Ke̱m. Kobisan ni po̱ngo̱be̱ oteten a m’bo̱m ma betiledi ma kwaṅ e lee̱ ná o mususu mao mwe̱se̱ ba si sumo to̱ bata mambo o Bibe̱l, to̱ná e tombabe̱le̱no̱ lokoli la ngedi o mambo ma mańame̱.

 Bamuwaso ba so̱i lodun la m’bo̱m ma betiledi ma kwaṅ. Mawengisan me oteten a m’bo̱m mō̱; nika e malee̱ nde ná mawuse̱ mō̱ mingedi o ponda tombabe̱le̱ lao. Nde jita la ma mawengisan ma titi tobotobo, ma si matukwa pe̱ to̱ jo̱nge̱le̱ la mbondo di tilabe̱. Nde mawengisan mō̱ ma ngińa ma so̱be̱, mena ma we̱le̱be̱ nde na m’boṅsan na janda la tukwa mwe̱ndi ma Bibe̱l. Byembilan beba ben:

1.   Betukwedi ba Bibe̱l bō̱ ba kwaṅ be makwala o 1 Yohane 5: 7 ná: “o mo̱ń, Tete̱, Eyala na Mudī: babo̱ balalo be nde mō̱.” Nde m’bo̱m ma betiledi mō̱ mena beno̱ ná ba lakisane̱ mi mabamse̱ ná be byala be si ta o betiledi ba mbondo. Be batabe̱ nde ombusa ponda. a Ońola nika nde Bibe̱l yena i tukwabe̱ o nin pond’asu na yena beno̱ pe̱ ná ba lakisane̱, i sumono̱ mo̱.

2.   Dina la Loba di maso̱be̱ lokoli na lokoli la ngedi o m’bo̱m ma Bibe̱l ma kwaṅ. To̱ na nika, betukwedi ba Bibe̱l jita be sumo mo̱, be we̱le̱ beto̱ti ka “Sango” to̱ “Loba.”

 O nin we̱nge̱, m’bo̱m ma betiledi mena mi so̱be̱ me jita kańena ye lambo di wam o pomane̱ so̱ diwuse̱. b Nje kobisane̱ la mi m’bo̱m di lee̱no̱ jombwea be̱ la te̱ite̱i la Bibe̱l nin we̱nge̱ e?

•   Jombwea Betiledi ba Bonahebe̱r (be mabelabe̱ ná “Male ma Kwaṅ”), ńadibie̱ William H. Green a kwali ná: “Ye ná e kwalabe̱ na mbaki ná kalat’a kwaṅ to̱ po̱ ni kombabe̱ bwam ka mo̱ e titi.”

•   Jombwea Betiledi ba Grikia to̱ “Male ma Peńa,” Ńadibie̱ mō̱ F. F. Bruce mo̱ ná: “Mboṅ i mabamse̱ Betiledi ba Male masu ma Peńa i buki nate̱na ’yidi ya kalati jita i tilabe̱, kańena moto to̱ mō̱ a titi ná a to̱bo̱ mo̱.”

•   Sir Frederic Kenyon, mubied’a m’bo̱m ma betiledi ba Bibe̱l mō̱ nu biane̱ jita a kwali ná moto te̱ “e ná a kwe̱ Bibe̱l o mā mao, a kwala na mbaki ńe̱se̱ esibe̱ bo̱ngo̱ to̱ kiṅakiṅane̱ ná, eyal’a Loba nde a kwe̱no̱ o mā, yena e tombabe̱le̱ o ńo̱ṅo̱n na ńo̱ṅo̱n esibe̱ bo̱lo̱ne̱ tobotobo to̱ po̱.”

•   Batiledi ba Bonayuda na ba bena bemedi o be̱ kriste̱n, ba kombe̱ myango mena mi malangwe̱ mawuse̱ mande̱ne̱ tumba la Loba di bolino̱. c (Miso̱ngi 20:12; 2 Samuel 11:2-4; Galatia 2:11-14) O sumo te̱ nika, ba kombe̱ pe̱ bepasi ba betiledi bena be makwese̱ tumba la pamo la Bonayuda muka, na bena be masambwe̱le̱ belēdi be se̱medi o myeka ma bato. (Hosea 4:2; Maleaki 2:8, 9; Mateo 23:8, 9; 1 Yohane 5:21) Di tombe̱le̱ la be bepasi ná te̱ite̱i di lee̱le̱ nde ná, batombe̱le̱ betiledi ba ta nde bato beno̱ ná ba lakisane̱, na bena ba ta ba bola Eyal’a bosangi ya Loba edube ende̱ne̱.

•   Mo̱ e si te̱nge̱n o kwala ná Loba, nu tute̱le̱ bato o tila Bibe̱l, ombwedi pe̱ ná a kombe̱ k’ao ńe te̱ite̱i e? d (Yesaya 40:8; 1 Petro 1:24, 25) Omo̱ń a me̱se̱, ńo̱ng’ao e ta nde ná Bibe̱l e be̱ muse̱ṅ ońola bato ba ńo̱ṅo̱n ye̱se̱, ba pond’a kwaṅ na ba nin pond’asu. (1 Korinto 10:11) Bibe̱l mo̱ ná, “me̱se̱ mena ma tilabe̱ kwaṅ ma tilabe̱ nde o lee̱ biso̱ ná ońola we̱lisane̱ na lo̱ko̱mea la betiledi di be̱ne̱ dipita.”—Roma 15:4.

•   Yesu na bokwedi bao ba timbise̱le̱ byala ba betiledi ba Bonahebe̱r esibe̱ penda to̱ po̱, nga m’bo̱m ba tano̱ ba bolane̱ mi tombabe̱le̱ ná te̱ite̱i to̱ ke̱m.—Lukas 4:16-21; Bebolo 17:1-3.