1. Boŋ na baŋ soŋ te ka te nɔnɔ Baabole daŋyelbo zannoo?

 TE YƆƆDƆƆLEE kaŋa yuori naŋ di Ben yeleeŋ ka, “N maŋ nɔŋeŋ ka N zanna Baabole daŋyelbo yɛlɛ.” Ho neŋ o laŋɛɛ teɛroŋ bee? Bee ho maŋ nyɛŋ ka Baabole daŋyelbo eɛ kpeɛŋaa yaga ka ho woŋ a muni? Aminekaŋaŋ gba Baabole daŋyelbo zannoo ba maŋ noma korɔ bo. Kyɛ ka hooŋ wa baŋ ananso naŋ vɛŋ ka Jehoova vɛŋ baŋ sɛge daŋyelbo eŋ a Baabole poɔŋ, ho na wa nɔŋ la a yɛlɛ.

2. Bo yɛlɛ teŋ na zanne a zannoo ŋa poɔŋ?

² A zannoo ŋa poɔŋ, te na zannɛɛ ananso aŋ seŋ ka te zanna Baabole daŋyelbo, ane lɛ teŋ na baŋ tu zannaa. A lɛ zanne daŋyelbo ayi mine naŋ be a Daaniel gane poɔ, a nyɛ tɔnɔ te naŋ na baŋ nyɛ yi be pampana ka teneeŋ baŋ a muni soŋ.

3. Ka hooŋ boɔrɔ ka ho woŋ Baabole daŋyelbo muni soŋ, bo aŋ seŋ ka ho e?

³ Ka teneeŋ boɔrɔ ka te woŋ Baabole daŋyelbo muni soŋ, aseŋ ka te bɔ sommo. Te nyɛ a yelmannaa ŋa. Te de ka ho gɛrɛɛ zie kaŋa ho naŋ ba baŋ, kyɛ ka ho neŋ ho zɔmeŋɛ kaŋa naŋ baŋ a zie soŋ zaa laŋ gɛrɛ be. O baŋɛɛ zie na yɛ naŋ be ane zie a soe zaa naŋ gɛrɛ. Nɔkpeɛne zaa kyebe ka ho poɔ zaaŋ na pɛle ka ho neŋ ho zɔmeŋɛ na laŋ gaa be! Jehoova meŋ waa ŋa ho zɔmeŋɛ na, a baŋ yɛlɛ na meŋ zaa naŋ na e nendaare kaŋa. Azuŋ, ka teneeŋ na woŋ Baabole daŋyelbo muni soŋ, aseŋ ka te yi sigrimennoŋ poɔŋ a sɔre Jehoova sommo.​—Daan. 2:28; 2 Pit. 1:19, 20.

4. Ananso la wala ka Jehoova vɛŋ baŋ sɛge daŋyelbo eŋ o Yelbiri na poɔŋ? (Jeremaiya 29:11) (Kaa a foto meŋ.)

⁴ Aŋa lɛ bidɔgreba naŋ maŋ boɔrɔ ka ba biiri taa popeɛloŋ  nendaare kaŋa na, lɛ ka Jehoova meŋ boɔrɔ korɔ o biiri. (Kanne Jeremaiya 29:11.) Jehoova na baŋ wulee yɛlɛ meŋɛmeŋɛ naŋ na e nendaare kaŋa, kyɛ bidɔgreba yɛŋ koŋ baŋ e lɛ. Jehoova vɛŋɛɛŋ ka noba mine sɛge daŋyelbo eŋ o Yelbiri na poɔŋ ka lɛ na vɛŋ ka te baŋ yelnimizeere naŋ na e nendaare kaŋa sɛre kyɛ ka ana yɛlɛ na nyɛ eebo. (Aiz. 46:10) A Baabole daŋyelbo eɛ kyɔɔta-sonne naŋ yi te Saa naŋ be sazuŋ zie. Kyɛ wala hoŋ na baŋ e sagedi meŋɛmeŋɛ ka yɛlɛ na a Baabole naŋ daŋyel biŋ na na nyɛɛ eebo?

5. Bo ka baapaalba na baŋ zanne yi Max zemmo yɛlɛ ŋa poɔŋ?

⁵ Noba naŋ ba taa gyeremɛ ko a Baabole la maŋ ŋmaa gyeere te yɔɔmine naŋ e baapaalba na ka ba naŋ wa gaa sakuu. Ba yelyaga ane ba yel-eree na baŋ vɛmeŋ ka te yɔɔmine ŋa piili bonnɔ yɛlɛ ba naŋ sagedi. Te nyɛ te yɔɔdɔɔ Max zemmo yɛlɛ. O yeleeŋ ka: “Saŋa na maŋ da gɛrɛ sakuu na, N da piili bonnɔŋ ka, ka lɛ yelmeŋɛ puoruu la ka N dɔgreba wulo ma bee, a da bonnɔ meŋ ka ka lɛ Naaŋmen vooroŋ soŋ la vɛŋ baŋ sɛge a Baabole bee.” Wala ka o dɔgreba da e? O yeleeŋ ka, “Ba da eɛ bɔĩĩ aneazaa ka a yɛlɛ da dɔnnɔ baŋ.” Max dɔgreba da de la a Baabole iri o soorebie zaa nɔɛ koo. Max meŋ da eɛ yelkaŋa. O yeleeŋ ka, “N da maŋ zannɛɛ Baabole daŋyelbo N meŋɛŋ, a vɛŋ ka N neŋ N taaba mine meŋ maŋ di dama kyaare yɛlɛ na maŋ zanne na.” Boŋ da yi a poɔŋ wa? Max yeleeŋ ka, “A yɛlɛ ŋa da soŋ maŋ maŋ wa sagedi ka Naaŋmen vooroŋ soŋ la e ka ba sɛge a Baabole!”

6. Bo aŋ seŋ ka ho e ka hooŋ piili taa bonnoo, ka ananso la wala?

⁶ Ka hooŋ meŋ piili bonnɔ ka a Baabole la taa a yelmeŋɛ aŋa Max, ta vɛŋ ka vi kpɛ bo. Kyɛ aseŋ ka ho e yelkaŋa wieoŋ a kyaare a yɛlɛ. Bonnoo waa ŋa bon naŋ le zoɔ̃. Ka ho bon nanee kaŋaŋ le zoɔ̃ ka hooŋ ba iri a zoɔ̃ bare, o na baŋ sãã la a bon. Ka hooŋ boɔrɔ ka ho iri bonnoo zaa naŋ na baŋ sãã ho sagediibu bare, aseŋ ka ho soore ho meŋɛ ka, ‘Ka lɛ N sagɛɛ yɛlɛ na a Baabole naŋ yel kyaare nendaare kaŋa na di bee?’ Ka hooŋ ba sagaadi te baare, lɛ yɛŋ aseŋ ka ho zanne a Baabole daŋyelbo mine naŋ nyɛ eebo. Wala hoŋ na toɔ̃ e lɛ?

7. Boŋ da maŋ soŋ Daaniel oŋ zanne daŋyelbo yɛlɛ soŋ? (Daaniel 12:10) (Kaa a foto meŋ.)

⁷ Daaniel e la ewuli soŋ a ko te zaa a kyaare lɛ teŋ na baŋ zanne daŋyelbo yɛlɛ. Teɛroŋ soŋ ka Daaniel da maŋ de zanna a daŋyelbo yɛlɛ, o da maŋ boɔrɔŋ ka o baŋ a yelmeŋɛ. Daaniel da taa la sigrimennoŋ meŋ. O da sagedieŋ ka, ka o naŋ peɛle Jehoova a kyɛ erɛ o boɔbo, o na somooŋ ka o woŋ daŋyelbo yɛlɛ muni soŋ. (Daan. 2:27, 28; kanne Daaniel 12:10.) Daaniel da wuleeŋ ka o taa la sigrimennoŋ a yi oŋ da maŋ dɛle Jehoova na. (Daan. 2:18) Daaniel meŋ da maŋ lɛ peɛrɛɛ yɛlɛ gaa tɔɔre. O da maŋ peɛre bɔ la o soorebie nɔɛ iribo yi a Baabole gama na naŋ da bebe na poɔŋ. (Jer. 25:11, 12; Daan. 9:2) Sobuo hoŋ na baŋ tɔgle Daaniel?

8. Ananso la wala ka noba mine teɛrɛ ka Baabole daŋyelbo koŋ nyɛ eebo? Kyɛ bo aŋ seŋ ka te e?

 ⁸ Ananso la wala hoŋ zanna Baabole daŋyelbo? Ho naŋ boɔrɔ ka ho baŋ a yelmeŋɛ zuŋ hoŋ zanna Baabole daŋyelbo bee? Ka ho teɛroŋ wa la lɛ, Jehoova na soŋ boŋ. (Gyn. 4:23, 24; 14:16, 17) Kyɛ noba mine yɛŋ, yɛlɛ mine zuŋ baŋ zanna a Baabole. Ba mine maŋ zannɛɛ a Baabole ka ba nyɛ sieree naŋ wuli ka a Baabole ba yi Naaŋmen zie. Ba teɛroŋ la ka, ka a Baaboleŋ ba yi Naaŋmen zie yɛŋ, ba na baŋ wulee ba menne yɛlɛ naŋ soma ane yɛlɛ naŋ ba soma. Kyɛ aseŋ ka te de teɛroŋ soŋ zanna ne a Baabole. Gyogo kaŋa meŋ la bebeŋ aŋ e nimizeɛ ka te taa a kyɛ na baŋ woŋ Baabole daŋyelbo muni soŋ.

9. Bo gyogo aŋ seŋ ka te taa aŋ na baŋ soŋ te ka te woŋ Baabole daŋyelbo muni soŋ? Wuli a muni.

⁹ Taa sigrimennoŋ. Jehoova eŋɛɛ noɔre ka o na soŋɛɛ bana naŋ taa sigrimennoŋ gyogo na. (Gyi. 4:6) Azuŋ aseŋ ka te puore sɔroo ka O soŋ te ka te woŋ a Baabole daŋyelbo muni soŋ. Ka teneeŋ taa sigrimennoŋ meŋ te na sagɛɛ a gbaŋgba-bivelaa sommo, bana ka Jehoova iri ka ba korɔ te siiloŋ poɔ bondirii wagre naŋ seŋ neŋ poɔŋ na. (Luk. 12:42) Jehoova ba e Naaŋmen naŋ dɔnnɔ yɛlɛ laŋna taa, azuŋ yɛŋ bebeŋ o naŋ tu zi-yenaa yoŋ kyɛ sonnɔ te ka te woŋ yelmenne naŋ be o Yelbiri poɔŋ na muni soŋ.​—1 Kor. 14:33; Efe. 4:4-6.

10. Boŋ hoŋ zanne yi Esther zemmo yɛlɛ ŋa poɔŋ?

¹⁰ Maŋ peɛre yɛlɛ gaa tɔɔre. Daŋ kaa iri daŋyelbo yɛlɛ naŋ noma korɔ bo, a peɛre o yɛlɛ gaa tɔɔre. Lɛ ka te yɔɔpɔge kaŋa yuori naŋ di Esther da e. O da boɔrɔŋ ka o baŋ yɛlɛ yaga kyaare a Mɛzaaya waabo daŋyelbo yɛlɛ na. O yeleeŋ ka, “Saŋa na maŋ da di yuomo 15 na, N da piileeŋ a peɛrɛ yɛlɛ ka N nyɛ sieree naŋ wuli ka ba sɛgɛɛ ana daŋyelbo na sɛre kyɛ ka Yezu wa.” Yɛlɛ na oŋ da zanne saŋa na oŋ da kanne yɛlɛ kyaare a Maŋkũũ Gama na da vɛŋɛɛŋ oŋ wa sagedi. O yeleeŋ ka, “Ba da sɛgɛɛ ana gama na mine sɛre kyɛ ka Krista wa, azuŋ daŋyelbo naŋ be a poɔŋ na yi la Naaŋmen zie.” Esther la yeleeŋ ka, “A yɛlɛ mine bebeŋ, N maŋ kannaaŋ a lɛ maaleŋ kannaa gbɛɛ yaga sɛre kyɛ woŋ a muni soŋ.” Kyɛ o poɔ pɛlɛɛŋ o naŋ mɔɔ a peɛre a yɛlɛ soŋ. Saŋa na oŋ peɛre Baabole daŋyelbo yaga gaa tɔɔre baare na, o yeleeŋ ka, “N wa nyɛɛŋ ka a Baabole yɛlɛ eɛ yelmeŋɛ!”

11. Bo tɔnɔ teŋ na nyɛ ka teneeŋ peɛre wa baŋ ka a Baabole poɔ yɛlɛ eɛ yelmeŋɛ?

¹¹ Ka teneeŋ nyɛ lɛ daŋyelbo naŋ be Naaŋmen Yelbiri poɔŋ naŋ nyɛ eebo na, a na vɛmeŋ ka te maaleŋ dɛle Jehoova yaga zaa ane sowuli na o naŋ korɔ te na. Baabole daŋyelbo meŋ maŋ soŋ teŋ teŋ taa teɛretɔ ka nendaarekaŋa naŋ soma waanaŋ, aneazaa ka te tuoree yelkpeɛne pampana. Te nyɛ daŋyelbo ayi mine Daaniel naŋ sɛge biŋ aŋ nyɛrɛ eebo pampana. Te na baŋ de la gbɛ-sonne ka teneeŋ woŋ a muni soŋ.

12. A gbɛsampama naŋ e “kuree naŋ gyɛri yagi eŋɛŋ” na, bo aŋ are ko? (Daaniel 2:41-43)

¹² Kanne Daaniel 2:41-43. A gaŋzannoo Naa Nebukadineezer naŋ da gaŋzanne a nyɛ  nensaalaa waaloŋ kaŋa ka Daaniel da wuli o muni koo na, a nensaalaa waaloŋ ŋa gbɛsampama da eɛ “kuree naŋ gyɛri yagi eŋɛŋ.” Ka teneeŋ de a daŋyelbo ŋa manne ne daŋyelbo mine naŋ be a Daaniel ane Yel-iriwulaa gama na poɔŋ, te na baŋ yeleŋ ka a gbɛsampama ŋa are ko la a United States paaloŋ ane a Britian paaloŋ. Ba na la laŋ tonɔ toma, ka ba naaŋ diibu meŋ taa kpeɛ̃o yaga zaa a donɛɛ zuŋ zenɛ ŋa. Daaniel da yeleeŋ ka “a naaloŋ kyɛlee na taa la kpeɛ̃o ka o kyɛlee meŋ [koŋ taa kpeɛ̃o].” Ananso la wala ka o kyɛlee koŋ taa kpeɛ̃o? Bonso a noba naŋ be a naaloŋ ŋa poɔŋ naŋ are ko a yagi na koŋ vɛŋ ka a naaloŋ ŋa dire naaŋ aŋa kuruu. b

13. Bo yelmenne naŋ e nimizeɛ teŋ zanne yi a daŋyelbo ŋa poɔŋ?

¹³ Te na baŋ zannɛɛ yelnimizeere yaga yi a nensaalaa waaloŋ na Daaniel naŋ da manne o yɛlɛ na, agaŋaazaa te na baŋ zannɛɛ yɛlɛ yaga yi o gbɛsampama na eŋɛŋ. A dɛndɛŋ soba, United States ane a Britian paalonne naaŋ diibu na wuleeŋ ka ba taa la kpeɛ̃o. Aŋa mannoo poɔŋ, United States paaloŋ ane a Britian paaloŋ eɛ paalonne na mine naŋ da zɔɔtoɔ̃ a Donɛɛ Zaa Zɔɔ Dɛndɛŋ ane Ayi Soba na poɔŋ. Kyɛ a donɛɛ zaa naaloŋ ŋa kpeɛ̃o sigee teŋɛ a naŋ kyɛnɛ sigre teŋɛ bonso, noba naŋ be o poɔŋ na maŋ zɔɔrɛɛ taa a zɔɔrɔ ne ba namine meŋ. Ayi soba, a donɛɛ zaa naaŋ diibu kpeɛ̃o ŋa la a baaraa soba sɛre kyɛ ka Naaŋmen Naaloŋ na na wa sãã a donɛɛ namine zaa. Aneazaa ka paalonne mine na iri zɔɔrɔ neŋ la a United States ane a Britian paalonne naaŋ diibu na, kyɛ ba koŋ toɔ̃ zɔɔtoɔ̃ ba a wa leɛ a donɛɛ zaa naaŋ diibu kpeɛ̃o. Te baŋɛɛ lɛ bonso “a kuurii” naŋ are ko Naaŋmen Naaloŋ na na ŋmurɛɛ a gbɛsampama naŋ are ko a United States ane a Britian paalonne naaŋ diibu na.​—Daan. 2:34, 35, 44, 45.

14. Ka teneeŋ baŋ a daŋyelbo naŋ kyaare a gbɛsampama naŋ e kuree ane yagi na, sobuoŋ aŋ na soŋ te ka te derɛ gbɛ-sonne?

¹⁴ Ho sagedieŋ ka Daaniel daŋyelbo ŋa naŋ kyaare a gbɛsampama naŋ e kuree ane yagi na eɛ yelmeŋɛ bee? Ka lɛ na, a na soŋ boŋ ka ho erɛ yɛlɛ naŋ soma ho zemmo poɔŋ. Ho koŋ moɔ̃ nimiri boɔrɔ bondaanboma meŋ, bonso ho baŋɛɛŋ ka a koŋ kɔɔre a donfaa ŋa na sãã la. (Luk. 12:16-21; 1 Gyn. 2:15-17) Ka hooŋ baŋ a daŋyelbo ŋa muni soŋ, a na soŋ boŋ ka ho de a naaŋ moɔloo ane a wulibo toma nimizeɛ. (Mat. 6:33; 28:18-20) Ka hooŋ wa zanne a daŋyelbo ŋa yɛlɛ baare, soore ho meŋɛ ka, ‘N gbɛ deree wuleeŋ ka N sagedieŋ peɛlaaŋ ka a koŋ kɔɔre Naaŋmen Naaloŋ na sãã la nensaaleba namine zaa bee?’

15. Nembobo la “a samun-gɔɔ seŋ naa” ane “a samun-duri seŋ naa” zenɛ ŋa? (Daaniel 11:40)

¹⁵ Kanne Daaniel 11:40. Daaniel zuri 11 yelee namine bayi mine naŋ zɔɔrɔ ne taa ka ba deɛ a donɛɛ naaŋ diibu kpeɛ̃o yɛlɛ. Ka teneeŋ de a daŋyelbo ŋa manne daŋyelbo mine naŋ be a Baabole poɔŋ, te na nyɛŋ ka “a samun-gɔɔ seŋ naa na” la Russia aneŋ paalonne naŋ are o puoreŋ na, ka “a samun-duri seŋ naa na” e United States ane a Britian paalonne naaŋ diibu na. c

16. Boŋ ka “a samun-gɔɔ seŋ naa na” erɛ Jehoova puorebiiri zenɛ ŋa?

¹⁶ Naaŋmen noba na naŋ be “a samun-gɔɔ  seŋ naa na” puliŋ tuoree dɔgroŋ. Ba maŋ ŋmɛ la ba mine a kyɛ nyɔge ba eŋ nempɔgedie poɔŋ ba sagediibu zuŋ. Dɔgroŋ na “a samun-gɔɔ seŋ naa” naŋ dɔgrɔ te yɔɔmine na ba eŋnɛ ba dabeɛ̃, kyɛ a vɛŋɛɛŋ ka ba sagediibu maaleŋ erɛ kpeɛŋaa yaga zaa. Bonso te yɔɔmine na baŋɛɛŋ ka dɔgroŋ na Naaŋmen puorebiiri naŋ tuoro na eɛ Daaniel daŋyelbo yɛlɛ naŋ nyɛrɛ eebo. d (Daan. 11:41) Ka teneeŋ baŋ lɛ, a na vɛmeŋ ka te teɛretɔ na maaleŋ e kpeɛŋaa kyɛ ka te naŋ dire yelmennoŋ korɔ Jehoova meŋ.

17. Bo yelkpeɛne ka Naaŋmen puorebiiri naŋ be “a samun-duri seŋ naa na” puliŋ da tuoro?

¹⁷ Yuomo mine naŋ pare “a samun-duri seŋ naa na” meŋ dɔgrɛɛ Jehoova puorebiiri. A yi yuoni 1900 a wa tɔ yuoni 1950, ba da nyɔgɛɛ te yɔɔmine yaga eŋ nempɔgedieŋ a kyɛ kare ba mine biiri meŋ yi sakuu poɔŋ, ba naŋ ba boɔrɔ ka ba de ba menne eŋ a donɛɛ ŋa naaŋ di yɛlɛ poɔŋ zuŋ. Kyɛ beraayi ŋa yɛŋ, Jehoova puorebiiri naŋ be a samun-duri seŋ naa ŋa puliŋ na  leɛ tuoree pigrinyɛ naŋ e a yoŋ a kyaare yelmennoŋ ba naŋ taa ko Naaŋmen Naaloŋ na. Aŋa mannoo poɔŋ, ka ba naŋ wa erɛ ba naaŋ di yɛlɛ, a na baŋ eɛ pigrinyɛ ka Kristabie are a naaŋ diibu kaŋa puoriŋ. Aminekaŋaŋ, o koŋ te vote yɛŋ, kyɛ o teɛroŋ ane o sukyiri poɔŋ yɛŋ o arɛɛ a naaŋ kaŋa puoriŋ. Azuŋ a eɛ nimizeɛ ka te tage te menne yi a donɛɛ ŋa naaŋ di yɛlɛ zaa poɔŋ, te teɛroŋ poɔŋ ane te yel-eree meŋ poɔŋ!​—Gyn. 15:18, 19; 18:36.

18. Wala teŋ na e te yɛlɛ a kyaare zɔɔre naŋ be a namine bayi ŋa kpakyagaŋ? (Kaa a foto meŋ.)

¹⁸ Aminekaŋaŋ noba naŋ ba taa sagediibu a Baabole daŋyelbo eŋɛŋ na, dabeɛ̃ na kpɛ baŋ ka ba naŋ wa nyɛ ka “a samun-duri seŋ naa na” ane “a samun-gɔɔ seŋ naa na” tagrɛɛ taa. (Daan. 11:40) A namine ŋa bayi zaa taa la zɔɔzɔɔ boma baŋ na baŋ de sãã ne bonvore zaa naŋ be a donɛɛ ŋa zuŋ. Kyɛ te baŋ ka Jehoova koŋ tere sori ka lɛ e. (Aiz. 45:18) Te ta vɛŋ ka a zɔɔre naŋ be “a samun-gɔɔ seŋ naa” ane “a samun-duri seŋ naa” kpakyagaŋ na eŋ te dabeɛ̃, kyɛ te vɛŋ ka a eŋ te sagediibu faŋa. A eɛ sieree naŋ wuli ka a donfaa ŋa baaroo taɛ la.

19. Bo yelmeŋɛ aŋ seŋ ka te sage a kyaare daŋyelbo yɛlɛ?

¹⁹ Te ba baŋ lɛ Baabole daŋyelbo naŋ na nyɛ eebo nendaarekaŋa. Daŋyele Daaniel meŋ da ba baŋ yɛlɛ na o naŋ da sɛge na zaa muni. (Daan. 12:8, 9) Azuŋ, ka teneeŋ ba baŋ lɛ daŋyelbo yɛlɛ naŋ na nyɛ eebo ba wuli ka a koŋ nyɛ eebo. Te taa la sagediibu ka, Jehoova na wuli teŋ yɛlɛ naŋ seŋ ka te baŋ wagre naŋ seŋ neŋ poɔŋ, aŋa lɛ o naŋ da e takoreŋ saŋa na.​—Eem. 3:7.

20. A koŋ kɔɔre bo Baabole daŋyelbo la na nyɛ eebo? Bo aŋ seŋ ka te naŋ moɔ̃ nimiri erɛ?

²⁰ Ba na moɔlɔ yeleŋ ka “emmaaroŋ ane zeŋ-laafeɛ bebe la.” (1 Tɛs. 5:3) A koŋ kɔɔre a donɛɛ ŋa namine na iri zɔɔ ne la zirii puoruu a sãã ba kpɛlɛŋkpɛlɛŋ. (Yel. 17:16, 17) A puoriŋ, ka ba pãã wa Naaŋmen puorebiiri meŋ eŋɛŋ. (Izik. 38:18, 19) A yɛlɛ ŋa na eŋ sɛre kyɛ ka Hammagedon, a zɔ-baaraa na piili. (Yel. 16:14, 16) Te taa la sagediibu ka a koŋ kɔɔre a yɛlɛ ŋa zaa na nyɛɛ eebo. Kyɛ pampana yɛŋ, te naŋ vɛŋ ka te teɛroŋ zaa be Baabole daŋyelbo yɛlɛ eŋɛŋ a sonnɔ noba mine meŋ ka ba erɛ lɛ, a de wuli te nimipa ko te Saa naŋ be sazuŋ na.