Yesu ˗ya ˗pö ꞊dhɛ ö ˗bha gwëëˈˈ ˗nu dua ˈyaa ˗mü kö ˗wo kë ‹ˈkpongtaamɛ ˗nu ˈka.› (Zan 15:19, NTBL) ꞊Yaa˗ pö ˈˈdhʋ̈ kö ˗ya ˗pö ˗an dua ˈyaa ˗mü kö ˗wo wo ˗kɔ ˗da ˈˈsɛkɔɔwɔn ˗nu waa ˗gblü ˗nu ˈgü. ˈˈKɛɛ ö ˗kɔ ˗bho ˈˈsɛkɔɔwɔn ˗nu ˈgü ˗sü ˈö bhë, ˈyaa ˈˈplëëplë ˈˈtʋ̈ŋ ˈbhaa ˗nu ˈka. ˗Yö ꞊mɔɔn˗ ˗bha ˈö˗ ˗kë ˈö mɛn ˗nu ˗wo kwa ˗wɔn yaa ꞊blɛɛ ɛɛnˈˈ ˈwo ˈˈyɩɩ to kwa ˗bha. Kwa ˗dho ˗a kë ꞊dhɛ kö kwa ˗kɔ ˈya ˗dho ˗da ˈˈsɛkɔɔwɔn ˗nu ˈgü kö ˈkwa ˈto ˗klu ˗sü ˈka Zoova ˗bha?

1. Kletiɛn ꞊dede ˗nu ˗wo ˈˈsɛgɔdhiʋ̈mɛn ˗nu ˗yö ˗kɔ ˗kë ꞊dhɛ?

Zoova ˗bha ꞊Gbɛkiö ˗nu ˗wo ˈˈsɛgɔdhiʋ̈mɛn ˗nu ꞊bhlëë ˗ya. Pë ˈö Yesu ˗ya pö kwa˗ ˗kë, ˈö ‹pë ˈö Sezaa ˗bha ˈka, ˈkwa˗ nu ˗a ˗dhë.› ˗A ˗pö ˈˈdhʋ̈ ˗sü ˗gɛn ˈnën ˈtɔ˗ ꞊dhɛ kwa ˈˈsɛgɔdhiʋ̈mɛn ˗nu ꞊bhlëë ˗ya ˈö ˈkwa kwa ˗bha ˈnii˗ ꞊sɔnŋ bho. (Makö 12:17, NTBL) Biblö ˗ya ˗zɔn ˈˈpuu ˈka ꞊dhɛ mɛn ˗nu ˈwo ˈˈsɛ ˗gɔ ˈˈdhiʋ̈ bhë, Zoova ˈnën ˈö ö ꞊kwaa˗ ˗an ˗zü ˈö ˈwo ˈˈsɛ ꞊kɔɔn. (Wlɔmö 13:1) ˗Ya ˗zɔn ꞊dhɛ ˈˈsɛgɔdhiʋ̈mɛn ˗nu ˈwo bhë, ˗an ˗bha mɛnkɔɔnsü ˗naan ˈˈdhiʋ̈todhɛ ˗yö ˗dhö. ˗Zlan ˗bha ˗Gblüdëdhɛ ˈö dhaŋ˗ ˈgü bhë, yö ˈnën kwa ˈˈɲan ˈdhö˗ ˗gɔ kö ˗yö ˈwɔn ˈˈgbɩɩ˗ ˗nu ꞊gban bho mɛnbhɩɩdhe ˗nu kwa ˗bha.

2. Kwa ˗dho ˗a ˗zɔn ˗kɔ ˗kë ꞊dhɛ ꞊dhɛ kwa ˗kɔ ˈyaa ˈˈsɛkɔɔwɔn ˗nu ˈgü?

Zoova ˗bha ꞊Gbɛkiö ˗nu ˈwaa bɔ ˈˈsɛkɔɔmɛn ˈˈwɛɛ ˈbhaa ˈka. ˗Wo ˗to Yesu ˗bha ˈwɔnzuan ˈˈpiʋ̈. ˗Dhɛkpaɔyi do ˈka, ˈdhɛ ˈö Yesu ˗yö ˗dhidha ˈbhaa ˗kë, ˗yö ˗kun mɛn ˗nu ˈˈpiʋ̈ ꞊dhɛ ˈwo˗ kë ˗gblüdë ˈka. ˈˈKɛɛ yö ˈti ˈˈwɩ ˗a ˗bha. (Zan 6:15) ˈMën ˗kë? ꞊Taabha ˗ya ˈgü ˗pʋ ˈö˗ pö, «ma ˗gblüdëdhɛ ˈyaa ˈˈkpʋng ꞊taa yö.» (Zan 18:36) ꞊Dɛɛ, Yesu ˗bha gwëëˈˈ ˗nu ˗wo wo ˗kɔ ˗bho ˈˈsɛkɔɔwɔn ˗nu ˈgü ˗kɔ ꞊va ˗ta. ˗A ˈwɔnzuan ˈnën ˗tɔ ˈwaa wo ˗kɔ ˗da ˗gblügɔnsü ˗nu ˈgü. (Michée 4:3 ˗wo pö.) ˗Wo ꞊drapo waa ˈˈsɛ ˗dɔ ˗a ˗bha ˗pë ˈˈwɛɛ ˈbhaa ˗nu ꞊bhlëë ˗ya, ˈˈkɛɛ ˈwaa ˗an gba. (1 Zan 5:21) ˈWaa bɔ ˈˈsɛkɔɔmɛn ˈˈwɛɛ ˈbhaa ˈka ɛɛnˈˈ ˈwaa ˗gban ˗a ˗gɔ. -Kɔ ˗nu ˈwo˗ ˗zɔn ˗a ˈka ꞊dhɛ wo ˗klu ˗sü ˈka ˗Zlan ˗bha mɛnkɔɔnsü ɛɛnˈˈ ˗a ˗bha ˗Gblüdëdhɛ yö dosɛnŋ ˗a ˗bha bhë, ˗an ˈbhaa ˈnën ˈö ˈwo bhë.

 ˗KAA ˈˈPIƲ̈ ˈPƆN

3. Kletiɛn ꞊dede ˗nu ˈwaa wo ˗kɔ ˗da ˈˈsɛkɔɔwɔn ˗nu ˈgü.

Yesu waa˗ ˗bha gwëëˈˈ ˗nu ˈwo kun ꞊kwɛŋzü, ˗wo ˈwɔnzuan ˗së ˗to kwa ˗gɔ. ˗Ka Wlɔmö 13:1, 5-7, NWT waa 1 Piɛdhö 2:13, 14 ˗an ˗wo pö. ˈKa ka bo, kö ˈka VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.

• ˈMën ˗kë ˈö kwa dua ˈdhö ˗mü kö ˈkwa ˈˈsɛgɔdhiʋ̈mɛn ˗nu ꞊bhlëë ˗ya?

• Kwa ˗dho ˗a ˗zɔn ꞊dhɛ kwa ˗an ꞊bhlëë ˗ya ˗kɔ ˗kë ꞊dhɛ?

˗Gblü ˗ya ˗da ˈˈsɛgɔ ˗nu ꞊zinŋgü, ˈˈsɛgɔ ˈbhaa ˗nu ˗wa ˗kë ꞊dhɛ ˈpë ˈwaa bɔ ˗a mɛn ˈbhaa ˈka ˗a ˈdhö. ˈKɛɛ gagade ˈö ˈdhö ˈyö ˗tɔ ˗wo wo ˗kɔ ˗da mɛn ꞊plɛ ˈwo ˈko zë ˗ni ˈgü wo ˈˈkwëë bhë ˗an ꞊gban ˗dhɛ. Ö ˗kɔ ˗bho ˈˈsɛkɔɔwɔn ˗nu ˈgü ˗sü ꞊dede ˈnën ˗tɔ ˗mën? ˗Ka Zan 17:16 ˗wo pö. ˈKa ka bo, kö ˈka VIDEO ˗ga, kö ˈka dhɛɛˈˈ ˈö ˈˈshia bhë ˗a ˗yɔ mɛɛnˈˈ.

• ˈMën ˈwo˗ ˗dhɛ ö ˗kɔ ˗bho ˈˈsɛkɔɔwɔn ˗nu ˈgü ˗sü?

Kö ˈˈsɛgɔdhiʋ̈mɛn ˗nu ˗wa pö ˈpë ˈö ˗Zlan ˗dhɛ ˈya˗ ˈkwa˗ kë, kwa ˗dho ˗a kë ꞊dhɛ? ˗Ka Këwɔn ˗nu 5:28, 29 ˗wo pö. ˈKa ka bo, kö ˈka VIDEO ˗ga, kö ˈka dhɛɛˈˈ ˗nu ˈwo ˈˈshia bhë, ˗an ˗yɔ mɛɛnˈˈ.

• ˈˈSɛgɔdhiʋ̈mɛn ˗nu ˗bha ˈtɔŋ˗ ˗ya ˗gban ˗Zlan ˗bha ˗gɔ, ˈde ˈkwa ˗dho ˗a ˗bha ꞊bhlëë ˗ya?

• Ü ˗bha ˈgü, ˈmën ˈö ˈˈsɛgɔdhiʋ̈mɛn ˗nu ꞊waa˗ pö ˈö kletiɛn ˈyaa ꞊mɔɔn˗ ˗bha kö ˗ya kë?

 4. Ü ˗kɔ bho ˈˈsɛkɔɔwɔn ˗nu ˈgü ü zuʋ̈ˈˈ ˈˈpiʋ̈ waa ü këwɔn ˗nu ˈgü.

˗Ka 1 Zan 5:21 ˗wo pö. ˈKa ka bo, kö ˈka VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.

• ˈMën ˗kë ˈö Aɲënʒö yö ˈti ˈˈwɩ ˗a ˗bha kö ˈö ˗da ˈˈsɛ kɔɔˈˈ paati ˈbhaa ˈgü ɛɛnˈˈ kö ˈö ö ˗kɔ ˗da ˈˈsɛkɔɔwɔn ˗nu ˈgü?

• Ü ˗bha ˈgü pë ˈö˗ ˗kë bhë ˈwɔn ˗së ˗mü ˗ee?

ˈWɔn ˈˈwɛɛ ˈbhaa ˗nu ˗mɛɛn ˈö ˈwo ꞊mɔɔn˗ ˗bha ˈö ˈwo kwa ˗kɔ ˗bho ˈˈsɛkɔɔwɔn ˗nu ˈgü ˗sü kë kwa ˗gɔ ˈˈgbɩɩ˗? ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.

• ˈˈSɛgɔ ˗nu ˗wo pë ˗nu ˈwo ˗kë ꞊dhɛ ꞊balɔn ˗nu ˈdhö ˗a ˗zuö ˗ni ˈgü wo ˈˈkwëë, kwa ˗dho kwa ˗kɔ bho ˈˈsɛkɔɔwɔn ˗nu ˈgü ˗kɔ ˗kë ꞊dhɛ?

• ˈPë ˈö ˈˈsɛgɔdhiʋ̈mɛn ˗nu ˗wa pö, ˈkö ˗kë ꞊dhɛ ˗yö ˗së ɛɛnˈˈ ˗yö ˈya˗ kwa ˗bha ˈka, kwa ˗dho kwa ˗kɔ bho ˈˈsɛkɔɔwɔn ˗nu ˈgü ˗kɔ ˗kë ꞊dhɛ?

• Pë ˗nu ˈö ˈkwa˗ man tele waa ꞊ladio ˗nu ˈgü ɛɛnˈˈ ˈö ˈkwa˗ man mɛn ˗nu ˈwo kwa ˗züzü ˗an ˈˈdhi, ˗yö ꞊mɔɔn˗ ˗bha ˈö kwa ˗bha ˗kɔ ˗bho ˈˈsɛkɔɔwɔn ˗nu ˈgü ˗sü kë kwa ˗gɔ ˗kɔ ˗kë ꞊dhɛ?

 ˗A ˈDHƐ TO KWA ˈˈƝAAN

Kletiɛn ꞊dede ˗nu ˗wo wo ˈgü ˗dɔ ˈˈgbɩɩ˗ ˈö ˈwaa wo ˗kɔ ˗da ˈˈsɛkɔɔwɔn ˗nu ˈgü wo zuʋ̈piʋ̈wɔn waa wo këwɔn ˗nu ˗an ˈgü.

˗Zobuödhe

• Kwa dua ˗mü kö ˈkwa ˈˈsɛgɔdhiʋ̈mɛn ˗nu ˈsü ˗kɔ ˗kë ꞊dhɛ?

• ˈMën ˗kë ˈö kwa dua ˈyaa ˗mü kö ˈkwa kwa ˗kɔ ˗da ˈˈsɛkɔɔwɔn ˗nu ˈgü?

• ˈWɔn ˗nu ˗mɛɛn ˈwo ꞊mɔɔn˗ ˗bha kö ˗wo kwa ˗kɔ bho ˈˈsɛkɔɔwɔn ˗nu ˈgü ˗sü kë kwa ˗gɔ ˈˈgbɩɩ˗?