Yɛlɛ Noba Naŋ Kanna Te Gama Naŋ Maŋ Soorɔ
A yelbie “ho na go baŋ,” naŋ be Yieme 12:7 na, yelee “Nembaalba” yɛlɛ (wɛlbo 5) bee “Jehoova yelbie” yɛlɛ oŋ yele (wɛlbo 6)?
A sɛgre ŋa zaa poɔ yɛlɛ yelee noba yɛlɛ.
Yieme 12:1-4 yeleeŋ ka ‘yelmeŋɛ deme kɔŋyɛŋ nensaaleba biiri poɔŋ.’ Te pãã nyɛ a sɛgre na a soorebiri naŋ kyaare na, Yieme 12:5-7.
“Jehoova yeleeŋ ka: ‘Nembaalba naŋ dire dɔgɛɛ,
ka nandaaneba meŋ pɛnɛ zuŋ,
N na iriŋ a e yelkaŋa.
N na faa baŋ a yi noba naŋ erɛ ba yɛlɛ naŋ ba seŋ neŋ na nuureŋ.’
Jehoova yɛlɛ maŋ pɛgeyiŋ;
A waa ŋa ware ba naŋ nyɛle vũũ dekpoŋ zie ba naŋ mɛ poɔŋ a iri a dɛgre zaa bare, a vɛŋ aŋ pɛgeyi gbɛre boyɔpoi.
Oo Jehoova, ho na go baŋ;
Ho na go la ba kaŋa zaa a yi a dɔge-tutaa ŋa noba zieŋ tegitegilɛ.”
O wɛlbo 5 na yelee yɛlɛ na Naaŋmen naŋ na e ko nembaalba. O na faa baŋ.
O wɛlbo 6 meŋ de poɔyɛŋ ka “Jehoova yɛlɛ maŋ pɛgeyiŋ,” ‘a waa ŋa ware ba naŋ nyɛle vũũ dekpoŋ zie ba naŋ mɛ poɔŋ.’ A yelbie ŋa wulee teɛroŋ yelmeŋɛ Kristabiiri zaa naŋ taa kyaare Naaŋmen yelbiri.—Yiem. 18:30; 119:140.
O wɛlbo 7 na meŋ yeleeŋ ka: “Oo Jehoova, ho na go baŋ; Ho na go la ba kaŋa zaa a yi a dɔge-tutaa ŋa noba zieŋ tegitegilɛ.” Azuŋ boŋ ka a yelbiri “baŋ” are ko?
O wɛlbo 7 naŋ tɔnne na yelee “Jehoova yelbie” yɛlɛ, azuŋ noba mine na baŋ teɛrɛŋ ka a yelbiri “baŋ” are ko la Naaŋmen na yelbie. Te baŋɛɛŋ meŋ ka aneazaa ka noba yaga mɔɔ la ba moɔbo zaa ka ba sãã a Baabole, kyɛ Naaŋmen go la a Baabole baŋ ba toɔ̃ saamoo.—Aiz. 40:8; 1 Pit. 1:25.
Kyɛ aŋa lɛ o wɛlbo 5 meŋ naŋ yel na Jehoova maŋ go la o noba. Jehoova maŋ sonnɔŋ a kyɛ faara bana na naŋ e “nembaalba” ane bana na “naŋ dire dɔgɛɛ” na, o naŋ na kyɛnɛ erɛɛ lɛ meŋ wagre zaa.—Joob 36:15; Yiem. 6:4; 31:1, 2; 54:7; 145:20.
Kyɛ boŋ ka a yelbiri “baŋ” naŋ be o wɛlbo 7 na are ko?
A yieme sɛgre ŋa poɔ yɛlɛ zaa wuleeŋ ka a yelbiri “baŋ” are ko la noba.
Yieme 12:1 poɔŋ, Deevid da yeleeŋ ka neŋfaare ŋmaarɛɛ zirii korɔ ‘yelmeŋɛ deme.’ A wɛlbo naŋ tɔnne na yeleeŋ ka Jehoova na iri zɔɔ neŋ la bana na zaa naŋ yele a lɛ yelfaare ŋa na. A yieloŋ yiele eŋ teŋ faŋa ka te na baŋ dɛlɛɛ Naaŋmen ka o na soŋ teŋ bonso o yelbie zaa pɛgeyieŋ.
Azuŋ o wɛlbo 7 yeleeŋ ka Jehoova na go “baŋ,” noba na a neŋfaare naŋ dɔgrɔ na.
Ba de la a yelbiri “baŋ” toŋ neŋ toma a Hiburu Sɛgre mine naŋ be dɛlebo poɔŋ. A o wɛlbo 7 poɔŋ, ba de la a yelbiri “te” toŋ ne toma gbɛre buyi zaa saŋa na baŋ da wa leɛrɛ a Sɛgre eŋnɛ Giriki kɔkɔre poɔŋ a dɛndɛŋ saŋa na, azuŋ lɛ meŋ wuleeŋ ka a yelbiri “baŋ” kyaarɛɛ nembaalba naŋ dire dɔgɛɛ. A baaraa zaa, o wɛlbo 7 yeleeŋ ka Jehoova na go la a yelmeŋɛ deme na “kaŋa zaa” yi a “dɔge-tutaa ŋa noba zieŋ,” a neŋfaare na naŋ vɛŋ ka faaloŋ nyɛrɛ nimitɔɔre gaabo na. (Yiem. 12:7, 8) Saŋa na baŋ da leɛrɛ a Hiburu Sɛgre eŋnɛ a Aramaic kɔkɔre poɔŋ na, ba da lɛ de la a yelbiri “baŋ” toŋ neŋ toma o wɛlbo 7 na poɔŋ, o kyɛlee kannɛɛŋ ka: “Oo DAANA, ho na go la a nemmenne, ho na go baŋ yi a dɔge-tutaa ŋa noba naŋ tonɔ faaloŋ ŋa zieŋ tegitegilɛ.” Ama zaa wuleeŋ ka Yieme 12:7 ba yele Naaŋmen yelbie yɛlɛ.
Azuŋ te na baŋ yeleŋ ka, a sɛgre ŋa korɛɛ ‘yelmeŋɛ deme’ teɛretɔ ka Naaŋmen na faa baŋ.
