ZANNOO YƐLƐ 6
YIELOŊ 18 Grateful for the Ransom
Te Poɔ Pɛlɛɛŋ Yaga Zaa Jehoova Naŋ Di Suuri Ko Te
“Naaŋmen naŋ nɔŋ a donɛɛ yaga zaa zuŋ la so oŋ toŋ o Bidɔɔ yeni oŋ wa a tendaa zu.”—GYN 3:16.
YƐLƐ TE NAŊ NA ZANNE
Ka teneeŋ na toɔ̃ wuli nimipa meŋɛmeŋɛ ko sudi na Jehoova naŋ di ko te na, aseŋ ka te zanne baŋ yɛlɛ na Jehoova naŋ e ko te ka lɛ vɛŋ teŋ nyɛ yelbebe sudi.
1-2. Sobuo ka nensaaleba yɛlɛ waa ŋa a bipɔlee na yɛlɛ o wɛlbo 1 naŋ yel o yɛlɛ na?
ŊMAA a yɛlɛ ŋa foto ho teɛroŋ poɔŋ a nyɛ, te de ka bipɔlee kaŋa dɔgreba eɛ bondaaneba. Kyɛ ka bebiri kaŋa ka yelkaŋa da e ka o dɔgreba na kpi. Saŋa na oŋ da woŋ a yɛlɛ na, o da koŋeeŋ yaga zaa. Kyɛ yelkaŋa da naŋ bebeŋ naŋ na vɛŋ ka a bipɔlee ŋa poɔ lɛ sãã yaga zaa. O da wa nyɛɛŋ ka o dɔgreba di la ba libie zaa a naŋ di sane poɔ, aŋ seŋ ka o yɔɔ. Azuŋ o da ba di o dɔgreba bondaaloŋ kyɛŋ, kyɛ a da seŋ ka o yɔɔ sane na zaa baŋ di na, ka a noba meŋ da are neŋ o kpeɛŋaa kpeɛŋaa ka o yɔɔ ba libie ko ba wieoŋ. O daŋ koŋ baŋ yɔɔ a sane ŋa zaa.
2 Sori kaŋa poɔŋ, te yɛlɛ waa ŋa a bipɔlee ŋa yɛlɛ na. Adama ne Hawaa naŋ e te dɛndɛŋ dɔgreba na da eɛ noba naŋ pɛgeyi, a da kpeɛrɛ paradiisi poɔŋ ka be da veɛlɛ yaga zaa. (Mun. 1:27; 2:7-9) Ba da taa la apoɔsori ka ba zeŋ emmaaroŋ poɔŋ a bebe tegitegilɛ. Kyɛ yɛlɛ da leɛrɛɛŋ, bonso Adama ne Hawaa da e la yelbebe. Azuŋ Jehoova da kare baŋ yi a Eedin gaadin poɔŋ ka lɛ vɛŋ baŋ kɔŋ apoɔsori baŋ da taa ka ba bebe tegitegilɛ. Bo kyɛŋbon la baŋ bare ko ba biiri? A Baabole yeleeŋ ka: “A lɛ zuŋ, a tuuro neŋyeni eŋɛŋ [Adama] ka faaloŋ tu kyɛ kpɛ a donɛɛ, ka kũũ meŋ tu faaloŋ eŋɛŋ wa, a tu lɛ eŋɛŋ ka kũũ ta nensaaleba zaa bonso ba zaa eɛ yelbebe deme.” (Uro. 5:12) Yelbebe na te naŋ nyɛ yi Adama zie na la vɛŋ teŋ kpiire. A yelbebe ŋa waa ŋa sane naŋ e kpoŋ yaga zaa, ka te kaŋa zaa koŋ baŋ yɔɔ.—Yiem. 49:8.
3. Ananso la wala teŋ na baŋ de yelbebe manne neŋ “sane”?
3 Yezu da de la yelbebe manne neŋ “sane.” (Mat. 6:12; Luk. 11:4) Ka teneeŋ wa e yelfaa, a maŋ waa ŋa te di la Jehoova sane aŋ seŋ ka te yɔɔ koo. Jehoova da naaŋ baŋ yelka te yɔɔ ana sane ŋa koo, kyɛ o ba e lɛ. Ka Jehoovaŋ da ba yɔɔ te yelbebe sane ko te, kũũ yoŋ teŋ na baŋ de yɔɔ a sane, teɛretɔ zaa da naaŋ koŋ lɛ bebe a ko te ka teneeŋ wa kpi.—Uro. 6:7, 23.
4. (a) Nensaaleba zaa eɛ yelbebe deme, azuŋ ka Jehoovaŋ da ba soŋ te boŋ da naaŋ pɔge te? (Yieme 49:7-9) (b) A Baabole poɔŋ, boŋ ka a yelbiri “faaloŋ” are ko? (Kaa a daga ŋa, “ Faaloŋ.”)
4 Te daŋ koŋ baŋ lɛ nyɛ boma na zaa Adama ane Hawaa naŋ kɔŋ na te menneŋ. (Kanne Yieme 49:7-9.) Ka Jehoovaŋ da ba soŋ te, te da koŋ taa teɛretɔ zaa ka te na nyɛɛ nyɔvore nendaarekaŋa bee kũũ leɛ-iruu. Te da naaŋ maŋ kpiŋ aŋa dunni, a koŋ taa teɛretɔ zaa ka te na nyɛɛ kũũni leɛ-iruu.—Ikil. 3:19; 2 Pit. 2:12.
5. Sobuo ka te Saa naŋ nɔnɔ te na soŋ te teŋ toɔ̃ yɔɔ yelbebe sane na te naŋ di na? (Kaa a foto.)
5 Te leɛteɛre a bipɔlee na yɛlɛ te naŋ daŋ yel a zannoo piileeŋ na. Te de ka dɔɔ bondaana kaŋa yeleeŋ ka o na yɔɔ la sane na zaa o naŋ di na koo, ho teɛre ka wala aŋ na erɛ o? Nɔkpeɛne zaa kyebe ka, a bipɔlee ŋa na sagɛɛ a sommo ŋa tɔ wieoŋ lɛ. Lɛ meŋ la, Jehoova naŋ e te Saa naŋ nɔnɔ te na meŋ ko teŋ kyɔɔtaa kaŋa naŋ na baŋ yɔɔ yelbebe sane na zaa te naŋ nyɛ yi Adama zie na. Ŋaa ka Yezu da manne a yɛlɛ: “Naaŋmen naŋ nɔŋ a donɛɛ yaga zaa zuŋ la so oŋ toŋ o Bidɔɔ yeni oŋ wa a tendaa zu, ka lɛ na vɛŋ ka neɛzaa naŋ taa sagediibu o eŋɛŋ koŋ wɛ kyɛ na nyɛ nyɔvore naŋ ba taa baaraa.” (Gyn. 3:16) A kyɔɔtaa ŋa meŋ maŋ lɛ soŋ teŋ ka te neŋ Jehoova taa niiloŋ naŋ soma.
Yezu da mannɛɛ a duorisoŋ naŋ kyaare Jehoova sudi a tuuro a yɔɔdeɛbo sareka na eŋɛŋ a ko noba. (Gyn. 3:16) O yi la o sukyiri zaa poɔŋ a de o nyɔvore tere a yɔɔ neŋ a yɔɔdeɛbo (Kanne o wɛlbo 5)
6. Bo Baabole yelbie mine la teŋ na zanne a zannoo ŋa poɔŋ, ka ananso la wala?
6 Wala teŋ na baŋ e nyɛ tɔnɔ yi a kyɔɔta-soŋ ŋa poɔŋ, a nyɛ te yelbebe bee te “sane” na sudi? Te na baŋ nyɛɛ a soorebiri ŋa noɔre iribo yi yelbie mine a Baabole naŋ de toŋ ne toma, aŋa leɛ maale taa, yelbebe pɔgebo, sareka naŋ pɛlɛ Naaŋmen poɔ, yɔɔdeɛbo, yɔɔdeɛ, ane a nyɛ mennoŋ. A zannoo ŋa poɔŋ, te na zanne nyɛɛ lɛ a yelbie ŋa kaŋa zaa naŋ wulo meŋɛmeŋɛ. Ka teneeŋ maŋ teɛrɛ sori na Jehoova naŋ tu kyɛ di te yelbebe suuri ko te na yɛlɛ gɛrɛ tɔɔre, te na maaleŋ taa la nimipa yaga zaa a koo.
A YELNIMIZEƐ LA ŊA: JEHOOVA BOƆRƆŊ KA TE WA E O ZƆMENNE
7. (a) Bo yɛlɛ ka Adama ane Hawaa lɛ kɔŋ? (b) Te naŋ e Adama ane Hawaa biiri na zuŋ, bo yɛlɛ la fɛre te yaga zaa? (Urom 5:10, 11)
7 Saŋa na Adama ane Hawaa naŋ da wa e yelfaa na, ba da koŋ baŋ lɛ nyɛ nyɔvore naŋ ba taa baaraa, ba da wa leɛ la Jehoova dɔndɔnne meŋ. Saŋa na Adama ane Hawaa naŋ da naŋ ba zagre Naaŋmen noɔre na, ba da poɔ la Naaŋmen booree na poɔŋ. (Luk. 3:38) Kyɛ saŋa na baŋ da zagre o noɔre na, o da ba lɛ vɛŋ baŋ poɔ o booree na poɔŋ, lɛ puoriŋ baŋ pãã da piili dɔgrɔ biiri. (Mun. 3:23, 24; 4:1) Te naŋ e Adama biiri na zuŋ aseŋ ka te neŋ Jehoova leɛ maale taa. (Kanne Urom 5:10, 11.) Azuŋ ka Jehoova soŋ te ka te neŋ o leɛ taa niiloŋ naŋ soma. Lɛ zuŋ, a ba seŋ ka te neŋ Jehoova lɛ e dɔndɔnne, kyɛ aseŋ ka te nyɔgoo ka o e te zɔmeŋɛ. Kyɛ a nɔmãã yɛlɛ la ka, Jehoova la daŋ de gbɛre ka te leɛ wa e o zɔmenne. Sobuo oŋ tu kyɛ e lɛ?
A YELSƐGRAA: NAAŊMEN YUO LA SORI KO TE KA TE WA E O ZƆMENNE
8. Bo la (a) yelbebe pɔgebo? (b) sareka naŋ pɛlɛ Naaŋmen poɔ?
8 Yelbebe pɔgebo eɛ yelsɛgraa Jehoova naŋ sɛgre ko nensaaleba a ko ba a vuo ka ba neŋ o leɛ maale taa, a taa niiloŋ naŋ soma. Azuŋ o da sɛgrɛɛ yɛlɛ ka o leɛ yɔɔdeɛ bon na Adama naŋ kɔŋ na, azuŋ a da seŋ ka o de bon naŋ e nanee seŋ bon na Adama naŋ kɔŋ na yɔɔ sɛre kyɛ na toɔ̃ yɔɔdeɛ bon na Adama naŋ kɔŋ na. A yelbiri na a Kristabiiri Giriki Sɛgre naŋ de toŋ neŋ toma na tɛgɛ la ka sareka naŋ pɛlɛ Naaŋmen poɔ. (Uro. 3:25) Azuŋ a yelbie sareka naŋ pɛlɛ Naaŋmen poɔ wulee sori na Jehoova naŋ tu kyɛ sɛgre yɛlɛ ka nensaaleba neŋ o na baŋ taa niiloŋ naŋ soma.
9. Bo yelsɛgraa la ka Jehoova da sɛgre ko a Izerayɛl biiri ka lɛ na baŋ vɛŋ ka ba nyɛ ba yelbebe sudi?
9 Jehoova da sɛgrɛɛ yɛlɛ ko a Izerayɛl biiri ka lɛ na vɛŋ ka ba neŋ o taa niiloŋ naŋ soma, kyɛ ka ba maŋ toɔ̃ nyɛ ba yelbebe sudi. A Izerayɛl biiri da maŋ di la tigri kaŋa dayeni yuoni zaa. Ba da boɔlooŋ ka a Yelbebe Pɔgebo Daare. A lɛ bebiri na, a ŋmenpuore wedeɛrekpoŋ da maŋ de la dunni iri sareka ko a noba zaa. Kyɛ dunni sareka yoŋ da koŋ baŋ pɔge a Izerayɛl biiri yelbebe kpɛlɛŋkpɛlɛŋ. Kyɛ ka a Izerayɛl biiriŋ da maŋ e kaŋdabaŋkalɛ meŋɛmeŋɛ a iri sarekare na Jehoova naŋ yelka ba iri na, Jehoova da maŋ eɛ siri ka o di ba yelbebe suuri ko ba. (Hib. 10:1-4) Sareka na baŋ da maŋ iri a Yelbebe Pɔgebo Daare na, ane sarekare na zaa baŋ da maŋ ire na da soŋɛɛ a Izerayɛl biiri baŋ nyɛ ka ba eɛ yelbebe deme, a nyɛ meŋ ka aseŋ ka ba nyɛ bon kaŋa naŋ na baŋ pɔge ba yelbebe na zaa kpɛlɛŋkpɛlɛŋ.
10. Bo yɛlɛ ka Jehoova e ka lɛ na vɛŋ ka nensaaleba na baŋ nyɛ ba yelbebe sudi?
10 Bo yɛlɛ ka Jehoova e ka lɛ vɛŋ ka nensaaleba na baŋ nyɛ yelbebe sudi? O da sɛgrɛɛ yɛlɛ ka o Bidɔɔ nɔŋnaa de o meŋɛ iri sareka “dayeni yoŋ ka o de neŋyaga yelbebe bare.” (Hib. 9:28) Yezu da de la “o nyɔvore iri sareka a yɔɔdeɛ neŋyaga.” (Mat. 20:28) Bo la a yɔɔdeɛbo?
YEZU YƆƆDEƐBO NA LA YƆƆ A SANE
11. (a) A Baabole poɔŋ, boŋ la a yɔɔdeɛbo? (b) Nembuo yoŋ la na baŋ yɔɔ a sane?
11 A Baabole vɛŋɛɛŋ teŋ baŋ ka Jehoova da nyɛɛŋ ka aseŋ ka te nyɛ yɔɔdeɛbo ka lɛ na baŋ vɛŋ ka te nyɛ te yelbebe sudi, kyɛ ka te neŋ o meŋ na baŋ taa zɔmennoŋ naŋ soma. a Bo yɔɔdeɛbo sane la aŋ da seŋ ka ba yɔɔ sɛre kyɛ ka nensaaleba na baŋ leɛ nyɛ bon na Adama naŋ kɔŋ na? Teɛre baŋ ka Adama ane Hawaa da kɔŋ la ba nyɔvore naŋ pɛgeyi na, ba da koŋ baŋ lɛ nyɛ nyɔvore naŋ ba taa baaraa. Azuŋ a na fɛreŋ ka a yɔɔdeɛbo a neŋ bon na Adama naŋ kɔŋ na seŋ taa. (1 Tim. 2:6) Neɛ naŋ na baŋ yɔɔ a yɔɔdeɛbo seŋ ka o e dɔɔ (1) naŋ pɛgeyi; (2) naŋ na baŋ zeŋ tegitegilɛ a teŋɛ zuŋ; ane (3) naŋ e siri ka o de o meŋɛ tere bee a de o nyɔvore iri sareka a ko te. A soba nyɔvoreŋ na yɔɔ bon na te naŋ kɔŋ na.
12. Bonso ka Yezu da toɔ̃ yɔɔ a yɔɔdeɛbo sane?
12 Te nyɛ yɛlɛ ata mine zuŋ Yezu naŋ da toɔ̃ yɔɔ a yɔɔdeɛbo sane. (1) O da eɛ neɛ naŋ pɛgeyi—a “da ba e yelbieri zaa” meŋ. (1 Pit. 2:22) (2) Azuŋ o da na baŋ zeŋɛɛ a teŋɛ zuŋ tegitegilɛ. (3) O da eɛ siri ka o kpi a de o nyɔvore yɔɔdeɛ te. (Hib. 10:9, 10) Yezu da pɛgeyieŋ aŋa lɛ na Adama naŋ da pɛgeyi a piilee saŋa na, kyɛ a puoriŋ Adama da te eɛ yelfaa. (1 Kor. 15:45) Yezu naŋ kpi ko te na zuŋ, o toɔ̃ yɔɔdeɛ bon na meŋɛ Adama naŋ da kɔŋ na. (Uro. 5:19) Yezu wa eɛ “a Adama parebaaraa.” A ba lɛ fɛre ka neɛ kaŋa naŋ pɛgeyi lɛ yɔɔ ka o de bon na Adama naŋ kɔŋ na. Bonso Yezu da de la o meŋɛ nyɔvore iri sareka “dayeni yoŋ” aŋ baare.—Hib. 7:27; 10:12.
13. Bo tɛɛtɛɛ la be yelbebe pɔgebo yelsɛgraa na ane a yɔɔdeɛbo kpakyagaŋ?
13 Bo tɛɛtɛɛ la be yelbebe pɔgebo yelsɛgraa na ane a yɔɔdeɛbo kpakyagaŋ? Yelbebe pɔgebo yelsɛgraa na eɛ gbɛre na Naaŋmen naŋ de ka lɛ na vɛŋ ka o neŋ nensaaleba taa niiloŋ naŋ soma. A yɔɔdeɛbo eɛ sane Jehoova naŋ yɔɔ ka lɛ na vɛŋ ka nensaaleba nyɛ yelbebe pɔgebo. Yezu zĩĩ naŋ e nanee la oŋ de yɔɔ neŋ a yɔɔdeɛbo ko te.—Efe. 1:7; Hib. 9:14.
JEHOOVA FAA TEŊ YI YELBEBE ANEŊ KŨŨ POƆŊ A KYƐ NYƐ KA TE EƐ SONTUURIBO
14. Bo teŋ na zanne a zannoo ŋa poɔŋ, ka ananso la wala?
14 Bo tɔnɔ teŋ maŋ nyɛ yi yɛlɛ na Jehoova naŋ e ko te na poɔŋ? A zannoo ŋa poɔŋ, te na nyɛɛ yelbie ayi mine a Baabole naŋ de toŋ neŋ toma aŋ soŋ te teŋ baŋ tɔnɔ na teŋ maŋ nyɛ yi Jehoova sudi na eŋɛŋ, ka lɛ soŋ te ka te nyɛ a soorebiri ŋa noɔre iribo.
15-16. (a) Boŋ ka a yelbiri “yɔɔdeɛ” naŋ be a Baabole poɔŋ na are ko? (b) Bo tɔnɔ teŋ nyɛ yi a yɔɔdeɛbo eŋɛŋ?
15 A Baabole yeleeŋ ka, Jehoova naŋ yɔɔ a yɔɔdeɛbo na zuŋ, te nyɛ la faabo bee someŋɛ. Ŋaa ka bitontona Piita da yelkyaare a yɔɔdeɛbo: “Yɛ baŋ ka ba faa yɛ la [yɛ nyɛɛ “a yɔɔdeɛbo”; ba “yɔɔdeɛ yɛŋ”] yi yelfoglo yɛ naŋ taa yi a yɛ sããkommine zie ne daaroŋ naŋ ba waa boma naŋ na baŋ wɛ aŋa salma bee salem-pelaa, kyɛ a Krista zĩĩ naŋ taa yuori la ka ba de faa ne yɛ; aŋa pilee naŋ ba taa faaloŋ bee saanaa zaa.”—1 Pit. 1:18, 19.
16 A tuuro a yɔɔdeɛbo sareka na eŋɛŋ, te na baŋ nyɛ la faabo a yi yelbebe ane kũũ naŋ maŋ waaneŋ dɔgɛɛ yaga na eŋɛŋ. (Uro. 5:21) Te puoree Jehoova a neŋ Yezu bareka yaga zaa te naŋ nyɛ faabo a tuuro Yezu zĩĩ naŋ e nanee oŋ de yɔɔdeɛ te na.—1 Kor. 15:22.
17-18. (a) Ka Jehoovaŋ wa yelka te eɛ nemmenne, wala ka lɛ wuli? (b) Bo tɔnɔ teŋ maŋ nyɛ ka Jehoovaŋ wa yelka te eɛ nemmenne?
17 A Baabole yeleeŋ ka Jehoova puorebiiri eɛ nemmenne. Lɛ wuleeŋ ka, a ba seŋ ka te yɔɔ te yelbebe te naŋ e sane. Aneazaa ka o ko teŋ a yɔɔdeɛbo, kyɛ o naŋ kaarɛɛ soriŋ ka te de o bege na tonɔ neŋ toma. Jehoova ba nyɛ te ka te eɛ nemmenne te naŋ seŋ neŋ zuŋ; kyɛ lɛ meŋ ba wuli ka o boɔrɔŋ ka te erɛ yelfaare. Jehoova eɛ siri ka o di te yelbebe suuri ko te, bonso te taa la sagediibu bon na o neŋ Yezu naŋ e a yɔɔ a yɔɔdeɛbo na.—Uro. 3:24; Gal. 2:16.
18 Bo tɔnɔ teŋ maŋ nyɛ ka Jehoovaŋ wa yelka te eɛ nemmenne? Noba mine nyɛɛ tɔnɔ, bonso ba kaa iri baŋ ka ba te poɔ Yezu eŋɛŋ ka ba di naaloŋ sazuŋ a wa e Naaŋmen biiri. (Tit. 3:7; 1 Gyn. 3:1) O di la ba yelbebe suuri ko ba. A waa ŋa ba daŋ ba e ana yelbebe na, azuŋ, ba seŋnɛɛŋ ka ba kpɛ a Naaloŋ poɔ. (Uro. 8:1, 2, 30) Noba na meŋ naŋ taa teɛretɔ ka ba na zeŋ la a donɛɛ zuŋ tegitegilɛ na, Jehoova di la suuri ko ba, a nyɛ ka ba eɛ nemmenne, a e o zɔmenne meŋ. (Gyi. 2:21-23) A nembeɛoŋ naŋ na ŋmaa a Hammagedon na na nyɛ la apoɔsori ka ba daŋ koŋ la kpi zaa. (Gyn. 11:26) Noba naŋ e “sontuuribo” ane “noba naŋ ba e sontuuribo” naŋ kpi na na nyɛ la kũũ leɛ-iruu. (Tom. 24:15; Gyn. 5:28, 29) A baaraa zaa, Jehoova yelmeŋɛ puorebiiri zaa naŋ be a teŋɛ zuŋ na “nyɛ [la] a Naaŋmen biiri someŋɛ naŋ taa gyeremɛ yaga zaa na.” (Uro. 8:21) Te eŋɛ nyagraŋ ka bebiri kaŋa, te na leɛ eɛ te Saa Jehoova biiri naŋ pɛgeyi!
19. Sobuo ka yɛlɛ na Jehoova ane Yezu naŋ e ko te na leɛre te zemmo yɛlɛ? (Kaa a daga ŋa meŋ, “ Jehoova Sudi.”)
19 Yelmeŋɛ zaa, te yɛlɛ da waa ŋa a bipɔlee na te naŋ daŋ yel o yɛlɛ a piilee saŋa na. O da kɔŋ la boma na zaa o dɔgreba naŋ da taa na, kyɛ aŋ da seŋ ka o yɔɔ saŋ-kpoŋ kaŋa o dɔgreba naŋ di. Kyɛ Jehoova ko teŋ sommo. Te yɛlɛ na leɛrɛɛŋ bonso Jehoova bɔ la sori kaŋa oŋ na baŋ tu kyɛ di te yelbebe suuri ko te, ka Yezu meŋ ko te a yɔɔdeɛbo. Ka teneeŋ taa sagediibu Yezu Krista eŋɛŋ, te na nyɛ la faabo yi yelbebe ane kũũ eŋɛŋ. Ka Jehoovaŋ wa di te yelbebe suuri ko te, a maŋ waa ŋa teŋ daŋ ba e yelfaa zaa. Kyɛ a maaleŋ gaŋaazaa, pampana ŋa te neŋ Jehoova te Saa naŋ be sazuŋ na na baŋ taa la niiloŋ naŋ soma.
20. Bo yɛlɛ teŋ na zanne a zannoo naŋ tɔnne na poɔŋ?
20 Ka teneeŋ maŋ teɛrɛ yɛlɛ na Jehoova ane Yezu naŋ e ko te na yɛlɛ gɛrɛ tɔɔre, a na soŋ teŋ ka te maaleŋ taa nimipa yaga zaa ko ba. (2 Kor. 5:15) Ka ba naŋ da ba soŋ te, te da koŋ taa teɛretɔ zaa! A zannoo naŋ tɔnne na poɔŋ, te na zannɛɛ Baabole yelmannee yaga naŋ na soŋ te ka te nyɛ ka, ka Jehoovaŋ wa di suuri ko te, a ba lɛ seŋ ka te vɛŋ ka yelfaa na te naŋ da e na yɛlɛ naŋ dɔnnɔ te.
YIELOŊ 10 Praise Jehovah Our God!
a Kɔkɔɛ mine poɔŋ, a yelbiri “yɔɔdeɛbo” tɛgɛ la ka “a yɔɔdeɛ nyɔvore,” bee “sane ba naŋ yɔɔ.”
