sü ˗bha.»
35 Yesu ˗kun bɔ ˗ni ˈgü ˈˈkwipö waa ˈpödhɛ ˗nu ˈˈpɛpɛ ˈgü, ˈö mɛn ˗nu ꞊klaŋ ˗kë ˗yakwëë ˗kë ˗a ˈgü ˗kɔ ˗nu ˈgü, ˈö nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha ˗a pö ˗an ˗dhɛ. ˗Yö ˈˈyua ꞊suu ˈˈpɛpɛ waa ꞊niɔɔn ˗kɔ ꞊suu ꞊gban ˈˈpɛpɛ bho mɛn ˗nu ˗bha.
36 ˈDhɛ ˈö ˗kpan mɛn ˗gbaa ꞊va ˗nu ˗bha, ˈyö ˗an ˗wëë ˗yö ˗a ˗kë ꞊dedewo, ˈyö ˗tɔ ꞊dhɛ ˗wo ˗kun ꞊dhɛ ˈˈbhlaa ˗nu ˈö ˗an ˗maankëmɛn ˈyaa ˈdhö, ˈö ˗wa ˗gi, ˈö mɛn ˈbhaa ˈˈtʋ ˈyaa ˗an ˗bha ˗an ˈdhö.
37 ˈDhɛ ˈö ˗kë ˈˈdhʋ̈, ˈyö˗ pö ö ˗bha gwëëˈˈ ˗nu ˗dhɛ: «Pë ꞊va ˈˈkan ˗wɔn ˗yö ˗dhö ˈbhlaa, ˈˈkɛɛ yökëmɛn ˗nu ˈwaa ꞊va.
38 ˗Dhɛ ˈö ˈˈdhʋ̈, ˗ka bhɛɛˈˈ ˈbhladhɛ Dëmɛn ˗dhɛ kö ˗yö yökëmɛn ˈbhaa ˗nu bɔ ˈbhlaa.»
-Zoto -a ˈˈpiʋ̈ -wɔn -nu
^ Ɛɛnˈˈ «ˈtaablö ˈˈdhiʋ̈.»
