ZANNOO YƐLƐ 34
YIELOŊ 107 The Divine Pattern of Love
Lɛ A Lantaapuoruu Nembɛrɛ Naŋ Maŋ Wuli Nɔmmo Ane Nimimaaroŋ Ko Neɛ Naŋ E Yelfaa
“Naaŋmen nimimaaroŋ bebe la ka ka yɛ leɛ yɛ eebo.”—URO. 2:4.
YƐLƐ TE NAŊ NA ZANNE
Sori na a nembɛrɛ naŋ maŋ tu a mɔɔrɔ ka ba soŋ noba naŋ e yelfaare naŋ e nimizeɛ a lantaapuoruu poɔŋ.
1. Boŋ na baŋ e ka neɛ kaŋaŋ wa e yelfaa naŋ e nimizeɛ?
A ZANNOO naŋ pare na poɔŋ, te zanne nyɛɛ lɛ Pɔɔl naŋ da yelka a lantaapuoruu naŋ be Korinti na e saŋa na neɛ kaŋa naŋ da e yelfaa naŋ e nimizeɛ na. A soba da ba e kaŋdabaŋkalɛ neŋ yelfaa na o naŋ e na, azuŋ a da seŋ ka ba iri o bare a lantaapuoruu poɔŋ. Kyɛ aŋa lɛ a sɛgre ba naŋ iri a zannoo ŋa yi naŋ wuli na, noba naŋ e yelfaare naŋ e nimizeɛ na, Naaŋmen na baŋ soŋ baŋ ka ba e kaŋdabaŋkalɛ a leɛre ba eebo. (Uro. 2:4) Sobuo oŋ maŋ tu a nembɛrɛ eŋɛŋ kyɛ soŋ neɛ oŋ e kaŋdabaŋkalɛ o yelfaare yɛlɛ?
2-3. Wala aŋ seŋ ka te e ka teneeŋ baŋ ka te yɔɔ kaŋa eɛ yelfaa naŋ e nimizeɛ, ka ananso la wala?
2 Ka a nembɛrɛŋ ba baŋ ka neɛ kaŋa eɛ yelfaa kaŋa naŋ e nimizeɛ, ba koŋ baŋ soŋ o soba. Azuŋ ka hooŋ baŋ ka neɛ kaŋa eɛ yelfaa kaŋa naŋ e nimizeɛ ka lɛ na baŋ vɛŋ ka ba iri o soba bare a lantaapuoruu poɔŋ, wala aŋ seŋ ka ho e? Eŋ o soba faŋa ka o gaa a nembɛrɛ zie a te bɔ sommo.—Aiz. 1:18; Tom. 20:28; 1 Pit. 5:2.
3 Kyɛ ka o sobaŋ zagre ka o gaa a nembɛrɛ zie, wala aŋ seŋ ka te e? Aseŋ ka te gaa a nembɛrɛ zie te meŋɛŋ a te vɛŋ ka ba baŋ a yɛlɛ, a toɔ̃ de sommo naŋ seŋ neŋ ko o soba. Ka teneeŋ wa e lɛ, te wulee nɔmmo ko te yɔɔ na bonso te baŋ ka a nembɛrɛ na baŋ soŋɛɛ o soba. Ka o sobaŋ naŋ moɔ̃ nimiri a erɛ a yelfaa, o neŋ Jehoova niiloŋ na sãã kpɛlɛŋkpɛlɛŋ. Ka noba naŋ ba puoro Jehoova meŋ wa woŋ yɛlɛ na o naŋ e na, a na baŋ sãã la a lantaapuoruu yosoŋ. Azuŋ aneazaa ka ana baŋ eɛ kpeɛŋaa, kyɛ aseŋ ka te gaa a nembɛrɛ zie a te yel a yɛlɛ ko ba, bonso te nɔŋɛɛ Jehoova ane te yɔɔ na naŋ e a yelfaa naŋ e nimizeɛ na.—Yiem. 27:14.
LƐ A NEMBƐRƐ NAŊ MAŊ SOŊ NEƐ NAŊ E YELFAA NAŊ E NIMIZEƐ
4. Boŋ ka a nembɛrɛ maŋ mɔɔrɔ ba moɔbo zaa ka ba e ka ba naŋ wa zeŋ neŋ neɛ kaŋa naŋ e yelfaa naŋ e nimizeɛ?
4 Ka neɛ kaŋa naŋ be a lantaapuoruu poɔŋ wa e yelfaa kaŋa naŋ e nimizeɛ, a nembɛrɛ maŋ kaa iree nembɛrɛ bata ka ba gaa te zeŋ neŋ o soba a kpɛ a yɛlɛ poɔŋ. a Aseŋ ka a dɔbɔ ŋa taa sigrimennoŋ a baŋ ba e ta zie meŋ. Aneazaa ka ba boɔrɔŋ ka ba soŋ o soba, kyɛ ba baŋɛɛŋ meŋ ka ba koŋ baŋ fɛre o soba ka o leɛre o eebo. (Dut. 30:19) A nembɛrɛ baŋɛɛŋ ka neɛzaa naaneŋ na e kaŋdabaŋkalɛ a leɛre o eebo aŋa lɛ Naa Deevid naŋ da e na. (2 Saa. 12:13) Saŋa kaŋa, noba mine naŋ e yelfaare naŋ e nimizeɛ maŋ zagrɛɛ kawane na Jehoova naŋ korɔ ba na. (Mun. 4:6-8) Kyɛ a nembɛrɛ boɔbo zaa la ka ba mɔɔ lɛ zaa baŋ na toɔ̃ kyɛ soŋ o soba ka o e kaŋdabaŋkalɛ a leɛre o eebo. Boŋ seŋ ka a be a nembɛrɛ teɛroŋ ka ba naŋ wa sonnɔ neɛ kaŋa naŋ e yelfaa naŋ e nimizeɛ?
5. Ka a nembɛrɛŋ wa laŋ zeŋ neŋ neɛ kaŋa naŋ e yelfaa naŋ e nimizeɛ, bo gyogo aŋ seŋ ka ba taa? (2 Timoti 2:24-26) (Kaa a foto meŋ.)
5 A nembɛrɛ maŋ baŋeŋ ka, aneazaa ka o soba eɛ yelfaa naŋ e nimizeɛ, kyɛ o naŋ eɛ nanee yaga zaa ko Jehoova. (Luk. 15:4, 6) Azuŋ ba ba maŋ yele yɛlɛ korɔ o soba nimikuonii soriŋ bee a erɛ o yɛlɛ naŋ ba soma. A nembɛrɛ ba maŋ nyɛ ka ba toma zaa la ka ba peɛre o soba yɛlɛ a baŋ a yɛlɛ zaa naŋ e. Kyɛ ba maŋ wulee gyogri na naŋ be 2 Timoti 2:24-26. (Kanne.) A nembɛrɛ maŋ eɛ bɔin, a kyɛ wulo nimimaaroŋ bonso ba boɔrɔŋ ka ba soŋ o soba ka o leɛre o teɛroŋ.
Aŋa lɛ na pekyeeneba naŋ da maŋ erɛ takoreŋ saŋa na, lɛ meŋ ka a nembɛrɛ maŋ mɔɔrɔ ba moɔbo zaa ka ba soŋ Jehoova pere naŋ bɔre (Kanne o wɛlbo 5)
6. Sɛre kyɛ ka a nembɛrɛ na gaa ka ba neŋ neɛ kaŋa naŋ e yelfaa naŋ e nimizeɛ zeŋ a kpɛ a yɛlɛ poɔŋ na, sobuo baŋ maŋ nare ba menne? (Urom 2:4)
6 A nembɛrɛ maŋ de la wagre a bɔ Jehoova sowuli. Ba maŋ mɔɔrɔŋ ka ba tɔgle Jehoova saŋa na ba naŋ sonnɔ neɛ kaŋa naŋ e yelfaa naŋ e nimizeɛ na, a maŋ teɛre Pɔɔl yelbie ŋa: “Naaŋmen nimimaaroŋ bebe la ka ka yɛ leɛ yɛ eebo.” (Kanne Urom 2:4.) A nembɛrɛ eɛ pekyeeneba, aseŋ ka ba tuuro a Krista sowuli a maŋ tɔglɔ o a kaara a lantaapuoruu zu soŋ. (Aiz. 11:3, 4; Mat. 18:18-20) Sɛre kyɛ ka a nembɛrɛ na gaa te zeŋ neŋ a soba na naŋ e yelfaa naŋ e nimizeɛ na, ba maŋ daŋ puore sɔrɛɛ Jehoova ka o soŋ ka o soba e kaŋdabaŋkalɛ. Ba maŋ peɛrɛɛ yɛlɛ yi a Baabole ane te gama na poɔŋ, a maŋ puore sɔre Jehoova ka o soŋ ba ka ba baŋ lɛ yɛlɛ naŋ waa ko o soba, a toɔ̃ baŋ a yɛlɛ zaa meŋ. Ba maŋ mɔɔrɔŋ meŋ ka ba baŋ yɛlɛ naŋ na baŋ vɛŋ ka o soba e yɛlɛ na o naŋ e na bee a taa a lɛ teɛroŋ na.—Yeng. 20:5.
7-8. Ka a nembɛrɛŋ wa zeŋ neŋ neɛ kaŋa naŋ e yelfaa naŋ e nimizeɛ, sobuo baŋ na baŋ tɔgle Jehoova kannyiri diibu na?
7 A nembɛrɛ maŋ tɔglɛɛ Jehoova kannyiri na. Ba maŋ leɛteɛrɛɛ lɛ Jehoova naŋ da e noba mine naŋ da e yelfaare naŋ e nimizeɛ saŋa kaŋa naŋ pare. Aŋa mannoo poɔŋ, Jehoova da di la kannyiri ko Keein. O da yelkooŋ yɛlɛ naŋ na e ka o naŋ ba leɛre o eebo, a vɛŋ oŋ baŋ meŋ ka ka o naŋ leɛre o eebo, o na nyɛɛ maaloo. (Mun. 4:6, 7) Jehoova da toŋ la daŋyele Neetaŋ oŋ gaa ko Deevid kawane. O da de la yelmannaa kaŋa toŋ neŋ toma a somoo oŋ e kaŋdabaŋkalɛ a leɛre o eebo. (2 Saa. 12:1-7) Ane meŋ, ka a Izerayɛl biiriŋ wa zagre Jehoova noɔre, o da maŋ ‘toŋɛɛ’ o daŋyelba ‘bebiri zaa’ ka ba gaa ba zie. (Jer. 7:24, 25) O da ba maŋ kyɛnlɛ ka o noba na e kaŋdabaŋkalɛ sɛre kyɛ ka o soŋ ba. Kyɛ saŋa na gba baŋ da naŋ be ba yelfaare poɔŋ na, o da maŋ eŋnɛ baŋ faŋa ka ba e kaŋdabaŋkalɛ.
8 Lɛ ka a nembɛrɛ maŋ tɔglɔ Jehoova ewuli sonne na ka ba naŋ wa mɔɔrɔ ka ba soŋ noba naŋ e yelfaare naŋ e nimizeɛ. A nembɛrɛ maŋ taa la “kannyiri kpoŋ” ko ba aŋa lɛ 2 Timoti 4:2 naŋ yel na. Azuŋ a na maŋ fɛreŋ ka lantaapuoruu neŋkpoŋ taa kannyiri a kyɛ e bɔin ka o naŋ wa sonnɔ neɛ kaŋa naŋ e yelfaa naŋ e nimizeɛ ka o leɛ boɔrɔ yelsonne eebo. Ka a lantaapuoruu neŋkpoŋ suuriŋ iri, a soba na naŋ e a yelfaa naŋ e nimizeɛ na koŋ kyɛnle woŋ kawane zaa oŋ na koo na.
9-10. Sobuo ka a nembɛrɛ na baŋ soŋ neɛ naŋ e yelfaa naŋ e nimizeɛ na ka o nyɛ yɛlɛ naŋ vɛŋ oŋ te e a yelfaa?
9 A nembɛrɛ maŋ mɔɔrɔŋ ka ba baŋ gbɛre na o soba naŋ de aŋ vɛŋ oŋ te e a lɛ yelfaa na. Aŋa mannoo poɔŋ, bo yɛlɛ la da vɛŋ ka o neŋ Jehoova niiloŋ ba lɛ e kpeɛŋaa? O barɛɛ o Baabole zannoo ane a naaŋ moɔloo gaabo bee? O ba lɛ kyaara puoro sɔrɔ Jehoova bee? O terɛɛ sori ka teɛroŋ faare nyɛ kpeɛ̃o o eŋɛŋ bee? Nembobo la o zɔmenne? Bo yɛlɛ oŋ maŋ de pɛlɛ o niŋe? Sobuo aŋ nyɛ kpeɛ̃o o teɛroŋ ane o sukyiri poɔŋ? Ka lɛ o baŋɛɛ lɛ a yɛlɛ na o naŋ e na naŋ sãã o Saa Jehoova poɔ seŋ bee?
10 A nembɛrɛ na baŋ soorooŋ soorebie naŋ na baŋ somoo ka o nyɛ yɛlɛ na naŋ vɛŋ ka o neŋ Jehoova niiloŋ ba lɛ e kpeɛŋaa ka lɛ vɛŋ oŋ te e a yelfaa na. Ba maŋ eɛ lɛ neŋ nimimaaroŋ, kyɛ ba ba maŋ sooroo yɛlɛ mine naŋ e o yoŋ yɛlɛ ka neɛzaa ba seŋ ka o baŋ. (Yeng. 20:5) A nembɛrɛ meŋ na baŋ de la yelmannaa a soŋ o soba ka o nyɛ ka yɛlɛ na o naŋ e na ba soma, aŋa lɛ na Neetaŋ naŋ da de yelmannaa soŋ Deevid na. Aminekaŋaŋ, a dɛndɛŋ saŋa na a nembɛrɛ neŋ a soba naŋ na zeŋ ka ba kpɛ a yɛlɛ poɔŋ na, o meŋɛ na wa nyɛŋ ka yɛlɛ na o naŋ e na ba soma, ka o poɔ sãã neŋ yɛlɛ na o naŋ e na. Aminekaŋaŋ gba o na eɛ kaŋdabaŋkalɛ.
11. Wala ka Yezu da e noba naŋ e yelfaare naŋ e nimizeɛ?
11 A nembɛrɛ maŋ mɔɔrɔŋ ka ba tɔglɔ Yezu. Saŋa na Yezu naŋ da yele yɛlɛ korɔ Sɔɔl naŋ yi Taasus na, o da soorooŋ a soorebiri ŋa: “Sɔɔl, Sɔɔl, bonso ka ho dɔgrɔ ma lɛ?” Yezu da soorooŋ a soorebiri ŋa a somoo oŋ nyɛ ka yɛlɛ na o naŋ erɛ na ba soma. (Tom. 9:3-6) Yezu da yelee yelkaŋa a kyaare “Gyɛzebɛl” meŋ, o da yeleeŋ ka: “N . . . ko la a Gyɛzebɛl vuo ka o leɛ o eebo.”—Yel. 2:20, 21.
12-13. Sobuo ka a nembɛrɛ na baŋ ko neɛ naŋ e yelfaa naŋ e nimizeɛ wagre ka o e kaŋdabaŋkalɛ? (Kaa a foto meŋ.)
12 A nembɛrɛ naŋ maŋ tɔglɔ Yezu na zuŋ, ba ba maŋ kyere ba menne a di a soba sɛrɛɛ ka o koŋ e kaŋdabaŋkalɛ. Ba mine na baŋ eɛ kaŋdabaŋkalɛ a dɛndɛŋ saŋa na a nembɛrɛ naŋ na zeŋ neŋ ba na, kyɛ ba mine meŋ, aminekaŋaŋ a na de la wagre fẽẽ kyɛ ka ba toɔ̃ e lɛ. Azuŋ a nembɛrɛ na baŋ sɛgrɛɛ yɛlɛ ka ba neŋ a soba lɛ zeŋ a kpɛ a yɛlɛ poɔŋ. Aminekaŋaŋ, ka ba neŋ o sobaŋ wa zeŋ a kpɛ a yɛlɛ poɔŋ a dɛndɛŋ saŋa na, a soba na teɛrɛɛ yɛlɛ na ba naŋ yelkoo na gaa tɔɔre. Kaapɔge o na yi la sigrimennoŋ poɔŋ a sɔre Jehoova ka o di suuri koo. (Yiem. 32:5; 38:18) Azuŋ ka o neŋ a nembɛrɛŋ lɛ wa zeŋ, aminekaŋaŋ o na wulee gyog-soŋ a gaŋ a dɛndɛŋ saŋa na ba neŋ o naŋ da zeŋ na.
13 A nembɛrɛ maŋ wulee nimimaaroŋ, a mɔɔrɔ ka ba baŋ lɛ a yɛlɛ naŋ dɔnnɔ a soba seŋ, ka ba toɔ̃ somoo ka o e kaŋdabaŋkalɛ a leɛre o eebo. Ba puore sɔre zaa maŋ la ka Jehoova soŋ ba ka ba toɔ̃ soŋ a soba na naŋ e a yelfaa naŋ e nimizeɛ na ka o nyɛ ka o eɛ yelfaa, a e siri ka o e kaŋdabaŋkalɛ a leɛre o eebo.—2 Tim. 2:25, 26.
Ka neɛ kaŋaŋ wa e yelfaa naŋ e nimizeɛ, saŋa kaŋa dayeni yoŋ naane ka a nembɛrɛ maŋ zeŋ neŋ o soba. Ba maŋ eɛ lɛ a koo wagre ka o e kaŋdabaŋkalɛ a leɛre o eebo (Kanne o wɛlbo 12)
14. Nembuo la maŋ soŋ neɛ naŋ e yelfaa naŋ e nimizeɛ oŋ e kaŋdabaŋkalɛ a leɛre o eebo, ka ananso la wala teŋ yel lɛ?
14 Ka neɛŋ e yelfaa naŋ e nimizeɛ kyɛ leɛ wa e kaŋdabaŋkalɛ a leɛre o eebo, te poɔ maŋ pɛleŋ yaga zaa! (Luk. 15:7, 10) Aneazaa ka a nembɛrɛ maŋ mɔɔ la ba moɔbo zaa ka ba soŋ a soba, kyɛ nembuo la maŋ soŋ a soba oŋ e kaŋdabaŋkalɛ a leɛre o eebo? Hooŋ leɛteɛre yɛlɛ na Pɔɔl naŋ sɛge a kyaare noba naŋ e yelfaare naŋ e nimizeɛ na. O da sɛgɛɛŋ ka: “Kaapɔge Naaŋmen na e la ka ba leɛ ba eebo.” (2 Tim. 2:25) Azuŋ Jehoova la maŋ soŋ Kristabie naŋ e yelfaa oŋ e kaŋdabaŋkalɛ a leɛre o eebo, nensaalaa zaa naaneŋ maŋ e lɛ. Pɔɔl da wulee tɔnɔ na neɛ naŋ na nyɛ ka o naŋ e kaŋdabaŋkalɛ a leɛre o eebo. A soba na maaleŋ taa la a yelmeŋɛ bammo na yaga zaa, ka o teɛroŋ gaŋ soŋ, ka o toɔ̃ zo yi Setaana kyɛgre zaa poɔŋ.—2 Tim. 2:26.
15. Ka neɛŋ wa e kaŋdabaŋkalɛ a leɛre o eebo, sobuo ka a nembɛrɛ naŋ maŋ gɛrɛ nimitɔɔre a sonnɔ a soba?
15 Ka neɛŋ wa e kaŋdabaŋkalɛ a leɛre o eebo, a nembɛrɛ naŋ maŋ te puoruuŋ a eŋ o sagediibu faŋa, a somoo ka o toɔ̃ zagre Setaana bɛnlɛ zaa a kyɛ erɛ yɛlɛ naŋ soma. (Hib. 12:12, 13) Yelmeŋɛ la ka a nembɛrɛ koŋ yelko neɛzaa yelfaa na a soba naŋ e. Kyɛ bo yɛlɛ aŋ seŋ ka ba vɛŋ ka a lantaapuoruu baŋ?
“YELI A BA SAANAA A NOBA ZAA NIŊESOGƆŊ”
16. Aŋa lɛ na 1 Timoti 5:20 naŋ yel na, nembobo la ka Pɔɔl da yele saŋa na oŋ da yelka “a noba zaa niŋesogɔŋ” na?
16 Kanne 1 Timoti 5:20. Pɔɔl da sɛgɛɛ a yɛlɛ ŋa ko Timoti meŋ naŋ da e a lantaapuoruu neŋkpoŋ kaŋa ka o yel a “banaŋ naŋ naŋ kyɛnɛ be yelbieri poɔ . . . saanaa a noba zaa niŋesogɔŋ.” Pɔɔl da boɔrɔŋ ka o wuli ka ba yel a neɛ naŋ e a yelfaa na saanaa yɛlɛ ka a lantaapuoruu deme zaa baŋ bee? Ai lɛ naane. Kyɛ o da yelee bana na yoŋ naŋ baŋ a yelfaa na a soba naŋ e na yɛlɛ. Aminekaŋaŋ, a na baŋ eɛ noba na naŋ nyɛ yɛlɛ na o naŋ e na, bee bana na o naŋ manne a yɛlɛ ko na. A nembɛrɛ na vɛŋeŋ ka ba baŋ ka ba kpɛ la a yɛlɛ poɔŋ a de dɛnnoo naŋ seŋ neŋ ko a soba.
17. Ka a lantaapuoruu noba yaga zieŋ baŋ a yelfaa yɛlɛ, bee aminekaŋaŋ a na wa baŋ a yelfaa yɛlɛ, bo duoro la baŋ maŋ moɔle ko a lantaapuoruu deme zaa, ka ananso la wala?
17 Saŋa kaŋa, a lantaapuoruu noba yaga zie zaa maŋ baŋɛɛ a yelfaa yɛlɛ bee aminekaŋaŋ ba na wa baŋɛɛ a yɛlɛ a puoriŋ. Ka a naŋ wa waa lɛ yɛŋ, a “noba zaa niŋesogɔŋ” na eɛ a lantaapuoruu zaa. Azuŋ a lantaapuoruu neŋkpoŋ kaŋa na moɔle ko la a lantaapuoruu deme ka a nembɛrɛ yelee te yɔɔdɔɔ na bee te yɔɔpɔge na nimiri yɛlɛ koo. Ananso la wala? Pɔɔl da yeleeŋ ka: “Ka a banaŋ naŋ kyɛre na zoro dabeɛ̃” ka ba ta te e yelfaa naŋ e nimizeɛ.
18. Ka bieŋ naŋ ba ta yuomo pie neŋ aniiŋ de suobu, a kyɛ e yelfaa naŋ e nimizeɛ, wala ka a nembɛrɛ na e? (Kaa a foto meŋ.)
18 Boŋ ka a nembɛrɛ maŋ e ka bie naŋ de suobu kyɛ naŋ ba ta yuomo pie neŋ aniiŋ e yelfaa kaŋa naŋ e nimizeɛ? A lantaapuoruu nembɛrɛ bayi neŋ a bie dɔgreba naŋ e Kristabiiri na laŋ zeŋeŋ a kpɛ a yɛlɛ poɔŋ. b A lantaapuoruu nembɛrɛ na soorɛɛ a bidɔgreba yɛlɛ na ba naŋ erɛ ka ba soŋ ba bie na ka o e kaŋdabaŋkalɛ a leɛre o eebo. Ka a bieŋ wa sagra o dɔgreba kawane na, a leɛrɛ o teɛroŋ ane o gyogo, a nembɛrɛ bayi na na baŋ de la gbɛre ka ba na barɛɛ a yɛlɛ zaa eŋ a bidɔgreba nuuriŋ ka ba naŋ kyɛnɛ sonnɔ ba bie na. Bonso a nembɛrɛ baŋɛɛŋ ka, Jehoova ko la bidɔgreba zaa a ferebo toma ka ba dɛnnɛ ba biiri nɔmmo soriŋ. (Dut. 6:6, 7; Yeng. 6:20; 22:6; Efe. 6:2-4) Kyɛ wagre naŋ gɛrɛ poɔŋ na, a nembɛrɛ na maŋ soorɛɛ a bidɔgreba a nyɛ ka ba derɛɛ sommo naŋ seŋ neŋ korɔ a bie bee. Kyɛ boŋ ka a nembɛrɛ na baŋ e ka a bieŋ naŋ moɔ̃ nimiri erɛ a yelfaa naŋ e nimizeɛ na? Ka anaŋ wa waa lɛ yɛŋ, nembɛrɛ bata ane a bie dɔgreba bee zukaara naŋ e Kristabie na laŋ zennɛɛ a bie a kpɛ a yɛlɛ poɔŋ.
Ka bieŋ ba ta yuomo pie neŋ aniiŋ de suobu kyɛ e yelfaa naŋ e nimizeɛ, nembɛrɛ bayi neŋ a bie dɔgreba bee o zukaara naŋ e Kristabie neŋ a bie na laŋ zeŋeŋ a kpɛ a yɛlɛ poɔŋ (Kanne o wɛlbo 18)
“JEHOOVA EƐ NEƐ NAŊ TAA NIMIBAALOŊ ANE NEMBAALONZOE YAGA ZAA”
19. Wala ka a nembɛrɛ na baŋ e a tɔglɔ Jehoova ka ba naŋ wa zeŋ neŋ neɛ kaŋa naŋ e yelfaa naŋ e nimizeɛ?
19 Jehoova kaarɛɛ soriŋ ka a nembɛrɛ vɛŋ ka a lantaapuoruu e forifori. (1 Kor. 5:7) Ba maŋ boɔrɔŋ ka ba soŋ noba naŋ e yelfaa naŋ e nimizeɛ ka ba e kaŋdabaŋkalɛ a leɛre ba eebo. Azuŋ ka ba naŋ wa sonnɔ neɛ kaŋa, ba boɔbo maŋ la ka a soba e leɛroo. Bonso ba boɔrɔŋ ka ba tɔgle Jehoova naŋ “taa nimibaaloŋ ane nembaalonzoe yaga zaa” na. (Gyi. 5:11) Te nyɛ lɛ a bitontona Gyɔɔn naŋ da maŋ wulo nɔmmo korɔ o yɔɔmine. O da sɛgɛɛŋ ka: “N bibiiri, N sɛgrɛ la a yɛlɛ ama korɔ yɛ ka ka yɛ na ta erɛ yelbieri. Kyɛ ka yɛ kaŋa zaaŋ wa e yelbieri, te taa la soŋnɔ a Saa zie. Ona la Yezu Krista, a nemmeŋɛ.”—1 Gyn. 2:1.
20. Bo yɛlɛ teŋ na zanne a zannoo naŋ tɔnne na poɔŋ?
20 A posaanaa la ka, saŋa kaŋa Kristabie naŋ e yelfaa naŋ e nimizeɛ maŋ zagreŋ ka o e kaŋdabaŋkalɛ. Ka anaŋ wa waa lɛ, aseŋ ka ba iri o bare a lantaapuoruu poɔŋ. Boŋ ka a nembɛrɛ maŋ e ka a yɛlɛ ŋa taaŋ wa e? Te na zannɛɛ a yɛlɛ a zannoo naŋ tɔnne na poɔŋ.
YIELOŊ 103 Shepherds—Gifts in Men
