1, 2. De ˈbhaa ˗nu ˈwo kun Zoova ˈˈtɔŋdë ˈbhaa ˗nu ˈka?

ˈDE ˈÜ˗ ˈˈpiʋ̈ kö ˗yö kë ˈü ˈˈtɔŋdë ˈka? ˈMɛn ˈö˗ ˗dhɔ ˗yö ˈü kë yö ˗mü. ˈMɛn ka˗ ˗nu ˈka ka ˈko ˗wo ˈgü man ˈö˗ zuʋ̈ˈˈ ˈˈpiʋ̈ ˗dhɛ ˈdhö ˗së, ˈö˗ kë ˗kɔ waa˗ ˈˈta ˗kɔ ˗nu ˈdhö ˈü ˗dhɛ ˗së yö ˗mü.

² Zoova ˗Zlan ˗yö ö ˗kɔ ˗yɛ mɛnbhɩɩdhe ˈbhaa ˗nu ˗bha, kö ˗wo kë ˗a ˈˈtɔŋdë ˈka. ˗A ˈwɔnzuan ꞊nɛn ˈtɔ˗ Ablaamö ˗kun Zoova ˈˈtɔŋdë do ˈka. (Isaïe 41:8; Zakö 2:23) Davi ˗dhɔ ˗yö Zoova ˗kë ˈpö. ˗Ya ˗pö Davi ˗bha ꞊dhɛ ‘n dhɔɔbhaamɛ ˗mü.’ (Këwɔn ˗nu 13:22) ˗Zlan ˗wodhiʋ̈lomɛn Daniɛlö ˗wɔn ˗yö ˗kun “ˈˈgbɩɩ˗ ꞊dedewo” Zoova ˗gɔ.​—Daniel 9:23.

3. ˗Mën ˈö ˗kë ˈö Ablaamö, Davi waa Daniɛlö ˗nu ˈwo ˗kë Zoova ˈˈtɔŋdë ˗nu ˈka?

³ ˗Mën ˈö Ablaamö, Davi waa Daniɛlö ˈwo˗ ˗kë ˈyö ˈwo ˗kë Zoova ˈˈtɔŋdë ˗nu ˈka? Zoova ˗ya ˗pö Ablaamö ˗dhɛ ꞊dhɛ ‘ˈü ˈwun ˗ma n ˗ta.’ (ˈWunzüdɔdhɛ 22:18) Mɛn ˗nu ˈwo wo ˗de sü ˈˈtɩtɩ ˈö ˈwo wo ˈˈtʋ to Zoova ˗wo ˗bha, wo ˈnën ˈwo ˗kë ˗a ˈˈtɔŋdë ˗nu ˈka. ˈˈSɛ ˗gɔ do ˗todhʋ̈sü ˈgü ˗mɛn ˗nu ˗mɔɔn ˗a ˗bha ˗ʒianwo ˈwo ˗kë ˗a ˈˈtɔŋdë ˗nu ˈka. Zoova ˗ya ˗pö Izraëdhö ˗sɛ ˈgü ˗mɛn ˗nu ˗dhɛ ꞊dhɛ: “꞊Ya kë ꞊dhɛ ˈka ka ˈˈtʋ ˈto n ˗wo ˗bha, a ˗dho kë ka ˗bha ˗Zlan ˈka ˈö ka ˗de ˈpö, ˈka ˗kë n ˗dhɔkëmɛn ˗nu ˈka.” (Jérémie 7:23) ˈDhɛ ˈö ˈˈdhʋ̈, ꞊ya kë ꞊dhɛ ˈü˗ ˈˈpiʋ̈, bhi ˗dë ˈpö ˈü kë Zoova ˈˈtɔŋdë ˈka, kö ˈü dua ˗mü ˈü ˈwɔn man ˗a ˗ta.

4, 5. Zoova ˗yö ö ˗kɔ ˗kpa ö ˈˈtɔŋ˗ ˗nu ˗ta ˗kɔ ˗kë ꞊dhɛ?

⁴ Biblö ˗ya ˗pö Zoova ˗yö “mɛn ˗nu ˈö ˗an zuʋ̈ˈˈ ˈdhö ˗klu ˗sü ˈka˗ ˗bha, ˗an ˗takun ˈö ꞊faan ˈka” ˈˈslö ˗mɛɛn. (2 Chroniques 16:9) Psaume 32:8 ˈgü, Zoova ˗ya ˗pö ö ˈˈtɔŋdë  ˗nu ˗dhɛ ꞊dhɛ: “A ˗dho ˈwɔndɔdhe nu ü ˗dhɛ, ˈö ʒiaan ˈü ˗dho ˈdho˗ ˗ta, ˈa˗ ˗gleŋ ˗da ü ˗bha. A ˗dho ˗dhioo dɔ ˈü ˗ta kö n ˈˈɲan ˗yö ü ˗bha.”

⁵ Kwa ˈyɔɔ˗ do ˈö˗ ˈˈpii ˈdhö ˈˈgbɩɩ˗, ˗ya ˈˈpiʋ̈ ˈö kwaa ˗Zlan kwa ˗bha ˈˈtɔŋdhɛ shiʋ̈ˈˈ. ˈˈKɛɛ Zoova ˗zë ˗ya ˈˈpiʋ̈ ˈö ö ˗kɔ ˈkpa kwa ˗ta. (Psaume 55:22 ˗wo pö.) ˈDhɛ ˈö ˗kë ꞊dhɛ Zoova ˈˈtɔŋdë ˗nu ˗mü kwa ˈka bhë, kwa˗ ˗dhɔkë kwa zuʋ̈ˈˈ ꞊gban ˈˈpɛpɛ ˈka. ˈKö ˈkwa ˗kë ˗ʒianwo ˈwɔn ˈˈgbɩɩ˗ suu ooˈˈ ˗suu ˈgü, kwa ˗to ˗klu ˗sü ˈka˗ ˗bha. Kwa kwa ˗zo ˗yö ˗a ˗dhɛ ꞊dhɛ ˗kɔ do ˈö ˈˈtanbhomɛn do ˈö˗ ˗wo ˈdhö Biblö ˈgü, ˗yö ö ˗zo yö˗ ˈka ˗a ˗dhɛ, ˗a ˈdhö. ˗Ya ˗pö Zoova ˗bha ꞊dhɛ: “ˈDhɛ ˈö ˗kë ꞊dhɛ ˗yö n ˗kɔ ˗së ˈgü bhë, n ˈti ˗dho ˗pö toŋtoŋdhö.” (Psaumes 16:8; 63:8) Sɔtraan ˗yö kwaa ˗Zlan kwa ˗bha ˈˈtɔŋdhɛ ˈˈkan ˗sü ˈˈslö ˗mɛɛn ˗kɔ ˗kë ꞊dhɛ?

6. ˗Mën ˗wɔn ˈö Sɔtraan ˗ya ꞊blɛɛ mɛnbhɩɩdhe ˗nu ˗bha?

⁶ Kwa˗ ˗yö ˈWɔn ˗gɔ 11 ˈgü ꞊dhɛ Sɔtraan ˗ya ˗pö Zoova ˈyaa mɛnkɔɔnmɛn ˗tiaandhö ˈka. ˗Ya ˗pö ꞊suakëmɛn ˈö ˈyaa ˈwɔn kpɛnŋdhö kë yö ˗mü ˗a ˈka, ˈyö ˈtɔ˗ ꞊dhɛ yö ˈti ö ꞊kwaa Adan waa Ɛvö ˗an ˗zü kö pë ˈö ˗an ˗dhɛ ˗së ɛɛnˈˈ ˈö ˗an ˗dhɛ ˈyaa˗, ˗a ˈdhɛ ˗an ˗zokun ˗wa kë. Biblö ˈgü ˈsëëdhɛ ˗be ˈwo˗ ˗dhɛ Job ˗ya ˗zɔn kwa ˗dhɛ ꞊dhɛ Sɔtraan ˗yö ˈwɔn ˗ya ˈpö mɛn ˗nu ˈwo˗ ˈˈpiʋ̈ ˈwo ˈˈtɔŋdhɛ ˈkun ˗Zlan ˈka ˗an ˗bha. Sɔtraan ˗ya ˗pö ꞊dhɛ ˗wo ˗Zlan ˗dhɔkë ö ꞊trɔɔn ˗bha, ˗wo ˈti˗ kë ˗A ˗dhɔ ꞊dede ˗bha. ˗Ya ˗pö ˗ʒiaanwo ꞊dhɛ ö ꞊mɔɔn˗ ˗bha ˈö mɛn ꞊gban bho ˗Zlan ˗bha. ˈDhɛ ˈö ˗kë ˈˈdhʋ̈ Zoova ˗yö ö ˗kɔ ˗kpa Zɔbö ˗ta ˗kɔ ˗kë ꞊dhɛ? ˗Gleŋ ˗mɛɛn ˈö ˈkwa ꞊mɔɔn˗ ˗bha ˈkwa˗ sü Zɔbö ˗bha? ˈWɔn ˈö ˈkwa ˗dho ˗a ˈgüman , yö ꞊nɛn bhë.

7, 8. (a) Zɔbö ˗kun ˗kɔ ˗kë ꞊dhɛ Zoova ˈˈɲan ˈˈdhiʋ̈? (b) ˗Mën ˈö Sɔtraan ˗ya pö Zɔbö ˗bha?

⁷ ˈDe ˈö ˗tɔ Zɔbö? Këwɔnsëmɛn do ˈö ˗kë ˗dhö ˈö˗ ˗kwɛ ˗ya ˗mɔn ꞊dɛɛ ˗kwɛ 3.600 ˗bha yö ˗mü. Zoova ˗ya ˗pö ˗a ˈtʋ̈ŋ bhë˗ ˈgü, mɛn ˈbha ˈö ˗dho kë ꞊dhɛ ˗a ˈdhö ˈˈsɛ ˗ta yö ˈti kë ˗dhö. Zɔbö ˗yö  ˗kun ˗Zlan ꞊bhlëë ˗ya ˗ni ˈgü ꞊dedewo, ˈö kun ˈwɔn yaa ˗san zë ˗ni. (Job 1:8) Zɔbö ˗kun Zoova ˈˈtɔŋdë ꞊dede ˈka.

⁸ Sɔtraan ˗ya ˗pö Zɔbö ˗bha ꞊dhɛ ˗yö ˗Zlan ˗dhɔkë ö ꞊trɔɔn ˗bha. ˈYö ˗a pö Zoova ˗dhɛ ꞊dhɛ: “Ü ˈti ˗kɔ ˗kpa mɛn ˗ta ˗glɛŋ ꞊klüŋ yö ˈdhö, ˗a ˗bha ˗bha ˈkɔɔmɛn ˗nu waa pë ˈˈpɛpɛ ˈwo˗ ˗gɔ ˗an ˗zü ˗ee? ˈBha ˈdhuëë˗ ˈkpɔ ˗a kë ˗yö ˗nu ˗bha, ˈö ˗bha ˗tuëë ˗nu ˗wa pa ˗dhɛ ꞊gban ˈgü. ˈˈKɛɛ ˈbha˗ pö ˗yö ˈgo ˈˈgblʋʋ, ˗bhö ü ˗kɔ ˈˈyɛ pë ˈˈpɛpɛ ˈwo ˗gɔ ˗an ˗bha, kö ꞊ya kë ꞊dhɛ yö ˈti ˗dho ö ˗wo ˗ya ü ˗bha ü ˈwɔɔdhö, kö ˈü˗ yö.”—Job 1:10, 11.

9. ˗Mën ˈö Zoova ˗yö ö ꞊kwaa Sɔtraan ˗zü kö ˗ya kë?

⁹ Sɔtraan ˗ya ˗pö Zɔbö ˗yö Zoova ˗dhɔkë ˈpë ˈö˗ nu ˗a ˗dhɛ bhë ˗a ˗wɔn ˈgü. ˗Ya ˗pö ˈzü ꞊dhɛ ö ꞊mɔɔn˗ ˗bha ˈö Zɔbö ˗bha Zoova ˗dhɔkë ˗sü ˈduannu. ˈPë ˈö Sɔtraan ˗ya pö Zɔbö ˗bha bhë yö ˈti Zoova ˗zo ˈkun, ˈˈkɛɛ ˗Yö ö ˗kwaa Sɔtraan ˗zü kö ˗yö Zɔbö ˈgüdan. ˗Yö kë ˈˈdhʋ̈ kö Zɔbö ˗bha kë Zoova ˈˈtɔŋdë ˈka ˗sü bhë, ꞊ya kë ꞊dhɛ ˗yö ˗gban ˗dhɔ ꞊dede ˗ta, kö ˗ya ˗bhokoo yö.

10. Sɔtraan ˗yö ˗dho Zɔbö ˗gɔ ˗kɔ ˗kë ꞊dhɛ? ˈDhɛ ˈö ˗kë ˈˈdhʋ̈, Zɔbö ˗ya ˗kë ꞊dhɛ?

¹⁰ ˗A ˈzüdɔ ˗sü ˈgü, Sɔtraan ˗yö Zɔbö ˗bha ˗tuëë ˗nu ˗zë, ˈö˗ ˗kë ˈö ˈwo ˗an ˈbhaa ꞊kwaan. ˈDhɛ go mü, ˈyö˗ ˗bha yökëmɛn ˗nu ˈkpiidhɛ zë. Zɔbö ˗bha pë ˈˈpɛpɛ ˈgü ˗yö ˗shiʋ̈. ˈDho ˗kaanta ˈö Sɔtraan ˗ya wo Zɔbö ˗gɔ ˈyö˗ ˗bha ˈnën ˗nu ˗kɔŋ do ꞊gban zë dhaga ˈka. ˈˈKɛɛ ˈkö ˗kë ˈˈdhʋ̈, Zɔbö ˗yö ˗to ˗klu ˗sü ˈka Zoova ˗bha. “ˈWɔn ˈˈpɛpɛ ˈö ˈˈdhʋ̈ ˗a ˈgü, Zɔbö yö ˈti ˈˈdhaŋ ꞊lö ˗Zlan ˗bha ɛɛnˈˈ yö ˈti ˈwɔn ˗ya ˗Zlan ˗bha ꞊dhɛ ˗ya pë yaa ˈbha kë.”—Job 1:12-19, 22.

11. (a) ˗Mën ˈbha ˈö Sɔtraan ˗ya ˗kë Zɔbö ˈka ˈzü? (b) Zɔbö ˗ya ˗kë ꞊dhɛ?

¹¹ Sɔtraan ˈgü yö ˈti ga. ˗Ya ˗pö ˗Zlan ˗dhɛ ˈzü ꞊dhɛ: “˗Bhö ˈpa ˗a ga waa˗ ꞊nënŋ ˗nu ˈka, ˈbha˗ kë ˈˈdhʋ̈, ˗yö ˗dho ö ˗wo ˗ya ü ˗bha ˈü ˈwɔɔdhö.” ˈDhɛ ˈö ˗kë ˈˈdhʋ̈, ˈyö Sɔtraan ˗yö ˈˈyua ˈˈdhiʋ̈˗ ˗ya Zɔbö ˗bha. (Job 2:5, 7) ˈˈKɛɛ ˈkö ˗kë ˈˈdhʋ̈ ˈzü, Zɔbö ˗yö ˗to  ˗klu ˗sü ˈka Zoova ˗bha. ˗Ya ˗pö: “ˈÖ dho ˈö yö n ga ˗yi ˗bha, n ˈti ˗dho n bo ˗man ˗klu ˗Zlan ˗bha ˗sü ˈka.”—Job 27:5.

12. Zɔbö ˗ya ˗zɔn ꞊dhɛ ꞊suakëmɛn ˗mü Sɔtraan ˈka ˗kɔ ˗kë ꞊dhɛ?

¹² ˈWɔn ˗nu ˈö Sɔtraan ˗ya ˗ya Zɔbö ˗bha bhë, waa˗ ˗kë saanˈˈ ˈgü ˗sü ˗gɛn ˈwaa kun Zɔbö ˈˈɲaan. ˗Yö ö ˗zo ˗gɔn ˗be ꞊dhɛ Zoova ˈnën ˈwɔn ˈˈgbɩɩ˗ ˗nu bhë ˗an ˗wɔ ö ˗ta. (Job 6:4; 16:11-14) ˈˈKɛɛ ˈkö ˗kë ˈˈdhʋ̈, Zɔbö ˗to ˗klu ˗sü ˈka Zoova ˗bha. ˗A ˗kë ˈˈdhʋ̈ ˗sü ˗ya ˗zɔn ꞊dhɛ pë gbɛ˗ ˈyaa kun Zɔbö këwɔn ˗bha. ˈYaa kun ö ˗zota ˗ni ö ˗de ˗wɔn ˈgü. ˗Yö ˗kun ˗Zlan ˈˈtɔŋdë ˈka, ˈyö ˗tɔ ꞊dhɛ ˗Zlan ˗dhɔ ˗yö ˗kun ˗a kë ˗ni ˈgü ꞊dedewo. ˈWɔn ˗nu ˈö Sɔtraan ˗yö ˗an ˗ya Zɔbö ˗bha bhë ˗wo ˗kun ꞊sua ˈka.

13. ˗Mën ˈö Zɔbö ˗bha ˗klu ˗Zlan ˗bha ˗sü ˗ya ˗zɔn?

¹³ ˈKö ˗kë ꞊dhɛ ˈwɔn ˗nu ˈwo kun kë ˗ni ˈgü dhaŋ˗ ˈgü ˈwaa kun ˗a ˈˈɲaan, Zɔbö ˗yö ˗to ˗klu ˗sü ˈka ˗Zlan ˗bha, ˈö˗ ˗zɔn ꞊dhɛ Sɔtraan bhë ꞊suakëmɛn ˗mü. Zoova ˗yö ˈdhuëë˗ ˗kpɔ Zɔbö ˗bha, ˗a ˗bha ˈˈtɔŋdhɛ ꞊dede ˗wɔn ˈgü.—Job 42:12-17.

14, 15. ˈWɔn ˗mɛɛn ˈö Sɔtraan ˗ya ˗ya gɔɔn˗ waa dhebɔ ˗nu ˈˈpɛpɛ ˗bha?

¹⁴ Ü ꞊mɔɔn˗ ˗bha ˈü ˗gleŋ ˗tiaandhö ˗nu ˈsü ˈwɔn ˈö ˗kë Zɔbö ˈka bhë˗ ˗bha. ꞊Dɛɛ, Sɔtraan ˗ya ˗pö ˈzü ꞊dhɛ kwa Zoova ˗dhɔkë ö ꞊trɔɔn ˗bha. Job 2:4 ˈgü ˗ya ˗pö: “Pë ˈˈpɛpɛ ˈö mɛnbhɩɩdhe ˗gɔ, ˗yö ˗dho ˗an nu ö ˗bha ˗tosɛta ˗wɔn ˈgü.” ˗Dhɛ ˈö ˈˈdhʋ̈, kö Sɔtraan ˗yö ˈwɔn ˗ya gɔɔn˗ ˗nu waa dhebɔ ˗nu ˈˈpɛpɛ ˗bha, Zɔbö do ˈyaa ˗mü. ˈDhɛ ˈö Zɔbö ga ˈö ˗kwɛ këŋ ꞊va ˗ʒiö, Sɔtraan ˗yö ˗we Zoova ˗dhɛ ˈzü ˈö ˈwɔn ˗ya ˗a ˗dhɔkëmɛn ˗nu ˗bha ˗kplawo. ˗A ˈwɔnzuan ˈnën ˗tɔ ꞊dhɛ Proverbes 27:11 ˗ya ˗pö: “N gbö, ˗bhö kë ꞊kpɔɔsü, ˈü n zuʋ̈ˈˈ ˈˈgblü dhi, kö ˈmɛn n ꞊woo mɛɛnˈˈ ˗ni [ɛɛnˈˈ ˈö ˈˈwɩ ˗ni n ˗dhɛ] bhë, ˈa˗ ˗daa kë˗ ˗gɔ.”

¹⁵ Ü ꞊mɔɔn˗ ˗bha ˈü ü ˈˈtʋ ˈto Zoova ˗wo ˗bha, ˈü kë ˗a ˈˈtɔŋdë ꞊dede ˈka, kö ˈü˗ ˗zɔn ꞊dhɛ ꞊suakëmɛn ˗mü Sɔtraan ˈka. ˈDhɛ ˈö ˈˈdhʋ̈, ꞊ya kë ꞊dhɛ ˈbha˗ yö ꞊dhɛ ü dua ˗mü kö ˈü pë ˈˈgbɩɩ˗ kë kö ˈü ü ˈˈta ˗kɔ bho ˈˈgblʋʋ, kö ˈü kë ˗Zlan ˈˈtɔŋdë ˈka, kö ʒiaan ˗së ꞊dede ˈü ꞊mɔɔn˗ ˗bha ˈü ˗da ˗a ˗ta ü ˗bha ˗tosɛta ˈgü yö ˈnën bhë. ˗A ˗kë ˈˈdhʋ̈ ˗sü bhë, ˈwɔn ꞊bhlëësü ˗mü. Sɔtraan ˗ya ˗pö ꞊dhɛ ˈbha kë ˈwɔn ˈˈgbɩɩ˗ ˈgü, ˈbhaa ꞊mɔɔn˗ ˗bha kö ˈü ˈto ˗klu  ˗sü ˈka ˗Zlan ˗bha. ˗Yö ˗bɔ ˈˈkpënŋ˗ ˈbha ˗nu ˗ta kö ˈö kwa ˈˈkan ˗Zlan ˗bha. ˗Ya ˗kë ˗kɔ ˗kë ꞊dhɛ?

16. (a) ˈˈSlö ˗mɛɛn ˗nu ˈö Sɔtraan bɔ ˗an ˗ta kö ˈö mɛn ˗nu ˈˈkan Zoova ˗dhɔkë ˗sü ˗bha? (b) Dügɔmɛn ˗ya ˈˈslö ˗mɛɛn ˗kɔ ˗kë ꞊dhɛ kö ˈö bhi ꞊dede ˈü ˈˈkan Zoova ˗dhɔkë ˗sü ˗bha?

¹⁶ Sɔtraan ˗yö ˗bɔ ˈˈslö ꞊va ˗ta kö ˈö kwaa ˗Zlan ˗nu kwa ˗bha ˈˈtɔŋdhɛ ˈˈkan. ˗Yö ˗nu kwa ˗gɔ ꞊dhɛ “laa ˈö ꞊gblan sië, ˈö ˗bhöpë mɔɔ˗ sië kö ˗ya ˗bhö ˗a ˈdhö.” (1 Piɛdhö 5:8) ꞊Ya kë ꞊dhɛ ü ˈˈtɔŋdë ˗nu, ü ˗bha ˈkɔdhigümɛn ˗nu waa mɛn ˈˈwɛɛ ˈbhaa ˗nu ˗wa ˗gban ü ˗gɔ kö ˈbha ˗dho Biblö draanˈˈ, kö pë ˈö kpɛnŋdhö ˈü˗ kë, ˗a ˈwɔn ˈya ˗dho ü ˈkun˗. ˗Yö ꞊mɔɔn˗ ˗bha ˈö ˗kë ü ˈgü ꞊dhɛ ˗nu ü ˗gɔ ˗sü ˈdhö. * (Zan 15:19, 20) Sɔtraan ꞊mɔɔn˗ ˗bha ˈzü ˈö ö ˗de ˗kë ꞊dhɛ “˗Zlan ˗bha bɔmɛ ˈö ˗dhɛpuudhɛ ˈgü” ˗a ˈdhö. ˈDhɛ ˈö ˈˈdhʋ̈, ˗yö ꞊mɔɔn˗ ˗bha ˈö bɔ ꞊sua ˗ta, ˈö ˈˈkpënŋ˗ ˗kë kwa ˗gɔ kö ˈkwa ˗gban Zoova ˗gɔ. (2 Kodhɛngtö 11:14) Sɔtraan ˗yö ˗bɔ ˈˈslö do ˈbha ˗ta ˈzü kö ˈö kwa ˈˈkan Zoova ˗dhɔkë ˗sü ˗bha. ˗Ya ˗kë ˈö ˈkwa kwa ˗zota ꞊dhɛ ˈkwaa ꞊mɔɔn˗ ˗bha ˈkwa ˗kë ˗Zlan ˗dhɔkëmɛn ˗tiaandhö ˈka.—Proverbes 24:10.

17. ˈMën ˗kë kwa ˗dho Zoova ˗bha ˈtɔŋ˗ ˗nu ˈkun?

¹⁷ ꞊Ya kë ꞊dhɛ ˈkwa Zoova ˗bha ˈtɔŋ˗ ˗nu ˈkun, kö kwa˗ ˗zɔn ꞊dhɛ Sɔtraan bhë ꞊suakëmɛn ˗mü. ˗Mën ˈö ˗dho kwa ˗takun kö ˈkwa ˈtɔŋ˗ ˗nu bhë ˗an ˈkun? Biblö ˗ya ˗pö: “Ü dua ˗mü kö ü ˗bha ˗Zlan Zoova ˗dhɔ ˗yö ü kë ü zuʋ̈ga ꞊gban, ü ˗zota ˗kɔ waa ü ꞊faan ꞊gban ˈˈpɛpɛ ˈka.” (Deutéronome 6:5) Kwa Zoova ˗bha ˈtɔŋ˗ ˗nu ˗kun ˈyö ˗tɔ ꞊dhɛ ˗a ˗dhɔ ˗yö kwa ˗kë. ꞊Ya kë ꞊dhɛ Zoova ˗dhɔ ˗yö ˈˈgla ˗ni ˈgü kwa ˈgü, pë ˈˈpɛpɛ ˈö˗ pö kwa ˗dhɛ ˗a kë ˗dhɔ ˗dhö kwa kë. Bɔmɛn Zan ˗yö ˈsëëdhɛ ˗bɛn ˗zë ˈö˗ pö:  ‘˗Zlan ˗dhɔ ˗bha mɛ kë ˗kɔ ˈˈwɛɛ ˈbha ˈyaa ˈdhö kö ˈyii kë ˗dhio ˗ma ˗a ˗ta ˗sü ˗zë ˈka. ˈˈKɛɛ ˈsa ˗dhioo ˗nu ˈö˗ dɔ kwa ˗ta bha kö ˗yö kë ꞊dhɛ ˗a ˈbha ˗yö ˈˈgbɩɩ˗ ˈyaa ˗mü.’—1 Zan 5:3.

18, 19. (a) ˗Mën ˗pë ˈbhaa ˗nu ˈö Zoova ˗ya pö ˗wo ˈyaa˗? (b) Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ ˈpë ˈkwaa ˗mɔɔn ˗a kë ˗sü ˗bha, Zoova ˈyaa˗ ˗dhɛ kwa ˗gɔ?

¹⁸ ˈˈKɛɛ ˗mën ˈbhaa ˗nu ˈö Zoova ˗ya pö kwa ˗dhɛ ꞊dhɛ ˗wo ˈyaa˗? ˗A ˈwɔnzuan ˈbhaa ˗nu ˗wo ˈkɔnën ˈö˗ ˗gɔ ˗kë “ ˈPë ˗san Zoova ˗kë, ˗a ˗san ˗yö ü kë” ˈka bhë˗ ˈgü. ˗A züdɔdhɛ ˈgü, ˗yö ꞊mɔɔn˗ ˗bha ˈö ˗kë ü ˈgü ꞊dhɛ pë ˗nu ˈwo bhë ˗an ˈbhaa ˗nu ˈwaa ˈyaa˗. ˈˈKɛɛ ꞊ya kë ꞊dhɛ Biblö ˈˈɲan ˗nu ˈwo ˗gban ˗an ˗bha ˈbha ˗an ˗wo pö, ˈbha ü ˗zota ˗an ˈgü ˗së ˈka, ü ˗dho ˗a ˈgüman ꞊dhɛ Zoova ˗bha ˈtɔŋ˗ ˗nu ˈkun ˗sü ˈö bhë ꞊kpɔɔdhɛ ˗wɔn kë ˗sü ˗mü. Ü ꞊mɔɔn˗ ˗bha ˈü˗ yö ˈzü ꞊dhɛ ü ˗bhawɔn ü ˗bha ˗tosɛta kë ˗kɔ ˈbhaa ˗nu ˗bho ˈˈgblʋʋ ˗sü ˗bha. Ü ˈˈta ˗kɔ ˗nu ˗bho ˈˈgblʋʋ ˗sü ꞊mɔɔn˗ ˗bha ˈö ˗kë ü ˗gɔ ˈˈgbɩɩ˗ ö züdɔdhɛ ˈgü. ˈˈKɛɛ kö ˈü ˗ya ü ˈˈta ˗kɔ baaˈˈ ˗sü ˗bha, ˈflëëbhodhe waa zuʋ̈gblüdhi ˈwo go ˗kë ˗Zlan ˈˈtɔŋdë ˈka ˗sü ˈgü, ü ˗dho ˗an  ꞊slɔɔ. (Isaïe 48:17, 18) Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ kwa ꞊mɔɔn˗ ˗bha ˈkwa kwa ˈˈta ˗kɔ bho ˈˈgblʋʋ?

¹⁹ ˈPë ˈˈoo ˗pë ˈö ˈkwaa ˗mɔn ˗a kë ˗sü ˗bha, Zoova ˈyaa ˗dhɛ kwa ˗gɔ toŋtoŋdhö. (Deutéronome 30:11-14) ˗Yö kwa ˗dɔ ˗së ˈka ˈö ˗ʒiö ˗a ˈka kwa ˗dede kwa ˗ta, ˈyö ˗tɔ ꞊dhɛ kwa ˈˈtɔŋdë ꞊dede ˗mü. ˗Yö kwa ꞊faan waa kwa ˈˈtëëtëdhɛ ˗nu ˗dɔ. (Psaume 103:14) Bɔmɛn Pɔdhö ˗yö kwa ꞊faan ˗mën ˈö˗ pö: “˗Zlan bha ˈyaa ˗wʋ ꞊plɛ pö, ˗yö ˗to ö ˗wʋ ˗ta. ˈYii ˈdho ˈˈwɩ˗ ˗bha kö Sɔtraan ˗yö ka ˈgü dan kö ˗yö ziö˗ ˈka ka faan ˈö ka ˈgü bha˗ ˗naa ˗ta. ˈˈKɛɛ ˈkö ꞊ya kë ˗zianwo ꞊dhɛ ˈgüdandhe ꞊në nu ka ˗ta, ˗yö ˗dho ˗a ˈˈslë kë ˈö ˈka ꞊mɔɔ˗ ˗kun ka ˗bha ˗sü ˗bha, ˈö ˈka dho˗ ˈka ˈˈdhʋ̈ ˈka go˗ ˈgü.” (1 Kodhɛngtö 10:13) Kwa ꞊mɔɔn˗ ˗bha ˈkwa kwa ˗zo yö Zoova ˗dhɛ ꞊dhɛ ˗yö ˗dho ꞊faan nu kwa ˗dhɛ ˈˈtʋ̈ŋ ꞊gban ˈgü kö ˈpë ˗dhɛ ˗së kö ˈkwa˗ kë. ˗Yö ˗dho “ˈgügbɩɩdhɛ ˗ziisü” nu ü ˗dhɛ kö ˗yö ü ˗takun kö ˈü bɔ ˈˈklʋʋbhɔdhe ˗nu ˈgü. (2 Kodhɛngtö 4:7) Zoova ˗bha mɛn ˗takun ˗sü ˈö ˈwɔn ˈˈgbɩɩ˗ ˈgü, ˈdhɛ Pɔdhö ˗yö ö ˗de ˗bhaa ˗dhɛ yö, ˗ya ˗bɛn ˗zë ˈö˗ pö: “N ˗kɔ ˗yö ˗mɔɔ ˈwɔn ˗nu bha˗ ꞊gban  kë ˗sü ˗bha ˈˈdhʋ̈ n Dëmɛ ꞊në˗ ˈsaa˗ ˈgü, ˗a ˗gɛn ˗mü ꞊dhɛ yö ꞊në n gba˗ ˗faan ˈka.”—Fidhipö 4:13.

20. ˈˈKlʋʋsë ˗nu ˗mɛɛn ˈö ü dua ˈdhö ˗mü kö ˈü ˗an ˗zɔn ü ˈˈta ˗kɔ ˗nu ˈgü? ˈYö ˈmën ˗kë?

²⁰ ꞊Ya kë ꞊dhɛ kwa˗ ˈˈpiʋ̈ ˈkwa kë Zoova ˈˈtɔŋdë ˗nu ˈka, kwa dua ˗mü kö ˈpë ˈö˗ pö ˗yö ˈyaa˗ ˈkwa ˈˈkan ˗a kë ˗sü ˗bha. ˈˈKɛɛ kwa dua ˈyaa ˗mü ˈpö kö kwa ˈˈdhiʋ̈ ˗yö ˈto bhë. (Wlɔmö 12:9) ˈPë ˗dhɔ ˗Zlan ˗kë ˈyö˗ ˗dhɔ ˗a ˈˈtɔŋdë ˗nu ˗kë ˈpö. Psaume 15:1-5 ˗ya ˈˈtɔŋdë ˗nu ˈˈta ˗kɔ ˗nu ˗wɔn ˗blɛɛ. (˗A ˗wo pö.) Zoova ˈˈtɔŋdë ˗nu ˗wo wo ˈˈta ˗kɔ ˗sü ˗a ˗bha ˈˈklʋʋsë ˗nu ˈwo ˗kë ꞊dhɛ “˗dhɔ, ꞊zuögbludhi, ꞊zuöyagbluu, ꞊zuösaadhɛ, këwun ˗së ˗nu, ˈglusë, ˗to ˗wo gü ˗sü, ˗kë ˈlëëlë ˗sü waa ˗de kuënnu ˗sü” ˗nu ˈdhö bhë ˗an ˗bha.—Gadhatö 5:22, 23.

21. ˈˈKlʋʋsë ˗nu ˈö ˗an ˗dhɔ ˗Zlan ˗kë, ü ˗dho ˗an kë ˗sü draanˈˈ ˗kɔ ˗kë ꞊dhɛ?

²¹ Ü ˗dho ˈˈklʋʋsë ˗nu ˈwo bhë ˗an kë ˗sü draanˈˈ ˗kɔ ˗kë ꞊dhɛ? Ü dua ˗mü kö ˈpë ˗dhɔ Zoova ˗kë, ˈü˗ draanˈˈ Biblö ˗wo pö ˗sü waa˗ draansü ˈka zoodhö zoodhö. (Isaïe 30:20, 21) ꞊Ya kë ꞊dhɛ ü˗ kë ˗ni ˈgü ˈˈdhʋ̈, ü ˗bha Zoova ˗dhɔ ˗dho ˗dadhiʋ̈. ꞊Ya kë ꞊dhɛ ˗a ˗dhɔ bhë ˗yö ˗da ˗ni ˈgü ˈˈdhiʋ̈, ˈwɔn ˗man ˗a ˗ta ˗dhɔ ˗dhö ˗da ˈü ˈgü ˈpö.

22. ˈBha ˈwɔn man Zoova ˗ta, ˗a ꞊trɔɔn ˗dho kë ˗mën ˈka?

²² Ü ˈˈta ˗kɔ ˗bho ˈˈgblʋʋ ˗sü ˈö ü ˗bha ˗tosɛta ˈgü bhë, ˗wo ꞊mɔɔn˗ ˗bha ˈwo˗ ˗zɔn sɔ zii ˗bho ü ˗bha ˗sü kö ˈü sɔ ˗dɛɛ ˗da ˗a ˈka. Biblö ˗ya ˗pö ꞊dhɛ ü dua ˗mü kö ˈü ü bo “˗tosea ˗kë ˗kɔ zii” ˈka, kö ˈü ˗da “˗tosea ˗dee” ˈgü. (Kodhɔsö 3:9, 10) Mɛn kë ˗kɔ ˗bho ˈˈgblʋʋ ˗sü ˈˈgbɩɩ˗, ˈˈkɛɛ kö ˈkwa kwa ˈˈta ˗kɔ ˗nu bho ˈˈgblʋʋ, kö kwa ˈwɔn man Zoova ˗ta, ˗ya ˗pö ꞊dhɛ ö ˗dho kwa “꞊saan ˈkpii˗” bho. (Psaume 19:11) ˗Bhö ˈwɔn man Zoova ˗ta kö ˈü˗ ˗zɔn ꞊dhɛ Sɔtraan bhë ꞊suakëmɛn ˗mü. ˗Bhö Zoova ˗dhɔkë ˗a ˗dhɔ ꞊dede ˗bha, ˈbha ˈdho˗ kë pë ˈü dho˗ ꞊slɔɔ ˗dhɛkpaɔ dhiʋ̈ˈˈ ˈgü ˗a ˗bha. ꞊Ya kë ˈˈdhʋ̈, ü ˗dho kë ˗Zlan ˈˈtɔŋdë ꞊dede ˈka.