May 23, 2023, United States paaloŋ laafeeloŋ tontoŋ neŋkpoŋ kaŋa da de la kpããmo ko noba ka, intanɛt dama diibu ziiri derɛɛ toɔrɔ yaga waana neŋ baapaalba yaga zuŋ.

•   “Yelmeŋɛ la, bibiiri ane baapaalba maŋ tu la intanɛt dama diibu ziiri eŋɛŋ kyɛ dire dama, kyɛ sieree bebeŋ a wulo ka a intanɛt dama diibu ziiri ŋa maŋ vɛmeŋ ka a bibiiri ane a baapaalba ŋa taa teɛroŋ gyɛre ane eŋgannoŋ poɔŋ baaloŋ.”​—Social Media and Youth Mental Health: The U.S. Surgeon General’s Advisory, 2023.

 Yɛlɛ na baŋ da peɛre nyɛ naŋ vɛŋ baŋ tere a kawane ka te kaara te menne velaa a kyaare a intanɛt dama diibu ziiri ŋa.

•   Ka Baapaalba naŋ ta ŋa yuomo pie neŋ ayi a te ta yuomo pie neŋ anuuŋ wa “de aware naŋ pare ata toŋ neŋ toma a intanɛt dama diibu ziiriŋ ŋaŋ, a maŋ vɛmeŋ a e mɔlɔ ka ba taa teɛroŋ gyɛre ane eŋkyere yɛlɛ.”

•   Ka baapaalba naŋ ta ŋa yuomo pie neŋ ayiŋ “wa de intanɛt dama diibu ziiri tonɔ neŋ toma yaga zaa, a maŋ vɛmeŋ aŋ e kpeɛŋaa ka ba toɔ̃ gbiri soŋ, noba maŋ tu la be kyɛ dɔgrɔ ba mine, ka ba mine meŋ maŋ teɛre ka ba eŋdaa waaloŋ ba veɛlɛ, ba mine meŋ maŋ teɛreŋ ka ba ba taa tɔnɔ zaa. Azuŋ, teɛroŋ gyɛre maŋ kpɛ baŋ yaga zaa. Pɔgeba ka a yɛlɛ ŋa pɔgrɔ yaga zaa a gaŋ dɔba.”

 Wala ka bidɔgreba na toɔ̃ e a go ba biiri yi a yɛlɛ ama zaa poɔŋ? A Baabole ko teŋ kawane naŋ na toɔ̃ soŋ te.

 Wuli ho biiri yɛlɛ naŋ seŋ ka ba e. Bidɔgreba, yɛ teɛre yɛlɛ yɛ bie naŋ na tuore ka o naŋ de a intanɛt dama diibu ziiri ŋa tonɔ neŋ toma. Ka yɛneeŋ wa teɛre a yɛlɛ gaa tɔɔre, yɛ soore yɛ menne ka, ‘A na somaŋ ka te ko te bie sori ka o de intanɛt dama diibu ziiri tonɔ neŋ toma bee?’

•   Baabole kawane: “De wuluu a ko bibile a kyaare sori naŋ seŋ ka o tu.”​—Yeng Yelibie 22:6.

•   Ka hooŋ boɔrɔ ka ho zanne yɛlɛ yaga poɔ, kanne a yelzu ŋa “Should My Child Use Social Media?” (Aseŋ Ka N Bie De Intanɛt Dama Diibu Ziiri Tonɔ Neŋ Toma Bee?)

 Ka hooŋ ko ho bie sori ka o de intanɛt dama diibu ziiri tonɔ neŋ toma, kyɛ aseŋ ka ho naŋ kaara ho bie na zu velaa zaa. Naŋ moɔ̃ niŋe wulo ho bie lɛ aŋ seŋ ka o de a intanɛt dama diibu ziiri ŋa tonɔ neŋ toma. Sobuo hoŋ na baŋ tu kyɛ e lɛ?

 Go ho bie na yi yɛlɛ naŋ na toɔ̃ de toɔrɔ waneŋ o zuŋ. Wuli ho bie na ka o baŋ yɛlɛ naŋ na toɔ̃ de toɔrɔ waneŋ o zuŋ, ane lɛ aŋ seŋ ka o e a toɔ̃ tage o meŋɛ yi a poɔŋ.

•   Baabole kawane: “Yɛ ta wa vɛnɛ ka peɛ̃mo toma ane dɛgre boorɔ zaa kyɛbee bombɔ-gaŋne e yɛlɛ baŋ na pore a yɛ poɔŋ gba, . . . a ba seŋ ka gyogo naŋ waana neŋ vi, kyɛbee yelyaga naŋ e dambol-yɛlɛ kyɛbee deɛne yelyaga naŋ taa yel-laama be yɛ poɔŋ.”​—Efesu 5:3, 4.

•   Ka hooŋ boɔrɔ yɛlɛ naŋ na toɔ̃ soŋ bo, kanne a yelzu ŋa “Teaching Your Teenager Social Media Safety.” (Lɛ Hoŋ Na Toɔ̃ Wuli Ho Baapaalaa Ka O Kaara O Meŋɛ Velaa Intanɛt Dama Diibu Ziiriŋ)

 Wuli ho bie na o e ta zie. Aŋa mannoo poɔŋ, wuli ho bie na saŋa ane lɛ na oŋ na toɔ̃ de intanɛt dama diibu ziiri toŋ neŋ toma kɔɔre seŋ.

•   Baabole kawane: “Yɛ kaara yɛ menne soŋ a kyaare lɛ yɛ naŋ kyɛnɛ . . . aŋa yɛmbanneba, yɛ maŋ de yɛ wagre tonɔ neŋ toma soŋ.”​—Efesu 5:15, 16.

•   Ho na baŋ de la a vidio ŋa De Intanɛt Tona Toma Yɛŋ Poɔŋ soŋ ho bie na ka o baŋ ziiri na oŋ na baŋ de intanɛt dama diibu ziiri toŋ neŋ toma a te ta.