Yā buka 130 mbu Mboṅ a Yehova i matombise̱no̱ mako̱to̱ne̱ mande̱ne̱ mbu te̱. O nin we̱nge̱ mudango ma mako̱to̱ne̱ mande̱ne̱ mu be̱n buka 40 ma bekwali, name̱ne̱ pe̱ na musiki, bebaisedi, na sinima. Ná bukedi ba tombwane̱ mo̱ bwam, bangame̱n ‘senga na je̱ne̱’ pe̱ bwam nje e matombe̱. (Lukas 2:20) Ne̱ni ba mabolane̱no̱ mabea mańu ná be̱se̱ ba tombwane̱ ma mako̱to̱ne̱, e be̱ to̱ we̱ni ba majano̱ e?

 O bekombo ba mbe̱nge̱, yal a bo̱l jita i be̱n bao belongisan ba bosenga na sinima. Nde ońola nje so̱ ponda di mare̱ntino̱ be bepolo di yo̱kino̱ wana basu belongisan e? David ńena nu mabole̱ ebolo na O̱fis a bosenga/sinima ńa Mulopo m’ebolo a mabola beteledi, mo̱ ná: “Jita la bepolo di mare̱ntino̱ di si longabe̱ ná be kase bato ba mapo̱ o lambe̱ toi o senga bekwali be matombisabe̱ na bape̱pe̱ o pambo a ponda ńa lambo ka hawa mutoba. K’eyembilan o yal a bo̱l na o bene̱ bepolo ba tuna la ńolo, ba mabolane̱ nde be belongisan o bola besungu ba mibia to̱ joka son a musiki. Ba mabolane̱ pe̱ nde écrans buka te̱ o lee̱ miso̱ngi ma bekip be o joke̱, mibia ma ńunga, na o timbise̱le̱ ngus’a mongo ya maloko. Nde biso̱ mo̱, di mapula ná bukedi bombwe sinima ya bwaba, ba senge pe̱ ná se̱ṅse̱ṅ nje ye̱se̱ e makwalabe̱ o kwande̱di.”

 Kana epol’a jako̱to̱ne̱ te̱ yeno̱ diwengisan na epe̱pe̱, jangame̱n bolane̱ belongisan ba bosenga/sinima bena bangame̱n ońola epolo te̱. Ponda bepolo ba mako̱to̱ne̱ be mapo̱so̱be̱no̱, o̱fis ya bosenga/sinima ya mikanjo m’ebolo yangame̱n jombwea owe̱ni bukedi ba me̱nde̱no̱ ja, bupisane̱ muso̱ngi ma bato ba menge̱le̱no̱ na bonde̱ne̱ ba epolo te̱. Ombusa nika, bonasango ba mapo̱ngo̱ miso̱ngi ná ba bie owe̱ni ba me̱nde̱no̱ te̱se̱ baffles na écrans, ba tila pe̱ belongisan be̱se̱ be me̱nde̱ pule̱ ná bato be̱se̱ ba we̱le̱ je̱ne̱ na senga nje ye̱se̱ e matombe̱ o jako̱to̱ne̱.

 Te̱se̱ la belongisan ba bosenga/sinima le pe̱te̱ ndutu jita o bepolo jako̱to̱ne̱ di matombano̱ na leme̱ jita o mulemlem ma ponda. Bato ba matukwe̱ bekwali be o tombe̱ bangame̱n we̱le̱ je̱ne̱ na senga mo̱. Nje babo̱me̱ne̱ pe̱ ba matukwano̱ yangame̱n tombabe̱le̱ o belongisan be te̱m wuma baso̱ṅtane̱ y’eyeme̱ ba jaino̱. Belongisan ba tobotobo be mongwane̱ ná bato be̱se̱ be̱ne̱ sinima o mulemlem ma ponda, to̱ e be̱ nde na leme̱ lo̱mbi musó mō̱. David mo̱ ná: “Be belongisan be si wam o bolane̱, bonasango bangame̱n so̱ kusa belongedi ba bwam obiana ba mabolane̱ mo̱.”

 Jita la mikanjo m’ebolo mi be̱n belongisan ba bosenga/sinima bena ba mabolane̱no̱ mbu te̱. Bonasango ba malane̱ so̱ nde be belongisan o epol’a jako̱to̱ne̱ te̱ ombusa yene̱. Mukanjo m’ebolo ma Amerika mu mabusise̱ buka 200 000 ba do̱lar a mbu te̱, buka te̱ o sawa ndiyo ońola be belongisan. Nde mu mususedi mu sibi, buka nje di wusano̱ busise̱ o bata janda belongisan na o sabangane̱ mo̱. Steven ńena nu ta nu be̱ne̱ mboṅ a jombwea belongisan ba bosenga/sinima o jako̱to̱ne̱ dinde̱ne̱ diwo̱ o Kanada mo̱ ná: “Ekip asu ya bosenga/sinima e po̱ngi miwe̱n o so̱nge̱le̱ na o sabangane̱ mongo ma be belongisan me̱se̱, nate̱na ma masadisadi, na o pak mo̱ bwam ná be be̱ be̱be̱ o wala o epol’a jako̱to̱ne̱ e bupe̱.”

 Re̱nti la belongisan ba bosenga/sinima le diye̱ jita, be belongisan be si yo̱ki pe̱ to̱ be̱ bwam jita. Ońola nika nde di mapo̱so̱no̱ o jita la ngedi, o janda belongisan be mapule̱ biso̱. Oteten a ponda, écran LED yena ye bwaba ba meta matanu na tindame̱ la meta malalo e mandisabe̱ nde 24 000 la do̱lar, musinga mō̱ ma micro ma 15 la meta pe̱ 20 ma do̱lar. Ngedi te̱ di mapulano̱ so̱ janda belongisan, o̱fis a bosenga/sinima e mase̱le̱ nde “dutea mususedi” mwemba na o̱fis a janda la sango. (Lukas 14:28) Ba mabaise̱ babo̱me̱ne̱ myuedi ka min: ‘Mo̱ bato baninga be belongisan be me̱nde̱no̱ jongwane̱ e? Mo̱ janda la belongisan ba peńa nde le mbad’a bwam ńa londise̱ ni ńo̱ngi e? Mo̱ di be̱n epol’a bwam o kombe̱ mo̱, name̱ne̱ pe̱ na belongisan na bato ba longabe̱ o bia sabangane̱ mo̱ e?

 Ná belongisan basu ba bosenga/sinima be je pond’a bwaba di po̱nge pe̱ ekotedi, di mapo̱ngulane̱ ngus’a mambo oten ponda ye̱se̱. O pond’a walane̱ la mo̱ o wuma ipe̱pe̱ di mawe̱le̱ nde mo̱ o mikoba mi dili ná be si kusa njo̱m, di mapo̱ngulane̱ pe̱ mi mikoba ponda te̱ nik’e mapulano̱.

 Bato bena ba titi Mboṅ a Yehova ba ńaki jita o je̱ne̱ nate̱na o njika dikala bosenga na bedinge̱dinge̱ beno̱ bwam o mako̱to̱ne̱ masu. K’eyembilan o jako̱to̱ne̱ dinde̱ne̱ diwo̱, muboled’a diyo dinde̱ne̱ la radio na télé a sesi belēdi be bolabe̱ na mbadi belongisan be tano̱ be tombe̱le̱ mo̱. Jonathan nu mongwane̱ o te̱se̱ belongisan ba bosenga/sinima o mako̱to̱ne̱ masu a lango ná: “A ta a ńaka o senga ná biso̱ be̱se̱ bena di ta o y’ekip je nde bate̱ mpuli na ná to̱ mō̱ ńasu a si mabola y’ebolo o longe̱. A kwali ná nik’e wusa no̱ngo̱ne̱ diyo lao mińa mitanu o te̱se̱ belongisan bena biso̱ di bo̱le̱no̱ nde te̱se̱ buńa bō̱ n’epasi buka te̱.” O jako̱to̱ne̱ dipe̱pe̱, mube̱ne̱ mboṅ a epolo di tano̱ di tomba a kwali ná: “Jita la babie̱ ebol’a musiki na ya sinima ba tombi owan, nde na s’e̱n bato ba mabole̱ ebolo bwam ka bińo̱ tomtom!”

 Njika tombwane̱ belongisan ba bosenga/sinima be wanedino̱ wa o mako̱to̱ne̱ mande̱ne̱ e? Yen ebe o be̱n nde milemlem ma besengedi ka David nu maje̱ o Inglisi. Mo̱ ná: “Na be̱n 88 ma mbu, na májukea pe̱ o jita la mako̱to̱ne̱ mande̱ne̱. Tatan na mimbu na be̱nno̱, e titi lambo di wam ná na we̱le̱ mbame̱ne̱ mususu o nje e matombe̱. Nde na yi sinima ya bwam, ye nde biana ponda e mapomane̱ tomba, e titi pe̱ to̱ mba ndutu o bupe̱ nje e matombe̱.” Micheal nu maje̱ o Nijeria mo̱ ná: “Kana tatan bonasango asu ba me̱ne̱no̱ babole̱ bekwali na sinima na bo̱bise̱ la ńolo, be ná ba be̱ mususu o bupe̱ jako̱to̱ne̱ ba bwane̱ pe̱ mo̱ muńe̱nge̱ nate̱n’o su.”

 Mun mbu o nukea te̱ o jako̱to̱ne̱ dinde̱ne̱ to̱ la tobotobo “Langwa myango ma bwam!” no̱ngo̱ son a ponda o jo̱nge̱le̱ ebolo ye̱se̱ e bolabe̱ ná o we̱le̱ senga na je̱ne̱ nje ye̱se̱ e matombe̱. Mabea mańu ma wonja, name̱ne̱ pe̱ na ma mena ma mabolabe̱ tongwea na donate.dan124.com, nde mongwane̱ ná nik’e we̱le̱ bolane̱. Di masoma bińo̱ jita.