ˈÖ ˗bhɔ ˈˈdhʋ̈ ꞊kwɛŋzü, Sɔtraan waa ˗zuu yaa ˗nu këwɔn ˈyaa˗, ˈö ˈwo ꞊kun pë yaa kë ˗ni ˈgü mɛn ˗nu ˈka. ˈÖ kun ꞊kwɛŋzü, Sɔtraan ˗yö ˗klu ˗Zlan ˗bha ˗mɛn Zɔbö ˗bha ˗tuëë waa˗ ˗bha yökëmɛn ˗nu ˗zë. ˈDhɛ ˈö go mü ˈyö˗ ˗kë ˈyö “ˈˈtee ˈˈgbɩɩ˗” ˗yö ˗ʒiö, ˈyö ˈkɔ ˈö Zɔbö ˗bha ˈnën ˗nu ˗kɔŋ do ˗kë ˗a ˈgü ˈyö wü, ˈyö ˈnën ˗nu bhë ˗an zë. ˈDhɛ go mü ˈzü, ˈyö Sɔtraan ˗yö ˗dhiëë ˗lo Zɔbö ˗bha, “ˈö go ˗a ˗gɛndhɛ ˗bha ˈö yö ˗a ˈka ˗a ˗gɔ ˗bha.”—Job 1:7-19; 2:7.

ˈÖ kun Yesu ˗bha ˈˈtʋ̈ŋ ˈgü, ˗zuu yaa ˗nu ˗wa ˗kë ˈö mɛn ˈbhaa ˗nu ˗kë ˈˈbhʋbhʋ ˈka ɛɛnˈˈ ˈö ˗an ˈˈɲɛɛn ˗yö ˗tröö. (Matiö 9:32, 33; 12:22) ˗Wo gɔndënën do ˈbha ꞊sëë bho, ˈö ˈwo˗ ˗kë ˈö ö ˗de ˗gi ˗gwë ˈka. (Makö 5:5) ˗Wa ˗kë ˈzü ˈö wlüüˈˈ ˗nën do ˗yö ˗ya ˈˈgbla ˗sü ˗bha, ˈö ö ˗de ˗zuö ˈˈshia, “ˈyö zun ˗dɩ zë ˗sü ˗bha ˈˈgbɩɩ˗ ˈka.”—Dhukö 9:42.

 ꞊Dɛɛ, Sɔtraan waa ˗zuu yaa ˗nu ˗bha mɛn zë ˗sü ˗ya ʒiö ˈˈdhiʋ̈ ˗be ˗bhaa ˗ta. ˈDhɛ ˈwo wo bo ˗an kë ˗sü ˈka dhaŋ˗ ˈgü, ˗an ˗bha pë yaa kë ˗sü ˗ya ˗da ˈˈdhiʋ̈ ꞊dedewo. Nɔɔn˗ ˗nu ˈwo go ˈˈkpɔnŋtaadhɛ ˗todhʋ̈sü ˈgü, ˗wa ˗zɔn ꞊dhɛ ˗an kë ˗kɔ ˈyaa˗. ˗Wo ˈˈyua ˗ya mɛn ˈbhaa ˗nu ˗bha. ˗Wo mɛn ˈbhaa ˗nu ꞊sëë bho gbeŋ yi ˗kan ˗an ˈˈɲan ˈgü ˗sü ˈka, ɛɛnˈˈ ˈwo˗ ˗kë ˈwo ˈˈɲɛɛn yaa bho. ˗Wo wo ˗de ˗kë mɛn ˗nu ꞊gɔn ɛɛnˈˈ mɛn ˗nu ˗bha dhebɔ ˈka ˈˈflose ˈka gbeŋ. ˗Wo so ˗da mɛn ˈbhaa ˗nu ˈgü, ˈö ˈwo ˗an ˗blü kö ˗wo mɛn ˗nu zë, ɛɛnˈˈ kö ˗wo wo ˗de zë.

Lɛntina ˈö Sidhinamö ˗ya ˗pö ꞊dhɛ ˗zuu yaa ˗yö ö ˗bha ˈkɔdhigümɛn 16 ˗zë, ˈö ö ˗wëëkëwo, ˈö pë ˗da ö ˗gɔ ˈgü ˗kwɛ 18 ˈˈpiʋ̈. Mɛn ꞊dede ˈö˗ ˈwɔn ˗kë ˗a ˈka, ꞊ya ꞊blɛɛ ˈö˗ pö ꞊dhɛ ˗zuu yaa ˗nu ˈö ˈwo bhë, “mɛn ˈö ˈyaa dɔ ˗an ˗gɔ ꞊zinŋ ˈgü, ˗a ˗mɛn ˗wëëkëwosü ˈö dho ˈö yö˗ ˈka ˗a zë ˗sü ˗bha, ˗a ˈˈyi ˗yö ˗kan ˗an ˈˈdhi.”

ˈˈKɛɛ Zoova ꞊mɔɔn˗ ˗bha ˈö ö ˗kɔ kpa ö ˗dhɔkëmɛn ˗nu ˗ta Sɔtraan ˗bha ˗nu mɛn ˗gɔ ˗sü ˗gɔ.—Proverbes 18:10.