1-2. Boŋ maŋ vɛŋ ka Naaŋmen puorebiiri taa popeɛloŋ? (Gyimisi 1:​22-25)

 JEHOOVA neŋ o Bidɔɔ nɔnnaa boɔrɔŋ ka te taa popeɛloŋ. Neɛ naŋ sɛge Yieme 119:2 na yeleeŋ ka: “Popeɛloŋ la bana na zaa naŋ tuuro o yelteɛrɛ, ba naŋ boɔroo a neŋ ba sukyie zaa.” Yezu meŋ eŋɛɛ noɔre ka: “Popeɛloŋ la bana naŋ kyɛllɛ a Naaŋmen yelbiri a kyɛ tuuraa!”—Luk. 11:28.

² Tenee Jehoova puorebiiri yɛŋ taa la popeɛloŋ. Bonso te taa la ananso yaga zaa, kyɛ agaŋaazaa, te maŋ kannɛɛ Naaŋmen Yelbiri na bebiri zaa, a maŋ mɔɔrɔ te mɔɔbo zaa ka te de yɛlɛ na te naŋ zanna na tonɔ neŋ toma te zemmo poɔŋ.—Kanne Gyimisi 1:​22-25.

3. Bo tɔnɔ teŋ maŋ nyɛ ka teneeŋ wa de yɛlɛ na teŋ kanna yire Naaŋmen Yelbiri na poɔŋ tonɔ neŋ toma?

³ Te maŋ nyɛ la tɔnɔ yaga zaa ka teneeŋ wa “de a yelbiri tonɔ neŋ toma.” Aŋa mannoo poɔŋ, ka teneeŋ wa de yɛlɛ na te naŋ zanna yire Naaŋmen Yelbiri poɔ tonɔ neŋ toma, a maŋ vɛŋeŋ teŋ pɛlɛ Jehoova poɔ, lɛ meŋ maŋ vɛŋeŋ ka te poɔ pɛle. (Ikil. 12:13) Ane meŋ, ka teneeŋ wa de Baabole sowuli tonɔ neŋ toma, a na vɛŋeŋ ka te neŋ te booree deme ane te yɔɔmine naŋ be a lantaapuoruu poɔŋ na taa niiloŋ naŋ soma. A yɛlɛ ŋa nyɛɛ eebo te zemmo poɔŋ. Yelkpeɛne naŋ maŋ pɔgrɔ bana naŋ ba de Jehoova sowuli tonɔ neŋ toma na ba pɔgrɔ te. Ɛɛ, te neŋ Naa Deevid laŋɛɛ teɛroŋ. Saŋa na oŋ da yel Jehoova bege, sowuli, ane o sɛrɛɛdiibu yɛlɛ o yieloŋ poɔŋ na, a baaraa zaa o da yeleeŋ ka: “Ka neɛŋ de a tonɔ neŋ toma, o na nyɛɛ saŋyɔɔ kpoŋ.”—Yiem. 19:​7-11.

4. Ananso la wala aŋ maŋ e kpeɛŋaa ka te de Naaŋmen Yelbiri na tonɔ neŋ toma?

⁴ A yelmeŋɛ naŋ bebe la ka, a ba maŋ e mɔlɔ ka te kanna Naaŋmen Yelbiri na a de o poɔ yɛlɛ tonɔ neŋ toma. Aneazaa ka te maŋ taa la yɛlɛ yaga ka te e bebiri zaa, kyɛ aseŋ ka te maŋ bɔ  wagre a maŋ kanna a kyɛ zanna a Baabole a toɔ̃ baŋ yɛlɛ Jehoova naŋ boɔrɔ ka te erɛ. Azuŋ, yɛ vɛŋ ka te nyɛ yɛlɛ mine naŋ na baŋ soŋ te ka te maŋ kanna a Baabole wagre zaa. Te na lɛ nyɛɛ yɛlɛ naŋ na baŋ soŋ te ka te maŋ teɛrɛ yɛlɛ na te naŋ kanne na gɛrɛ tɔɔre a nyɛ lɛ teŋ na baŋ de a toŋ neŋ toma te zemmo poɔŋ.

MAŊ BƆ WAGRE A KANNA NAAŊMEN YELBIRI NA

5. Bo yɛlɛ mine la na baŋ deɛ te wagre kpoŋ zie zaa?

⁵ Jehoova puorebiiri maŋ taa la yɛlɛ yaga ka ba e ba zemmo poɔŋ bebiri zaa. Te maŋ de la wagre yaga a erɛ yɛlɛ a Baabole naŋ yelka a eɛ nimizeɛ na. Aŋa mannoo poɔŋ, te yaga zie maŋ tonɛɛ te menne toma ka te nyɛ libie a toɔ̃ kaara te menne ane te yideme. (1 Tim. 5:8) Kristabiiri yaga zie zaa maŋ kaarɛɛ ba dɔgreba naŋ e neŋnyaane bee a beɛrɛ. Aseŋ ka te zaa meŋ maŋ kaara te menne laafeeloŋ zieŋ, a meŋ maŋ de la wagre. Ane meŋ, te naŋ maŋ taa la toŋ nimizeere mine meŋ a lantaapuoruu poɔŋ. Te ferebo toma na kaŋa naŋ e nimizeɛ a lantaapuoruu poɔŋ la ka te maŋ tonɔ a naaŋ moɔloo toma lɛ zaa te naŋ na toɔ̃. Azuŋ a yɛlɛ ŋa zaa teŋ maŋ taa ka te e. Kyɛ wala teŋ na baŋ e a maŋ nyɛ wagre a kanna a Baabole wagre zaa, a maŋ teɛrɛ yɛlɛ na te naŋ kanna na gɛrɛ tɔɔre, a de tonɔ neŋ toma?

6. Wala teŋ na baŋ e a maŋ mɔɔ kyɛ kanne a Baabole? (Kaa a foto meŋ.)

⁶ Baabole kannoo eɛ yɛlɛ na kaŋa naŋ “fɛre yaga zaa” a ko Kristabiiri, azuŋ aseŋ ka te maŋ mɔɔ kyɛ kannoo. (Fil. 1:10) Ŋaa ka a yieme gane piilee zie na yelkyaare neɛ naŋ taa popeɛloŋ, o yeleeŋ ka: “O popeɛloŋ maŋ be la Jehoova bege na eŋɛŋ, o maŋ kannɛɛ O bege na a maŋ teɛrɛ o yɛlɛ ŋmenaa ane zisoɔree.” (Yiem. 1:​1, 2) Lɛ wuleeŋ ka, aseŋ ka te maŋ bɔ wagre a kanna a Baabole. Bo saŋa aŋ maŋ soma ka te kanna a Baabole? Te kaŋa zaa na baŋ taa la wagre naŋ soma ko te ka te maŋ kanne a Baabole. Kyɛ yɛlɛ naŋ e nimizeɛ la ka te maŋ kaa iri wagre naŋ na baŋ soŋ te ka te maŋ kanna a Baabole wagre zaa. Te yɔɔdɔɔ kaŋa yuori naŋ di Victor yeleeŋ ka: “N maŋ nɔŋeŋ ka N kanna a Baabole beguo saŋa. Aneazaa ka N ba nɔŋ ka N maŋ iri wieoŋ beguo saŋa, kyɛ a  lɛ saŋa, zie maŋ eɛ bɔin maŋ toɔ̃ de N teɛroŋ zaa eŋ a kannoo eŋɛŋ. N teɛroŋ maŋ gaŋɛɛ ziyeni maŋ toɔ̃ de N teɛroŋ zaa eŋ a kannoo eŋɛŋ.” Aminekaŋaŋ lɛ aŋ waa ko ho meŋ. Soore ho meŋɛ ka, ‘Bo saŋa la na baŋ soma ko ma ka N maŋ kanne a Baabole?’

MAŊ TEƐRƐ YƐLƐ NA HO NAŊ KANNA NA GƐRƐ TƆƆRE

7-8. Boŋ na baŋ vɛŋ ka te koŋ nyɛrɛ tɔnɔ yire yɛlɛ na te naŋ kanna na poɔŋ? Tere yelmannaa.

⁷ A yelmeŋɛ la ka, te na baŋ kannɛɛ yɛlɛ yaga zaa kyɛ a baaraa zaa, te koŋ baŋ lɛ teɛre yelzaa te naŋ kanne. Ho daŋ kannɛɛ yɛlɛ mine kyɛ wagre fẽẽ mine puoriŋ hoŋ koŋ baŋ lɛ teɛre yɛlɛ na ho naŋ kanne na bee? Te zaa ka a yɛlɛ ŋa maŋ pɔge. A yɛlɛ nembao zie la ka, a yɛlɛ ŋa na baŋ pɔge teŋ ka teneeŋ wa kanna a Baabole. Aŋa mannoo poɔŋ, aminekaŋaŋ, te na baŋ de biŋee te nimitɔɔreŋ ka te na maŋ kannɛɛ a Baabole zuri awala mine bebiri zaa. A lɛ ŋa somaŋ yaga zaa. Kyɛ aseŋ ka te maŋ de yɛlɛ mine biŋ te nimitɔɔreŋ, a mɔɔrɔ te mɔɔbo zaa ka te ta ana yɛlɛ na. (1 Kor. 9:26) Kyɛ ka teneeŋ wa boɔrɔ ka te nyɛ tɔnɔ yi te Baabole kannoo poɔŋ, yɛlɛ mine bebeŋ aŋ seŋ ka te e a gaŋ teŋ deɛ na kannoo.

⁸ Teɛre a yelmannaa ŋa yɛlɛ a nyɛ: Ka ba naŋ wa bore boma, a maŋ fɛreŋ ka a nyɛ koɔ̃ sɛre kyɛ na baŋ baa. Kyɛ ka saaŋ wa mi te gaali wagre fẽẽ mine poɔŋ, a teŋɛ maŋ maaleŋ maaŋeŋ te gaali. Ka a naŋ wa waa lɛ, a bonbulo koŋ baŋ lɛ nyɛ tɔnɔ zaa yi a koɔ̃ poɔŋ. A maŋ de la wagre fẽẽ sɛre kyɛ ka a koɔ̃ na baŋ nyunne kpɛ a teŋɛ ka lɛ vɛŋ ka a bonbulo baŋ baa velaa zaa. Lɛ neŋ o zu la, a ba seŋ ka te meŋ maŋ lonno neŋ a Baabole kannoo. Lɛ wuleeŋ ka, a ba seŋ ka te lonne kanne a Baabole ka lɛ vɛŋ ka te koŋ baŋ gyieli bee a teɛre yɛlɛ na te naŋ kanne na gaa tɔɔre, a toɔ̃ de tonɔ neŋ toma.—Gyi. 1:24.

9. Boŋ aŋ seŋ ka te e ka teneeŋ wa nyɛ ka te maŋ lonnoŋ ka teneeŋ wa kanna a Baabole?

⁹ Ho maŋ nyɛŋ ka wagre mineŋ, ho maŋ lonno ne la ho Baabole kannoo bee? Wala aŋ seŋ ka ho e? Mãã ho meŋɛ. Maŋ de wagre a teɛre yɛlɛ na ho naŋ kanne baare na, bee yɛlɛ na ho naŋ kanna na gaa tɔɔre. A ba seŋ ka a yɛlɛ ŋa e kpeɛŋaa ko bo. Ho na baŋ de la wagre mine poɔ wagre na ho naŋ maŋ de kanna na, ka lɛ  vɛŋ ka ho baŋ nyɛ wagre a teɛre yɛlɛ na ho naŋ kanne na gaa tɔɔre. Kyɛbee maŋ kanne sɛgre fẽẽ lɛ, ka a soŋ bo ka ho de a wagre kyɛlɛɛ na teɛre ne yɛlɛ na ho naŋ kanne na gaa tɔɔre. Victor te naŋ daŋ yel o yɛlɛ na yeleeŋ ka: “N maŋ vɛŋeŋ ka N Baabole kannoo e ŋmaa lɛ, aŋa zu bonyeni. N maŋ kannɛɛ a Baabole beguo saŋa, azuŋ, N maŋ toɔ̃ teɛrɛɛ yɛlɛ na N naŋ kanne na a bebi-gbuli zaa poɔŋ.” Lɛ zaa hoŋ na boɔrɔ ka ho kanne kɔɔre seŋ, kyɛ a eɛ nimizeɛ ka ho mãã ho meŋɛ a toɔ̃ teɛre yɛlɛ na ho naŋ kanna na gaa tɔɔre.—Yiem. 119:97; kaa a daga ŋa, “ Soorebie A Naŋ Seŋ Ka Ho Teɛre A Yɛlɛ.”

10. Tere yelmannaa kaŋa a wuli lɛ hoŋ na baŋ e a de yɛlɛ na ho naŋ zanna na tonɔ ne toma. (1 Tɛsalonika 5:​17, 18)

¹⁰ Wagre zaa ho naŋ iri biŋ ka ho maŋ kanne a Baabole ane lɛ zaa hoŋ na maŋ kannoo kɔɔre seŋ, maŋ mɔɔrɔ ka ho nyɛ soe hoŋ na baŋ tu a de yɛlɛ na ho naŋ kanne na toŋ neŋ toma. Ka hooŋ wa kanna a Naaŋmen Yelbiri, maŋ soore ho meŋɛ ka, ‘Wala maŋ na baŋ e a toɔ̃ de yɛlɛ na maŋ kanna na toŋ neŋ toma zenɛ ŋa bee a de a toŋ neŋ toma nendaarekaŋa?’ Aŋa mannoo poɔŋ, te de ka ho kannɛɛ 1 Tɛsalonika 5:​17, 18. (Kanne.) Ka hooŋ wa kanne a sɛgre ayi ŋa baare, ho na baŋ kyɛlleŋ fẽẽ a kyɛ teɛre nyɛ gbɛɛ bo wala ho naŋ maŋ puore ane lɛ ho naŋ maŋ yi ho sukyiri zaaŋ a puore seŋ. Ane meŋ, ho na baŋ teɛrɛɛ yɛlɛ naŋ vɛŋ hoŋ taa nimipa yaga zaa. Aminekaŋaŋ, ho de la gbɛre ka ho puore Jehoova bareka yɛlɛ ata mine zuŋ. Haali ka hooŋ wa de wagre fẽẽ lɛ teɛre yɛlɛ na Naaŋmen Yelbiri naŋ yele na, a na soŋ boŋ ka ho baŋ a Naaŋmen Yelbiri na muni soŋ, a de a tonɔ neŋ toma meŋ. Ka hooŋ maŋ de yɛlɛ na ho naŋ kanne na tonɔ neŋ toma bebiri zaa, wagre naŋ gɛrɛ poɔŋ, ho na wa leɛ la Jehoova puorebie naŋ kyile yaga zaa. Kyɛ ka hooŋ wa nyɛ ka yɛlɛ yaga naŋ bebeŋ aŋ seŋ ka ho e leɛroo a poɔŋ, wala hoŋ na e?

DE YƐLƐ HOŊ NA BAŊ TA BIŊ HO NIMITƆƆREŊ

11. Ananso la wala ka ho eŋɛ na baŋ kyoɔre wagre mineŋ? Tere yelmannaa.

¹¹ Aminekaŋaŋ, ka hooŋ wa kanna a Baabole, ho eŋɛ na baŋ kyoɔreŋ, bonso ho na wa nyɛŋ ka yɛlɛ yaga naŋ bebeŋ aŋ seŋ ka ho naŋ e leɛroo a poɔŋ. Te nyɛ yelmannaa ŋa: Te de ka zenɛ ŋa, ho Baabole kannoo poɔŋ ho nyɛɛ kawane a kyaare nɔnne yɛlɛ. (Gyi. 2:​1-8) Ho nyɛɛŋ ka aseŋ ka ho e leɛroo fẽẽ a kyaare gyogo ho naŋ maŋ taa kyaare noba na, azuŋ ho deɛ gbɛre ka ho na e la leɛroo. Lɛ somaŋ yaga zaa! Kyɛ ka zie nyaaŋ, hoŋ kanne sɛgre kaŋa a nyɛ ka aseŋ ka ho kaara ho yelyelii zieŋ soŋ. (Gyi. 3:​1-12) Ho nyɛɛŋ ka saŋa kaŋa, ho yelyelii ba maŋ eŋnɛ faŋa. Azuŋ, ho de la gbɛre ka, ka ho neŋ nobaŋ wa yele yɛlɛ, ho na maŋ yelee yɛlɛ naŋ eŋnɛ faŋa. Zie naŋ la wa nyaa na, ho la kannɛɛ a Baabole a nyɛ ka a ba seŋ ka ho nyɔge a donɛɛ zɔmennoŋ. (Gyi. 4:​4-12) Azuŋ ho wa  nyɛɛŋ ka aseŋ ka ho kaara soŋ a kyaare yɛlɛ na ho naŋ maŋ de pɛlɛ ho nimiri na. Aminekaŋaŋ, a beraanaare daare, ho eŋɛ zaaŋ na kyoɔre, bonso, ho na wa nyɛɛŋ ka a eɛ kpeɛŋaa yaga zaa ka ho e ana leɛroo na zaa.

12. Ananso la wala aŋ ba seŋ ka ho vɛŋ ka ho eŋɛ kyoɔre, ka hooŋ wa kanne a Baabole a nyɛ ka aseŋ ka ho e leɛroo mine? (Kaa a muni zie yɛlɛ na meŋ.)

¹² Ka a naŋ wa fɛre ka ho e leɛroo yaga bee a nyɛ nimitɔɔre gaabo yɛlɛ mine poɔŋ, ta wa vɛnɛ ka ho eŋɛ kyoɔrɔ. Ka hooŋ wa nyɛ ka aseŋ ka ho e leɛroo yɛŋ, lɛ wuleeŋ ka ho sigree ho meŋɛ, a taa teɛroŋ soŋ meŋ. Ka teneeŋ wa e sigrimeŋɛ deme, te na maŋ kannɛɛ a Baabole a boɔrɔ yɛlɛ aŋ seŋ ka te e leɛroo a poɔŋ. a Teɛre baŋ ka, aseŋ ka te naŋ de “a gyog-paalaa” na su pɔge te menne wagre zaa. (Kol. 3:10.) Boŋ na baŋ soŋ bo ka ho naŋ de a Naaŋmen Yelbiri tonɔ neŋ toma?

13. Wala hoŋ na baŋ e a de yɛlɛ hoŋ zanne na tonɔ neŋ toma? (Kaa a foto meŋ.)

¹³ Ka teneeŋ wa kanna a Baabole a nyɛ ka aseŋ ka te e leɛroo mine, a ba seŋ ka ho mɔɔrɔ ka ho e a leɛroo zaa dayeni, kyɛ ho na baŋ piiliŋ a erɛ a leɛroo fẽẽfẽẽ fẽẽfẽẽ. (Yeng. 11:2) E ŋaa nyɛ: Sɛge yɛlɛ na zaa hoŋ nyɛ ka aseŋ ka ho e leɛroo na biŋ, a kyɛ pãã de biŋ ho nimitɔɔreŋ ka ho erɛ ana leɛroo na fẽẽfẽẽ fẽẽfẽẽ. A buo soba aŋ seŋ ka ho daŋ piili?

14. Bo leɛroo mine hoŋ na baŋ de biŋ ho nimitɔɔreŋ ka ho daŋ e ho zemmo poɔŋ?

¹⁴ Ho na baŋ daŋ eɛ leɛroo na hoŋ teɛre ka a na eɛ mɔlɔ ko bo ka ho e na. Bee ho na baŋ daŋ eɛ leɛroo na hoŋ nyɛ ka a eɛ nimizeɛ yaga. Ka hooŋ wa de gbɛre kyaare yɛlɛ na hoŋ boɔrɔ ka ho daŋ leɛre ho zemmo poɔŋ na, ho pãã na baŋ peɛrɛɛ a yɛlɛ yi te gama na mine poɔŋ. Aminekaŋaŋ, ho na baŋ de la a Watch Tower Publications Index kyɛbee a Research Guide for Jehovah’s Witnesses a peɛre a yɛlɛ gaa tɔɔre. Puore sɔre  Jehoova ka o “maŋ soŋnɔ [bo] ka [ho] boɔrɔ kyɛ tonɔ a O popɛle toma.” (Fil. 2:13) A pãã mɔɔ kyɛ de yɛlɛ na ho naŋ zanne na tonɔ neŋ toma. Ka hooŋ wa toɔ̃ e ho dɛndɛŋ leɛroo, a na eŋ boŋ faŋa ka ho e a leɛroo na zaa naŋ kyɛre na. Yelmeŋɛ la, ka hooŋ wa nyɛ ka ho toɔ̃ eɛ leɛroo kaŋa a maaleŋ taa Kristabiiloŋ gyogo, a na baŋ eŋ boŋ faŋa yaga zaa ka ho naŋ moɔ̃ nimiri erɛ leɛroo yaga. A na baŋ wa eɛ mɔlɔ ko bo ka ho e a leɛroo na zaa naŋ kyɛre na.

YƐ VƐŊ KA A NAAŊMEN YELBIRI “TONƆ TOMA” YƐ POƆ

15. Jehoova puorebiiri a neŋ noba naŋ maŋ kanna a Baabole yɛlɛ ba yi taa, Sobuoŋ? (1 Tɛsalonika 2:13)

¹⁵ Noba mine maŋ kannɛɛ a Baabole gbɛɛ yaga. Kyɛ ba sereŋ maŋ sagɛɛ yɛlɛ na a Baabole naŋ wulo na di bee? Ba maŋ derɛɛ yɛlɛ na ba naŋ kanna na tonɔ neŋ toma bee a erɛ leɛroo ba zemmo poɔŋ bee? A nembao zie la ka, gbɛɛ yaga, ba ba maŋ de a tonɔ neŋ toma. Kyɛ lɛ naane aŋ maŋ waa ko Jehoova puorebiiri yɛŋ! Aŋa a dɛndɛŋ Kristabiiri na, te meŋ maŋ de la a Baabole “ka o waa lɛ o naŋ sereŋ waa, a Naaŋmen Yelbiri.” Agaŋaazaa, te maŋ mɔɔrɛɛ te mɔɔbo zaa ka te de a Baabole sowuli tonɔ neŋ toma te zemmo poɔŋ.—Kanne 1 Tɛsalonika 2:13.

16. Boŋ na baŋ soŋ te ka te de a Naaŋmen Yelbiri na tonɔ neŋ toma?

¹⁶ A ba maŋ e mɔlɔ ka te kanna Naaŋmen Yelbiri, a kyɛ de yɛlɛ na te naŋ kanna na tonɔ neŋ toma te zemmo poɔŋ. A na baŋ eɛ kpeɛŋaa ka te nyɛ wagre a kannoo. Kyɛbee aminekaŋaŋ, te na maŋ lonneŋ te gaali ka teneeŋ wa kanna a Baabole ka lɛ vɛŋ ka te koŋ baŋ teɛre yɛlɛ na te naŋ kanna na gɛrɛ tɔɔre. Kyɛbee te enne zaaŋ na baŋ kyoɔre ka teneeŋ wa nyɛ ka yɛlɛ yaga bebeŋ aŋ seŋ ka te naŋ e leɛroo a poɔŋ. Yelkpeɛne zaa ho naŋ tuoro, kyɛ tamaa naŋ bebeŋ. Jehoova sommoŋ, ho na baŋ zɔɔtoɔ̃ ŋaaŋ. Te maŋ mɔɔ te mɔɔbo zaa a sage o sommo, a kyɛ ta maŋ inne yɛlɛ na te naŋ woŋ na, kyɛ te maŋ de o Yelbiri na tonɔ neŋ toma. Nɔkpeɛne zaa kyebe ka, ka teneeŋ wa moɔ̃ nimiri kanna a Naaŋmen Yelbiri na, a de o poɔ yɛlɛ tonɔ neŋ toma, te sereŋ na taa la popeɛloŋ.—Gyi. 1:25.