A yi duoro ba naŋ maŋ moɔlɔ poɔŋ, gbɛɛ yaga ba maŋ moɔlɛɛ lɛ na noba naŋ yele yelfaare korɔ taa, lɛ baŋ de nimikuonii a dɔgrɔ ba taaba ba naŋ ba nɔnɔ ba yɛlɛ zuŋ. Ba maŋ lɛ moɔlɛɛ lɛ na bale tɛɛtɛɛ noba naŋ maŋ iri zɔɔrɔ neŋ taa, ane zɔɔre yɛlɛ.

•   “A zɔɔre naŋ be Izerayɛl neŋ Gaza kpakyagaŋ na zuŋ, noba yaga zie zaa yelee yelfaare kyaara taa intanɛt dama diibu ziiriŋ pampana ŋa a gaŋ saŋa zaa naŋ pare. Noba naŋ nɔnɔ kpaŋkpaŋkpeɛ̃o neŋ hataa yɛlɛ la are ba puoriŋ a eŋnɛ ba faŋa baŋ erɛ lɛ.”​—The New York Times, November 15, 2023.

•   “A yi October bebiri 7 soba a wa ta zenɛ ŋa, noba naŋ ba nɔnɔ taa zuŋ na, ba maŋ yelee yelfaare kyaara taa, a lɛ erɛ ba taaba nimikuonii a gaŋ saŋa zaa naŋ pare.”​—Dennis Francis, president of the United Nations General Assembly, November 3, 2023.

 Zenɛ ŋa naane ka noba piili yele yelfaare kyaara taa. Takoreŋ saŋa zaa ka zɔɔre neŋ nimikuoŋ yɛlɛ bebe. Ŋaaŋ ka a Baabole yeli kyaare noba mine naŋ da bebe takoreŋ saŋa na, “ba maŋ narɛɛ ba potu-yɛlɛ na baŋ boɔrɔ ka ba yeli na aŋa tampiime.” Ba eɛ noba naŋ da maŋ boɔrɔ zɔɔre ane kpaŋkpaŋkpeɛ̃o toma. (Yieme 64:3; 120:7; 140:1) Kyɛ, a Baabole wuleeŋ ka lɛ na noba naŋ hataa yaga zaa zenɛ na wuleeŋ ka yelnimizeɛ kaŋa waanaŋ ka o nyɛ eebo.

 A Baabole wuli teŋ yɛlɛ ayi mine zuŋ hataa naŋ bebe yaga zaa zenɛ ŋa.

1.  1. A Baabole daŋyeleeŋ ka te saŋa ŋaŋ “noba yaga nɔmmo na mãã la.” (Matio 24:12) Noba koŋ nɔnɔ taa, kyɛ ba na taaɛ gyogri naŋ na vɛŋ ka ba hataa.​—2 Timoti 3:1-5.

2.  2. Lɛ na noba naŋ hataa yaga zaa na wulee lɛ na Setaana a Dɛɛvul naŋ sããna noba teɛroŋ zenɛ ŋa. A Baabole yeleeŋ ka, “a donɛɛ zaa be la a neŋfaa na kpeɛ̃o puliŋ.”​—1 Gyɔɔn 5:19; Yel-iriwulaa 12:9, 12.

 Kyɛ, a Baabole lɛ wuleeŋ ka a koŋ kɔɔre Naaŋmen na iree yɛlɛ na zaa naŋ waana neŋ hataa na bare. Kyɛ lɛ yoŋ naane, o na iree dɔgɛɛ na zaa hataa naŋ de waneŋ na meŋ bare. A Baabole eŋɛɛ noɔre ka:

•   Naaŋmen “na eɛrɛɛ nentaŋ zaa bare ba nimieŋ, kũũ koŋ la kyebe, woore, konni, ane kpɛlle ŋmeɛbo koŋ la bebe. A na e la yelkorɔ naŋ pare wa gaa.”​—Yel-iriwulaa 21:4.